Published:Updated:

சிறு தானியங்கள் பெரிய ஆய்வுகள்! : வறட்சி, பருவநிலை மாற்றத்துக்கு ஏற்ற சிறு தானியங்கள்!

சிறுதானியம்
பிரீமியம் ஸ்டோரி
News
சிறுதானியம்

சிறுதானியம்

ஹைதராபாத்திலுள்ள இந்தியச் சிறுதானிய ஆராய்ச்சிக் கழகத்தில் சிறுதானியங்கள் சம்பந்தமாக மேற்கொள்ளப்படும் ஆராய்ச்சிகள், பணிகள் குறித்து இந்தப் பகுதியில் பார்த்து வருகிறோம். இந்த இதழில் கேழ்வரகு, சாமை, தினை உள்ளிட்ட தானியங்கள் குறித்துப் பார்ப்போம்.

சிறுதானியங்கள் குறித்துப் பேசிய இந்தியச் சிறுதானிய ஆராய்ச்சிக் கழகத்தின் இயக்குநர் விலாஸ் ஏ தொனபி, “சிறுதானியங்கள் சுமார் 3,000-லிருந்து 5,000 ஆண்டுகள் வரை பழைமை வாய்ந்தவை. குதிரைவாலி, வரகு மற்றும் சாமை ஆகிய சிறுதானியங்கள் இந்தியாவைப் பூர்வீகமாகக் கொண்டவை.

சிறுதானியம்
சிறுதானியம்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உலகெங்கும் நதிக்கரை நாகரிகம் உருவாகிக்கொண்டிருந்த சமயத்தில், வறண்ட பகுதிகளிலும் மக்களை வாழவைத்து ஒரு நாகரிகத்தை உருவாக்கிய சிறப்புக்குரியவை சிறுதானியங்கள். சிறுதானியங்களில் அதிக ஆராய்ச்சிகள் மேற்கொள்ளப்படுவது இந்தியாவில்தான். இந்தியாவில் 60 சதவிகித விவசாயம் பருவமழையை எதிர்பார்த்து நடக்கிறது. மழையை எதிர்பார்த்து விதைப்பதற்கு, சிறுதானியங்களே முதன்மைத் தேர்வாக இருக்கின்றன. `பருவநிலை மாற்றத்தால் 2050-ம் ஆண்டுக்குள் இரண்டிலிருந்து மூன்று டிகிரி வெப்பநிலை உயரும்’ என்கிறார்கள். வெப்பநிலை உயரும்போது சிறுதானியச் சாகுபடி முக்கிய இடத்தை வகிக்கும். ஒரு கிலோ அரிசி உற்பத்தி செய்ய 5,000 லிட்டர் தண்ணீர் தேவைப்படும்.

சிறுதானியம்
சிறுதானியம்

ஆனால், ஒரு கிலோ சிறுதானியத்தை விளைவிக்க 300 லிட்டர் தண்ணீரே போதுமானது. குறைந்த அளவு வேலை, பராமரிப்பு, சூழலுக்கு உகந்தது என்று பல சாதகமான அம்சங்கள் இதற்கு உண்டு.

உலகிலேயே சிறுதானியத்தை அதிகம் உண்ணும் மக்கள் இந்தியாவிலும் ஆப்பிரிக்காவிலும் மட்டும்தான் இருக்கிறார்கள்.

இன்றைய வாழ்க்கை முறையில் மருத்துவத்துக்கு நாம் செலவிடும் தொகை அதிகம். அதைப் பெருமளவில் குறைக்கும் திறன் சிறுதானியங்களுக்கு மட்டுமே உண்டு” என்றவர் சிறுதானியங்கள் குறித்துப் பேச விஞ்ஞானிகளை அறிமுகப்படுத்தினார்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
கேழ்வரகு
(Finger Millet)

கேழ்வரகு குறித்துப் பேசிய விஞ்ஞானி கே.என்.கணபதி, “4-5 விரல்கள், 6-8 விரல்கள் எனக் கேழ்வரகில் ரகங்களைப் பொறுத்து கதிர்களின் விரல்கள் இருக்கும். இந்தியாவில் ஒன்றரை மில்லியன் ஹெக்டேரில் கேழ்வரகுச் சாகுபடி நடைபெறுகிறது. மொத்த கேழ்வரகு உற்பத்தியில், கர்நாடகாவில் 60 சதவிகிதம் பயிரிடப்படுகிறது. எல்லாவிதமான பருவநிலைகளிலும் இதைச் சாகுபடி செய்யலாம். 32-35 டிகிரி வெப்பநிலையிலும், அனைத்து மண் வகைகளிலும் வளரக்கூடியது. ஜி.பி.யு-28, கோ-13, டி.என்.ஏ.யு-946, கோ-9, கோ-12, கோ-15 போன்ற ரகங்கள் நல்ல மகசூல் கொடுக்கக்கூடியவை. பறவைகளால் எளிதில் பாதிப்படையாதவை. நெல்லுக்கு மட்டுமே இருக்கும் நாற்று நடவு முறை கேழ்வரகுக்கும் பின்பற்றப்படுகிறது. கேழ்வரகு விதையை 50 ஆண்டுகள் வரை சேமித்துவைத்து, பயன்படுத்த முடியும். நேரடி விதைப்பு முறையில் விதைக்க ஏக்கருக்கு நான்கு கிலோவும், நாற்று நடவு முறையில் இரண்டு கிலோ விதையும் தேவைப்படும். நேரடி விதைப்பு முறையில் ஏக்கருக்கு 800 கிலோவும், நடவு முறையில் 1,800 கிலோவும் மகசூல் கிடைக்கும்.

சிறுதானியம்
சிறுதானியம்
சாமை
(Little Millet)

இந்தியாவின் மிகவும் பழைமையான சிறுதானியம் சாமை. இந்தியாவில் மூன்று லட்சம் ஹெக்டேரில் சாகுபடி செய்யப்படுகிறது. இரும்பு, ஜிங்க் சத்து உள்ளிட்ட அதிக நுண்ணூட்டச் சத்துகள் கொண்ட சிறுதானியம் இது. ஹெக்டேருக்கு 2-2.5 டன் வரை விளைச்சல் கிடைக்கும். டி.ஹெச்.எல்.எம் 36-3, அதிக மகசூல் கிடைக்கூடிய ரகம். இதோடு பையூர்-2, டி.என்.ஏ.யு-63, கோ-1, 3, 4, 6 ரகங்களும் நல்ல மகசூல் கொடுக்கக்கூடியவை. நேரடி விதைப்பு முறையில் அதிகம் சாகுபடி செய்யப்படுகிறது. இதற்கு ஐந்து கிலோ விதை தேவைப்படும். நெல் அறுவடை இயந்திரங்களைக்கொண்டே அறுவடை செய்யலாம். கரீப் பருவத்தில் அதிகம் சாகுபடி செய்யப்படுகிறது. 70-80 நாள்களில் அறுவடை. ஏக்கருக்கு 700 கிலோ மகசூல் கிடைக்கும்” என்றார்.

விலாஸ் ஏ தொனபி
விலாஸ் ஏ தொனபி
கம்பு
(Pearl Millet)

கம்புச் சாகுபடி குறித்துப் பேசிய விஞ்ஞானி மி.சஞ்சனா ரெட்டி, “கம்பு வெப்பமண்டலப் பகுதிக்கு ஏற்ற பயிர். 400 மில்லிமீட்டர் மழை கிடைத்தாலே விளைந்துவிடும். ஜூன், ஜூலை மற்றும் கோடைக்காலத்திலும் சாகுபடி செய்ய ஏற்ற பயிர். குறைந்த அளவு இடுபொருள்களே போதுமானவை. நந்தி-70, 72, கோ-9, காவிரி ஆகிய ரகங்கள் ஏற்றவை. 45 சென்டிமீட்டர் வரிசை இடைவெளியில் சாகுபடி செய்யலாம்.

கே.என்.கணபதி
கே.என்.கணபதி

70 நாள்களில் விளைந்துவிடும். மூன்று முறை பாசனம் செய்தாலே நல்ல மகசூல் எடுத்துவிட முடியும். அதிக தீவனத்தையும் தருகிறது. கால்நடைகளுக்குப் பயன்படுத்தலாம். ஹெக்டேருக்கு 2.9 டன் தானியம் மகசூலாகக் கிடைக்கும்” என்றார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

தினை
(Foxtail Millet)

தினை குறித்துப் பேசிய விஞ்ஞானி கே.ஹரிபிரசன்னா, “கரீப், ரபி இரண்டு பருவங்களிலும் இதைச் சாகுபடி செய்யலாம். கோயம்புத்தூரிலுள்ள தமிழ்நாடு வேளாண் பல்கலைக்கழகம் வெளியிட்ட கோ.7 தினை ரகம் நல்ல மகசூல் கொடுக்கக்கூடியது. டி.என்.ஏ.யு-43, 186, கோ-1, 2, 4, 5, பி.எஸ்-4 போன்ற ரகங்களும் அதிக அளவில் சாகுபடி செய்யப்படுகின்றன. 400-700 மில்லிமீட்டர் மழையளவு போதுமானது. 70-85 நாள்களில் விளைந்துவிடும். ஹெக்டேருக்கு 35-40 குவிண்டால் வைக்கோல் கிடைக்கும். ஹெக்டேருக்கு 8-12 குவிண்டால் தானிய விளைச்சல் கிடைக்கும். அதிக மகசூல் கொடுக்கும் ரகங்களைத் தேர்ந்தெடுத்து நடவு செய்ய வேண்டும். நேரடி விதைப்பு முறையில் வரிசை நடவு மிகவும் முக்கியமானது. ஏக்கருக்கு மூன்று கிலோ விதை போதுமானது. முதல் 30 நாள்களுக்கு களைகள் இல்லாமல் பார்த்துக்கொண்டால் மகசூல் கூடும். ஊடுபயிராகப் பயறு வகைகளையும் சாகுபடி செய்யலாம். பறவைகளுக்கு மிகவும் பிடித்த உணவு. கால்நடைத் தீவனம், பறவை வளர்ப்புக்கு அதிகம் பயன்படுத்தலாம்” என்றார்.

மி.சஞ்சனா ரெட்டி
மி.சஞ்சனா ரெட்டி
வரகு
(Kodo Millet)

சிறுதானியங்களிலேயே வளர்வதற்கு அதிக நாள்கள் எடுத்துக் கொள்ளும் தானியம் வரகு. 140 நாள்கள் எடுத்துக்கொள்ளும். கல், மண் நிறைந்த மிகவும் மோசமான மண் வகைகளில்கூட வளரக்கூடியது. வறட்சியான பகுதிகளுக்கு ஏற்ற பயிர். ஜூன்-ஜூலை, செப்டம்பர்-அக்டோபர் மாதங்களில் விதைக்கலாம். ஏக்கருக்கு ஆறு கிலோ விதை தேவைப்படும். 25-30 நாள்களில் ஒரு பாசனமும், 40-45 நாள்களில் ஒரு பாசனமும் தேவைப்படும். தமிழ்நாட்டில் கோ-3, டி.என்.ஏ.யு-86, ஜே.கே-13, கே.எம்.வி-20 (பம்பன்) போன்ற ஆராய்ச்சி ரகங்கள் சாகுபடி செய்ய ஏற்றவை.

சிறுதானியம்
சிறுதானியம்
பனிவரகு
(Proso Millet)

பனிவரகு குறித்துப் பேசிய விஞ்ஞானி அவினாஷ் சிங்கோடே, “இரும்புச்சத்து, ஜிங்க் அதிகம்கொண்ட தானியங்களில் பனிவரகும் ஒன்று. மகசூல் அளவு அதிகமாகக் கிடைக்கும். மிகவும் குறைந்த நாள்களில் (60-80) விளைந்து வந்துவிடும். இதற்கு மூன்று முறை பாசனம் அல்லது மூன்று மழை இருந்தாலே போதுமானது.

கே.ஹரிபிரசன்னா
கே.ஹரிபிரசன்னா

கோ-5, கோ-4, 3, 2, டி.என்.ஏ.யு-145, 151, 164, 202, ஜி.பி.யு.பி-21 போன்றவை சிறந்த ரகங்கள். அனைத்து வகையான மண்ணிலும் வளரும். இதன் தோலை நீக்கி அரிசியாக்கிச் சாப்பிடலாம். இந்த தானியத்தில் 80 சதவிகிதம் அரிசி கிடைத்துவிடும். பண்ணைக் கழிவுகளை நிலத்துக்குக் கொடுத்து, மண்ணில் கார்பன் சத்தை அதிகரித்து விதைத்தால் சிறப்பான மகசூல் கிடைக்கும். நேரடி விதைப்பு முறையில் ஏக்கருக்கு 600 கிலோவும் நடவு முறையில் 1,000 கிலோவும் கிடைக்கும். தொழுவுரம் மிகவும் ஏற்றது” என்றார்.

அவினாஷ் சிங்கோடே
அவினாஷ் சிங்கோடே

சிறுதானிய மதிப்புக்கூட்டல் குறித்து அடுத்த இதழில்...

தொடர்புக்கு,

Indian Institute of Millets Research,

Rajendranagar, Hyderabad-500030

Telangana.

Phone: 040 24599300, 2459 9301

பருவம் தவறாமல் விதைக்க வேண்டும்!

சிறுதானியங்களில் பூச்சிக் கட்டுப்பாடு குறித்துத் தமிழில் பேசிய விஞ்ஞானி கலைசேகர், “சிறுதானியங்களைத் தாக்கும் பூச்சிகள் பார்ப்பதற்கு ஒரே மாதிரி இருக்கும். ஒவ்வொரு பூச்சிக்கும் ஒவ்வொரு கட்டுப்படுத்தும் முறை இருக்கிறது.

குருத்து ஈ: இது பெரும்பாலும் விதைத்த 30 நாள்களுக்குள் வரும். சில தானியங்களில் அதற்கும் மேற்பட்ட நாள்களில் வரும். தாய் ஈ முட்டையிட்டுச் சென்றுவிடும். அதன் பிறகு முட்டைகள் வளர்ந்து குருத்தைச் சாப்பிட்டுவிடும்.

விஞ்ஞானி கலைசேகர்
விஞ்ஞானி கலைசேகர்

தண்டு துளைப்பான்: பயிர்களில் 30 நாள்களுக்கு மேல் தாக்கும். இதைத் தவிர்க்க ஜூன் மாதத்திலேயே விதைத்துவிட வேண்டும். ஜூலை மாதத்தில் விதைத்தால் அதிகம் தாக்கும். பயிரின் தாள், தண்டு ஆகியவற்றைச் சாப்பிட்டுவிடும். இதன் தாக்குதல் தண்டுகளுக்குள் நிகழ்வதால் பெரும்பாலும் தெரியாது. அதனால் மகசூல் இழப்பு அதிகமாக இருக்கும். குறிப்பாகச் சோளப் பயிர்களில் இதன் தாக்கம் அதிகமாக இருக்கும்.

இலைப்பேன்: மழைக்காலங்களுக்குப் பிறகு விதைக்கப்படும் சிறுதானியங்களில் அசுவினி தாக்குதல் இருக்கும். இதன் தாக்குதலைத் தவிர்க்க விதைக்கும் விதைகளின் அளவை அதிகரிக்க வேண்டும். பருவம் தவறாமல் விதைத்துவிட வேண்டும்.

இந்த மூன்று வகையான பூச்சிகள்தான் பிரதானம். இவற்றைத் தவிர்க்க ஒட்டுண்ணி பூச்சிகளை வயலில் விட வேண்டும். அது இவற்றின் முட்டைகளைச் சாப்பிட்டுவிடும். வேப்ப இலைக் கரைசல், வேப்பங்கொட்டைக் கரைசல், வேப்ப எண்ணெய் இவற்றில் ஏதாவதொன்றை ஒரு லிட்டர் தண்ணீருக்கு 50 மி.லி என்ற கணக்கில் தெளித்துக் கட்டுப்படுத்தலாம்” என்றார்.

தொடர்புக்கு, கலைசேகர், செல்போன் 97044 65354