Published:Updated:

‘குஜராத் சிக்கல் தமிழகத்துக்கும் வரலாம்!’

விவசாயிகள்
பிரீமியம் ஸ்டோரி
விவசாயிகள்

கார்ப்பரேட்டுகளுக்கு ஆதரவானதா ஒப்பந்த சாகுபடி சட்டம்?

‘குஜராத் சிக்கல் தமிழகத்துக்கும் வரலாம்!’

கார்ப்பரேட்டுகளுக்கு ஆதரவானதா ஒப்பந்த சாகுபடி சட்டம்?

Published:Updated:
விவசாயிகள்
பிரீமியம் ஸ்டோரி
விவசாயிகள்

விவசாயிகளை வாழவைப்பதும் வீழவைப்பதும் விளைபொருள்களுக்கான விலைதான்! கடன் வாங்கி பயிர் செய்த விளைபொருள்கள், பல நேரங்களில் குறைந்த விலைக்கு விற்பனையாகின்றன. இதனால், விவசாயிகள் வேதனையில் சிக்கித்தவிக்கிறார்கள்.

நெல், கரும்பு போன்ற விளைபொருள்களுக்கு, கொள்முதல் விலை நிர்ணயிக்கப்பட்டுள்ளது. மற்ற விளைபொருள்கள், சந்தைவிலைக்கேற்ப விற்பனை செய்யப்படுகின்றன. இந்த நிலையில்தான், ஒப்பந்த சாகுபடிக்கான தனிச்சட்டம் தமிழகத்தில் இயற்றப்பட்டுள்ளது. ‘தமிழ்நாடு வேளாண் விளைபொருள், கால்நடை ஒப்பந்தப் பண்ணையம் மற்றும் சேவைகள் சட்டம் - 2019’ என்ற சட்டத்துக்கு, குடியரசுத் தலைவர் ராம்நாத் கோவிந்த் ஒப்புதல் வழங்கியிருக்கிறார்.

விளைபொருள்களுக்கான ஒப்பந்த சாகுபடி சட்டம், இந்தியாவின் எந்த மாநிலத்திலும் இல்லை. தமிழகம்தான் இந்தச் சட்டத்தை இயற்றும் முதல் மாநிலம். கரும்பு, மூலிகைப் பயிர்கள், விவசாயப் பயிர்கள், இறைச்சிக் கோழி தொடர்பான ஒப்பந்தத்தை, இந்தச் சட்டத்தின்கீழ் செய்துகொள்ளலாம். ‘இந்தச் சட்டப்படி, கொள்முதல் செய்பவர்களும் பண்ணையாளர்களும் சாகுபடிக்கு முன்பே ஒப்பந்தம் செய்துகொள்ளலாம். அறுவடை நேரத்தில் சந்தையில் என்ன விலை இருந்தாலும், ஒப்பந்தத்தில் குறிப்பிட்டுள்ள விலைக்கே விளைபொருள்களை கொள்முதல் நிறுவனம் வாங்கிக்கொள்ள வேண்டும். நிறுவனம், நிர்ணயித்த விலையைக் கொடுக்காமல்போனாலோ கொள்முதல் செய்ய மறுத்தாலோ பண்ணையாளர்களுக்கு ஆதரவாக இந்தச் சட்டம் செயல்படும். இதன்மூலம் விவசாயிகளின் வருமானம் அதிகரிப்பதுடன், பாதுகாப்பும் உறுதிசெய்யப்படும்’ என்கிறது அரசின் அறிவிப்பு.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

‘‘இந்தச் சட்டம் முழுமையாகச் செயல்பட்டால் பண்ணையாளர்களுக்குப் பயனுள்ளதாக இருக்கும். ஆனால், செயல்பாட்டுக்கு முழுமையாக வருமா என்பதில் சந்தேகம் உள்ளது. இந்தியாவில் குஜராத் உள்ளிட்ட சில மாநிலங்களில் சோதனை அடிப்படையில் ஒப்பந்த சாகுபடி சட்டம் செயல்படுத்தப் பட்டு, தோல்வியில் முடிந்திருக்கிறது’’ என்று சட்டத்துக்கு எதிர்ப்பு தெரிவிக்கின்றனர் தமிழக விவசாயச் சங்கத்தினர்.

‘குஜராத் சிக்கல் தமிழகத்துக்கும் வரலாம்!’

தமிழக அனைத்து விவசாயச் சங்கங்களின் ஒருங்கிணைப்புக் குழுத் தலைவர் பி.ஆர்.பாண்டியன், ‘‘இந்தச் சட்டம்குறித்து, சட்டமன்றத்தில் வெளிப்படையாக விவாதிக்கவில்லை; விவசாயிகளிடமும் கருத்து கேட்கவில்லை. இந்த நிலையில் ஒப்பந்த சாகுபடி சட்டம் நிறைவேற்றப்படுவது, கார்ப்பரேட் கம்பெனிகளுக்குத்தான் சாதகமாக இருக்கும். ஏற்கெனவே பெப்சி உள்ளிட்ட சில நிறுவனங்கள் வடமாநிலங்களில் உருளைக்கிழங்கை ஒப்பந்த முறையில் சாகுபடி செய்கின்றன. குஜராத்தில் பெப்சி நிறுவனத்தின் உருளைக்கிழங்கை சில விவசாயிகள் பயிரிட்டனர். ‘ஒப்பந்தப் பண்ணை ஒன்றின் அருகில் இருந்த, ஒப்பந்தம் செய்யாத விவசாயி ஒருவரின் வயலில் இருந்தது எங்கள் ரக உருளைக்கிழங்கு’ என்று பெப்சி நிறுவனம் வழக்கு தொடர்ந்தது. அதற்கு நஷ்டஈடாக 1.05 கோடி ரூபாய் கேட்டது. பெரும்போராட்டத்துக்குப் பிறகே அந்த வழக்கைத் தள்ளுபடி செய்ய முடிந்தது. ஒப்பந்தப் பண்ணையம் சட்டம் நடைமுறைக்கு வந்தால், அதே நிலை தமிழகத்திலும் ஏற்படலாம்.

தமிழகத்தில் இயற்கை விவசாயம் செய்யும் விவசாயிகள் தற்போது அதிகரித்துவருகிறார்கள். இதனால், பாரம்பர்ய விதைகள் மீண்டும் பயன்பாட்டுக்கு வந்துகொண்டிருக் கின்றன. இயற்கைவழி வேளாண்மை காரணமாக ரசாயன உரம், பூச்சிக்கொல்லி விற்பனை வெகுவாகக் குறைந்திருக்கிறது. இந்த நிலையில் ஒப்பந்த சாகுபடி சட்டம் நடைமுறைக்கு வந்தால், மீண்டும் ரசாயனப் பயன்பாடு அதிகரிக்கும். காரணம், ஒப்பந்த நிறுவனம் விதை முதல் உரம், பூச்சிக்கொல்லி வரை அனைத்தையும் கொடுத்துவிடும். ‘வீரிய ரக விதைகள் மூலம் அதிக மகசூல் கிடைப்பதால், வருமானம் அதிகமாகும்’ என விவசாயிகளுக்கு ஆசை காட்டப்படும். இவற்றால் மண் மலடாகும் என்ற உண்மையை மறைத்துவிடுவார்கள்.

இதனால், பெரும்பாலான விவசாயிகள் கார்ப்பரேட் கம்பெனிகள் சொல்லும் பயிரையே சாகுபடி செய்வார்கள். இதைப் பயன்படுத்திக்கொண்டு கார்ப்பரேட் நிறுவனங்களும் தங்கள் இடுபொருள்களை விவசாயிகளிடம் விற்றுவிடுவார்கள். அதோடு, குஜராத்தில் உருளைக்கிழங்கு காப்புரிமைப் பிரச்னை ஏற்பட்டதுபோல், இங்கும் நடக்க வாய்ப்பிருக்கிறது.

‘குஜராத் சிக்கல் தமிழகத்துக்கும் வரலாம்!’

விவசாயம் மட்டுமல்லாமல், கால்நடை வளர்ப்பிலும் ஒப்பந்த சாகுபடி சட்டம் செல்லுபடியாகும் என்கிறார்கள். இதன்மூலம் பிராய்லர் கோழிப்பண்ணைகள் அதிகரிக்கும். தற்போது நாட்டுக்கோழி வளர்ப்பு அதிகரித்துவருகிறது. நுகர்வோரும் பிராய்லரைவிட நாட்டுக்கோழிகளையே விரும்பி வாங்குகிறார்கள். இந்தச் சட்டம் அதிலும் சிக்கல் ஏற்படுத்த வாய்ப்பிருக்கிறது. மீண்டும் நாட்டுக்கோழி வளர்ப்பு பின்னோக்கிப் போகலாம்.

இப்படி பல வகைகளிலும், ஒப்பந்த சாகுபடி சட்டம் பண்ணையாளர்களுக்கு பாதகமாக இருக்கவே அதிக வாய்ப்பிருக்கிறது. இந்தச் சட்டத்தை இயற்றுவதற்குப் பதிலாக, விளைபொருள்களுக்கு அரசே விலையை நிர்ணயம் செய்யலாம். அதுதான் விவசாயிகளுக்குப் பயனுள்ள தாக இருக்கும். இந்தச் சட்டம் செயல்பாட்டுக்கு வந்தால், ஒரு கட்டத்தில் விளைநிலங்கள் கார்ப்பரேட் நிறுவனங்களின் கையில் போக வாய்ப்பிருக்கிறது’’ என்றார்.

தமிழ்நாடு இயற்கை விவசாயிகள் கூட்டமைப்பின் தலைவர் அறச்சலூர் செல்வம், ‘‘இந்தச் சட்டம் தமிழக அரசு உருவாக்கிய சட்டமல்ல. மாதிரி சட்டத்தை மத்திய அரசு அனுப் பியது. அதைத்தான் இவர்கள் சட்டமாக்கியிருக்கிறார்கள். விவசாயத்தை, அரசாங்கக் கட்டுப்பாட்டிலிருந்து வெளியேற்ற வேண்டும்; தனியார் மயமாக்க வேண்டும் என நினைக்கிறார்கள். ஏற்கெனவே கால்நடைச் சட்டம் கொண்டுவந்து, கால்நடைத் துறையில் தனியாருக்கு வாய்ப்புகளை உருவாக்கியது போல்தான் இந்தச் சட்டமும் இருக்கப்போகிறது. ஒப்பந்த சாகுபடி சட்டம் நடைமுறைக்கு வந்தால், எதிர்காலத்தில் ஒழுங்குமுறை விற்பனைக்கூடம் இல்லாமல்போய்விடும். அரசாங்கம் நெல்லை வாங்காமல்போகும் நிலை உருவாகும். இனி வேளாண் விற்பனைக் குழு, கண்காணிப்புப் பணியை மட்டுமே பார்க்கும். கரும்பு ஏற்கெனவே ஒப்பந்த சாகுபடியில்தான் இருக்கிறது. ஆனால், கரும்பை வாங்கும் தனியார் ஆலைகள் பணத்தைத் தர இழுத்தடிகின்றன. அங்கு விதிமுறைகள் பயனளிக்கவில்லையே! அத்தியாவசிய பொருள்கள்மீதான அரசாங்கத்தின் கட்டுப்பாடு போய், அது தனியார் கைகளுக்கு வந்துவிடும். இது மிகப்பெரிய ஆபத்தை உருவாக்கும்’’ என்றார்.

பி.ஆர்.பாண்டியன், அறச்சலூர் செல்வம்
பி.ஆர்.பாண்டியன், அறச்சலூர் செல்வம்

விவசாயச் சங்கத்தினரின் சந்தேகங்களுக் கெல்லாம் விளக்கம் கேட்க, தமிழக வேளாண் செயலாளர் ககன்தீப்சிங் பேடி மற்றும் வேளாண் இயக்குநர் தட்சிணாமூர்த்தி ஆகியோரை பலமுறை தொடர்புகொண்டும் அவர்கள் பதிலளிக்கவில்லை.

‘‘பண்ணையாளர்களுக்கு ஆதரவாகவே இந்தச் சட்டம் செயல்படும். `விவசாயிகளின் வருமானம் அதிகரிப்பதுடன் பாதுகாப்பும் உறுதிசெய்யப்படும்’ என்று இந்தச் சட்டம் குறித்த அறிக்கையிலேயே தெளிவாகக் குறிப்பிட்டுவிட்டோமே’’ என்பதே கீழ்மட்ட அதிகாரிகளின் பதிலாக இருக்கிறது.

ஒப்பந்த சாகுபடி சட்டத்தை நடைமுறைக்குக் கொண்டுவருவதற்கான பணிகள் விரைவாக நடந்துவருகின்றன. செயல்பாட்டுக்கு வந்த பிறகுதான் முழுமையான சாதக பாதகங்கள் தெரியவரும்.