Published:Updated:

உழவு, உரம், பால், நெய்... அசத்தும் அம்ரித் மகால் நாட்டு மாடுகள்!

அம்ரித் மகால் மாடுகள்
பிரீமியம் ஸ்டோரி
News
அம்ரித் மகால் மாடுகள்

கால்நடை

நாட்டுமாடுகள் கோலோச்சிக் கொண்டிருந்த நம்முடைய விவசாயத்தில் இன்று கலப்பின மாடுகள் தவிர்க்க முடியாத அங்கமாக இருந்து வருகின்றன. அதேசமயம், நாட்டுமாடுகளுக்கான மவுசு உயர்ந்துகொண்டேதான் இருக்கிறது. இன்றும் நாட்டுமாடுகள் அதற்குரிய மரியாதையோடுதான் பார்க்கப்படுகின்றன. பசுமை விகடன் பொங்கல் சிறப்பிதழில் ஒவ்வோர் ஆண்டும் நாட்டு மாடுகள் பற்றிய சிறப்புகளை எழுதி வருகிறோம். தமிழ்நாட்டில் காங்கேயம், புலிக்குளம், உம்பளச்சேரி, பர்கூர், ஆலம்பாடி மாடுகள் பற்றி எழுதியிருக்கிறோம். அதேபோல அண்டை மாநிலங்களின் ஓங்கோல், புங்கனூர் குட்டை, ஹல்லிக்கர் மாடுகளைப் பற்றியும் எழுதியிருக்கிறோம். அந்த வரிசையில் கர்நாடக மாநிலத்தின் நாட்டு மாடுகளான அம்ரித் மகால், மலநாடு கிட்டா குறித்து இந்தப் பொங்கலுக்குப் பார்ப்போம்.

அம்ரித் மகால், உலகின் பழைமையான மாட்டினங் களில் ஒன்று என்று சொல்லப்படுகிறது. 500 ஆண்டு களுக்கு முன்பு மன்னராட்சிக் காலத்திலிருந்தே கர்நாடகாவில் இந்த மாட்டுக்கெனப் பண்ணைகள் அமைத்து பராமரிக்கப்பட்டு வருகிறது. சிக்மகளூர், ஷிமோகா, ஹாசன், சித்ரதுர்கா மற்றும் மைசூரு மாவட்டங்களில் பரவலாக வளர்க்கப்பட்டு வருகின்றன, இந்த மாடுகள்.

ராணுவ வீரர்களைப்போல நடந்து வரும் அம்ரித் மகால் மாடுகள்
ராணுவ வீரர்களைப்போல நடந்து வரும் அம்ரித் மகால் மாடுகள்

அம்ரித் மகால் மாடுகளுக்கெனச் செயல்படும் இனப்பெருக்க மையம் (பண்ணை), சிக்மகளூர் மாவட்டம், அஜம்புராவிலிருந்து 2 கி.மீ தொலைவில் உள்ளது. சுமார் 800 ஏக்கரில் அம்ரித் மகால் மாடுகளுக்கென்றே இயங்கி வருகிறது இந்தப் பண்ணை. பண்ணைக்குள் நுழைந்ததும் மடிக்கேரி மாடல் பழைய அரசு கட்டடம் நம்மை வரவேற்றது. மேய்ச்சலுக்குச் செல்ல மாடுகள் ஆயத்தமாகிக் கொண்டிருந்த வேளையில் பண்ணையை வலம் வந்தோம். பண்ணை குறித்தும், மாடுகள் குறித்தும் பேசினார் கர்நாடக கால்நடை பராமரிப்புத் துறையின் கால்நடை அலுவலர் முனைவர் பிரித்விராஜ்.

“உலகின் பழைமையான மாட்டினங்களில் அம்ரித் மகாலும் ஒன்று. ‘அம்ரித் மகால்’ என்று சொல்லுக்கு ‘பால் வள மாளிகை’ என்று பெயர். 1572-ம் ஆண்டு இந்த மாட்டின் இனம் கண்டறியப்பட்டு பராமரிக்கப்பட்டு வருகிறது. கிட்டத்தட்ட இங்கிலாந்திலுள்ள குட்டைக் கொம்பு (Short Horn) மாட்டினத்தின் காலத்தைச் சேர்ந்தது. மைசூரு உடையார்களின் ஆட்சிக்காலம், திப்புச் சுல்தான் காலம், பிரிட்டிஷ் ஆட்சிக் காலம் என மூன்று ஆட்சிக்காலத்திலும் நடைபெற்ற போர்களில் இந்த மாடுகள் ராணுவ தளவாடங்கள், உணவுப் பொருள்கள் ஆகியவற்றைக் கொண்டு செல்ல பயன் படுத்தப்பட்டிருக்கின்றன. குறிப்பாக 19-ம் நூற்றாண்டில் நடைபெற்ற ஆப்கன் போரில் இமயமலையின் மலைப் பகுதிகளில் இந்த மாடுகள் எளிதாகப் பொருள்களைக் கொண்டு செல்ல பயன்பட்டிருக்கின்றன. ஒட்டகம், குதிரைகள் செல்ல முடியாத இடங்களுக்குக்கூட இந்த மாடுகள் சுமைகளை ஏற்றிக்கொண்டு எளிதாகச் சென்று வந்திருக்கின்றன.

ஆங்கிலேயர் ஆட்சிக் காலத்தில் குதிரைகள் அதிகம் பயன்பாட்டில் இருந்தன. அப்படியிருந்தும் மாடுகள் பயன்படுத்தப்பட்டதன் காரணம் குதிரைகள் வேகமாகச் செல்லும். ஆனால், அதிக எடையுள்ள பொருள்களை வேகமாகக் கொண்டு செல்லாது. மாடுகள் மெதுவாகச் சென்றாலும் அதிக எடையுள்ள பொருள்களை நீண்ட தொலைவுக்கு எடுத்துச் செல்லும்.

பிரிட்டிஷ் ஆட்சிக் காலத்தில் வண்டி இழுக்கும் அம்ரித் மகால் மாடுகள்
பிரிட்டிஷ் ஆட்சிக் காலத்தில் வண்டி இழுக்கும் அம்ரித் மகால் மாடுகள்

இதுபற்றி ஆங்கிலேய கேப்டன் டேவிட்சன் பதிவு செய்துள்ள குறிப்பில், ‘எங்களுடைய பாம்பே படையில் 230 மைசூரு மாட்டு வண்டிகளை ஆப்கன் போரில் பயன் படுத்தினோம். எங்கள் படை பிரிவுக்குச் சொல்லியிருந்தேன். நாம் செல்லும் இடம் அதிகம் உணவு கிடைக்கக்கூடிய இடமல்ல. அதனால், தண்ணீர், உணவை அதிகம் எதிர்பார்க்காத மாடுகளாக இருக்க வேண்டும் என்று. அதற்கேற்றாற்போல் தொடர்ந்து 16 மணி நேரம் வண்டிகளை இழுத்தன இந்த மாடுகள். ஆப்கனிலிருந்து இந்தியா திரும்பும் திரா மலைப்பகுதிகள் மனிதர்களே அதிகம் நடமாடாத, சாலை வசதியே இல்லாத பகுதி. ஆனால், அதிலும் இந்த மாடுகள் தளவாடங்களை ஏற்றிக்கொண்டு இந்தியா வந்தடைந்தது. வறட்சியைத் தாங்கி, வேலையைச் செய்யக்கூடிய இந்த மைசூரு மாடுகள் மாடுகளிலேயே சிறந்தவை’ என்று தெரிவித்துள்ளார்.

1808-ல் மைசூர் கமிஷனர், ‘அம்ரித் மகால் மாடுகள் ரொம்பவே சுறுசுறுப்பு, பார்ப்பதற்கு அழகு, ராணுவத்தினரைவிட வேகமாக ஓடும் திறனுடையது. மிகவும் வித்தியாசமான இனமாக இந்த மாட்டினத்தைப் பார்க்கிறோம். அரபு நாடுகளுக்குக் குதிரை வண்டிகள்போல் இந்தியாவுக்கு மாட்டுவண்டிகள்தான். இந்தியாவின் போக்குவரத்து, பொருளா தாரத்தில் மாட்டு வண்டிகள் முக்கியப் பங்காற்றி வருகின்றன’ என்று தெரிவித்துள்ளார். இப்படி இந்த மாட்டின் பெருமைகளைச் சொல்லிக்கொண்டே போகலாம்” என்றவர் பண்ணை பற்றிய தகவல்களைப் பகிர்ந்து கொண்டார்.

பிரித்விராஜ்
பிரித்விராஜ்

“முதன்முறையாக விஜயநகரப் பேரரசர் கிருஷ்ண தேவராயர் (1572-1600) ஆட்சிக் காலத்தில் ஶ்ரீரங்கப்பட்டணத்தில் ஹல்லிக்கர் மற்றும் அம்ரித் மகால் மாடுகளுக்கென்று ‘கருஹட்டி’ (Herd) அமைத்து பாதுகாத்தார். விஜய நகர ஆட்சிக்குப் பிறகு, மைசூரு மகாராஜாக்கள் (1617-1704) பராமரித்தனர். அவர்களில் சிக்கத் தேவராஜ உடையார் ‘பென்னே சாவடி’ (Calf Shed) என்ற பெயரில் அம்ரித் மகால் மாடுகளின் இனப்பெருக்கத் துக்காகப் பண்ணைகளையும், தீவனத்துக்காக மேய்ச்சல் நிலங்களையும் உருவாக்கினார்.

அதன் பிறகு ஹைதர் அலி, திப்பு சுல்தான் காலத்தில் ராணுவத்தில் பயன்படுத்து வதற்காகவே தனியாக மாடுகளுக்குப் பயிற்சி கொடுத்து தயார் செய்தார். அப்போதே 60,000 மாட்டு வண்டிகளை வைத்திருந்தார் என்றால் பார்த்துக்கொள்ளுங்கள். அதேபோல் நல்ல பால் கொடுக்கும் மாடுகளைத் தனியாகவும் நன்றாக உழவு ஓட்டும் மாடுகளைத் தனியாகவும், வண்டியோட்டும் மாடுகளைத் தனியாகவும் ஷெட் அமைத்து பிரித்து வளர்க்கப்பட்டன. திப்பு சுல்தானிடமிருந்து மீண்டும் ஆங்கிலேயர் ஆட்சியின் கீழ் வந்தது மைசூரு. 1860-ம் ஆண்டு கமிஷனர் சார்லஸ் ட்ரேவெலின் என்பவர் ‘மாடுகளைப் பராமரிப்பது அரசுக்குத் தண்டச் செலவு, இதனால் பெரிய பயனில்லை’ என்று சொல்லி அம்ரித் மகால் மாடுகளின் பண்ணைகளைப் பராமரிக்காமல் விட்டுவிட்டார். ஆறு ஆண்டு களுக்குப் பிறகு, மீண்டும் 1866-ல் மைசூர் மும்மடி கிருஷ்ண ராஜ உடையார் பண்ணை களைப் பராமரிக்க உத்தரவிட்டார். இவர்தான் காவல் என்ற அமைப்பை உருவாக்கி குளிர், வெயில், மழைக்காலங்களிலும் பிரச்னையின்றி மாடுகளைச் சமாளிக்கத் தீவனப்புற்களை வளர்க்க உத்தரவிட்டார். இந்த மாடுகளின் சிறப்புகளை விளக்கி அப்போதைய மெட்ராஸ் மாகாணத்துக்கு 4,000 பசு மாடுகள், 100 காளை மாடுகளை விற்பனை செய்திருக்கிறார்.

அம்ரித் மகால் மாடுகள்
அம்ரித் மகால் மாடுகள்

மைசூரு சமஸ்தானம், பிரிட்டிஷ் அரசாங்கம் என மாறி இப்போது கர்நாடக கால்நடை பராமரிப்புத் துறையின் கீழ் செயல்பட்டு வருகிறது. டாக்டர் வில்லியம் ஸ்மித் என்பவர் 1929-ம் ஆண்டு இந்த மையத்தை உருவாக்கினார். அப்போது இங்கே மாடுகளைப் பராமரிக்கத் தமிழ்நாட்டிலிருந்துதான் ஆட்கள் அழைத்து வரப்பட்டார்கள்” என்றவர், மாடுகளின் சிறப்புகளைப் பற்றிப் பேசினார்.

“சிக்மகளூர், ஹாசன், சித்ரதுர்கா மாவட்டங்களில் பார்த்தீர்களென்றால் நிலமெல்லாம் தமிழ்நாட்டின் விருதுநகர் மாவட்டம் போல கரிசல் மண்ணும், சில இடங்களில் கற்கள் கலந்த செம்மண்ணும் தான் இருக்கும். பெரிய பெரிய வயல்களாக இருக்கும் இந்த நிலங்களை உழவு ஓட்ட அம்ரித் மகால் மாடுகள்தான் பயன்படுத்தப்பட்டு வந்தன. தொடர்ந்து 6 மணிநேரம் ஓய்வின்றி ஏர் ஓட்டும் தன்மை கொண்டவை இந்த மாடுகள். இப்போது பாக்கு, வெங்காயம், வெனிலா, மக்காச்சோளம் போன்ற பணப்பயிர்கள் வந்துவிட்டதால் இங்கேயும் உழவு என்பது அருகி வருகிறது. இருப்பினும் வண்டி ஓட்ட, உழவு ஓட்ட மாடுகள் தேவைப்படுவோர் ஆண்டுக்கு ஒருமுறை இங்கே நடக்கும் ஏலத்தில் கலந்துகொண்டு மாடுகளை வாங்கிச் செல்கின்றனர்.

பண்ணையில் தீவனம்
பண்ணையில் தீவனம்

கொரோனாவுக்கு முன்பு 2019-ல் 1.2 கோடி ரூபாய்க்கு ஏலம் போனது. மாடுகள் விற்பதன் மூலம் கிடைக்கும் தொகையைக் கொண்டு பண்ணையை நிர்வகிக்கிறோம். இந்த மையத்துக்குக் கீழ் 5 சிறிய பண்ணைகள் இருக்கின்றன. அங்கேயும் மாடுகள் பராமரிக்கப்பட்டு வருகின்றன. அரசும் நிதியுதவி செய்கிறது. மேலும் தகவல் தேவைப்படுவோர் மையத்தை அணுகலாம்” என்றார்.

500 ஆண்டுகளாகப் பண்ணைகள் அமைத்து பாதுகாத்து வந்த நாட்டு மாடுகள், இந்த 50 ஆண்டுகளில் குறைந்துபோனதை நினைத்துக் கொண்டே அங்கிருந்து விடைபெற்றோம்.

மைசூரின் புறநகர் பகுதியான ராமகிருஷ்ணா நகரில் அம்ரித் மகால் மாடுகளைப் பாலுக் கென்று வளர்த்து வருகிறார் ரவி கௌடா. ஒரு காலை வேளையில் அங்கு சென்றோம். பால் கறந்து அதன் சூடு ஆறுவதற்கு முன்பாகவே விற்பனை செய்துவிடுகிறார். பால் கறந்துவிட்டு வந்து பேசினார். “பொதுவாகவே தேசா ஹசு (நாட்டு மாடுகள்) பால் மிகவும் குறைவாகக் கொடுக்கின்றன என்று சொல் கிறார்கள். அதில் அந்த அளவுக்கு உண்மையில்லை.

ரவி கௌடா
ரவி கௌடா

நான் கன்றுக்குட்டிக்கு விட்டது போக ஒரு நாளைக்கு 5 லிட்டர் பால் கறக்கிறேன். தொடர்ந்து 3 மாதங்களுக்கு இந்த அளவு கிடைக்கிறது. பிறகு, குறைந்து விடும். அதை அப்படியே கன்றுக்குட்டிக்கு விட்டு விடுவோம். 3 மாதங் களுக்கு 450 லிட்டர். ஒரு லிட்டர் 50 ரூபாய் கணக்கில் 22,500 ரூபாய் வருமானம். ஒரு வருடம் ஆன கன்றுக்குட்டி 30,000 ரூபாய். ஆக, வருஷத்துக்கு 52,500 ரூபாய் வருமானம். எங்கிட்ட ஒரிஜனல் நாட்டு மாடுகள் இரண்டு இருக்கின்றன. இதன்மூலமாக வருஷத்துக்கு 1,05,000 ரூபாய் வருமானம். இதைத்தவிர எரு வேறு கிடைக் கிறது.

அம்ரித் மகால் மாடு
அம்ரித் மகால் மாடு

கலப்பின மாடுகள் என்றால் அதற்குப் பராமரிப்புச் செலவு அதிகம். கம்பெனி தீவனம், பசுந்தீவனம் கண்டிப்பாக அதற்குத் தேவை. எங்கள் மாடுகள் மேய்ந்துவிட்டு வருவதோடு சரி. தேவைப்பட்டால் பிண்ணாக்குத் தண்ணீர் வைப்போம். இதில் செலவு என்று சொல்வதற்கு ஏதுமில்லை. காலையிலேயே விட்டுட்டா அதுபாட்டுக்கு காலாற போய் மேய்ந்துவிட்டுச் சாயந்தரம் வீட்டுக்கு அருகே வந்துவிடும். இங்கே தங்குவதற்கு ஒரு கிரவுண்டில் இடம் குத்தகைக்கு எடுத்திருக்கிறேன். அதில்தான் மாடுகளைத் தங்க வைக்கிறேன். இப்போது மொத்தம் 15 நாட்டு மாடுகள் இருக்கின்றன” என்றவரைத் தொடர்ந்து அதே பகுதியில் அம்ரித் மகால் நாட்டு மாட்டை வளர்த்து வரும் கோபால் என்பவரிடம் பேசியபோது பாலின் விலை, வருமானம் எல்லாமே ரவி கௌடா சொல்லியதை உறுதி செய்தார்.

ராணுவ வீரர்களைப்போல நடந்து வரும் அம்ரித் மகால் மாடுகள்
ராணுவ வீரர்களைப்போல நடந்து வரும் அம்ரித் மகால் மாடுகள்

தொடர்ந்து பேசிய ரவி கௌடா, “வரலாற்று முக்கியத்துவம் வாய்ந்த இந்த மாடுகள், ஹல்லிக்கர் மாடுகளுக்கு இணையான புகழ் பெறவில்லை. கர்நாடகத்தில் நடைபெறும் பல போட்டிகளில் ஹல்லிக்கர் மாடுகள் மட்டுமே அதிகம் பங்கு பெறுகிறது. இந்திய நாட்டு மாடுகளுக்கு உரிய பாய்ச்சல் தன்மை, அகலமான நெற்றி, வளைந்து, நெளிந்து மிரட்டும் கொம்புகள், உருளை வடிவிலான உடம்பு எனப் பல சிறப்பம்சங்கள் இந்த மாடுகளுக்கு உண்டு. இதைப் பரவலாக்க வேண்டும் என்ற நோக்கத்திலேயே கடந்த 8 ஆண்டுகளாகப் பராமரித்து வருகிறேன்” என்று விடைகொடுத்தார்.

தொடர்புக்கு,

Amrit Mahal Cattle Breeding & Training Centre,

Ajjampura, Chikkamagalur District.

Karnataka

பிரித்விராஜ், செல்போன்: 80777 47138

ரவி கொளடா, செல்போன் 99015 34032.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

அம்ரித் மகால் மாடுகளின் குணாதிசயங்கள்

இந்த மாடுகள் அதிகம் பாய்ச்சல் தன்மையைக் கொண்டவை. கொம்புகள் நீண்டு வளர்ந்து குறுகி காணப்படும். கால்கள் மான்களைப் போன்று சிறுத்துக் காணப்படும். கழுத்துத் தாடைப் பகுதிகளில் அதிக சதைப்பகுதி கீழே தொங்கும். வேகமாக ஓடும் திறன் கொண்டவை. சாம்பல், வெள்ளை, கறுப்பு நிறங்களில் காணப்படும்.