Published:Updated:

விருதுகள் வாங்கிக் குவிக்கும் விவசாய சேவா சங்கம் டியூகாஸ்!

சிறந்த வேளாண் சங்கத்திற்கான விருது
பிரீமியம் ஸ்டோரி
News
சிறந்த வேளாண் சங்கத்திற்கான விருது

கூட்டுறவு

மிழ்நாட்டில் மொத்தம் 4,454 கூட்டுறவு வேளாண் சங்கங்கள் செயல்பட்டு வருகின்றன. விவசாயிகளின் பங்களிப்புடன் செயல்படும் பெருவாரியான கூட்டுறவுச் சங்கங்கள் பல கோடி ரூபாய் வைப்பு நிதியுடன் லாபகரமாக இயங்கி வருகின்றன.

அப்படி இயங்கிவரும் கூட்டுறவுச் சங்கங்களில் ஒன்றுதான், ‘டியூகாஸ்’ (Tucas) எனப்படும் துடியலூர் கூட்டுறவு விவசாய சேவா சங்கம். 1955-ம் ஆண்டு அன்றைய முதலமைச்சர் காமராஜரால் தொடங்கப்பட்ட இந்தச் சங்கம் இன்று பலகோடி ரூபாய் வைப்பு நிதி, ஆண்டுக்கு 250 கோடி ரூபாய் வணிகம் என்று நாட்டின் முன்னோடி நிறுவனமாக விளங்குகிறது. இந்த சங்கத்தின் செயல்பாடுகள் குறித்து, விளக்குகிறார் அதன் மேலாண்மை இயக்குநர் மற்றும் இணைப்பதிவாளர் ஏ.விஜயசக்தி.

ஏ.விஜயசக்தி
ஏ.விஜயசக்தி

‘‘கோயம்புத்தூர் மாவட்டம், துடியலூர் கிராமத்தில் 1955-ம் ஆண்டு ‘டியூகாஸ்’ எனப்படும் துடியலூர் கூட்டுறவு விவசாய சேவா ஸ்தாபனம் தொடங்கப்பட்டது. இதன் முதல் தலைவராக இருந்தவர் வி.சி.சுப்பையா கவுண்டர். அவர் தனக்குச் சொந்தமான 31 சென்ட் நிலத்தைக் கூட்டுறவு சேவா ஸ்தாபனம் அமைக்க வழங்கியுள்ளார். இன்று அது 12 ஏக்கராக வளர்ந்துள்ளது. எங்கள் சங்கத்தில், நரசிம்மநாயக்கன் பாளையம், இடிகரை, வெள்ளக்கிணர், உடையாம்பாளையம், கணபதி, சரவணம்பட்டி, பன்னிமடை, வடமதுரை, பழனிக்கவுண்டன் புதூர், சங்கனூர் உள்ளிட்ட ஊர்களில் உள்ள 16,000 விவசாயிகள் முதல் நிலை உறுப்பினராக இருக்கிறார்கள். அவர்களுக்கு ஆண்டுக்கு 20 சதவிகிதம் ஈவுத்தொகையாக வழங்கி வருகிறோம். 2 லட்சம் வாடிக்கையாளர்கள் சாதாரண உறுப்பினர்களாக இருக்கிறார்கள். கிராமப்புறத்தில் தொடங்கப்பட்ட சங்கமாக இருந்தாலும், இப்போது இதன் சில பகுதிகள் மாநகராட்சி எல்லைக்குள் வந்துவிட்டன. 9 இடங்களில் எங்கள் நிறுவனத்திற்குக் கிளைகள் உள்ளன. அதில் 5 கிளைகள், கோவை மாநகரத்தின் இதயப்பகுதியில் அமைந்து, நகர மக்களுக்கும் சிறப்பான சேவையாற்றி வருகிறது. கிராமப்புற ஸ்தாபனம் மாநகரத்தில் கிளைகள் அமைத்துச் சேவையாற்றி வருவது எங்கள் வளர்ச்சிக்குச் சான்று. விவசாயப் பயிர்க்கடன்கள், நகைக்கடன்கள், வீட்டு வசதி கடன்கள், தனிநபர் கடன்கள் மட்டுமல்லாமல் பல்வேறு வணிகம் சார்ந்த நிதி செயல்பாடுகளை உள்ளடக்கிச் செயல்படும் இந்த நிறுவனம், 65 ஆண்டுகளாகத் தொடர்ந்து லாபத்தில் இயங்கி வருகிறது. குறிப்பாக விவசாயம் கிராமப்புற வளர்ச்சி ஆகியவற்றில் முழு மூச்சுடன் பணியாற்றி வருகிறது.

விருதுகள் வாங்கிக் குவிக்கும் விவசாய சேவா சங்கம் டியூகாஸ்!

அதன் அடிப்படையில் இடுபொருள் மற்றும் பூச்சி மருந்துகள் உற்பத்தியும் நடைபெறுகிறது. 12 வகையான கலப்பு உரங்களைத் தயாரித்து, ஆண்டுக்கு 10,000 டன் அளவில், தமிழ்நாட்டில் உள்ள கூட்டுறவு வேளாண் விற்பனை நிலையங்களுக்கு அனுப்பி வருகிறோம். நிறுவன வளாகத்தில் பெட்ரோல் நிலையம் ஒன்றும், நீரா பானம் விற்பனை அங்காடி ஒன்றும் செயல்படுகிறது. நிறுவனத்தின் சார்பில் அச்சகம் ஒன்றும் இயங்கி வருகிறது. பயிர்களுக்கு மருந்து தெளிக்கும் விசைத்தெளிப்பு கருவிகளைச் சொந்தமாகத் தயாரித்து ‘டியூகாஸ்’ என்கிற பெயரில் விற்பனை செய்து வருகிறோம். டிராக்டர் உள்ளிட்ட பண்ணை இயந்திரங்களைக் குறைந்த வாடகைக்கு விவசாயிகளுக்கு வழங்கி வருகிறோம். புதிய வீடு கட்ட கடனுதவியும் உண்டு.

சிறந்த வேளாண் சங்கத்திற்கான விருது
சிறந்த வேளாண் சங்கத்திற்கான விருது

‘நல் விதை, நல் விளைச்சல்’ என்கிற தாரக மந்திரத்தை மனதில்கொண்டு, 1977-ம் ஆண்டுமுதல் விதைநெல் உற்பத்தியை மேற்கொண்டு வருகிறோம். ஒப்பந்தப் பண்ணை மூலம் ஆண்டுக்கு 1,000 மெட்ரிக் டன் விதைநெல் உற்பத்தி செய்யப்படுகிறது. விதைப் பரிசோதனை மூலம் முளைப்புத்திறன் பரிசோதனை செய்யப்பட்டு, தேவையான விவசாயிகளுக்குக் ‘கோவை விதைகள்’ (Kovai Seeds) என்ற பெயரில் குறைந்த விலையில் விற்பனை செய்து வருகிறோம். 20 ஆண்டுகளாக மாவட்ட, மாநில அளவில் சிறந்த கூட்டுறவுச் சங்கத்திற்கான விருதைத் தொடர்ந்து இந்தச் சங்கம் பெற்றுவருகிறது. எங்கள் நிறுவனத்தின் பொது நல நிதியிலிருந்து 16 அரசு ஆரம்பப் பள்ளிகளுக்கு வளர்ச்சி நிதி வழங்கி வருகிறோம். எதிர்காலத்தில் தேசிய அளவில் சிறந்த சங்கமாகத் துடியலூர் கூட்டுறவு விவசாயச் சேவா சங்கம் திகழும்’’ என்றார் நம்பிக்கையுடன்.

டியூகாஸ் அலுவலகம்
டியூகாஸ் அலுவலகம்

தொடர்புக்கு, விஜயசக்தி, செல்போன்: 99943 45034

எதிர்காலத் திட்டம்!

டியூகாஸ் நிறுவனத்தில் தற்போதைய தலைவர் எம்.சுப்பையனிடம் நிறுவனத்தின் எதிர்காலச் செயல்பாடுகள் குறித்துப் பேசினோம்.

 எம்.சுப்பையன்
எம்.சுப்பையன்

‘‘வேப்பம் பிண்ணாக்கு, நுண்ணூட்டக் கலவை உரம் ஆகியவற்றை வல்லுநர்களைக் கொண்டு தயாரித்து விவசாயிகளுக்கு வழங்கிவருகிறோம். தென்னை விவசாயிகளை மேம்படுத்தும் விதமாக அரசு அங்கீகாரத்துடன் நீரா பானம் மற்றும் ஆவின் பாலகம் ஆகியவற்றின் விற்பனையைத் தொடங்கி நடத்தி வருகிறோம். இதோடு மரச்செக்கு எண்ணெயையும் உற்பத்தி செய்து வழங்கி வருகிறோம். நகர்ப்புறவாசிகள் பலர் தங்கள் வீடுகளில் மாடித்தோட்டம் அமைத்துத் தங்கள் குடும்பத்திற்குத் தேவையான காய்கறிகள், கீரைகளை உற்பத்தி செய்வது அதிகரித்து வருகிறது. மாடித்தோட்டம் அமைக்கத் தேவையான உபகரணங்கள் மற்றும் குறைந்த எடை கொண்ட இடுபொருள்களைக் குறைந்த விலையில் வழங்கும் எதிர்காலத் திட்டமும் வைத்துள்ளோம்’’ என்றார்.