Published:Updated:

50 சென்ட்... ரூ.87,000... சொட்டுநீரில் செழிக்கும் சொம்பு சுரைக்காய்!

சுரைக்காய்ச் சாகுபடி
பிரீமியம் ஸ்டோரி
சுரைக்காய்ச் சாகுபடி

மகசூல் - ஞான.வேல்முருகன்

50 சென்ட்... ரூ.87,000... சொட்டுநீரில் செழிக்கும் சொம்பு சுரைக்காய்!

மகசூல் - ஞான.வேல்முருகன்

Published:Updated:
சுரைக்காய்ச் சாகுபடி
பிரீமியம் ஸ்டோரி
சுரைக்காய்ச் சாகுபடி

ந்தச் சமயத்தில் என்ன பயிர் செய்தால் நல்ல விலை கிடைக்கும் என்பதை இன்றைய காலகட்டத்தில் விவசாயிகள் அறிந்து வைத்திருப்பது அவசியம். இது அனுபவத்தின் மூலம்தான் வரும் என்றாலும், சிலரைப் பார்த்துக் கற்றுக்கொண்டால் முன்கூட்டியே திறம்படச் செயல்பட உதவும். இப்படிக் கோடைக்காலத்தில் சந்தைக்கு அதிகளவில் வரத்து இல்லாமல் இருக்கும் சுரைக்காயைச் சாகுபடி செய்து நல்ல வருமானம் பார்த்து வருகிறார் சேலம் மாவட்டம், கம்மாளப்பட்டியைச் சேர்ந்த விவசாயி சின்னதுரை.

ஒரு மாலை வேளையில் அவரைச் சந்தித்தோம். சுரைக்காய் பறிக்கும் பணியில் மும்முரமாக இருந்தவர், சுரைக்காய் பறித்து முடித்துவிட்டு வந்து பேசினார். “கடந்த மூணு வருஷமா சுரைக்காய் பயிர் செய்றேன். மண்டியிலும், உழவர் சந்தையிலும் கோடைக்காலத்துல சுரைக்காய் நல்ல விலைக்கு விக்கிறத நேர்ல பார்த்தேன். அதனால சுரைக்காய்ச் சாகுபடி செய்யலாம்னு யோசிச்சேன். பிறகு, சுரைக்காய் சாகுபடி பத்தி அக்கம்பக்கத்து விவசாயிகள்கிட்ட கேட்டுத் தெரிஞ்சுகிட்டு கோடைக்காலத்தில பயிர் செஞ்சேன். விற்பனை நல்ல முறையில இருந்துச்சு.” தான் சுரைக்காய்ச் சாகுபடிக்கு வந்த கதையைச் சொன்னவர், பறித்த சுரைக்காய்களைச் சந்தைக்கு எடுத்துச் செல்லும் வகையில் பெட்டியில் அடுக்கி வைத்துக் கொண்டே பேசினார்.

அறுவடை செய்த சுரைக்காயுடன் சின்னதுரை
அறுவடை செய்த சுரைக்காயுடன் சின்னதுரை

“எங்களுக்கு 4 ஏக்கர் நிலம் இருக்கு. என்னுடைய அப்பா காலத்தில சோளம், கம்பு போன்ற சிறுதானியப் பயிர்கள்தான் பிரதான சாகுபடியா இருந்துச்சு. எங்க குடும்பத்தோட உணவுத் தேவையை அந்தப் பயிர்கள்தான் பூர்த்திச் செய்தது. நான் 5-ம் வகுப்புவரை படிச்சேன். பிறகு அப்பாவுக்குத் துணையாக விவசாய வேலையைக் கவனிக்க ஆரம்பிச்சேன். இப்போ எனக்கு வயசு 54 ஆகுது. அப்பா விவசாயம் பார்க்கும்போது குடும்பத்தோட உணவுத்தேவையைப் பூர்த்திச் செய்ய முடிந்ததே தவிர, பெரிய அளவில் வருமானம் எடுக்க முடியல. இதை மாற்றணும், கையில காசு, பணம் சேரணும்னு காய்கறி, மலர் சாகுபடியைத் தேர்ந்தெடுத்தேன். என்னோடது செம்மண் நிலம். எதை விதைச்சாலும் நல்லா விளையும். எங்ககிட்ட இருக்கிற 4 ஏக்கர் நிலத்துல அரை ஏக்கர்ல அரளிப் பூ சாகுபடி, அரை ஏக்கர்ல எலுமிச்சைச் சாகுபடி, மீதி 3 ஏக்கர்ல தலா அரை ஏக்கர் கணக்குல தக்காளி, பீர்க்கன், பாகல், புடலை, அவரை, சுரைக்காய்னு சாகுபடி செஞ்சிட்டு வர்றேன்.

சுரைக்காய் பறிப்பு
சுரைக்காய் பறிப்பு

சந்தைக்கேற்ற சாகுபடி

ஆரம்பத்துல மண்டிக்கு (மார்க்கெட்) போய்க் காய்கறிகளை வித்துட்டு வருவேன். கடந்த ஒரு வருஷமா தோட்டத்துல விளையும் காய்கறிகளை உழவர் சந்தைக்குக் கொண்டு போய் விற்பனை செஞ்சிட்டு வர்றேன். நானே விற்பனை செய்றதால எந்தச் சமயத்தில் எந்தக் காய்கறிக்கு வரவேற்பு இருக்குதுனு தெரிஞ்சுகிட்டு, அதற்குத் தகுந்த மாதிரிப் பயிர் செஞ்சிட்டு வர்றேன். பொதுவா, தைப்பட்டத்துல தக்காளி, கத்திரி, கொடி வகைக் காய்கறிகளைப் பயிர் செய்வது வழக்கம். இந்தப் பட்டத்துல, காய்கறிகள் நல்லா காய்க்கும். ஆனா, விலை கிடைக்காது. அதனால, நான் மாசி பட்டத்துல விதைக்க ஆரம்பிச்சேன். மகசூல் கொஞ்சம் குறைஞ்சாலும் நல்ல விலை கிடைக்குது. இத கவனிச்சுதான் சுரையைத் தொடர்ந்து பயிர் செய்துட்டு வர்றேன். இதுலேயே ஊடுபயிராக முருங்கையும் வளர்ந்துட்டு வருது” என்றவர் சுரைக்காய் பற்றிப் பேசினார்.

‘‘சுரைக்காயை எடைபோட்டுக் கொடுக்க வேண்டியதில்ல. காய் சைஸை பொறுத்து, ஒரு காய் 10 ரூபாய், 15 ரூபாய்னு விக்கிறோம்.’’

50 நாளில் அறுவடை

“சொம்பு சுரைக்காய் என்றழைக்கப்படும் குண்டு சுரைக்காயைத்தான் சாகுபடி செஞ்சிட்டு வர்றேன். இது வீரிய ரகம்தான். பொதுவா, சந்தையில வால் சுரைக்காய்தான் நல்லா விக்கும்னு சொல்வாங்க. ஆனா, அதைவிடக் குண்டு சுரைக்காயை நிறைய பேரு விரும்பி வாங்குறாங்க. இந்த வருஷம் மாசி மாசம் அரை ஏக்கர்ல சுரைக்காய் நடவு செஞ்சேன். நடவு செஞ்ச 50 நாள்கள்ல காய் அறுவடைக்கு வந்துடுச்சு. கடந்த 70 நாள்களுக்கு மேலாக அறுவடை செஞ்சிட்டு வர்றேன். சுரைக்காயைத் தினமும் அறுவடை செய்யலாம், இருந்தாலும் காய் கொஞ்சம் உருட்டு (வடிவம்) வரணுங்கறதுக்காக ஒருநாள் விட்டு ஒருநாள் அறுவடை செய்றேன்.

தினமும் அரை ஏக்கர்ல இருந்து 200-300 காய்களை அறுவடை செஞ்சு உழவர் சந்தைக்கு எடுத்துட்டுப் போய் விற்பனை செய்றேன். சுரைக்காய் பறிக்கும்போது எப்படியும் ஒண்ணு, ரெண்டு காய்கள் இலைக்குள்ள மறைஞ்சு தப்பிச்சுடும். அதைச் செடியிலேயே விட்டுவிடுவோம். நல்லா முத்துன பிறகு அறுத்துப் பத்திரப்படுத்தி வெச்சுக்குவேன். அதிலிருந்து அடுத்த முறை விதைக்கும்போது விதைகளைப் பயன் படுத்திக்குவேன்” என்றவர் நிறைவாக வருமானம் குறித்துப் பேசினார்.

செலவு, வரவு கணக்கு
செலவு, வரவு கணக்கு

ஓர் அறுவடைக்கு 250 காய்கள்

“பொதுவாகக் காய்கறிகளை எடை போட்டு விற்பது வழக்கம். ஆனா, சுரைக்காயை எடைபோட்டுக் கொடுக்க வேண்டியதில்ல. காய் சைஸைப் பொறுத்து, ஒரு காய் 10 ரூபாய், 15 ரூபாய்னு விக்கிறோம். போன மார்ச் மாசத் தொடக்கத்தில ஒரு சுரைக்காய் விலை 15 ரூபாய்க்கு விற்பனையாச்சு. இப்ப 10 ரூபாய்க்கு விற்பனையாகுது. பொதுவா சுரைக்காய் சின்ன அளவுல கைக்கும் பைக்கும் அடக்கமான அளவுல இருக்கணும்னு வாங்குறவங்க விரும்புறாங்க. அதுக்கேத்த மாதிரி ‘சைஸ்’ வாரியா பிரிச்சு விற்பனை செஞ்சிடுவேன்.

அறுவடை செய்ய ஆரம்பிச்சதுல இருந்து இந்த 70 நாள்ல முப்பத்தஞ்சு அறுவடை செஞ்சிருக்கேன். ஒரு அறுவடைக்குச் சராசரியா 250 காய்களை அறுவடை செஞ்சதுல 8,750 காய்கள் கிடைச்சிருக்கு. ஒரு காய் 10 ரூபாய் என்ற விலையில 87,500 ரூபாய் வருமானம் கிடைச்சிருக்கு. இன்னும் 10 நாள்கள் அறுவடை இருக்கு. அதன்மூலம் எப்படியும் 2,000 காய்கள் கிடைக்கும்னு எதிர்பார்க்கிறேன். அதுமூலமா 20,000 ரூபாய் கிடைக்கும். ஆக, அரை ஏக்கர் சுரைக்காய் சாகுபடி மூலமா 1,07,000 ரூபாய் வருமானம் கிடைக்கும். இப்ப வரைக்கும் கிடைச்சிருக்கிற வருமானம் 87,500 ரூபாய். எரு, உழவு, களையெடுப்பு, காய் பறிப்பு, போக்குவரத்துனு 25,000 ரூபாய்ச் செலவாகியிருக்கு. செலவு போக 62,500 ரூபாய் லாபம் கிடைச்சிருக்கு. மத்த பயிர்களுக்கு அதிகம் மெனக்கெடணும். ஆனா, சுரைக்காய்க்கு அதுபோல எதுவும் இல்ல. இந்தக் கோடைக்காலத்துல மத்த காய்கறிகளைவிடச் சுரைக்காய் எனக்கு நல்ல வருமானத்தைக் கொடுத்திருக்கு” மகிழ்ச்சியோடு சொன்னவரிடம் விடைபெற்றோம்.

தொடர்புக்கு,
சின்னதுரை,
செல்போன்: 80983 43422.

சுரைக்காயுடன்
சுரைக்காயுடன்

இப்படித்தான் செய்யணும் சுரைக்காய்ச் சாகுபடி

அரை ஏக்கரில் சுரைக்காய்ச் சாகுபடி செய்வது குறித்து, சின்னதுரை பகிர்ந்துகொண்ட தகவல்கள் இங்கே இடம் பெறுகின்றன.

சுரைக்காயின் சாகுபடி காலம் 140 நாள்கள். விதைத்த 50 நாள்களில் அறுவடைக்கு வரும். தொடர்ந்து 90 நாள்கள், ஒருநாள் விட்டு ஒருநாள் அறுவடை செய்வது மூலமாக 45 நாள்கள் நல்ல மகசூல் கிடைக்கும். சுரைக்காய்க்கு ஆடிப்பட்டம், தைப்பட்டம் ஏற்றது. கோடைக்கால வருமானத்துக்காக மாசிப் பட்டத்திலும் விதைக்கலாம்.

சாகுபடி செய்யப்படும் நிலத்தை நன்கு உழவு செய்து வைத்துக்கொள்ள வேண்டும். மற்ற கொடி வகைக் காய்கறிகளைவிடச் சுரைக்காய் செடியின் வேர் பூமிக்குள் ஆழமாக இறங்கும் என்பதால் மண்ணைப் பொலபொலப்பாக உழவு ஓட்டி வைத்துக்கொள்வது அவசியம். 6 அடி இடைவெளியில் பார் அமைத்துக்கொள்ள வேண்டும். அப்போதுதான் சுரைக்காய்க் கொடி ஓட இடம் கிடைக்கும். ஆட்டு எரு, மாட்டு எரு இரண்டும் கலந்து அரை ஏக்கருக்கு 3 டன் என்ற கணக்கில் பார் மீது தூவி, அதன்மீது மண் போட்டு மூட வேண்டும். எரு, நன்கு தூளாக்கப்பட்டதாக இருக்க வேண்டும். எந்தளவுக்குத் தூளாகப் போடுகிறோமோ அந்தளவுக்கு மண்ணுக்கு நன்றாகச் சத்து கிடைக்கும். மண்ணில் வளம் இருந்தால் கொடி நன்றாக ஓடும். அதிகளவிலும் காய்க்கும். நீண்ட நாள்களுக்கு அறுவடை செய்யலாம்.

சொம்பு சுரைக்காய்
சொம்பு சுரைக்காய்

பாரின் மீது சொட்டுநீர்ப் பாசனக் குழாயைப் பொருத்தி பாசனம் செய்ய வேண்டும். பிறகு, 3 அடி இடைவெளியில் சுரைக்காய் விதைகளை விதைக்க வேண்டும். விதையைத் தேர்வு செய்யும்போது கொஞ்சம் பச்சையும் வெள்ளையும் கலந்த காயிலிருந்து விதைதேர்வு செய்ய வேண்டும். விதைப்புக்கு முன்பு மாட்டுச் சிறுநீரில் இரண்டு மணி நேரம் விதைகளை ஊற வைக்க வேண்டும். அதன் பிறகு ஈரமான துணியில் வைத்துக் கட்டி ஒரு நாள் வைத்திருந்து அதன் பிறகு, நடவு செய்தால் நல்ல முளைப்புத்திறன் இருக்கும்.

விதை நடவுக்குப் பிறகு ஒரு நாள் விட்டு ஒரு நாள் அரை மணி நேரம் தண்ணீர் பாய்ச்சினால் போதுமானது. வாய்க்கால் பாசனத்தில் சாகுபடி செய்பவர்கள் வாரத்துக்கு இரண்டு முறை பாசனம் செய்ய வேண்டும். 10 நாள்களுக்குள் விதை முளைத்து வெளியே வந்துவிடும். 15-20 நாளில் களை எடுக்க வேண்டும். 20-ம் நாள்களுக்கு மேல் கொடி ஓடத் தொடங்கிப் பூக்கள் பூக்க ஆரம்பிக்கும். செடியில் பூக்கள் கொட்டாமல் இருக்க, தோமோர் கரைசலை பூப்பிடிக்கும் தருணத்தில் இரண்டு நாள்கள் இடைவெளியில் 4 முறை தெளித்து விட வேண்டும்.

30-ம் நாள்களுக்கு மேல் செடியில் பிஞ்சு பிடிக்கும். பிஞ்சு பிடித்த பிறகு, தினமும் அரை மணி நேரம் தண்ணீர்விட்டால் காய்களின் எடை கூடும். சுரைக்காய்ச் செடியில் பூச்சிகளின் தாக்குதல் பெரிதாக இருக்காது. பிஞ்சுகள் அதிகமாக இருக்கும்போது எலிகள் காயைச் சுரண்டும். இதைக் கட்டுப்படுத்த அரைக்கிலோ கருவாட்டை 10 லிட்டர் தண்ணீரில் ஊற வைத்து அந்தத் தண்ணீரை வயலைச் சுற்றித் தெளித்துவிட்டால் எலிகளின் தொல்லையைக் கட்டுப்படுத்தலாம். இதற்கும் கட்டுப்படவில்லையென்றால் ஒரு கிலோ வெள்ளைப் பூண்டு (அரைத்தது), நான்கு புகையிலை இரண்டையும் ஒருநாள் தண்ணீரில் ஊரில் வைத்து அந்தத் தண்ணீரைச் சொட்டு நீரின் மூலம் கலந்துவிட்டு எலிகளின் தொல்லையைக் கட்டுப்படுத்தலாம். 50-ம் நாளில் அறுவடைக்கு வரத் தொடங்கும். தொடர்ந்து தண்ணீர் பாய்ச்சி வந்தால் மட்டும் போதும். 140 நாள்கள்வரை அறுவடை செய்யலாம்.