Published:Updated:

பண்ணைப் பள்ளி… செயல் விளக்கப் பயிற்சி… தொலைபேசி மூலம் ஆலோசனை…

ஒட்டுமொத்த விகடனுக்கும் ஒரே ஷார்ட்கட்

Use App
கால்நடை வளர்ப்பு குறித்த பயிற்சியில்...
கால்நடை வளர்ப்பு குறித்த பயிற்சியில்...

பயிற்சி

பிரீமியம் ஸ்டோரி

விவசாயிகளுக்கு வேளாண்மைத்துறை எவ்வளவு உதவிகள் செய்து வருகிறதோ… அதே அளவுக்கு வேளாண் அறிவியல் நிலையங்களும் உதவி செய்து வருகின்றன. பயிற்சி, ஆலோசனை, வழிகாட்டல் எனப்பல சேவைகளை ஆற்றி வருகின்றன, வேளாண் அறிவியல் நிலையங்கள். அப்படிச் சிறப்பாகச் செயல்படும் நிலையங்களில் விழுப்புரம் மாவட்டம், திண்டிவனத்தில் இயங்கிவரும் வேளாண் அறிவியல் நிலையமும் ஒன்று. கடந்த 2017-ம் ஆண்டில், மாநில அளவில் சிறந்த வேளாண்மை அறிவியல் நிலையமாகத் தேர்ந்தெடுக்கப்பட்டிருக்கிறது, இந்த நிலையம்.

வேளாண் அறிவியல் நிலையம்...
வேளாண் அறிவியல் நிலையம்...

விழுப்புரம் மாவட்டம் 22 வட்டாரங்களை உள்ளடக்கிய மிகப்பெரிய மாவட்டம். இந்த மாவட்டத்தில் நெல், கரும்பு, உளுந்து, பச்சைப்பயறு, நிலக்கடலை, கம்பு, கேழ்வரகு, கத்திரி, வெண்டை, மிளகாய், பந்தல் காய்கறிகள், மஞ்சள், மரவள்ளி, மலர்கள் எனப் பலவிதமான பயிர்கள் சாகுபடி செய்யப்படுகின்றன. விழுப்புரம் மாவட்டத்துக்கான வேளாண்மை அறிவியல் நிலையம், 2004-ம் ஆண்டு முதல் திண்டிவனத்தில் இயங்கி வருகிறது. எண்ணெய் வித்துக்கள் ஆராய்ச்சி நிலைய வளாகத்தில் அமைந்துள்ள இந்த நிலையம், தமிழ்நாடு வேளாண்மைப் பல்கலைக்கழகத்தின் நேரடிக் கட்டுப்பாட்டிலும், டெல்லியில் உள்ள இந்திய வேளாண் ஆராய்ச்சிக் கழகத்தின் நிதியுதவியுடனும் இயங்கி வருகிறது.

பண்ணைப் பள்ளி… செயல் விளக்கப் பயிற்சி… தொலைபேசி மூலம் ஆலோசனை…

இந்த நிலையத்தின் பணிகள்குறித்து, திட்ட ஒருங்கிணைப்பாளர் பேராசிரியர் சத்யாவிடம் பேசினோம். “தொழில்நுட்பப் பரிமாற்றத்தின் மூலம் வேளாண் உற்பத்தி மற்றும் உற்பத்தித் திறனை அதிகரித்தல், சுய வேலைவாய்ப்பைப் பெருக்குவதன் மூலம் கிராமப்புறங்களில் பொருளாதார முன்னேற்றத்துக்கு உறுதுணையாக இருத்தல் ஆகியவைதான் எங்களின் முக்கியப் பணிகள்.

பண்ணைப் பள்ளி… செயல் விளக்கப் பயிற்சி… தொலைபேசி மூலம் ஆலோசனை…

வயல்வெளி ஆய்வுகள்மூலம் விழுப்புரம் மாவட்டத்துக்கு ஏற்ற தொழில்நுட்பங்களைக் கண்டறிந்து அவற்றை உழவர்களுக்குச் சொல்லிக்கொடுக்கிறோம். பல்வகைப் பயிர்களின் செயல்முறை விளக்கத்திடல்களை அமைத்து உற்பத்தியின் அளவைக் கண்டறிதல் உள்ளிட்ட பல வேலைகளைச் செய்து வருகிறோம். புதிய ரக விதைகள் மற்றும் தரமான இடுபொருள்களை விவசாயிகளுக்குக் கொடுத்து வருகிறோம். மொத்தமாக 42.5 ஏக்கர் பரப்பளவில் நெல், தானிய வகைகள், பயறு வகைகள், எண்ணெய் வித்துக்கள், தோட்டக்கலைப் பயிர்கள், பழ மரங்கள், தீவனப்பயிர்கள் எனச் சாகுபடி செய்து வருகிறோம்.

நேரடி செயல்விளக்கப் பயிற்சி...
நேரடி செயல்விளக்கப் பயிற்சி...

இங்கு அமைக்கப்பட்டுள்ள செயல் விளக்கத் திடல்கள் மூலம் விவசாயிகளுக்குப் பயிற்சி அளிக்கப்பட்டு வருகிறது. தொழில்முனைவோர் பயன்பெறக்கூடிய வகையில்… மண்புழு உரம் தயாரிப்புக் கூடம், காளான் வளர்ப்புக் கூடம், கொட்டில் முறையில் ஆடு வளர்ப்பு, கோழி வளர்ப்புக் கூடம் ஆகியவை அமைக்கப்பட்டுள்ளன. உழவர்கள் தங்கி பயிற்சி பெறுவதற்கான ‘உழவர் விடுதி’யும் இங்கு அமைக்கப்பட்டுள்ளது. விவசாயிகளே நாற்றுகளை உற்பத்தி செய்துகொள்ளும் வகையில் நிழல் வலைக்குடில்கள் அமைக்கப்பட்டுள்ளன. நிறைய விவசாயிகள் இதைப் பயன்படுத்தி வருகிறார்கள். சொட்டுநீர்ப் பாசனத்துக்கான செயல் விளக்கத் திடல்களும் இங்கு உள்ளன. ஏறத்தாழ 150 நபர்கள் அமரும் வகையில் கருத்தரங்குக்கூடம் அமைக்கப்பட்டுள்ளது” என்ற சத்யா, நிலையத்தைச் சுற்றிக்காட்டியபடியே பேசினார்.

“இந்த மையம் தொடங்கப்பட்ட நாளிலிருந்து இதுவரை 126 செயல் விளக்கப் பயிற்சிகள் விவசாயிகளின் வயல்களில் நடத்தப்பட்டுள்ளன. அவற்றின் மூலமாக நெல், கேழ்வரகு, நிலக்கடலை, சோளம், கம்பு, பாசிப்பயறு, வெண்டை ஆகிய பயிர்களில் புதிய ரகங்களை விவசாயிகளிடம் பரவலாக்கியுள்ளோம். அதன்மூலம், விவசாயிகளின் வாழ்வாதாரம் உயர்த்தப்பட்டுள்ளது. செயல் விளக்கப் பயிற்சியில், பயிர்களில் வரும் நோய்களுக்கான முன்னெச்சரிக்கை நடவடிக்கைகள் குறித்த பயிற்சிகளும் வழங்கப்பட்டுள்ளன. குறிப்பாக வயல்வெளி ஆய்வுகளில் விழுப்புரம் மாவட்டத்துக்கு ஏற்ற உயர் விளைச்சல் தரும் ரகங்கள், வறட்சியைத் தாங்கி வளரும் ரகங்கள், இலைவழி நுண்ணூட்ட முறைகள், விதைநேர்த்தி, பூச்சி மற்றும் நோய் மேலாண்மை முறைகள் போன்றவை குறித்து விவசாயிகளுக்குப் பயிற்சி அளிக்கப்படுகிறது.

கால்நடை வளர்ப்பு குறித்த பயிற்சியில்...
கால்நடை வளர்ப்பு குறித்த பயிற்சியில்...

இயற்கை வள மேலாண்மை, பயிர் மேலாண்மை, கால்நடை மேலாண்மை, பயறு வகைப் பயிர்களில் விதை உற்பத்தி, துல்லிய பண்ணையம் ஆகிய பயிற்சிகளையும் வழங்கி வருகிறோம். உழவர் மன்றங்கள் உள்ளிட்ட பல செயல்பாடுகளைச் செய்து வருகிறோம். விழுப்புரம் மாவட்டம், பெரிய வட்டாரங்களை உள்ளடக்கியதால், அனைத்து விவசாயிகளும் நேரில் வர முடியாது. அதனால், அவர்களுக்கு ஒவ்வொரு புதன்கிழமைதோறும் மாலை 3 மணி முதல் 5 மணிவரை தொலைபேசிமூலம் ஆலோசனைகள் வழங்கி வருகிறோம்.

சத்யா
சத்யா

விழுப்புரம் மாவட்ட விவசாயிகள் பயன்பெறும் வகையில் வேளாண் அறிவியல் நிலையத்தில் விற்பனையகம் ஆரம்பிக்கப்பட்டுச் செயல்பட்டு வருகிறது. மேலும் விவசாயிகளுக்காக வாட்ஸ்அப் குழு ஒன்று ஆரம்பிக்கப்பட்டு வேளாண் தொடர்பான சந்தேகங்களுக்கு விளக்கம் அளிக்கப்பட்டு வருகிறது” என்ற சத்யா நிறைவாக, “பயிர்களில் ஏற்படும் பிரச்னைகளுக்குத் தீர்வுகாண பண்ணைப் பள்ளிகள் நடத்தப் படுகின்றன. குறிப்பாக இந்தப் பண்ணைப் பள்ளிகளில் ஒருங்கிணைந்த பூச்சி, நோய் மேலாண்மை முறைகள் மற்றும் மேம்படுத்தப்பட்ட சாகுபடிக் குறிப்புகள் பற்றி விவசாயிகளுக்கு அவர்களின் வயல்களிலேயே செயல் விளக்கம் அளிக்கப்படுகிறது.

தங்கி பயிற்சி பெறுவதற்கான ‘உழவர் விடுதி’யும் இங்கு அமைக்கப்பட்டுள்ளது. விவசாயிகளுக்காக வாட்ஸ்அப் குழு ஒன்றை ஆரம்பித்துள்ளோம்.

விவசாயச் செலவைக் குறைப்பதே இந்தப் பயிற்சியின் நோக்கம். விவசாயிகளுக்காகவும், கிராமப்புற வாழ்வாதாரங்களை உயர்த்துவதற்காகவும் தமிழ்நாடு வேளாண் பல்கலைக்கழகத்தின் உதவியுடன் எப்போதுமே சேவை செய்யக் காத்திருக்கிறது, இந்த மையம்” என்று சொல்லி விடைகொடுத்தார்.

தொடர்புக்கு, வேளாண் அறிவியல் நிலையம், திண்டிவனம், விழுப்புரம் மாவட்டம். தொலைபேசி: 04147 250001.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு