Published:Updated:

அறிவியல் - 2 : சாணத்தில் இத்தனை சத்துகளா? ஆச்சர்யப்படுத்தும் அறிவியல்!

மாடு
பிரீமியம் ஸ்டோரி
மாடு

இயற்கை வேளாண்மை-ஆய்வுப் பார்வையும்... அறிவியல் உண்மையும்!

அறிவியல் - 2 : சாணத்தில் இத்தனை சத்துகளா? ஆச்சர்யப்படுத்தும் அறிவியல்!

இயற்கை வேளாண்மை-ஆய்வுப் பார்வையும்... அறிவியல் உண்மையும்!

Published:Updated:
மாடு
பிரீமியம் ஸ்டோரி
மாடு

முனைவர். செந்தூர்குமரன்

யற்கை விவசாயத்தின் ஆணிவேராக இருப்பவை சாணம், மாட்டுச் சிறுநீர் இரண்டும்தான். இயற்கை விவசாயம் என்றாலே `அது சாணம், சிறுநீர் விஷயம்... அதெல்லாம் சரிப்படாது. யூரியா போட்டாதான் பயிர் வளரும்’ என்ற மனநிலை இன்றைக்கு பலருக்கும் இருக்கிறது. `சாணம், சிறுநீர் ஆகியவை சாதாரணக் கழிவுப் பொருள்கள். அவற்றில் என்ன சத்துகள் இருந்துவிடப் போகின்றன’ என்று சாதாரணமாக நினைக்கிறார்கள். உண்மையில் சாணம், மாட்டுச் சிறுநீர் இரண்டிலும் என்னென்ன பொருள்கள் இருக்கின்றன... அவை எவ்வாறு செயல்படுகின்றன என்ற அறிவியல் உண்மையை அறிந்துகொண்டால் அவற்றைப் பார்க்கும் பார்வையே மாறிவிடும்.

சாணம்
சாணம்

மண்ணிலுள்ள நுண்ணுயிர்கள்தாம் நாம் பயிருக்குக் கொடுக்கும் உரம் உள்ளிட்ட இடுபொருள்களை பயிர் எடுத்துக்கொள்ளும் வகையில் உருமாற்றித் தருகின்றன என்பதைக் கடந்த இதழில் பார்த்தோம். நுண்ணுயிர்களான அந்தச் சமையல்காரர்களுக்கு உணவு வேண்டுமல்லவா... அவர்களுக்கான உணவுதான் சாணம். யூரியா சத்துகள் பயிருக்குப் போகலாம். ஆனால், நுண்ணுயிர்களுக்கான உணவாகாது. ஆக, பயிருக்கும் உண்ணும் வடிவில் உணவு வேண்டும்; அந்த வடிவில் மாற்றிக்கொடுக்கச் சம்பளம் இல்லாத சமையல்காரர்கள் வேண்டும். அந்தச் சமையல்காரர்களுக்கு உணவும் செலவில்லாமல் கிடைக்க வேண்டுமென்றால் அதற்கு ஒரே வழி சாணம்தான்.

மாடுகளின் தீவனக் கழிவையே `சாணம்’ என்கிறோம். மாடு உண்ணும் தீவனங்களில் செரிப்பவை ரத்தத்தில் கலந்துவிடும், செரிக்காத தீவனக் கழிவு சாணமாக வெளியே வரும். அப்படி வரும் கழிவு, வெறும் சாணமாக மட்டும் வருவதில்லை. மாட்டின் உடம்பிலிருந்து லட்சக்கணக்கான நன்மை செய்யும் கிருமிகளைத் தன்னுள் அடைகாத்து வெளியே வந்து விழுகிறது. மண்ணை வளப்படுத்த ஆலைக் கழிவுகளைக் கொடுக்கலாம். ஆனால், அவை உயிரற்ற ஓர் இயந்திரத்தின் மூலம் வெளிவரும் கழிவு.

ஒட்டுமொத்த விகடனுக்கும் ஒரே ஷார்ட்கட்!

மாடு
மாடு

அதில் ஜீவன் இருக்காது. ஆனால், உயிருள்ள பொருளான மாட்டின் உள்ளேயிருந்து வரும்போது பல்வேறு நுண்ணுயிர்கள் கலந்து வருகின்றன. மாட்டுக்கு நான்கு வயிறு அல்லது வயிற்றுப் பாகங்கள் உண்டு. அவை முறையே ரூமென், ரெட்டிக்குலம், ஓமசம் மற்றும் அபோமசம் எனப்படும். நான்கு பாகங்களைக்கொண்ட வயிற்றில் முதலில் ரூமென் இரைப்பை. அங்கு கோடிக்கணக்கான நன்மை செய்யும் நுண்ணுயிரிகளும் பாக்டீரியாவும் இருக்கின்றன. அங்கு தேவையான உணவைச் சத்துகளாக எடுத்தது போக, மீதமுள்ள செரிக்காத உணவில் இந்த நன்மை செய்யும் நுண்ணுயிரிகளும் பாக்டீரியாவும் கலந்து வெளியே வரும்.

இவற்றை மண்ணில் இடும்போது, ஏற்கெனவே மண்ணிலுள்ள சமையற்காரர்களான நுண்ணுயிர்களுடன் இணைந்து மண்ணை வளமாக்கி, தழைச்சத்து, மணிச்சத்தை மண்ணில் நிலைநிறுத்தும் வேலையைச் செய்யத் தொடங்குகின்றன.

சில நேரங்களில் மாடு கழியும். அதை இடுபொருள் தயாரிக்கப் பயன்படுத்தக் கூடாது. ஒரு கிலோ தொழுவுரம் போட்டால் ஆர்சனிக், 100 சதவிகிதத்திலிருந்து 35 சதவிகிதமாகக் குறைகிறது.
விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

தண்ணீரைச் சுத்தம் செய்ய நாம் ஆர்.ஓ வைத்திருக்கிறோம். அப்படி மண்ணைச் சுத்தம் செய்யும் பணியைத்தான் சாணம் செய்கிறது. மண்ணிலுள்ள தேவையில்லாத கழிவுகளை வெளியேற்றிவிட்டு, தேவையானவற்றை வளர்க்கும் வேலையை இது செய்கிறது. இந்தப் பணியை வேறு எந்த இடுபொருளும் செய்ய முடியாது. தரமான சாணம் என்பது 3:1 என்ற விகிதத்தில் இருக்க வேண்டும். மூன்று பங்கு திடப்பொருள், ஒரு பங்கு திரவமாக இருக்க வேண்டும். மாடு போடும் சாணம் நான்கு கிலோ இருந்தால் அதில் மூன்று கிலோ சாணமாகவும், ஒரு கிலோ சிறுநீராகவும் இருக்க வேண்டும். அதுதான் தரமான சாணம். இடுபொருள்கள் தயாரிக்க அதைத்தான் பயன்படுத்த வேண்டும். இந்த விகிதம் மாறி 2:2 என்ற அளவில் சற்று நீராக இருந்தாலும், அதை இடுபொருள்கள் செய்யப் பயன்படுத்தக் கூடாது. சில நேரங்களில் மாடு கழியும். அதை இடுபொருள் தயாரிக்கப் பயன்படுத்தக் கூடாது. மாட்டின் வயிற்றுக்குள் தீமை செய்யும் பாக்டீரியாவின் எண்ணிக்கை அதிகமாகும்போதுதான் அது கழிசலாக வெளிவரும். அப்போது சாணத்திலும் தீமை செய்யும் பாக்டீரியா அதிகமாக வந்துவிடும். எனவே, இயற்கை இடுபொருள்கள் செய்ய அதைப் பயன்படுத்தக் கூடாது. கழிச்சலாக இருக்கும் சாணத்தைப் பயன்படுத்தும்போது கைகளை நன்றாகச் சுத்தப்படுத்திக்கொள்ள வேண்டும். இல்லாவிட்டால் ஈக்கோலை போன்ற கிருமிகள் நம் உடலுக்குள்ளும் போய்விடும்.

அறிவியல் - 2 : சாணத்தில் இத்தனை சத்துகளா? ஆச்சர்யப்படுத்தும் அறிவியல்!

பூச்சி மருந்து தயாரிக்கும் நிறுவனங்கள் பட்டியலில் உலக அளவில் தெற்காசிய நாடுகள் ஆறாவது இடத்தில் இருக்கின்றன. ஆசியாவில் அதிக அளவு பூச்சிக்கொல்லி பயன்படுத்தும் நாடுகள் பட்டியலில் இந்தியா மூன்றாவது இடத்தில் இருக்கிறது. 2019-ம் ஆண்டு மட்டும் 2,17,000 டன் பூச்சிக்கொல்லி இந்தியாவில் பயன்படுத்தப்பட்டிருக்கிறது.

நம் நாட்டில் ரசாயனம் பயன்படுத்துபவர்கள்தான் அதிகம் இருக்கிறார்கள். அப்படி அவர்கள் பயன்படுத்தும் ரசாயனங்களால் மண்ணிலுள்ள நன்மை செய்யும் நுண்ணுயிர்கள் அழிந்துபோகின்றன. மண் உயிர்த் தன்மையைக் கொஞ்சம் கொஞ்சமாக இழக்கிறது. பூச்சிக்கொல்லிகளில் உள்ள `பீனால்’ என்ற பொருள்தான் மண்ணைச் சீரழிக்கிறது. அந்த பீனாலை அழிக்கக்கூடிய சக்தி படைத்தவை நன்மை செய்யும் பாக்டீரியா, பூஞ்சை, ஆக்டினோமைசிஸ் என்ற மும்மூர்த்திகள்தான். இவை பீனாலை அழித்து, மண்ணின் கட்டமைப்பைச் சீர்ப்படுத்துகின்றன. இந்த மூன்றும் சாணத்தில் அதிக அளவில் இருக்கின்றன. அதனால்தான் சாணத்தால் தயாரிக்கும் இடுபொருள்களை மண்ணில் தெளிக்கும்போது மண் வளமாகிறது. ஒரு லிட்டர் ஜீவாமிர்தமோ, பஞ்சகவ்யாவோ, சாணக் கரைசலோ மண்ணில் விழும்போது, மண்ணில் 1,000 மில்லி கிராமில், 100 மில்லி கிராம் அளவுக்கு பீனால் செயல்படாமல் முடக்குகிறது. ஒரு லிட்டர் சாண இடுபொருளுக்கே இவ்வளவு நன்மை நடக்கும்போது, தொடர்ந்து பயன்படுத்தினால் என்ன நடக்கும் என்பதை நினைத்துப் பாருங்கள்.

‘‘தண்ணீரைச் சுத்தம் செய்ய நாம் ஆர்.ஓ வைத்திருக்கிறோம். அப்படி மண்ணைச் சுத்தம் செய்யும் பணியைத்தான் சாணம் செய்கிறது.’’

சூடோமோனஸ் பாக்டீரியாவும், டிரைக்கோடெர்மா விரிடி போன்ற பூஞ்சைகளும் மண்ணில் வளர ஊடகமாக இருக்கிறது இந்தச் சாணம். தொழிற்சாலைகள் அதிகமாக இருக்கும் பகுதிகளில் ஆலைக் கழிவுகள் மூலமாகக் கடின உலோகங்கள் மண்ணில் பரவும். குரோமியம், ஆர்சனிக், டிரான்சியம் இந்த மூன்றும் கடின உலோகங்கள். இவை மண்ணையும் கெடுக்கும். பயிர்களும் இவற்றை எடுத்துக்கொள்ளும். இவற்றை எடுத்துக்கொண்ட பயிர்களில் விளையும் விளைபொருளை உண்பதால், இதயநோய், சிறுநீரகம் உள்ளிட்ட பல்வேறு நோய்கள் தாக்கும். ஆலைக் கழிவுகளைப் பயன்படுத்தும் பகுதிகளில் இந்தக் கடின உலோகங்களின் வேகத்தைக் குறைக்க, அறிந்தோ அறியாமலோ சாணத்தைப் பயன்படுத்துகிறோம்.

சாணத்திலுள்ள மெதனோஜெனிக் பாக்டீரியா, அற்புதமான பணியைச் செய்து மண்ணின் உயிர்த் தன்மையைப் பாதுகாக்கிறது. சாணத்தை மண்ணில் இடுவதால் சூடோமோனஸ் பிலேகாக்ளாஸிசிடா மற்றும் சூடோமோனஸ் ஏரொஜினோசா வகை பாக்டீரியா மண்ணில் பெருகும். இந்த வகை பாக்டீரியாவைக்கொண்டு குளோர்பைரிபாஸ், சைபெர்மெத்ரின் மற்றும் பென்வோலரானேட் போன்ற ரசாயனப் பூச்சிக்கொல்லிகளால் மண்ணில் ஏற்படும் தீமைகளைத் தடுக்கும் வேலையையும் செய்கிறது சாணம். ஆர்சனிக்கைச் செயல்படாமல் செய்து அதை அப்புறப்படுத்தும் வேலையைச் செய்கிறது. ஒரு கிலோ தொழுவுரம் போட்டால் ஆர்சனிக், 100 சதவிகிதத்திலிருந்து 35 சதவிகிதமாகக் குறையும்; 65 சதவிகிதம் காணாமல் போய்விடும். ஆக, பல வகைகளிலும் சாணம் பயனுள்ளதாக இருக்கிறது என்பது அறிவியல்பூர்வமாக நிரூபிக்கப்பட்ட உண்மை.

தாவரங்கள் செழித்து வளர வேண்டுமென்றால், அவற்றின் தண்டு மற்றும் வேர்களின் வெளிச்சுவர் திசுக்கள் மிக அவசியம். அவற்றின் மூலம் தாவரங்களின் வளர்சிதை மாற்றம் மிக நன்றாக இருக்கும். அதற்குத் தேவையான மூன்று திசு மூலக்கூறுகள் லிக்னின், செல்லுலோஸ் மற்றும் செமி செல்லுலோஸ். இவையும் இந்தச் சாணத்தில் போதுமான அளவில் இருக்கின்றன. இவை தவிர பேசில்லஸ், கோரேனோபாக்டீரியம், லாக்டோபாசில்லஸ், ஈஸ்ட், சாக்கரோமைசீஸ், சிட்ரோபாக்டீரியா, என்டெரோபாக்டர், எச்சரிசியா கோலை (ஈக்கோலை), கிளப்சில்லா, க்ளூவீரா, பஸ்டேரோல்லா, ப்ரொவிடென்சியா மற்றும் சூடோமோனஸ் போன்ற நுண்ணுயிரிகளும் சாணத்தில் மிக நிறைவாகவே இருக்கின்றன. இதில் ஈக்கோலையைத் தவிர மற்றவையெல்லாம் நன்மை செய்யும் நுண்ணுயிர்கள்.

மண்ணிலுள்ள கரையா நிலையிலுள்ள டிரை கால்சியம் பாஸ்பேட் என்ற மணிச்சத்து உரத்தைக் கரையக்கூடிய, பயிர் எடுக்கக்கூடிய உரமாக மாற்றிக்கொடுக்கும் வேலையைச் செய்கின்றன பேசில்லஸ் சாபென்சிஸ், பேசில்லஸ் ஸ்செரெஸ் மற்றும் பேசில்லஸ் சப்டிலிஸ் வகை நுண்ணுயிரிகள். மேலும் இந்தப் பேசில்லஸ் நுண்ணுயிரிகள் நெல் பயிரிலுள்ள பாக்டீரியல் வாடல் நோய் ஏற்படுத்தும் ரைஸக்டோனியா என்னும் தீமை செய்யும் நுண்ணுயிரிகளின் ஆதிக்கத்தை அறவே குறைக்கின்றன.

மேலும் மண்ணில் இடும் அசோஸ்பைரில்லம், சூடோமோனஸ் போன்ற பாக்டீரியாவுக்கு, சாண இடுபொருள்கள் இடும்போதும், அதிலுள்ள நுண்ணுயிர்கள் சேரும்போதும் இரண்டும் இணைந்து வேகமாக வேலை செய்யும். `ஒரு சதுர அடி மண்ணில் ஐந்து லட்சம் கோடி நுண்ணுயிர்கள் இருக்கும்’ என்கிறது அறிவியல். சாணத்தைப் போட்டால்தான் ஐந்து லட்சம் கோடி நுண்ணுயிர்களை உருவாக்க முடியும்.

மாட்டுச் சிறுநீர் மற்றும் இயற்கைப் பொருள்களிலுள்ள அறிவியல் பற்றி அடுத்த இதழில்..

-பார்வை தொடரும்

சாணம் சேமிக்கும் முறை
சாணம் சேமிக்கும் முறை

சாணம் சேமிக்கும் முறை

விளைபொருள்களை வைக்கும் இடத்தின் அருகில் சாணத்தைக் கொட்டி வைக்கக் கூடாது. மழை பெய்தால் நனையும் இடத்திலோ, காற்று அதிகமாக வீசும் இடத்திலோ சாணத்தைச் சேமித்து வைக்கக் கூடாது. அதற்காகத் தனியாக ஒரு குழி எடுக்க வேண்டும். மண் குழியாக இல்லாமல் தொட்டியாகக் கட்டிக்கொள்வது நல்லது. தொட்டியை மழைநீர், அதிக வெயில் படாத அளவுக்கு மேலே ஒரு தடுப்பைக் கட்டிக்கொள்ள வேண்டும். கிணறு மற்றும் ஆழ்துளைக் கிணறு அருகில் சாணத்தைச் சேமிக்கக் கூடாது. கிணறுகளிலிருந்து 100 அடி தூரத்தில்தான் சாணக்குழிகள் இருக்க வேண்டும். சாணத்திலுள்ள ஈக்கோலை என்ற தீமை செய்யும் பாக்டீரியா மழையில் நனையும் போது உருகி தண்ணீரில் கலந்துவிடும். அது மனிதர்களுக்கு வாந்தி வயிற்றுப்போக்கை ஏற்படுத்தி நோய்வாய்ப்படவைக்கும், தீமையாக முடியும்.

சாணத்தை எப்படிப் பயன்படுத்துவது?

மாடு போட்டவுடனேயே பசும் சாணத்தை எடுத்துப் பயன்படுத்தக் கூடாது. இடுபொருள் தயாரிக்கவும் பயன்படுத்தக் கூடாது. குறைந்தபட்சம் மேற்கண்ட முறையில் ஓரிரு நாள்கள் சேமித்துத்தான் பயன்படுத்த வேண்டும். சாணத்தை மட்க வைத்து அடியுரமாகப் பயன்படுத்தலாம். சாண உரம், இடுபொருள்களை மண்ணில் பயன்படுத்தியவுடனே பயிர்களில் பலனை எதிர்பார்க்கக் கூடாது.

இடுபொருள்களாக இருந்தால் ஒரு வாரம் முதல் 15 நாள்களுக்குப் பிறகுதான் பலன் தெரியும். உரமாக இருந்தால் குறைந்தபட்சம் மூன்று வாரங்கள், முழுமையான பலனை அடைய 120 நாள்களாகும். இன்றைக்குப் போடும் உரத்துக்கு 120 நாள்களில்தான் பலன் கிடைக்கும். தொடர்ந்து உரங்களைப் பயன்படுத்தும்போதுதான் தொடர் பலனை அனுபவிக்க முடியும். இயற்கை இடுபொருள்களைப் பயிர்கள் எடுத்துக்கொள்ளும் காலத்தைக் கணக்கில்கொண்டு பயன்படுத்தினால் மட்டுமே இயற்கை விவசாயத்தில் வெற்றி பெற முடியும்.