`ரூ.12,110 கோடி விவசாய கடன் தள்ளுபடி - தமிழக அரசு அறிவிப்பு' - விவசாயிகள் என்ன சொல்கிறார்கள்?

அதேசமயம் விவசாயிகள் கூட்டுறவு வங்கிகளில் வாங்கிய கடன்களை மட்டும் தள்ளுபடி செய்வதோடு மட்டுமல்லாமல், தேசிய மற்றும் வணிக வங்கிகளில் வாங்கிய கடன்களையும் தள்ளுபடி செய்ய வேண்டும். புயல், மழை பாதிப்பு என்பது அனைத்து விவசாயிகளுக்கும் பொதுவானது. கூட்டுறவு வங்கிகள் கடந்த 5 ஆண்டுகளாக மிகவும் நலிவடைந்த நிலையில் இருப்பதால், நிறைய விவசாயிகளுக்கு இங்கு பயிர் கடன் கிடைக்கவில்லை. வேறு வழியில்லாமல் தேசிய மற்றும் வணிக வங்கிகளில்தான் கடன் பெற்றுள்ளார்கள்.

அந்தக் கடன்களையும் தள்ளுபடி செய்ய வேண்டும். 5 ஏக்கர் வரை நிலம் வைத்துள்ள சிறு, குறு விவசாயிகளின் கடன்கள் மட்டும்தான் தள்ளுபடி செய்யப்படும் என சொல்லாமல், 5 ஏக்கருக்கு மேல் நிலம் வைத்துள்ள பெரு விவசாயிகளின் கடன்களையும் தள்ளுபடி செய்ய வேண்டும். வரப்போகும் சட்டமன்றத் தேர்தலை மனதில் வைத்து முதலமைச்சர் எடப்பாடி பழனிசாமி இத்தகைய அறிவிப்பை வெளியிட்டிருந்தாலும் கூட, இதை நாங்கள் மனதார வரவேற்கிறோம். நன்றி தெரிவித்துக்கொள்கிறோம்" எனத் தெரிவித்தார்.

தஞ்சை மாவட்ட காவிரி விவசாயிகள் பாதுகாப்பு சங்கத்தின் துணைத் தலைவர் சுகுமாறன், ``தமிழக சட்டமன்றத்தின் ஆயுட் காலம் இன்னும் மூன்று மாதத்தில் முடிய இருக்கிறது. தற்போது நடைபெறும் சட்டமன்ற கூட்டத்தொடர் என்பது சம்பிரதாயத்துக்காக மட்டுமே நடைபெறக்கூடியது. பெரிய அளவிலான நிதி ஒதுக்கீடு செய்வதென்பது எப்படி சாத்தியம் எனத் தெரியவில்லை.

விவசாய கடன் தள்ளுபடிக்கான 12,110 கோடி ரூபாய்க்கு எங்கிருந்து நிதி ஒதுக்குவார்கள் எனத் தெரியவில்லை. எனவே, தற்போதைய அறிவிப்பு வெறும் கானல் நீராக இருந்துவிடப் போகிறதோ என சந்தேகமாக உள்ளது. உண்மையாகவே கடன் தள்ளுபடி செய்யப்பட்டு, உடனடியாக நடைமுறைக்கு வந்தால் மிகுந்த மகிழ்ச்சி. தமிழக முதல்வருக்கு நன்றி தெரிவிப்போம்’’ எனத் தெரிவித்தார்.