Published:Updated:

மும்முனை மின்சாரம் தட்டுப்பாடு... பன்முனை தாக்குதலில் விவசாயிகள்!

விவசாயிகள்
பிரீமியம் ஸ்டோரி
விவசாயிகள்

குறைந்த மின் அழுத்தத்தால் டிரான்ஸ்ஃபார்மரும் அடிக்கடி பழுதாகிவிடுகிறது.

மும்முனை மின்சாரம் தட்டுப்பாடு... பன்முனை தாக்குதலில் விவசாயிகள்!

குறைந்த மின் அழுத்தத்தால் டிரான்ஸ்ஃபார்மரும் அடிக்கடி பழுதாகிவிடுகிறது.

Published:Updated:
விவசாயிகள்
பிரீமியம் ஸ்டோரி
விவசாயிகள்
டெல்டா மாவட்ட விவசாயிகளுக்கு கோடை சாகுபடிக்கு கைகொடுப்பது ஆழ்துளைக் கிணறுகள்தான். அதற்கு, மும்முனை மின்சாரம் மிக முக்கியம்.

ஆனால், கடந்த ஒரு மாதத்துக்கும் மேலாக கடுமையான மின்சாரத் தட்டுப்பாட்டால் பயிர்களுக்கு தண்ணீர் பாய்ச்ச முடியாமல் தவித்துவருகின்றனர் விவசாயிகள். பயிர்கள் கருகத் தொடங்கிவிட்டன. நாற்று நடப்பட்ட வயல்கள் வெடித்துக் கிடக்க, விரக்தியில் தவிக்கின்றனர் விவசாயிகள்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

ஆழ்துளைக் கிணற்றுப் பாசன விவசாயிகள் நலச் சங்கத்தின் தஞ்சை மாவட்டத் தலைவர் புண்ணியமூர்த்தியிடம் பேசினோம். ‘‘தஞ்சாவூர் மாவட்டத்தில் மட்டும் மும்முனை மின்சாரத்தைப் பயன்படுத்தி, சுமார் 30,000 ஹெக்டேர் பரப்பளவில் ஆழ்துளைக் கிணற்றுப் பாசனம் நடைபெறுகிறது. இதில் 20,000 ஹெக்டேர் பரப்பில் நெல் பயிர் சாகுபடி செய்யப்படுகிறது. கரும்பு, சோளம், கடலை, உளுந்து, எள், பருத்தியும் பயிரிடப்பட்டுள்ளன.

வீரசேனன் - புண்ணியமூர்த்தி - தங்கமணி
வீரசேனன் - புண்ணியமூர்த்தி - தங்கமணி

தற்போது ஆயிரத்துக்கும் மேற்பட்ட விவசாயிகள், குறுவை நெல் நடவுப் பணிகளை முடித்துவிட்டனர். நூற்றுக்கணக்கான விவசாயிகள் நாற்று விட்டு நடவு செய்வதற்காகக் காத்துக்கிடக் கின்றனர். கோடை வெயில் சுட்டெரிப்பதால் பயிருக்கு அதிகளவில் தண்ணீர் பாய்ச்ச வேண்டியுள்ளது. ஆனால், கடந்த ஒரு மாதமாக மும்முனை மின்சாரம் பல மணி நேரம் துண்டிக்கப் படுகிறது. அப்படியே மின்சாரம் வந்தாலும் குறைந்த மின் அழுத்தத்துடன் வருவதால் மோட்டாரைப் பயன்படுத்த முடியவில்லை. மீறி பயன்படுத்தினால் மோட்டார் பழுதாகிவிடுகிறது. அதை சரிசெய்ய, இருபதாயிரம் ரூபாய் வரை செலவாகிறது.

இன்னொரு பக்கம் குறைந்த மின் அழுத்தத்தால் டிரான்ஸ்ஃபார்மரும் அடிக்கடி பழுதாகிவிடுகிறது. இதை சரிசெய்ய, மின் ஊழியர்கள் டிரான்ஸ் ஃபார்மரை மின்வாரிய அலுவலகத்துக்கு ஏற்றிச் செல்வார்கள். அந்தச் செலவையும் விவசாயிகள் தலையில் கட்டிவிடுகின்றனர். இதனால், சீராக நீர் பாய்ச்ச முடியாமல் பயிர்கள் கருகிவருகின்றன. விவசாய நிலங்கள் வறண்டு வெடித்துக் கிடக்கின்றன’’ என்றார்.

கோடைக்காலங்களில் குறைந்தது 20 மணி நேரமாவது தங்குதடையின்றி மின்சாரம் கொடுக்க வேண்டும் என, டெல்டா விவசாயிகள் தமிழக அரசுக்கு தொடர்ந்து கோரிக்கைவிடுத்து வருகின்றனர். இதுகுறித்துப் பேசும் பட்டுக் கோட்டையைச் சேர்ந்த விவசாயி வீரசேனன், ‘‘பட்டுக்கோட்டை மற்றும் சுற்றுவட்டாரப் பகுதிகளில் கடந்த வருடம் கஜா புயலில் விழுந்த தென்னைமரங்களுக்கு மாற்றாக புதிய தென்னங் கன்றுகளை வைத்து பராமரித்து வருகிறோம். விவசாயத்துக்கு ஒரு நாளைக்கு பகல் 12 மணியிலிருந்து மாலை 6 மணி வரையும், இரவு 12 மணியிலிருந்து காலை 6 மணி வரையும் என மொத்தம் 12 மணி நேரம் மின்சாரம் கொடுக்கப்படும் என அரசு அறிவித்துள்ளது.

மும்முனை மின்சாரம் தட்டுப்பாடு...  பன்முனை தாக்குதலில் விவசாயிகள்!

ஆனால், சில மணி நேரம்கூட மும்முனை மின்சாரம் முறையாக வருவதில்லை. இதனால் நடவு நட்ட பயிர்கள் கருகிவருகின்றன. தண்ணீர் பற்றாக்குறையால் தென்னங்கன்றின் மட்டைகளை வெள்ளை ஈக்கள் தாக்கத் தொடங்கியுள்ளன. வேளாண் துறை அதிகாரிகளிடம் முறையிட்டால், `மட்டைகளில் தண்ணீரைப் பீய்ச்சி அடித்தால் சரியாகிவிடும்’ என்கின்றனர். வயலுக்குப் பாய்ச்சவே தண்ணீர் இல்லாத நிலையில், மட்டைகளில் எப்படி தண்ணீர் பீய்ச்சியடிக்க முடியும்?” என்றார் கவலையுடன்.

கொரோனா ஊரடங்கால், களை எடுக்கவும் விவசாயத் தொழிலாளர்கள் வருவதில்லை. இதனால் களைக்கொல்லி மருந்தை விவசாயிகள் பயன் படுத்துகின்றனர். ஆனால், நிலைமையைச் சாதகமாக்கிக் கொண்ட தனியார் உரக்கடைகள், 4,500 ரூபாய்க்கு விற்கும் ஒரு லிட்டர் களைக்கொல்லி மருந்தை 6,500-ரூபாய்க்கு விற்கின்றன.

கோடை சாகுபடிதான் விவசாயிகளுக்கு நல்ல விளைச்சலைக் கொடுக்கும். ஆனால், மும்முனை மின்சாரம் தட்டுப்பாட்டால் பெரும் இழப்பு ஏற்படும் நிலைக்கு விவசாயிகள் தள்ளப்பட்டுள்ளனர். தமிழகம் முழுவதுமே இந்தப் பிரச்னை இருந்தாலும், டெல்டா மாவட்டங்களில் இது அதிக பாதிப்பை ஏற்படுத்தியுள்ளது.

“கொரோனா ஊரடங்கால் தொழிற்சாலைகள், வணிக நிறுவனங்கள் மூடப்பட்டுள்ளதால், மின் பயன்பாடு குறைந்துவிட்டது. இதனால் தமிழகத்தில் மின் தட்டுப்பாடு இல்லை” என்று கூறுகிறார் மின்சாரத் துறை அமைச்சர் தங்கமணி. `அப்படியானால், இந்த நேரத்திலும் விவசாயிகளுக்கு முழு மின்சாரத்தையும் தர முடியாமல்போனது ஏன்?’ என்று கேட்கின்றனர் விவசாயிகள்.

இதுகுறித்து மின்சாரத் துறை அமைச்சர் தங்கமணியிடம் பேசினோம். ‘‘விவசாயிகளுக்கு தினமும் 12 மணி நேரம் மும்முனை மின்சாரம் கொடுக்கப்பட்டுவருகிறது. இருமுனை மின்சாரம் வரும்போதும் விவசாயிகள் ஆழ்துளைக் கிணறுக்கான மோட்டாரைப் பயன்படுத்துவதால் லோ வோல்டேஜ் ஏற்படுகிறது. இனி இதுபோன்ற பிரச்னைகள் ஏற்படாத வகையில், நடவடிக்கை எடுக்கப்பட்டுள்ளது’’ என்றார்.

ஆனால், களத்தில் எந்த மாற்றமும் தெரியவில்லை. கருகுவது பயிர்கள் மட்டுமல்லை... விவசாயிகளின் வாழ்வாதாரமும்தான்!