Published:Updated:

அனகைரஸ் லோபெஸி மாவுப்பூச்சியை ஒடுக்கும் ஒட்டுண்ணி!

மாவுபூச்சித் தாக்குதல்
பிரீமியம் ஸ்டோரி
மாவுபூச்சித் தாக்குதல்

பயிற்சி

அனகைரஸ் லோபெஸி மாவுப்பூச்சியை ஒடுக்கும் ஒட்டுண்ணி!

பயிற்சி

Published:Updated:
மாவுபூச்சித் தாக்குதல்
பிரீமியம் ஸ்டோரி
மாவுபூச்சித் தாக்குதல்

மாவுப்பூச்சி, விவசாயிகளுக்குப் பெரிய பிரச்னையாக உள்ள பூச்சியினம். இதை மேலாண்மை செய்யும் முறைகள் பற்றிய நேரலை பயிற்சி வகுப்புக்கு ஏற்பாடு செய்திருந்தது பசுமை விகடன் மற்றும் திருச்சி துவாக்குடியில் உள்ள தமிழ்நாடு பாசன மேலாண்மை பயிற்சி நிலையம்.

கடந்த 24.08.2021 அன்று நடந்த நேரலை நிகழ்ச்சியில் பயிற்சி நிலையத்தின் உதவிப் பேராசிரியர் மற்றும் உதவி இயக்குநர் நீ.செல்வம் மாவுப்பூச்சி மேலாண்மை குறித்து விளக்கினார். நிகழ்ச்சியில் அவர் பேசியபோது, ‘‘மாவுப்பூச்சி, சாறு உறிஞ்சும் பூச்சி வகையைச் சேர்ந்தது. இதன் வாழ்நாள் 25 முதல் 50 நாள்கள். மாவுப்பூச்சியில பலவகையான ஜாதிகள் இருக்கு. ஒவ்வொன்றும் ஒவ்வொரு விதம். பல ஜாதிகள் இருந்தாலும் பொதுவான ஒரு விஷயம் முட்டை வடிவிலான உருவமைப்பு.

நீ.செல்வம்
நீ.செல்வம்

ஒவ்வொரு இனத்துக்கும் ஒவ்வொரு வாழ்க்கை முறை இருக்கு. இயற்கை முறையில் கட்டுப்படுத்தும்போது ஒவ்வொன்றைப் பற்றியும் தெரிஞ்சுக்க வேண்டியது அவசியம்.

மாவுப்பூச்சியைப் பொறுத்தவரைக்கும் செம்பருத்தி, பப்பாளி, எலுமிச்சை, கரும்பு, மா, அன்னாசி, பருத்தி, மரவள்ளினு எல்லாத்தையும் தாக்குது. இலையில உட்கார்ந்துகொண்டு தன் உருவத்தைவிட 50 மடங்கு அளவுல அதிகமான சாற்றை உறிஞ்சும். அதுல 48 மடங்கு வெளியே அனுப்பிடும். அவ்வளவு சர்க்கரை தண்ணியை வெளியே அனுப்புறதுனால, அதைக் குடிக்கிறதுக்கு மாவுப்பூச்சி இருக்கிற இடங்கள்ல எல்லாம் எறும்புகள் நடமாட்டம் அளவுக்கு அதிகமாக இருக்கும்.

பயிரில் நுனிக் குருத்தில் இலையின் கீழ் பக்கம், செடிகள்ல எங்கெங்கே சந்து பொந்துகள் இருக்கோ அங்கதான் இந்த மாவுப்பூச்சிகள் இருக்கும். செடி வளர்வதற்குத் தேவையான எல்லா விதமான சத்துகளும் நுனியில்தான் வந்து நிற்கும். இந்த நிலையில் செடியோட நுனியில் உட்காருகிற மாவுப்பூச்சி எல்லாச் சத்துகளையும் உறிஞ்சிடுது. அதனால செடி வளர்ச்சி குன்றிப் போயிடுது.

மரவள்ளியில் மாவுப்பூச்சி தாக்குதல்
மரவள்ளியில் மாவுப்பூச்சி தாக்குதல்


மாவுப்பூச்சி, மேல் இலையோட கீழ் பக்கத்துல உட்கார்ந்து சாப்பிடும்போது அது சுரக்கும் திரவம் கீழே இருக்கிற இலையின் மேல் படியும். அதனால அங்க கறுப்பு நிறத்துல பூஞ்சணம் உருவாகும். இதனால, இலை முழுக்கக் கறுப்பு நிறமா மாறிடும். அதனால இலைகளால் ஒளிச்சேர்க்கை செய்ய முடியாது. ஏற்கெனவே வளர்ச்சிக்குத் தேவையான சத்துகளை மாவுப்பூச்சி உறிஞ்சினதால செடியோட வளர்ச்சி பாதிக்கப்பட்டுவிடும். இன்னொரு பக்கம் ஒளிச்சேர்க்கை செய்ய முடியாத நிலை. மாவுப்பூச்சியால பயிருக்கு இப்படி ரெண்டு விதமான தாக்குதல்கள் நடக்குது.

மாவுப்பூச்சி பரவும் முறை

முட்டையிலிருந்து வெளிவரக்கூடிய முதல் நிலை, இலையோட நுனிப்பகுதியில இருக்கும்னு பார்த்தோம். காற்று வீசக்கூடிய திசையில இலையோட நுனியில இருக்கிற பூச்சிகள், அடுத்த பயிருக்குக் காற்று மூலம் பரவும். ஒரு வயலிலிருந்து அடுத்த வயலுக்குத் தண்ணீர் பாய்ச்சும்போது தண்ணியில உட்கார்ந்து அடுத்த வயலுக்குப் பரவும். எறும்புகள், ஒரு செடியிலிருந்து இன்னொரு செடிக்கு எடுத்துட்டு போகும். ஒரு பயிர்ல உக்காரும் பறவைகள் கால் வழியா அடுத்த பயிருக்குப் போகும்.‌ நாம வயலைச் சுத்தி பார்க்கும்போதோ, மருந்தடிக்கும் போதோ துணியிலயே ஒட்டிகிட்டு அடுத்த இடத்துக்குப் பரவும். கலப்பை, மண்வெட்டி மாதிரியான பொருள்கள் மூலமாகவும் பரவும். அறுவடையான பொருளைச் சந்தைக்குக் கொண்டு போறதுக்காக வரக்கூடிய வண்டிகள் மூலமாகவும் பரவும். இறக்குமதி மூலமாகவும் இது பரவும்.

இரை விழுங்கிகள்
இரை விழுங்கிகள்


மாவுப்பூச்சிக்கான காலநிலை

28 டிகிரி செல்சியஸ் வெப்பநிலை இருந்துச் சுன்னா மாவுப்பூச்சிக்குக் கொண்டாட்டம். வெயில் காலமும் இல்லாம குளிர்காலமும் இல்லாம இது ரெண்டுக்கும் நடுவுல இருக்க அருமையான காலகட்டம். அந்தக் காலகட்டத்தில ஒரு மடங்கு முட்டை போடுறதுக்குப் பதிலா ஒன்பது மடங்கு முட்டை போடும். மழைக் காலம்தான், இதுக்கு ரொம்பப் பாதகமான காலகட்டம். பெய்யுற மழையோட வேகத்திலயே செடியை விட்டு அடிச்சிட்டு போயிடும். அதனாலதான் மாவுப்பூச்சி கட்டுப்பாடு செய்றதுக்கு ஸ்பிரேயர் வெச்சு மழைபெய்யுற மாதிரியான சூழ்நிலையை உருவாக்கலாம்.

மாவுப்பூச்சி அளவுக்கு அதிகமா பெருகுறதுக்கு முக்கியமான காரணம் இதோட வாழ்க்கை முறைதான். பெண் பூச்சி முட்டை போடுறதுக்கு ஆண் பூச்சி உடல் இணை சேர வேண்டிய அவசியமே இல்ல. அது வயசுக்கு வந்திருச்சுனாலே முட்டைப் போட ஆரம்பிச்சுடும். அது போடுற முட்டைகள்ல 95 சதவிகிதம் பெண் பூச்சிகளை உருவாக்குற முட்டையாதான் இருக்கும்.

சாம்பல் நிற பட்டாம்பூச்சி
சாம்பல் நிற பட்டாம்பூச்சி


50 நாள்களில் 500 முட்டைகள்

பெண் மாவுப்பூச்சிக்கு இறக்கைக் கிடையாது. ஆண் மாவுப்பூச்சிக்கு மட்டும் தான் இறக்கை இருக்கும். சில வகை மாவுப் பூச்சிகள் உடம்புக்குள்ளேயே முட்டை போட்டுக் குஞ்சுகளை உருவாக்கி வெளியே அனுப்பும். தன்னுடைய வாழ்நாளான 25 முதல் 50 நாள்களுக்குள் கிட்டத்தட்ட 500 முட்டையைப் போட்டு அதில் 450-க்கும் மேல் பெண் பூச்சியை உருவாக்கிடும். ஒரு மாவுப்பூச்சி மூலம் ஓர் ஆண்டுக்கு 15 தலைமுறைகள் உருவாகும்.

மாவுப்பூச்சியும் எறும்பும்

பொதுவாகச் சாறு உறிஞ்சும் பூச்சிகள் சாற்றை உறிஞ்சி தேன் போன்ற திரவத்தைக் கழிவாக வெளியேற்றும். அந்தத் தேன் சுவைக்காக எறும்புகள் மாவுப்பூச்சி இருக்குற இடத்தில கூட்டம் கூட்டமாய் இருக்கும். மாடுகள் நல்ல புல்வெளிகள்ல எவ்வளவு சந்தோஷமா மேயுமோ... அது மாதிரி மாவுப்பூச்சிகளுக்கான மேய்ச்சல் நிலங்கள் பயிர்கள்தான். அதை மேய்க்கும் மேய்ப்பான் எறும்பு. ஒரு பயிர்ல உட்கார்ந்த மாவுப்பூச்சி, முழுக்கச் சாறு உறிஞ்சி, அந்தப் பயிர் வளர்ச்சி குன்றிப்போன பிறகு, மாவுப் பூச்சியை அங்கிருந்து இன்னொரு பயிருக்குத் தூக்கிக்கொண்டு போய் வைக்கிற வேலை யைப் பாக்குறது எறும்புகள்தான். அப்படின்னா மாவுப்பூச்சியைக் கட்டுப் படுத்துறதுக்கு முன்னாடி எறும்பு களைக் கட்டுப்படுத்தணும்.

களைச்செடிகள் கவனம்

மாவுப்பூச்சிகளுக்கு மாற்று விருந்து பயிரா இருக்கிறது களைச்செடிகள். ஓர் அறுவடை முடிந்து அடுத்த அறுவடை வரைக்கும் அல்லது ஒரு பருவம் முடிந்து அடுத்த பருவம்வரைக்கும் இடைப்பட்ட காலங்கள்ல களைச் செடிகள்லதான் மாவுப்பூச்சிகள் தங்கும். அந்தக் களைச் செடிகள்லயும் இனப்பெருக்கத்தைத் தொடர்ந்து நடத்தி கிட்டே இருக்கும். களைச்செடின்னு பார்த்தா, பார்த்தீனியம், கிளரிசீடியா, துத்தி செடிகளைச் சொல்லலாம். அதுலயும் துத்தி செடிங்க வயலைச் சுற்றி இருந்தா, நீங்க வம்ப விலைக்கு வாங்குறீங்கன்னு அர்த்தம்.

மாவுப்பூச்சியைக் கட்டுப்படுத்த முதல்ல அதைப் பத்தின புரிதல் இருக்கணும். ரெண்டாவது ரசாயனங்கள் மூலமாகக் கட்டுப்படுத்துறதை விட உயிரியல் முறையில அதைக் கட்டுப்படுத்தணும்.‌ அதுக்கு நல்லது செய்யுற பூச்சிகளை உங்க வயலுக்கு வர வைக்கணும்.

பூச்சித் தாக்குதல்
பூச்சித் தாக்குதல்


பூச்சி கட்டுப்பாடு

விதைக்கரணை தேர்வு செய்றதுல ரொம்ப கவனமா இருக்கணும். மாவுப்பூச்சி தாக்குதல் இருக்கிற வயலிலிருந்து விதைக் கரணைகளை வாங்கக் கூடாது. நடவுக்கு முன்னாடி விதைக் கரணைகளை விதைநேர்த்தி செய்யணும். நோய் எதிர்ப்பு சக்திகொண்ட ரகங்களைத் தேர்வு செய்யணும். பயிர் கரும்பச்சை, வெளிர்பச்சை நிறத்துல இருக்கக் கூடாது. ரெண்டுக்கும் நடுவுல இருப்பதுதான் நல்லது. மாவுப்பூச்சி ஒரு இடத்திலிருந்து அடுத்த இடத்துக்குப் பரவும்போது இந்தப் பச்சை நிறம் அதைக் கவர்ந்திழுக்கும். அதனால அதுக்கு ஏற்ற மாதிரியான எரு, உர மேலாண்மை செய்யணும். மாவுப்பூச்சிகளுக்கு மேல கர்ணன் கவச குண்டலம் மாதிரி ஒரு மெழுகுபூச்சுக் கவசம் மாதிரி இருக்கும். அதனால நம்ம தெளிக்கூடிய பூச்சிக்கொல்லி விஷம்கூட அதைத் தாக்காது. அதனாலதான் பூச்சிக்கொல்லிகளால மாவுப் பூச்சிகளை முழுமையாகக் கட்டுப்படுத்த முடியல.

இரைவிழுங்கிகள்

பூச்சிகளைச் சாப்பிடக்கூடிய இரை விழுங்கிகளை வயலுக்கு வர வெச்சா போதும். அதுங்க பூச்சிகளை ஓரளவு கட்டுப்படுத்திடும் இரைவிழுங்கிகளான பொறிவண்டு, சிர்பிட் ஈ, பச்சை கண்ணாடி றெக்கைப் பூச்சி, சாம்பல் நிற பட்டாம் பூச்சி, சில ரக ஒட்டுண்ணிக் குளவிகள், மாவுப்பூச்சி மேல முட்டை போட்டு, அதுக்குள்ள உக்காந்து வளர்ந்தே அதை அழிச்சிடும். அந்த மாதிரி ஒட்டுண்ணிகளையும் வயலுக்கு வரவழைக்கணும். இதைச் சரியா செஞ்சிட்டாப் போதும். உயிர்க்கொல்லி விஷம் தெளிக்காம உங்க பயிரைக் காப்பாத்தலாம். ஆப்பிரிக்காவில் மரவள்ளி மாவுப்பூச்சி 100 சதவிகிதம் சேதத்தை உருவாக்குச்சி. அவங்க ஒட்டுண்ணி குளவிகள் மூலம் அதைக் கட்டுப்படுத்திட்டாங்க.

அனகைரஸ் லோபெஸி
அனகைரஸ் லோபெஸி


அனகைரஸ் லோபெஸி (Anagyrus Lopezi). இதுதான், மரவள்ளியைத் தாக்குற ஆப்பிரிக்க மாவுப்பூச்சிகளைக் கட்டுப்படுத்தும் ஒட்டுண்ணிக் குளவியோட பேரு. இது வீரதீர சாகசம் நிறைஞ்ச குளவி. ஆப்பிரிக்காவுல 14 நாடுகள்ல கடுமையான பாதிப்பு கொடுத்த மரவள்ளி மாவுப்பூச்சிகளை, இந்த ஒட்டுண்ணி குளவிதான் ஓட ஓட விரட்டுச்சு. மரவள்ளி மாவுப்பூச்சிக்குத்தான் இது வில்லன். விவசாயிகளைப் பொறுத்தவரைக்கும் ஹீரோ. இப்ப அந்த ஒட்டுண்ணிக் குளவிகளை இந்தியாவுக்கு வரவழைச்சிருக்காங்க. இன்னும் அஞ்சு, ஆறு மாசத்துல அந்த ஒட்டுண்ணிக் குளவிகள் நம்ம வயல்ல விட வாய்ப்பிருக்கு’’ என்று விரிவாகப் பேசினார்.

பப்பாளியில் மாவுப்பூச்சி கட்டுப்பாடு
பப்பாளியில் மாவுப்பூச்சி கட்டுப்பாடு

உலகம் சுற்றும் மாவுப்பூச்சி

“மரவள்ளி மாவுப்பூச்சி 1970-ம் வருஷத்துல இருந்து சுமார் 15 வருஷமா ஆப்பிரிக்காவில் இருந்துச்சு. அங்கிருந்து 2008-ம் வருஷம் தாய்லாந்துக்குப் போச்சு. 2010-ல் கம்போடியா, 2012-ல் வியட்நாம் போயி, 2020-ம் வருஷம் நம்ம ஊருக்கு வந்து சேர்ந்தாச்சு. பெங்களூருல இருக்கிற தேசிய பூச்சிகள் வள அமைவிடம் (ICAR-NBAIR), இது ஆப்பிரிக்காவிலிருந்து வந்த மாவுப்பூச்சின்னு சொல்றாங்க” என்கிறார் பூச்சி செல்வம்.

மரவள்ளி வந்த கதை

மரவள்ளி எங்கிருந்து வந்தது என்பதைப் பற்றிய பேசிய பூச்சி செல்வம், “மரவள்ளி உருவானது தென் அமெரிக்க நாட்டுல. ஏசு பிறப்பதற்கு 2,000 வருஷத்துக்கு முன்னாடி உருவானது.140 வருஷத்துக்கு முன்னாடிதான் இந்தியாவுக்கு வந்து சேர்ந்திருக்கு. தென் அமெரிக்காவுல இருந்து வட அமெரிக்கா போய், அங்கிருந்து ஆப்பிரிக்கா போய், அங்கிருந்து இந்தியாவுக்கு வந்து சேர்ந்திருக்கு. கேரளாவுல திருவிதாங்கூர் ராஜாதான் 1880-ம் வருஷம் மரவள்ளியை அறிமுகப்படுத்தினார்.

மூணு வருஷத்துக்கு முன்னாடி வரைக்கும் மரவள்ளியில பூச்சி, நோய் தாக்குதல் வரும்னு சொன்னா நம்பியிருக்க மாட்டோம். இது வறட்சியைத் தாங்கி வளர்ற பயிர். எந்தவிதமான பூச்சி, நோய் தாக்குதலும் இல்லாத பயிர்.‌ இதுல முதல்ல உருவான பிரச்னை மஞ்சள் தேமல் நோய். அது வெள்ளை ஈ மூலமா பரவிச்சு. இந்த இடத்தில் ஒண்ணு சொல்லணும். இப்ப மரவள்ளியைத் தாக்குகிற மாவு பூச்சிகளுக்கு, வெள்ளை ஈயைப்போல நோய் பரப்பும் திறன் இருந்திருந்தா நம்ம ஊர்ல இன்னிக்கு மரவள்ளி பயிரே இருந்திருக்காது. ஏன்னா வெள்ளை ஈயைவிடப் பல மடங்கு இனப்பெருக்கத்தில் பெரிய ஆள் மாவுப்பூச்சி” என்றார்.

கருவாட்டு எண்ணெய் சோப்பு

“மாவுப்பூச்சியைக் கட்டுப்படுத்த கருவாட்டு எண்ணெய் சோப்பு (மீன் எண்ணெய் என்பது வேறு) 25 கிராம் எடுத்து, ஒரு லிட்டர் தண்ணியில கலந்து, செடிகள் மேல தெளிச்சா மாவுப்பூச்சி, செதில்பூச்சி, வெள்ளை ஈ மூன்றையும் கட்டுப்படுத்தலாம். இது இல்லாம வேப்ப எண்ணெய் 2 சதவிகிதம், வேப்பங்கொட்டை கரைசல் 5 சதவிகிதம் தெளிக்கலாம். மேலும், 1 லிட்டர் தண்ணீருக்கு இயற்கைப் பூஞ்சணக்கொல்லியான வெர்ட்டி சிலியம் லெக்கானி 5 கிராம் கலந்தும் தெளிக்கலாம்” என்கிறார் பூச்சி செல்வம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism