Published:Updated:

ஈரமான தீவனங்களைக் கொடுக்கக் கூடாது... மழைக்கால கால்நடைப் பராமரிப்பு முறைகள்!

கால்நடைப் பராமரிப்பு
பிரீமியம் ஸ்டோரி
கால்நடைப் பராமரிப்பு

பராமரிப்பு

ஈரமான தீவனங்களைக் கொடுக்கக் கூடாது... மழைக்கால கால்நடைப் பராமரிப்பு முறைகள்!

பராமரிப்பு

Published:Updated:
கால்நடைப் பராமரிப்பு
பிரீமியம் ஸ்டோரி
கால்நடைப் பராமரிப்பு

ழைக்காலத்தில் கால்நடைகளை எவ்வாறு பராமரிக்க வேண்டும், இந்தக் காலத்தில் கால்நடைகளைத் தாக்கும் நோய்கள் மற்றும் அதற்கான தீர்வுகள் குறித்துக் காஞ்சி புரம் மாவட்டம், காட்டுப்பாக்கம், வேளாண்மை அறிவியல் நிலைய உதவிப் பேராசிரியர் முனைவர் தேவகியிடம் பேசினோம்.

தேவகி
தேவகி

சுத்தமான குடிநீர் அவசியம்

‘‘மழைக்காலத்தில் தண்ணீர் மூலம் பரவும் நோய்க்கிருமிகளால் ஈகோலை அதிகமாக இருக்க வாய்ப்புள்ளது. எனவே, கால்நடைகளுக்குக் காய்ச்சி ஆறவைத்த தண்ணீரையே கொடுக்க வேண்டும். குளம், குட்டைகளில் தேங்கிய மழைநீரில் நுண்கிருமிகளும் புழுக்களும் அதிகம் காணப்படும். அவற்றைக் கால்நடைகள் பருகும்போது நோய்த்தாக்கம் ஏற்பட வாய்ப்புள்ளது. குடிநீர் மற்றும் தீவனத் தொட்டிகளைத் தினமும் சுத்தம் செய்ய வேண்டும்.

ஒட்டுமொத்த விகடனுக்கும் ஒரே ஷார்ட்கட்!

கால்நடைப் பராமரிப்பு
கால்நடைப் பராமரிப்பு

மேலும், வாரம் ஒருமுறை சுண்ணாம்புப் பொடி பூசிக் காயவிட்டுப் பிறகு பயன்படுத்த வேண்டும். இந்தக்காலங்களில் கோழிகள் குறைவாகவே தண்ணீர் குடிக்கும். தண்ணீர் குளிர்ச்சியாக இருந்தால் அந்த அளவும் குறைந்துவிடும். எனவே, கோழிகளுக்குச் சூடாக இல்லாமல், வெதுவெதுப்பான தண்ணீரை வைக்கலாம். கால்நடை மருந்துகளைத் தண்ணீரில் கலந்து கொடுக்கும்போது, தண்ணீர் சூடான நிலையிலிருந்தால் மருந்து அதன் தன்மையை இழந்துவிடும். இதனால் மருந்து கொடுப்பதால் பலன் இல்லாமல் போய்விடும்.

கொட்டகைப் பாதுகாப்பு அவசியம்

கொட்டகையை மழைக்கு முன்பே பரிசோதித்து, மழைநீர் உள்ளே ஒழுகாதபடி மேற்கூரையில் ஓட்டைகள் இருந்தால் அடைக்க வேண்டும். மழைநீர் ஒரே இடத்தில் தேங்கக் கூடாது. முறையான வடிகால் அமைத்து வெளியேற்ற வேண்டும்.

மழைநீர் தேங்கினால் ஈக்கள் மற்றும் கொசுக்கள் உருவாகி, கால்நடைகளுக்கு நோய்த் தொற்றினை ஏற்படுத்திவிடும். கொட்டகையில் சாணம் மற்றும் மாட்டுச் சிறுநீருடன் மழைநீரும் சேர்ந்து அமோனியா வாயுவை உற்பத்தி செய்து கால்நடைகளுக்குக் காய்ச்சல், சளி மற்றும் நிமோனியா கழிச்சல் வரையிலான பாதிப்புகளை ஏற்படுத்தும். எனவே, சாணம் மற்றும் சிறுநீரை அவ்வப்போது கொட்டகையிலிருந்து சுத்தம் செய்து, கொட்டகையின் தரை வெதுவெதுப்பாக இருக்கும்படி பார்த்துக்கொள்ள வேண்டும். நன்கு உலர்ந்த வைக்கோல் அல்லது கோணிச் சாக்குகளைக் கொட்டகையின் தரையில் பரப்பி வெப்பத்தன்மையை உருவாக்கலாம். கறவை மாடுகள் இருக்கும் கொட்டகையின் தரை சுத்தமாகவும், ஈரம் இல்லாமலும் இருக்க வேண்டும். அப்போதுதான் சாணம், மற்றும் சிறுநீரால் உருவாகும் கிருமிகள் மூலமாக தோன்றும் மடிவீக்க நோயைத் தடுக்க முடியும்.

இளம் கன்றுக்குட்டிகள், ஆட்டுக்குட்டிகள், கோழிக்குஞ்சுகள் ஆகியவற்றைக் குளிர்ந்த காற்று தாக்காதவாறு கொட்டகையின் பக்கவாட்டில் ஓலைத்தடுப்பு, சாக்குப்பை, தார்பாலின், திரைச்சீலை ஆகியவற்றைக் கட்டி மறைக்கலாம். இதனை மாலை நேரத்தில் தொங்கவிட்டுக் காலையில் சுருட்டி வைக்கும்படி செய்யலாம். மாலை, இரவு நேரத்தில்தான் குளிர்ந்த காற்றின் தாக்கம் அதிகமாக இருக்கும். 24 மணி நேரமும் தொங்க விட்டால் அசுத்தமான காற்று கொட்டகை யினுள் சுற்றி நின்று, கால்நடைகளுக்கு நோய்ப்பாதிப்பை ஏற்படுத்தலாம்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

தீவனம்

கால்நடைக்கான தீவனத்தைச் சேமித்து வைக்காமல் உடனுக்குடன் உபயோகப் படுத்திவிட வேண்டும். மழைக்காலத்தில் தரையில் அதிக ஈரப்பதம் இருக்கும். எனவே தரையில் மரக்கட்டைகள் வைத்து அதன்மேல் தீவன மூட்டைகளை அடுக்கி வைக்க வேண்டும். பூஞ்சை தாக்கி, தீவனம் கட்டிகளாக இருந்தால் அதைப் பயன்படுத்தக் கூடாது. அதைத் தீவனமாகக் கொடுத்தால் கால்நடைகளின் கல்லீரல் மற்றும் சிறுநீரகம் பாதிப்பதோடு, நோய் எதிர்ப்புத்திறன் குறைந்து கழிச்சல் ஏற்படும். சில நேரங்களில் உயிரிழப்பைக்கூட ஏற்படுத்திவிடும்.

கால்நடைப் பராமரிப்பு
கால்நடைப் பராமரிப்பு

கறவை மாடுகளுக்குத் தினமும் 5 முதல் 7 கிலோ அளவு காய்ந்த உலர் தீவனமான வைக்கோல், சோளத்தட்டை அல்லது நிலக்கடலைக்கொடி இவற்றைக் கொடுப்பதால் பாலில் கொழுப்புச்சத்தின் விகிதம் கூடும்.

நீரில் நனைக்கப்பட்ட உலர் தீவனத்தைக் கால்நடைகளுக்குக் கொடுப்பதைத் தவிர்க்க வேண்டும். கோழிகளுக்கு அதிக வெப்பம் தேவைப்படுவதால், தீவனத்துடன் எரிசக்தி மிகுந்த உணவுப்பொருளை அதிகமாகச் சேர்த்து அரைத்துக் கொடுக்கலாம். கோழி களுக்குத் தீவனத்தைத் தண்ணீரில் பிசைந்து கொடுப்பதை மழைக்காலத்தில் தவிர்க்க வேண்டும். உலர் தீவனத்தை மட்டுமே கொடுக்க வேண்டும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

மேய்ச்சல் முறைகள்

இந்தக் காலங்களில் சூரிய ஒளி நன்றாக வந்த பிறகே கால்நடைகளை மேய்ச்சலுக்கு அனுப்ப வேண்டும். மழைக்காலத்தில் புற்களில் முளைக்கும் புதிய தளிர்களை உண்பதால் துள்ளுமாரி நோய் உண்டாகும். எனவே மேய்ச்சலைக் குறைப்பது நல்லது. கால்நடை களைச் சுழற்சி முறையில் மேய்ச்சலுக்கு அனுப்ப வேண்டும். இதனால் கால்நடைகளில் குளிர்காலங்களில் நோய்த்தொற்று ஏற்படாதபடி பாதுகாக்கலாம்.

தொற்றுநோய்கள்

மழைக்காலம் தொடங்குவதற்கு முன்பே, கால்நடைகளுக்குத் தடுப்பூசி போடுவதன் மூலம் தொற்று நோய்கள் தாக்காமல் பாதுகாக்கலாம். கறவை மாடுகளில் அடைப்பான், தொண்டை அடைப்பான், சப்பை நோய் மற்றும் கோமாரி நோய்க்கான தடுப்பூசிகளையும், வெள்ளாடுகளில் கொல்லை நோய், செம்மறியாடுகளில் நீலநாக்கு நோய் போன்ற நோய்களுக்கான தடுப்பூசிகளையும், கோழிகளில் வெள்ளைக் கழிச்சல், இரத்தக் கழிச்சல் போன்ற நோய்க்கான தடுப்பூசிகளையும் கால்நடை மருத்துவரின் பரிந்துரைப்படி போடுவது அவசியம்.

ஒட்டுண்ணிகள்

மழை மற்றும் குளிர்காலத்திற்கு முன்பே கால்நடைகளுக்குக் குடற்புழு நீக்கம் செய்ய வேண்டும். மேய்ச்சலுக்குச் செல்லும் கால்நடைகளுக்கு உருண்டை, தட்டை, நாடாப்புழுக்களின் தாக்கம் அதிகம். எனவே, 2 முதல் 3 மாதங்களுக்கு ஒருமுறை தகுந்த பூச்சி மருந்து அளிக்க வேண்டும். புற ஒட்டுண்ணிகளின் தாக்கத்தைக் கட்டுப்படுத்திட மை பதத்தில் அரைத்த வசம்பைத் தண்ணீரில் கரைத்து கன்றுகளின் தோலின்மேல் தடவலாம்” என்றவர் நிறைவாக,

“கொசுக்களின் இனப்பெருக்கத்தைக் கட்டுப்படுத்த கொட்டகையின் அருகில் தேங்கியிருக்கும் தண்ணீரை அகற்ற வேண்டும்.

கொசுக்கள் கால்நடைகளைக் கடிப்பதைத் தவிர்க்க, அதிகாலை மற்றும் இரவு வேளைகளில் வேப்பிலை அல்லது நொச்சி இலையில் புகைமூட்டம் போடலாம். ரத்த ஒட்டுண்ணி நோய்களான பெபிசியோசிஸ், தைலீரியோசிஸ் போன்ற நோய்கள் தாக்கினால் உடனே கால்நடை மருத்துவரை அணுகி உரிய சிகிச்சை அளிக்க வேண்டும்’’ என்றார்.

தொடர்புக்கு, தேவகி, செல்போன்: 94452 58978

கால்நடைப் பராமரிப்பு
கால்நடைப் பராமரிப்பு

மழைக்காலத்தில் கன்றுப் பராமரிப்பு

ழைக்காலத்தில் பிறக்கும் கன்றுகள் ஈரப்பதம் மற்றும் குளிரினால் அதிகம் பாதிக்கப்படும். எனவே மழைக்காலத்தில் கன்றுகளை நனையாமல் பார்த்துக் கொள்ள வேண்டும். இரவு நேரத்தில் கன்றுகள் கதகதப்பான சூழலில் இருக்க வேண்டும். தரையில் வைக்கோல், பக்கவாட்டில் கோணிப்பைகளைக் கட்டுதல், இரவு நேரத்தில் கன்றுகளின் மேலே மின்பல்புகளைத் தொங்கவிடுதல், கன்றுகளுக்குச் சாம்பிராணி புகைமூட்டம் போடுதல் போன்ற பராமரிப்புச் செயல்கள் கன்றுகளைக் குளிரிலிருந்து காப்பாற்றும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism