Published:Updated:

மதிப்புக்கூட்டலில் அசத்தும் வேளாண் கூட்டுறவுச் சங்கம்..!

விற்பனைக்குத் தயாராக மஞ்சள்தூள், மிளகாய்த்தூள்
பிரீமியம் ஸ்டோரி
விற்பனைக்குத் தயாராக மஞ்சள்தூள், மிளகாய்த்தூள்

ஆண்டுக்கு 350 டன்... ரூ. 8 கோடி வருமானம்!

மதிப்புக்கூட்டலில் அசத்தும் வேளாண் கூட்டுறவுச் சங்கம்..!

ஆண்டுக்கு 350 டன்... ரூ. 8 கோடி வருமானம்!

Published:Updated:
விற்பனைக்குத் தயாராக மஞ்சள்தூள், மிளகாய்த்தூள்
பிரீமியம் ஸ்டோரி
விற்பனைக்குத் தயாராக மஞ்சள்தூள், மிளகாய்த்தூள்

கூட்டுறவு

‘கூட்டுறவுப் பொருள்கள் இனி ஆன்லைனில்’ என்ற தலைப்பில் கடந்த ஆண்டு ‘ஈரோடு வேளாண்மை உற்பத்தியாளர்கள் கூட்டுறவு விற்பனைச் சங்கம்’ குறித்த கட்டுரை வெளிவந்தது. ஈரோடு- பள்ளிப்பாளையம் சாலையில், கருங்கல்பாளையத்திலிருக்கிறது இந்த விற்பனைச் சங்கம்’. 1960-ம் ஆண்டு 58 உறுப்பினர்களுடன் ஆரம்பிக்கப்பட்ட சங்கத்தில், தற்போது 45,612 உறுப்பினர்கள் இருக்கின்றனர். தமிழ்நாட்டில் மஞ்சள் விவசாயம் செய்யும் பெரும்பாலான விவசாயிகள் இந்தச் சங்கத்தில் உறுப்பினர்களாக இருக்கிறார்கள்.

 மஞ்சள் அரைக்கும் ஆலை
மஞ்சள் அரைக்கும் ஆலை

ஈரோட்டில் சுமார் நான்கு இடங்களில் மஞ்சள் ஏல விற்பனை நடந்தாலும், இந்தச் சங்கத்தில்தான் பெருமளவில் மஞ்சள் வணிகம் நடைபெறுகிறது. ஈரோட்டிலிருந்து வெளியே செல்லும் மஞ்சளில் கிட்டதட்ட 40 சதவிகிதம் இங்கிருந்துதான் செல்கிறது. மாநில அளவில் சிறந்த கூட்டுறவு விற்பனைச் சங்கமாகத் தொடர்ந்து தேர்ந்தெடுக்கப்பட்டுவருகிறது.

ஐம்பது ஆண்டுகளாக வெறும் மஞ்சள் வணிகத்தை மட்டுமே கையாண்டு வந்த இந்தச் சங்கம், 2014-ம் ஆண்டு முதல் ‘மங்களம்’ என்ற பெயரில் மதிப்புக்கூட்டலில் இறங்கி, சந்தையைக் கலக்கிவருகிறது. தற்போது எப்படிச் செயல்பட்டுக்கொண்டிருக்கிறது என்பதை அறிய ஈரோடு மாவட்டக் கூட்டுறவுச் சங்கங்களின் துணைப் பதிவாளரும், ஈரோடு வேளாண்மை உற்பத்தியாளர்கள் கூட்டுறவு விற்பனைச் சங்கத்தின் மேலாண்மை இயக்குநருமான கந்தராஜாவிடம் பேசினோம். ‘‘தேசிய கூட்டுறவு அபிவிருத்திக் கழகம், 1986-ம் ஆண்டு மஞ்சள் அரவை ஆலை அமைக்க ரூ.10 லட்சம் நிதியுதவி வழங்கியது. கேட்பவர்களுக்கு, அரவை ஆலையில் கூலிக்கு மஞ்சள் அரைத்துக் கொடுத்துவந்தோம். 2009-ம் ஆண்டுக்குப் பிறகு இந்த ஆலை செயல்பாட்டில் இல்லாமல் முடங்கிப்போனது. அப்போதுதான் ‘வருடத்துக்கு 12 ஆயிரம் மெட்ரிக் டன் மஞ்சளைக் கையாளும் கூட்டுறவுச் சங்கம், ஏன் அதிலிருந்து மதிப்புக்கூட்டப்பட்ட பொருளை உருவாக்கக் கூடாது’ என நிர்வாகிகள் சிந்தித்தனர்.

ஒட்டுமொத்த விகடனுக்கும் ஒரே ஷார்ட்கட்!

மஞ்சள் அரைக்கும் பணி
மஞ்சள் அரைக்கும் பணி

அந்தச் சிந்தனையில் 2014-ம் ஆண்டு உருவானதுதான் ‘மங்களம்.’ மங்களத்தின் முதல் தயாரிப்பு மஞ்சள்தூள், செயல்படாமலிருந்த மஞ்சள் அரவை இயந்திரத்தைச் சரிசெய்து, சங்க உறுப்பினர்களிடம் மஞ்சளை வாங்கி, அரைத்துச் சலித்தெடுத்து அது பேக் செய்யப்பட்டு விற்பனை செய்யப்பட்டது.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

மங்களத்துக்கான சந்தை

‘தமிழ்நாட்டில் மொத்தம் 36,214 நியாயவிலைக் கடைகள் இருக்கின்றன. இவற்றில் 1.95 கோடி குடும்ப அட்டைகள் இருக்கின்றன. இந்த 1.95 கோடி குடும்ப அட்டைதாரர்களில், 10 சதவிகிதம் பேர் அதாவது 19.5 லட்சம் பேர் நம்மிடம் பொருள்களை வாங்கினால் போதும்.

கந்தராஜா
கந்தராஜா

`ஒரு குடும்பத்துக்கு, ஒரு மாதத்துக்கு குறைந்தது 100 கிராம் மஞ்சள்தூளாவது தேவைப்படும். அப்படிப் பார்த்தால் ஒரு அட்டைக்கு 100 கிராம் வீதம் 195 டன் மஞ்சள்தூள் தேவைப்படும்’ என்ற கணக்கை நம்பி சங்கம் களத்திலிறங்கியது. ஆனால், கள நிலவரமோ கடுமையாக இருந்தது.

ஒரு குடும்பத்துக்கு, ஒரு மாதத்துக்கு குறைந்தது 100 கிராம் மஞ்சள்தூளாவது தேவைப்படும். ஆழ்வார்பேட்டை ஆஞ்சநேயர் கோயிலுக்கு இங்கிருந்துதான் மாதம் 100 கிலோ குங்குமம் செல்கிறது.

முதல் வருடத்தில் வெறும் 27 டன் மஞ்சள்தூளை மட்டுமே விற்பனை செய்ய முடிந்தது. இருந்தாலும், சங்க நிர்வாகிகள் துவண்டு போகவில்லை. `70 ரூபாய்க்கு வாங்கும் மஞ்சளை அரைத்துத் தூளாக்கி, 100 ரூபாய்க்கு விற்பனை செய்தால் செலவுபோக குறைந்தது 10 சதவிகித லாபமாவது கிடைக்கும்’ என்று நினைத்தார்கள்.

அந்த நம்பிக்கை வீண்போகவில்லை. வெறும் 27 டன் மஞ்சள்தூளை விற்பனை செய்த சங்கம், இன்றைக்கு வருடத்துக்கு 350 டன் மஞ்சளை விற்பனைசெய்கிறது’’ என்றவர் மற்ற தயாரிப்புகளைப் பற்றிப் பேசத் தொடங்கினார்.

மங்களம் மசாலாப் பொருள்கள்

“மஞ்சள்தூள், குங்குமத்தைத் தொடர்ந்து, 2016-ம் ஆண்டு முதல் மசாலாப் பொருள்கள் தயாரிப்பில் சங்கம் இறங்கியது. தேவையான மூலப்பொருள்களைப் பிற கூட்டுறவு நிறுவனங்களிலிருந்து கொள்முதல் செய்வோம். மல்லித்தூள், மிளகாய்த்தூள், சாம்பார்தூள், ரசப்பொடி, மட்டன் மசாலா, சிக்கன் மசாலா, ராகி மாவு, பஜ்ஜி மாவு போன்றவற்றை சங்கத்தின் அரவை ஆலை மூலம் சுத்தமாகவும் தரமாகவும் தயார் செய்கிறோம்.

பாக்கெட்டுகளாக்கும் பணி
பாக்கெட்டுகளாக்கும் பணி

20 கிராம் முதல் ஒரு கிலோ வரையிலான பாக்கெட்டுகளைத் தயார் செய்கிறோம். இவற்றைத் தமிழகத்திலுள்ள நுகர்வோர் கூட்டுறவு பண்டகசாலைகள் மற்றும் வேளாண்மை உற்பத்தியாளர்கள் கூட்டுறவு விற்பனைச் சங்கங்களின் நியாயவிலைக் கடைகள் மூலம் விற்பனை செய்கிறோம். அந்தவகையில், 2018-19-ம் ஆண்டில் மட்டும் ரூ.3.16 கோடிக்கு மசாலாப் பொருள்கள் விற்பனை செய்யப்பட்டிருக்கின்றன.

விற்பனைக்குத் தயாராக மஞ்சள்தூள், மிளகாய்த்தூள்
விற்பனைக்குத் தயாராக மஞ்சள்தூள், மிளகாய்த்தூள்

சங்கம் தயார் செய்யும் மதிப்புக்கூட்டப்பட்ட பொருள்களான மங்களம் மஞ்சள்தூள் மற்றும் மசாலா தூள்களுடன், இதர கூட்டுறவு நிறுவனங்கள் உற்பத்தி செய்யும் மதிப்புக்கூட்டப்பட்ட பொருள்களையும் வாங்கி இணையதளம் மூலமாகவும், கைப்பேசி செயலி மூலமாகவும், நுகர்வோர்களின் இல்லங்களுக்கே பொருள்களைக் கொண்டு சேர்க்கிறோம். 30 லட்சம் ரூபாய் முதலீட்டோடு ஆரம்பித்தோம். இன்றைக்கு வருடத்துக்கு 8 கோடி ரூபாய்க்குமேல் வியாபாரம் செய்கிறோம்.

`தரமற்ற பொருள்களும், கலப்படம் செய்யப்பட்டவையும் நடுத்தர மற்றும் ஏழைக் குடும்பங்களுக்குத்தான் செல்கின்றன. கூட்டுறவுத்துறை மூலமாக அவர்களுக்கு ஏன் தரமான பொருள்களை, நியாயமான விலையில் கொடுக்கக் கூடாது?’ என்று நினைத்தோம். `சொசைட்டியில் கொடுக்கப்படும் பொருள்கள் தரம் குறைவானதாகத்தான் இருக்கும்’ என்று மக்கள் மனதில் ஓர் எண்ணம் இருக்கிறது. அதை நிச்சயமாக ‘மங்களம்’ உடைத்தெறியும்’’ என்றவர் நிறைவாக,

விற்பனை நிலையம்
விற்பனை நிலையம்

``விலை குறைவு, தரம் இதைக் காட்டித்தான் எங்கள் பொருள்களைச் சந்தைக்குக் கொண்டு செல்கிறோம். சுவைக்காக நாங்கள் எதையும் சேர்ப்பதில்லை. பாரம்பர்யச் சுவை மற்றும் ஆரோக்கியம் ஆகியவற்றை கவனத்தில் கொண்டு தயாரிக்கிறோம். சிங்கப்பூர், அமெரிக்கா, தென் ஆப்பிரிக்கா, மலேசியா ஆகிய நாடுகளுக்கும் மஞ்சள்தூளை ஏற்றுமதி செய்துவருகிறோம். நியாயவிலைக் கடைகள், சிந்தாமணி போன்ற கூட்டுறவு பண்டக சாலைகள் மற்றும் ஆன்லைன் மூலமாக எங்கள் பொருள்களை விற்பனை செய்கிறோம்.

இப்படி விற்பனை செய்வதன் மூலமாக எங்களுக்குக் கிடைக்கும் லாபம், சங்கத்திலுள்ள விவசாய உறுப்பினர்களுக்குப் பங்கு ஈவுத் தொகையாக வழங்கப்படுகிறது. எனவே, முழுக்க முழுக்க விவசாயிகள் நலனை மையப்படுத்தியே `மங்களம்’ தயாரிப்புகள் இருக்கின்றன. இதற்கு மக்கள் நிச்சயமாக ஆதரவு கொடுப்பார்கள் என்று நம்புகிறேன்” என்றார் நம்பிக்கையுடன்.

தொடர்புக்கு, ஈரோடு வேளாண்மை கூட்டுறவு விற்பனைச் சங்கம், தொலைபேசி: 0424 2211129.

மஞ்சளும் குங்குமமும்!

‘‘மஞ்சளை மூலப்பொருளாக வைத்து 2015-ம் ஆண்டுக் குங்குமம் தயாரிப்பதில் இறங்கினோம். மஞ்சளை வாங்கி, உடைத்து அதை எலுமிச்சைச்சாற்றுடன் சேர்த்து ஏழு நாள்கள் சூரியஒளி படாத இடத்தில் ஊறவைப்போம். பிறகு அதை அரைத்து, நெற்றியில் ஒட்டுவதற்காக நல்லெண்ணெய் சேர்த்தால் குங்குமம் தயார். இப்படிப் பாரம்பர்ய முறைப்படி தயாரிக்கப்படுவதால் இதற்கு மக்களிடையே நல்ல வரவேற்பு இருக்கிறது.

சென்னையின் பிரபல ஆழ்வார்பேட்டை ஆஞ்சநேயர் கோயிலுக்கு இங்கிருந்துதான் மாதம் 100 கிலோ குங்குமம் செல்கிறது. அதுமட்டுமல்லாமல், தமிழக அறநிலையத்துறையின் முக்கியமான கோயில்களான சமயபுரம் மாரியம்மன் கோயில், மதுரை மீனாட்சியம்மன் கோயிலுக்கும் இங்கிருந்துதான் மஞ்சள் மற்றும் குங்குமம் செல்கின்றன. தாழம்பூ, ரோஸ் ஃபிளேவரிலும் குங்குமம் செய்து கொடுக்கிறோம். ஒரு கிலோ குங்குமத்தின் விலை 180 ரூபாய். சராசரியாக மாதம் 500 கிலோ குங்குமம் விற்பனையாகிறது. ஆடி, கார்த்திகை போன்ற விசேஷ காலங்களில் இரண்டு முதல் ஐந்து டன் வரை விற்பனையாகிறது’’ என்கிறார் கந்தராஜா.