Published:Updated:

40 சென்ட்... மாதம் ரூ. 24,000 பச்சை மிளகாய்ச் சாகுபடி!

ஒட்டுமொத்த விகடனுக்கும் ஒரே ஷார்ட்கட்

Use App
மிளகாய்த் தோட்டத்தில் அருண்
மிளகாய்த் தோட்டத்தில் அருண்

மகசூல்

பிரீமியம் ஸ்டோரி
சைவம், அசைவம் என இரண்டு உணவுகளிலும் அதிகம் பயன்படுத்தப்படுவது மிளகாய். பச்சை மிளகாயாகவும் வற்றலாகவும் சந்தையில் விற்பனையாகி வருகிறது. ஆண்டு முழுவதும் சாகுபடி செய்யக்கூடிய பயிராகவும் இருக்கிறது மிளகாய். அதனால்தான் காய்கறிச் சாகுபடி செய்யும் பெரும்பாலான விவசாயிகள் மிளகாய்ச் சாகுபடியில் ஆர்வம் காட்டுகிறார்கள். அந்த வரிசையில் மிளகாயை இயற்கை முறையில் சாகுபடி செய்து நல்ல வருமானம் ஈட்டி வருகிறார், ராணிப்பேட்டை மாவட்டத்தைச் சேர்ந்த அருண்.

ஆற்காடு - செய்யாறு சாலையில் உள்ள மலையனூர் கிராமத்தில் இருக்கிறது அருணின் தோட்டம். மிளகாய்த் தோட்டத்தைப் பார்வையிட்டுக் கொண்டிருந்த அருணைச் சந்தித்துப் பேசினோம்.

மிளகாய்த் தோட்டத்தில் அருண்
மிளகாய்த் தோட்டத்தில் அருண்

“என் சொந்த ஊர் திண்டுக்கல் மாவட்டம். காலேஜ் படிக்கும்போதே படிப்பை பாதியில நிறுத்திட்டு வீட்டை விட்டு வெளியேறிச் சென்னைக்கு வந்துட்டேன். எனக்கு நேரத்தை வீணடிக்கப் பிடிக்கல. அதனால சென்னையில ஏதாவது பண்ணலாம்னு தோணிச்சு. சென்னை வந்து கொஞ்ச நாள்கள் தங்கியிருந்தேன். அப்போ இயற்கை விவசாய விளைபொருளுக்கான தேவை அதிகமா இருக்குறதைப் பார்த்தேன். அப்போ இருந்தே இயற்கை விவசாயம் சம்பந்தமா கத்துக்க ஆரம்பிச்சேன். சொந்த ஊர்ல தாத்தா கூட விவசாயம் பார்த்த அனுபவம் எனக்கு இருந்துச்சு. அதனால விவசாய யுக்திகளை எளிமையா கத்துக்க முடிஞ்சது. எனக்கான சந்தை சென்னைதான்னு முடிவு பண்ணிட்டேன். இறுதியா ராணிப்பேட்டை பக்கத்துல இருக்குற மலையனூர் கிராமத்துல 30 ஏக்கர் குத்தகைக்கு எடுத்து விவசாயம் செய்ய ஆரம்பிச்சுட்டேன். இந்த நிலத்துல நெல், கத்திரி, மஞ்சள், மிளகாய்னு பல பயிர்களைச் சாகுபடி செஞ்சுட்டு வர்றேன். மிளகாய் போக 2 ஏக்கர்ல மஞ்சள், அரை ஏக்கர்ல கத்திரி, 40 சென்ட்ல சம்பங்கி வச்சிருக்கேன்” என்றவர் தொடர்ந்தார்.

தண்ணீர் சேமிக்க மல்ச்சிங் ஷீட்!

‘‘விவசாயத்துல ஏதாவது புதுசா முயற்சி பண்ணலாம்னு தோணுச்சு. அதனால கத்திரிக்கும் மிளகாய்க்கும் மல்ச்சிங் ஷீட் (நிலப்போர்வை) போடலாம்னு நினைச்சேன். இதைக் கேட்ட பக்கத்துத் தோட்டத்துக்காரங்க என்னை ஒரு மாதிரி பார்க்க ஆரம்பிச்சாங்க. நான் எதுக்கும் கவலைப்படல. நான் ஷீட் போட்டதுக்கு இன்னொரு காரணமும் இருக்கு. குத்தகைக்கு எடுத்த இந்த நிலத்துல களைகள் அதிகமா வரும். அடிக்கடி களை எடுத்துக்கிட்டே இருக்க முடியாது. அதனால மல்ச்சிங் ஷீட்தான் ஒரே தீர்வுனு முடிவு பண்ணி அதைப் போட்டுட்டேன்.

பச்சை மிளகாய்
பச்சை மிளகாய்

இப்போ மிளகாயை நடவு பண்ணி 3 மாசம் ஆச்சு. நான் சாகுபடி செஞ்சிருக்கிறது உயர் ரக பச்சை மிளகாய். இது எல்லாச் சூழலுக்கும் ஏத்த மாதிரி வளரும். 10 மாசத்துக்குக் குறையாம மகசூல் கிடைக்கும்.

மல்ச்சீங் ஷீட்
மல்ச்சீங் ஷீட்

2 அடி அகலம், 1 அடி உயரத்துல பார் அமைச்சு, கோழி எருவைப் போட்டு, சொட்டுநீர்க் குழாய்களைப் பதிச்சு, அது மேல மல்ச்சிங் ஷீட் போட்டு மூடிடணும். விதை அல்லது நாத்துகளை மல்ச்சிங் ஷீட்டில் துளை போட்டு நடவு செய்யலாம். இப்படிச் செய்யுறப்போ களைகள் வராது. மல்ச்சிங் ஷீட்டுக்கு உள்ள சொட்டுநீர்ப் பாசன குழாய்கள அமைச்சிருக்கேன். அதனால தண்ணியும் குறைவாத்தான் தேவைப்படும். தினமும் ஒரு மணி நேரம் பாய்ச்சினா போதும்.

மண்ணில் வெப்பநிலை சீரா இருக்குறதோடு, மல்ச்சிங் ஷீட்ல இருந்து சூரிய ஒளி எதிரொலிக்கிறதால பூச்சிகளும் குறையுது. 50 சென்ட்ல மல்ச்சிங் ஷீட் போடுறதுக்கு 5,500 ரூபாய் வரை செலவாகும். இது ரெண்டு வருஷத்துக்குத் தாங்கும். இந்தப் போகம் மிளகாயை முடிச்சிட்டு, அடுத்த 6 மாச பயிரைப் போட்டுக்குவேன். இடுபொருள்கள் சரியா பயன்படுத்துறதால மண்ணுல சத்துகள் நிலையா இருக்கும். ஒரு பயிர் அறுவடை ஆரம்பிச்சதுமே, அடுத்த போகத்துக்கு நிலத்தைத் தயார் பண்ணிடுவேன். அப்படித்தான் கத்திரி, மஞ்சள்னு பயிர் செஞ்சிருக்கேன். அதுக்காகக் கொஞ்ச நிலத்தை எப்பவும் சும்மா வெச்சிருப்பேன். முறையான பராமரிப்பு பண்றதால, எப்பவுமே குறைவில்லாத மகசூல் வந்துகிட்டே இருக்கு’’ என்றவர் வருமானம் பற்றிப் பேசத் தொடங்கினார்.

‘‘இந்த நிலத்துல களைகள் அதிகமா வரும். அடிக்கடி களை எடுத்துகிட்டே இருக்க முடியாது. அதனால மல்ச்சிங் ஷீட்தான் ஒரே தீர்வுனு போட்டுட்டேன்.’’

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

‘‘பலவகையான காய்கறிகள் விளைஞ்சாலும் எந்த நிலத்திலிருந்து எவ்ளோ வருதுனு கணக்கு வைக்கணும். சென்னையில இயற்கை அங்காடிகளுக்கு 10 நாளைக்கு ஒருமுறை 400 கிலோ அனுப்புறேன். வெளி மார்க்கெட்ல விக்கிறதைவிடக் கூடுதல் விலைக்கு எடுத்துக் கிறாங்க. நியாயமான விலை கிடைக்கிறதால தைரியமா விளைவிக்க முடியுது. கிலோ 20-60 ரூபாய் வரை விற்பனையாச்சு. நாற்றை நடவு பண்ணி 53-ம் நாள் காய்கள் வந்துச்சு. அதுல இருந்து 10 நாளைக்கு ஒருமுறை அறுவடைதான். இதுவரை 3 அறுவடை முடிஞ்சிருக்கு. அதுமூலமா 1,200 கிலோ மிளகாய் கிடைச்சிருக்கு. ஒரு கிலோ குறைஞ்சபட்சம் 20 ரூபாய் கணக்குல 400 கிலோவுக்கு 8,000 ரூபாய் கிடைக்குது. மாசத்துக்கு மூணு பறிப்பு என்ற கணக்குல மொத்தம் 24,000 ரூபாய் கிடைச்சிருக்கு. ஒவ்வொரு பறிப்புக்கும் 2,500 ரூபாய் வரை செலவாகும். 3 பறிப்புக்கு மொத்தமா 7,500 ரூபாய் வரை செலவாகியிருக்கு. அதுபோக 16,500 ரூபாய் லாபமா நின்னுருக்கு. இன்னும் 5-7 அறுவடை இருக்கு. அதுமூலமா 1 லட்சத்துக்கு மேல லாபம் கிடைக்கும்னு எதிர்பார்க்கிறேன்’’ என்றவர் நிறைவாக,

40 சென்ட்... மாதம் ரூ. 24,000 பச்சை மிளகாய்ச் சாகுபடி!

‘‘வெறும் 40 சென்ட்ல ஒரு மகசூல்ல ஒரு லட்சம் ரூபாய்க்கு மேல லாபங்கிறது நல்ல விஷயம்தான். மிளகாயைப் பழுக்க வச்சு, மிளகாய்ப் பொடியாவும் மாத்தி கொடுக்கப் போறேன். அப்போ இன்னும் வருமானம் அதிகமாகும்” என்றபடி விடைகொடுத்தார்.

தொடர்புக்கு, அருண், செல்போன்: 76048 19689

இப்படித்தான் செய்யணும் சாகுபடி!

50 சென்டில் மிளகாய்ச் சாகுபடி செய்யும் முறைபற்றி அருண் சொன்ன விஷயங்கள் பாடமாக இங்கே...

50 சென்ட் நிலத்தில் 2 டன் தொழு உரத்தைக் கொட்டி பரப்பி விட வேண்டும். உளிக் கலப்பை மூலம் இரண்டு உழவு செய்ய வேண்டும். மூன்றாவது உழவாக ரோட்டோவேட்டரில் நிலத்தை மட்டப்படுத்த வேண்டும். பிறகு, 2 அடிக்கு ஒரு மேட்டுப் பாத்தி அமைத்து, அதில் சொட்டுநீர்க் குழாய்களை அமைக்க வேண்டும்.

பாத்தியின் மேல் ‘மல்ச்சிங் ஷீட்’ போர்த்தி, அதில் 45 செ.மீ இடைவெளியில் துளை அமைத்து மிளகாய் நாற்றுகளை நடவு செய்ய வேண்டும். (இவர் 23 நாள்கள் வயதுள்ள நாற்றுகளை வெளியிலிருந்து வாங்கி நடவு செய்துள்ளார்) நடவு செய்து 3 நாள்கள் கழித்துச் சொட்டு நீருடன் காலையில் ஜீவாமிர்தம், மாலையில் 10 லிட்டர் தண்ணீருக்கு 300 மி.லி பஞ்சகவ்யா கொடுக்க வேண்டும். இது பயிர்களின் வளர்ச்சியை ஊக்கப்படுத்தும். 5-ம் நாள், நாற்றுகளின் வேர்ப்பகுதிகளில் கைப்பிடியளவு எரு வைக்க வேண்டும்.

பூச்சிகளைக் கட்டுப்படுத்த பல பயிர்!

“பொதுவா, எந்த விவசாயம் செஞ்சாலும் தனிப்பயிரா செய்யக் கூடாது. கூட நாலு பயிர்களைக் கலந்து விதைக்கணும். இதைத்தான் என் தாத்தா காலத்துல செஞ்சாங்க. ஆனா, அதை விட்டுட்டு ஒத்தைப் பயிரா சாகுபடி செய்யுறப்ப வயலுக்கு வர்ற மொத்தப் பூச்சியும் பயிரை நாசமாக்கிடுது. நான் மிளகாய்க்கு இடையில ஊடுபயிரா அங்கங்க தக்காளி, கொத்தவரை, தண்டுக்கீரைனு போட்டிருக்கேன். வரப்பு ஓரங்கள்ல மரப் பயிர்கள் இருக்கு. வயலுக்கு வர்ற பூச்சிகள் மத்த செடிகள்லயும் உட்காந்துக்கிறதால, மிளகாய்ச்செடி பிரச்னையே இல்லாம மகசூல் தருது” என்கிறார் அருண்.

சீராகத் தண்ணீர் பாய்ச்சினாலே போதுமானது...

டவு செய்த 20, 40-ம் நாளில் களைகளை அகற்ற வேண்டும் (மல்ச்சிங் ஷீட் போட்டிருப்பதால் களை எடுக்கத் தேவையில்லை). 25-ம் நாளுக்கு மேல் பூச்சித்தாக்குதல் ஏற்பட வாய்ப்புள்ளது. அதனால் 10 லிட்டர் தண்ணீரில் 300 மி.லி இஞ்சி-பூண்டுக் கரைசல் என்ற விகிதத்தில் கலந்து, கைத்தெளிப்பான் மூலம் தெளிக்க வேண்டும். 40-ம் நாளிலிருந்து 15 நாள்களுக்கு ஒருமுறை 10 லிட்டர் தண்ணீருக்கு 300 மி.லி பஞ்சகவ்யா என்ற அளவில் கொடுக்க வேண்டும்.

40-ம் நாளுக்கு மேல் பூவெடுக்கும். அப்போது, பூ உதிராமல் இருப்பதற்காக, பஞ்சகவ்யா (10 லிட்டர் தண்ணீருக்கு 300 மி.லி) தெளிக்க வேண்டும். இதுபோகச் செடியின் ஈரப்பதத்துக்காக ஹைட்ரோஜெல் இடுபொருளைப் பயன்படுத்திச் செடியின் ஈரத்தன்மையைத் தக்க வைக்கலாம். நிலத்தில் ஈரம் இருப்பதைப் பொறுத்து அவ்வப்போது ஜீவாமிர்தத்தைப் பாசனம் மூலமாகக் கொடுக்க வேண்டும். 50-ம் நாளுக்கு மேல் காய்க்க ஆரம்பிக்கும். பிறகு, ஒவ்வொரு பறிப்புக்கும் 10 நாள்கள் இடைவெளி விடலாம். 10 மாதங்கள் வரை தொடர்ந்து மகசூல் கிடைக்கும்.

பூச்சிகளுக்கு இயற்கைத் தீர்வு!

“மிளகாய் விவசாயத்தைப் பொறுத்தவரை காய்த்துளைப்பான், சுருட்டைநோய் அதிகம் தாக்கும். மார்கழி மாதம் பனி அதிகமாக இருக்கும்போது சுருட்டைநோய் செடிகளைத் தாக்கும். அதைத் தடுக்க, இலைதழைகளின்மேல் ஊறவைத்த அமுதக்கரைசலைத் தெளித்தாலே போதுமானது. மார்கழிக் கடைசியில் காய்த்துளைப்பான்கள் தாக்கும். இது காய்களில் துளை போட்டுவிடும். அந்த நேரத்தில் பூச்சிவிரட்டியைத் தெளித்தால் இதைச் சமாளித்துவிடலாம் அல்லது நிலத்தில் பரவலாகச் சாமந்திப் பூக்களை நட்டு வைப்பதன் மூலமாக இந்தப் பூச்சிகளைக் கட்டுப்படுத்தலாம். மிளகாய்க்குப் பூச்சிவிரட்டியும், கத்திரிக்குச் சாமந்தியும் நடவு செய்திருக்கிறேன்” என்கிறார் அருண்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு