Published:Updated:

சூழல்: சுற்றுச்சூழலுக்கு வேட்டு வைக்கும் புதிய சட்டம்!

சுற்றுச்சூழலுக்கு வேட்டு
வைக்கும் புதிய சட்டம்!
பிரீமியம் ஸ்டோரி
News
சுற்றுச்சூழலுக்கு வேட்டு வைக்கும் புதிய சட்டம்!

சுற்றுச்சூழல் தாக்க மதிப்பீடு

சுற்றுச்சூழல் தாக்க மதிப்பீடு சட்ட வரைவு (EIA2020). சமீபகாலமாகப் பேசுபொருளாக இருக்கிறது. சமூக வலைதளங்கள் இது தொடர்பான விவாதங்களில் பரபரப்பாக இருக்கின்றன. இந்தப் புதிய சட்ட வரைவைப் பற்றி மத்திய அரசின் தரப்பில் இதுவரை பதிலில்லை. அப்படி என்னதான் இருக்கிறது புதிய சட்ட வரைவில்? என்பது குறித்துப் பூவுலகின் நண்பர்கள் அமைப்பைச் சேர்ந்த பொறியாளர் சுந்தர்ராஜனிடம் சில கேள்விகளை முன்வைத்தோம்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
சூழல்: சுற்றுச்சூழலுக்கு வேட்டு
வைக்கும் புதிய சட்டம்!

சுற்றுச்சூழல் தாக்க மதிப்பீடு (EIA-Environmental Impact Assessment) என்றால் என்ன?

“இந்தியாவில் பெருநிறுவனங்கள், தொழிற்சாலைகள் அல்லது வளர்ச்சி திட்டங்களைத் தொடங்க வேண்டுமென்றால் சுற்றுச்சூழல் சட்டம் 1986-ன் கீழ் அனுமதி பெற வேண்டும். அந்தத் திட்டம் சுற்றுச்சூழலின் மீது ஏற்படுத்தும் தாக்கத்தை ஆராய்ந்து, அதை அறிக்கையாக அரசுக்கு அந்த நிறுவனம் சமர்ப்பிக்க வேண்டும். அந்தத் தொழிற்சாலை அமையவுள்ள இடம், பரப்பளவு, அதிலிருந்து வெளியேறும் கழிவுகளின் அளவு மற்றும் கழிவின் தன்மை, அதனால் சுற்றுச்சூழலுக்கு ஏற்படும் பாதிப்புகள், அருகில் வசிக்கும் மக்களின் உடல்நிலையில் அது ஏற்படுத்த போகும் பாதிப்புகள், மக்களின் வாழ்வாதாரத்தில் ஏற்படுத்தும் பாதிப்புகள் இவற்றோடு சூழலியல் பாதிப்புகளைக் களைய சூழலியல் மேலாண்மைத் திட்டம், பாதிப்புகளைக் குறைக்கத் தணிப்பு நடவடிக்கைகள் போன்றவற்றை விரிவாக ஆய்வு செய்து, சம்பந்தப்பட்ட நிறுவனம் தனது சுற்றுச்சூழல் தாக்க மதிப்பீட்டில் சமர்ப்பிக்க வேண்டும். அரசு சார்பில் அமைக்கப்பட்ட நிபுணர் குழு அதை ஆய்வு செய்து சுற்றுச்சூழலுக்கு ஆபத்து இல்லாத திட்டமாக இருந்தால் அதற்கு அனுமதி வழங்க முடியும்.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

சுற்றுச்சூழலுக்கு வேட்டு
வைக்கும் புதிய சட்டம்!
சுற்றுச்சூழலுக்கு வேட்டு வைக்கும் புதிய சட்டம்!

நடைமுறையில் உள்ள சுற்றுச்சூழல் தாக்க மதிப்பீடு 2006-ன் அம்சங்கள் என்ன?

“தற்போது இருக்கும் 2006 EIA வழிகாட்டுதலின்படி, தொழிற்சாலைகள் மற்றும் வளர்ச்சி திட்டங்கள் ஏ மற்றும் பி என்று இரண்டு பிரிவுகளாகப் பிரிக்கப்பட்டிருக்கின்றன. ஏ- பிரிவுத் திட்டங்களான அணுமின் நிலையங்கள், பெட்ரோல் சுத்திகரிப்பு, பெட்ரோகெமிக்கல் நிறுவனங்கள், ரசாயன உரம் மற்றும் பூச்சிக்கொல்லி தயாரிக்கும் நிறுவனங்கள், எரிவாயு குழாய் பதிப்பு, பெரிய அளவிலான சுரங்கப் பணிகள், நிலத்தடி எண்ணெய்-எரிவாயு நிலக்கரிப் படுகை மீத்தேன் எடுக்கும் திட்டங்கள் உட்பட முக்கியத்துவம் வாய்ந்த, அதேநேரத்தில் சூழலுக்கு அதிகம் கேடு விளைவிக்கக்கூடிய திட்டங்கள் ஏ பிரிவுத் திட்டங்களாக வகைப்படுத்தப்பட்டிருக்கின்றன. பி- பிரிவுத் திட்டங்களான 50 ஹெக்டேருக்குக் குறைவான சுரங்கப் பணிகள், 500 மெகாவாட் திறனுக்கு உட்பட்ட அனல் மின் நிலையங்கள், சர்க்கரை ஆலைகள், சிமென்ட் ஆலைகள், 500 ஹெக்டேர் பரப்பளவிற்குள் இருக்கும் தொழில் மண்டலங்களில் இயங்கும் தொழிற்சாலைகள் முதலிய திட்டங்கள் பி பிரிவுத் திட்டங்கள் என வரையறை செய்யப்பட்டிருக்கின்றன. இவற்றில் ஏ பிரிவுத் திட்டங்களுக்கு மத்திய நிபுணர் குழுவும், பி பிரிவுத் திட்டங்களுக்கு மாநில நிபுணர் குழுவும் மதிப்பீடு செய்து அனுமதி வழங்கும். ஏ, பி எந்தப் பிரிவாக இருந்தாலும் சரி அனைத்துத் திட்டங்களுக்கும் சூழலியல் தாக்க மதிப்பீடும், பொதுமக்கள் கருத்துக்கேட்பும் 2006 EIA-வில் அவசியமாக இருக்கின்றன.”

சுற்றுச்சூழல் தாக்க மதிப்பீடு 2020 புதிய வரைவில் திட்ட வகைப்பாட்டில் செய்யப்பட்டிருக்கும் மாற்றங்கள் என்ன?

“தற்போது அரசு கொண்டுவந்திருக்கும் புதிய வரைவில் திட்டங்கள் ஏ, பி1, பி2 என மூன்று பிரிவுத் திட்டங்களாகப் பிரிக்கப்பட்டுள்ளன. இதன்படி, ஏ பிரிவுத் திட்டங்களை, மத்திய நிபுணர் குழு மதிப்பீடு செய்து அனுமதி வழங்கும், இதற்கு இஐஏ ஆய்வறிக்கை மற்றும் மக்கள் கருத்துக்கேட்பு அவசியம். பி1 பிரிவுத் திட்டங்களுக்குச் சூழல் தாக்க மதிப்பீடு மற்றும் பொதுமக்கள் கருத்துக் கேட்பு அவசியம். ஆனால் மாநில நிபுணர் குழு மதிப்பீடு செய்து அனுமதி வழங்கும். பி2 பிரிவுத் திட்டங்களை மாநில நிபுணர் குழு மதிப்பீடு செய்து அனுமதி வழங்கும். ”

ஆனால் இதற்கு இஐஏ ஆய்வறிக்கையோ, பொதுமக்கள் கருத்துக் கேட்போ தேவையில்லை என்று வரையறை செய்யப்பட்டுள்ளது.

முந்தைய சட்டத்துக்கும், புதிதாக வரவிருக்கும் சட்டத்துக்கும் உள்ள வேறுபாடுகள் என்ன?

“முந்தைய சட்டத்தில் சூழலியல் தாக்க மதிப்பீடும், பொதுமக்கள் கருத்துக் கேட்பும் அவசியமாக இருந்த 25 சிவப்பு மற்றும் ஆரஞ்சு வகை நிறுவனங்களைத் தற்போது பி2 பிரிவுக்கு மாற்றியிருப்பதன் மூலம் அவற்றைத் தொடங்குவதற்குப் பொதுமக்கள் கருத்துக் கேட்போ, சூழலியல் தாக்க மதிப்பீடோ செய்ய வேண்டியதில்லை என்கிறது இந்தப் புதிய வரைவு.

சூழல்: சுற்றுச்சூழலுக்கு வேட்டு
வைக்கும் புதிய சட்டம்!

இந்தப் புதிய வரையறையின்படி பி2 பிரிவில் குறிப்பிடப்பட்டிருக்கும் 5 ஹெக்டேர் வரை நடைபெறும் கனிம சுரங்கப் பணிகள், 100 கி.மீ வரையிலான சாலை விரிவாக்கப் பணிகள், உள்நாட்டு நீர் வழிகள், நீர்ப்பாசன நவீனமயமாக்கல், அனைத்துக் கட்டுமானம், அமிலம் தயாரிக்கும் தொழிற்சாலைகள், சிமென்ட் ஆலைகள், 25 மெகாவாட் அளவிலான புனல் மின்சாரத் திட்டங்கள், தொழிற்பேட்டைகளில் இயங்கும் தோல் தொழிற்சாலைகள் மற்றும் முக்கியமாக நீருக்கடியிலும் பூமிக்கடியிலும் இருக்கும் எரிவாயு-நிலக்கரி-எண்ணெய் வளங்கள்-நிலக்கரி படிம மீத்தேன் எடுத்தல் ஆகிய திட்டங்களுக்கு இஐஏவும், கருத்துக்கேட்பும் அவசியமில்லை.”

புதிய சட்ட வரைவு கொண்டு வரப்பட்டால் என்ன நிகழும்?

“மக்கள் எவ்வளவு எதிர்ப்புத் தெரிவித்தாலும் அதைப் பொருட்படுத்தாமல் EIA 2020 சட்டத்தின் அடிப்படையில் சட்டப்படி திட்டத்தை அமல்படுத்தும் முழு அதிகாரத்தை அரசு பெறுகிறது. இத்திட்டங்களுக்குச் சூழலியல் அனுமதி கொடுக்கக் கூடாது என்று வலியுறுத்தித் தனி நபரோ அல்லது அமைப்புகளோ இயக்கங்களோ நீதி மன்றம் செல்லமுடியாதபடி புதிய வரைவில் மாற்றம் கொண்டுவரப்பட்டுள்ளது குறிப்பிடத்தக்கது. முக்கியமாகத் தேச நலன், பாதுகாப்புச் சார்ந்த திட்டங்கள் மற்றும் கடலில் 12 நாட்டிக்கல் மைல் தொலைவில் செயல்படுத்தும் திட்டங்கள் ஆகியவற்றை மக்களுக்குத் தெரியப்படுத்தவோ, பொதுமக்கள் கருத்துக் கேட்போ தேவையில்லை என்றும் சொல்கிறது புதிய வரைவு. இந்த வரையறையின் கீழ், கடல் வளத்தை அழிக்கும் சாகர் மாலா திட்டமும், நாட்டின் லட்சிய திட்டமாக பா.ஜ.க அரசால் கருதப்படும் பாரத்மாலா பரியோஜனா திட்டத்தின் கீழ் வரும் எட்டுவழிச் சாலை திட்டமும், தமிழகத்தை ராணுவ கேந்திரமாக்கும் திட்டமும், ஏன் நம் மலை வளத்தை நாசமாக்கத் துடிக்கும் நியூட்ரினோ திட்டமும் கூட இதன் அடிப்படையில் மக்கள் கருத்துக்கேட்பு இல்லாமல் நடைமுறை படுத்தப்பட வாய்ப்பிருக்கிறது.

சூழல்: சுற்றுச்சூழலுக்கு வேட்டு
வைக்கும் புதிய சட்டம்!

ஏற்கெனவே செயல்பாட்டில் இருக்கும் தொழிற்சாலைகள் கூடுதல் விரிவாக்கம் செய்யவோ அல்லது தங்களது உற்பத்தி முறையினை நவீனப்படுத்துவதாக இருந்தாலோ அந்த மாறுதல் மொத்த உற்பத்தியில் 50 சதவிகிதத்துக்குக் குறைவாக இருக்கும் பட்சத்தில் அந்த விரிவாக்கத்திற்கான சூழலியல் அனுமதி பெற மக்கள் கருத்துக் கேட்பு தேவையில்லை என்று புதிய வரைவின் பத்தி 16.1 சொல்கிறது. எளிமையாகச் சொல்ல வேண்டும் என்றால் ஏற்கெனவே மக்களையும் சூழலையும் பாதித்துக் கொண்டிருக்கும் ஸ்டெர்லைட் ஆலை விரிவாக்கம் செய்து கூடுதலாக உற்பத்தி செய்வதாக இருந்தால் அதற்கு மக்கள் கருத்துக் கேட்பு இல்லாமலே விரிவாக்கத்திற்கான அனுமதி வழங்கப்படும்.”

புதிய சட்ட வரைவில் உள்ள மற்ற முக்கியமான பிரச்னைகள் என்னென்ன?

“புதிய சட்ட வரைவில் மக்கள் தங்கள் கருத்துகளைத் தெரிவிக்கும் கால அவகாசம் 30 நாள்களிலிருந்து 20 நாள்களாகக் கணக்கிடப்பட்டுள்ளது. மக்கள் கருத்துக்கேட்புக் கூட்டம் நடத்துவதற்கான நாள்களும் 45 முதல் 40 நாள்களாகக் குறைக்கப்பட்டுள்ளன. கால அவகாசம் குறைக்கப்பட்டால், கருத்துக்கேட்பு என்பது முழுமையடையாது. ஒரு நிறுவனம் செயல்படும்போது, அது எந்தச் சூழலியல் சீர்கேடும் செய்யவில்லை என்று மாசுக்கட்டுப்பாட்டு வாரியத்திடம் 6 மாதங்களுக்கு ஒருமுறை அறிக்கை சமர்ப்பிக்க வேண்டும். இப்போது அது வருடத்துக்கு ஒருமுறை சமர்ப்பித்தாலும் போதும் என மாற்றியுள்ளனர். இனி சூழலியல் சீர்கேட்டில் நிறுவனம் ஈடுபட்டால் அதிகாரிகளின் பார்வைக்கு வர 1 வருடம் ஆகிவிடும். சூழலியல் அனுமதி உரிமத்தின் கால அளவைக் கூட்டியிருக்கிறார்கள். புதிய சட்டத்தில் ‘திட்டத்தைச் செயல்படுத்த கூடியவர்கள், ஏதாவது அரசுத் துறையினர், ஆய்வுக்குழு அல்லது மதிப்பீட்டுக்குழு’ என இவர்கள் மட்டும்தான் சூழலியல் விதிமீறல்களைப் பற்றிப் புகார் சொல்ல முடியும். மற்ற சாமானியர்கள் புகார் சொல்ல முடியாது.

முன்பெல்லாம் சூழலியல் அனுமதி வாங்கிவிட்டுத்தான் ஒரு திட்டமோ, தொழிற்சாலையோ தொடங்கப்படும். ஆனால், இப்போது தொழிற்சாலையைத் தொடங்கிவிட்டு, அதற்கு அபராதமும் கட்டிவிட்டுப் பின்னர்ச் சூழலியல் அனுமதி பெறும் நடைமுறையை இப்போது அறிமுகப்படுத்தியிருக்கிறது. முழுக்க முழுக்கப் புதிய வரைவு தொழில் நிறுவனங்கள் லாபமீட்டும் வகையிலும், சுற்றுச்சூழல் சீர்குலையும் வகையிலும் புதிய வரைவு இயற்றப்பட்டுள்ளது. இது முந்தைய சட்டங்களை நீர்த்துப்போகச் செய்யும் நடவடிக்கை.”