Published:Updated:

உயிரியல் பூச்சிக் கட்டுப்பாடு!எளிய தொழில்நுட்பம்... ஏராளமான நன்மைகள்!

வெளிநாட்டு விவசாயம்
பிரீமியம் ஸ்டோரி
வெளிநாட்டு விவசாயம்

வெளிநாட்டு விவசாயம்-14

உயிரியல் பூச்சிக் கட்டுப்பாடு!எளிய தொழில்நுட்பம்... ஏராளமான நன்மைகள்!

வெளிநாட்டு விவசாயம்-14

Published:Updated:
வெளிநாட்டு விவசாயம்
பிரீமியம் ஸ்டோரி
வெளிநாட்டு விவசாயம்

முட்டைக்கோஸ் குடும்பப் பயிர்களைத் தாக்கும் வைரமுதுகுப் பூச்சியின் கூட்டுப் புழுக்களைத் தாக்கக் கூடிய ஓர் ஒட்டுண்ணியைத்தேடி, 15 ஆண்டுகளுக்கு முன்னர், முதன்முதலாகச் சிரியா சென்றேன்.

அப்போது சிரியா, உள்நாட்டுப் போர் இல்லாத அமைதியான நாடாக இருந்தது. முதலில் சிரியாவின் மிகப் பழைமையான நகரமான அலெப்போ (Aleppo) நகரத்துக்குச் சென்றேன்.

ஒரு காலைப்பொழுதில் முட்டைக்கோஸ் வயல்களைத் தேடிப் புறப்படும்போது முதல் அதிர்ச்சி காத்திருந்தது. காலை 10 மணிக்கெல்லாம் வெப்பநிலை 40 டிகிரி செல்சியஸைத் தாண்டியிருந்தது. அலெப்போ நகருக்கு மிக அருகியிலேயே பாலைவனப் பரப்பு வேறு.

அலெப்போ நகரம்
அலெப்போ நகரம்

இப்படிப்பட்ட பருவநிலையில் முட்டைக்கோஸ் விளையுமா? அப்படியே விளைந்தாலும் அதை வைரமுதுகுப் பூச்சி தாக்குமா? ஒருவேளை வைரமுதுகுப் பூச்சி இருந்தாலும், அதை ஒட்டுண்ணியால் தாக்க முடியுமா? இப்படிப்பட்ட பல்வேறு கேள்விகளுடன் ஆரம்பித்த பயணம், வழியில் எதிர்ப்பட்ட பழைமையான மலைக்கோட்டையில் நின்றது.

நம்பிக்கை கொடுத்த களைச்செடி

பலநூறு ஆண்டுகள் பழைமையான மலைக் கோட்டையைப் பார்க்கும் ஆவலில், உச்சி வெயிலிலேயே மலையேறினோம். கோட்டையிலிருந்த பழைமையான கட்டடக்கலையைவிட, அங்கிருந்த களைச்செடிகள் தான் என் கவனத்தை ஈர்த்தன.

ஆம், வறண்ட நிலத்தில், கடும் வெப்பத்தில் பூத்திருந்த அந்தக் களைச்செடிகள் எல்லாமே கடுகுக் குடும்பத்தைச் சேர்ந்தவை. அவற்றைப் பார்த்த எனக்கு, நிச்சயம் இங்கு வைரமுதுகுப் பூச்சியும், அதன் ஒட்டுண்ணியும் இருக்கும் என்ற நம்பிக்கை உருவானது.

யூபிரேட்டஸ் ஆறு
யூபிரேட்டஸ் ஆறு


அலெப்போ நகரைச் சுற்றியிருந்த வயல்வெளிகளில் தேடிப்பார்த்தேன். அங்கு ஒட்டுண்ணிகள் ஏதும் தென்படவில்லை. அங்கிருந்து அலெப்போவின் கிழக்கே 400 கி.மீ தொலைவில், ஈராக்கின் எல்லைப் பகுதியை ஒட்டியிருக்கும் ‘டெர் எஸ்ஸோர்’ (Deir ez-Zur) என்ற நகரத்தை நோக்கிச் சென்றோம். அதற்கு முக்கியக் காரணம், ‘அலெப்போ’ முதல் ‘டெர் எஸ்ஸோர்’ வரையிலான பகுதிகளில் ஆங்காங்கே விவசாயம் மிக அதிகளவில் நடைபெறுகிறது.

ஒட்டுண்ணி கூட்டுப்புழுக்கள்

மேற்கு ஆசியாவின் மிகப்பெரும் நதிகளில் ஒன்றான ‘யூபிரேட்டஸ்’ (Euphrates), துருக்கியில் ஆரம்பித்துச் சிரியா மற்றும் ஈராக் வழியாகச் செல்லும். இந்த நதி பாயும் பகுதிகளில்தான் அலெப்போ முதல் டெர் எஸ்ஸோர் வரையிலான விளைநிலங்கள் இருக்கின்றன. முக்கிய இடங்கள் அனைத் திலும் நின்று தேடியும், குறிப்பிடத்தக்க ஒட்டுண்ணிகள் எதுவும் கிடைக்கவில்லை. இருப்பினும் மனம் தளராமல், 2007-ம் ஆண்டும் தொடர்ந்து சிரியாவில் தேடினோம். ஆனால், இம்முறை அலெப்போ முதல் அந்நாட்டின் மையப்பகுதியில் இருக்கும் ஹோம்ஸ் (Homs) ஊடாக, தெற்குப் பகுதியில் இருக்கும் தலைநகர் டமாஸ்கஸ் (Damascus) வரையிலும் தேடினோம்.

அலெப்போ மலைக்கோட்டைப் பகுதியில் வளர்ந்துள்ள கடுகு குடும்பத்தைச் சேர்ந்த களைச்செடி
அலெப்போ மலைக்கோட்டைப் பகுதியில் வளர்ந்துள்ள கடுகு குடும்பத்தைச் சேர்ந்த களைச்செடி

முடிவில், சில இடங்களில் குறிப்பிட்ட ஓர் ஒட்டுண்ணியின் கூட்டுப்புழுக்கள் கிடைத்தன. கிட்டத்தட்ட ‘டையடிக்மா’வின் சாயலிலேயே இருந்த அவற்றைச் சேகரித்து, முறையான அனுமதியுடன் தைவானுக்குக் கொண்டுவந்து ஆய்வு செய்தோம். முடிவில், அவை ‘டையடிக்மா’தான் என்று உறுதி செய்யப்பட்டது. இது எங்களுக்கு ஒரு ஆச்சர்யமான முடிவுதான்; ஏனெனில் அதுநாள் வரையிலும் உலகம் முழுவதும் அறியப்பட்ட ‘டையடிக்மா’, 32 டிகிரி செல்சியஸுக்கு மேலான வெப்பநிலையைத் தாங்காது. ஆனால், சிரியாவிலோ சர்வசாதாரணமாக 40 டிகிரிக்கு மேற்பட்ட இடங்களிலும் வாழ்கிறது. அப்படியானால், அவை ஒரு தனித்தன்மை மற்றும் மரபியல் கூறுகளைக் கொண்ட ‘டையடிக்மா’வாக இருக்கலாம் என்று நம்பினோம்.

சிரியாவில் கண்டுபிடிக்கப்பட்ட அதிக வெப்பநிலையைத் தாங்கக் கூடிய டையடிக்மா ஒட்டுண்ணி
சிரியாவில் கண்டுபிடிக்கப்பட்ட அதிக வெப்பநிலையைத் தாங்கக் கூடிய டையடிக்மா ஒட்டுண்ணி


சிறப்பு ‘டையடிக்மா’

எனவே, கூடுதல் ஆய்வுகளை மேற்கொள்ளும் பொருட்டு, அதற்கடுத்த ஆண்டும் சிரியாவின் ஹோம்ஸ் நகருக்குச் சென்று, நூற்றுக்கணக் கான சிறப்பு ‘டையடிக்மா’வைக் கொண்டு வந்தோம். அவற்றைப் பல்வேறு ஆய்வுகளுக்கு, குறிப்பாக அவை எவ்வளவு வெப்பநிலையைத் தாங்கி வாழக்கூடியவை என்று கண்டறியும் ஆய்வுகளுக்கு உட்படுத்தினோம். முடிவில், அவை அதிக வெப்பநிலையைத் தாங்கக் கூடிய தனித்தன்மை கொண்ட ‘டையடிக்மா’ என்பதைக் கண்டறிந்தோம். இவை அனைத்துமே, சிறப்பு அனுமதியுடன் தடுப்புக் காப்பகத்தில் (Quarantine) நடத்தப்பட்ட ஆய்வுகள். அதற்குப் பிறகு, இந்தப் பூச்சிகளை அழித்து விட வேண்டும் என்பதால், அவ்வாறே செய்தோம். அவற்றை விவசாய நிலங்களில் அறிமுகப்படுத்த வேண்டுமென்றால், அதற்குத் தனிப்பட்ட அனுமதி வேண்டும். அப்படிப்பட்ட அனுமதியுடன், சிரியாவி லிருந்து இந்த ‘டையடிக்மா’வைக் கொண்டு வர ஏற்பாடு நடந்துகொண்டிருக்கும்போதே, அங்கு உள்நாட்டுப் போர் ஏற்பட்டுவிட்டது. எனவே, இந்தச் சிறப்புவகை ‘டையடிக்மா’ இன்னும் தெற்கு மற்றும் தென்கிழக்கு ஆசியாவின் விளைநிலங்களை அடைய முடியவில்லை என்பது, ஒரு வருத்தமான உண்மை.

முட்டைக்கோஸ் பட்டுப்பூச்சிகள்
முட்டைக்கோஸ் பட்டுப்பூச்சிகள்
உயிரியல் பூச்சிக்கொல்லிகள் தெளிக்கப்பட்ட லாவோஸ் வயலில் பல்கிப் பெருகியிருக்கும் முட்டைக்கோஸ் பட்டுப்பூச்சியின் ஒட்டுண்ணிகள்
உயிரியல் பூச்சிக்கொல்லிகள் தெளிக்கப்பட்ட லாவோஸ் வயலில் பல்கிப் பெருகியிருக்கும் முட்டைக்கோஸ் பட்டுப்பூச்சியின் ஒட்டுண்ணிகள்


இந்த இடத்தில் ‘டையடிக்மா’ மற்றும் ‘டையட்ரோமஸ்’ ஆகியவற்றின் அறிமுகத்துக்குப் பிறகு, ஏற்பட்ட மாற்றங்களையும் சொல்லியாக வேண்டும். நம்மூரில் ரௌடிகளில் பலவகை உண்டு. ஒரு குறிப்பிட்ட பகுதியில் மிக வலுவான, முதல்நிலை ரௌடி இருப்பார். அதே பகுதியில் பல சின்ன ரௌடிகளும் இருப்பார்கள். ஆனால், அவர்களின் பராபரங்கள் அவ்வளவாக வெளியே தெரியாது. ஒருவேளை முதல்நிலை ரௌடி என்கவுன்ட்டரில் கொல்லப்பட்டாலோ, குண்டர் சட்டத்தில் சிறையில் அடைக்கப்பட்டாலோ, இரண்டாம்நிலை ரௌடிகளில் ஒருவரோ, இருவரோ முதல் இடத்தைப் பிடிக்க எத்தனித்து, அதை அடைவார்கள். இப்போது இந்தச் சூழ்நிலையை வைரமுதுகுப் பூச்சியுடன் பொருத்திப் பாருங்கள்.

உயிரியல் பூச்சிக்கொல்லிகள் தெளிக்கப்பட்ட வியட்நாம் வயலில் பல்கிப் பெருகியிருக்கும் அசுவினிகளுக்கு எதிரான ஒட்டுண்ணிகள்
உயிரியல் பூச்சிக்கொல்லிகள் தெளிக்கப்பட்ட வியட்நாம் வயலில் பல்கிப் பெருகியிருக்கும் அசுவினிகளுக்கு எதிரான ஒட்டுண்ணிகள்

வில்லனான இரண்டாம்நிலை பூச்சிகள்

புதிதாக அறிமுகப்படுத்தப்பட்ட ஒட்டுண்ணிகளால் அவை இருக்குமிடம் தெரியாமல் ஒடுக்கப்பட்ட பிறகு, சில இரண்டாம்நிலை பூச்சிகள் தலைதூக்க ஆரம்பித்தன. அவற்றுள் குறிப்பிடத்தக்கவை முட்டைக்கோஸ் கொத்துப் புழுக்கள் (Cabbage cluster caterpillar), வலைப்புழுக்கள் (Cabbage webworm) மற்றும் முட்டைக்கோஸ் பட்டுப்பூச்சிகள் (Cabbage butterfly). சில இடங்களில் புகையிலைப் புழுக்களும் தலைதூக்க ஆரம்பித்தன. துரதிர்ஷ்டவசமாக இந்தப் பூச்சிகளுக்கு உயிரியல் கட்டுப்பாட்டு முறைகள் ஏதுமில்லை. எனவே, வேறு வழியின்றி விவசாயிகள் பூச்சிக்கொல்லிகளை நாடத் தொடங்கினார்கள். விளைவு... அப்படிப் பயன்படுத்தப்பட்ட பூச்சிக்கொல்லிகள் வைரமுதுகுப் பூச்சிக்கு எதிராக அறிமுகப் படுத்தப்பட்ட ஒட்டுண்ணிகளையும் ஒழிக்க ஆரம்பித்தன. பூச்சிக்கொல்லிகளுக்குத்தான் நாசகாரப் பூச்சிகள் மற்றும் நன்மை செய்யும் பூச்சிகள் என்ற பேதமில்லையே? ஆனால், நான் முன்பே சொன்னபடி வைரமுதுகுப் பூச்சிகள் பூச்சிக் கொல்லிகளுக்கு எதிர்ப்புத்திறனை வளர்த்துக் கொள்வதால் அவற்றுக்கு ஒன்றும் நேர்வதில்லை. முடிவில் எதிரிகளற்ற களத்தில், மீண்டும் வைரமுதுகுப் பூச்சி விஸ்வரூபம் எடுக்கிறது.

உயிரியல் பூச்சிக்கொல்லிகள் தெளிக்கப்பட்ட தைவான் வயலில் காணப்படும் இரைவிழுங்கிகள்
உயிரியல் பூச்சிக்கொல்லிகள் தெளிக்கப்பட்ட தைவான் வயலில் காணப்படும் இரைவிழுங்கிகள்


இந்தச் சுழற்சியைத் தடுப்பது எப்படி? அதற்காக ஹவாயில் விஞ்ஞானிகள் முழுக்க முழுக்கப் பூச்சிக்கொல்லிகளைக் கொண்டு ஒரு தீர்வைக் கண்டுபிடித்தார்கள். இந்த இடத்தில், பூச்சிக்கொல்லிகளைப் பற்றிச் சற்று விளக்கமாகத் தெரிந்துகொள்ள வேண்டும். பூச்சிக்கொல்லிகளில் பல்வேறு வகைகள் உண்டு. ஒருசில பூச்சிகளின் நரம்பு மண்டலத்தைத் தாக்கிக் கொல்லும்; சில வளர்சிதை மாற்றங்களைத் தடுக்கும்; ஒருசில தசைகளைப் பாதித்துக் கொல்லும்; மற்ற சில உணவு மண்டலத்தைப் பாதித்துக் கொல்லும்.

தீர்வு கண்டுபிடித்த விஞ்ஞானிகள்

உதாரணமாக, பூச்சிக்கொல்லிகளில் தொடு நஞ்சு, குடல் நஞ்சு, ஊடுருவிப் பாயும் நஞ்சு, புகை நஞ்சு,நரம்பு நஞ்சு என ஐந்து தலைமுறை பூச்சிக்கொல்லிகள் இருக்கின்றன.

புழு
புழு


இதில் நரம்பு நஞ்சு பயன்படுத்தும்போது அதற்கு எதிரான எதிர்ப்பு திறனை வளர்த்துக்கொள்ளும். அதே நஞ்சு தாக்கும் வகையைச் சார்ந்த வேறு வகை பூச்சிகளும் இதற்கு எதிர்ப்புத் திறனை வளர்த்துக் கொள்ளும் ஆக, அதில் நீங்கள் ஒரு குறிப்பிட்ட குழுவைச் சேர்ந்த பூச்சிக்கொல்லியை மட்டுமே (பொதுவாக உங்கள் பகுதியில் எது அதிகம் கிடைக்கிறதோ, அதை மட்டுமே) அதிகம் பயன்படுத்தி இருப்பீர்கள். அப்படித் தொடர்ந்து பயன்படுத்தினால், குறிப்பிட்ட அந்தப் பூச்சி, அந்தப் பூச்சிக்கொல்லிக்கு எதிர்ப்புத்திறனை வளர்த்துக் கொள்ளும். அது மட்டுமல்லாமல், நரம்பு மண்டலத்தைப் பாதிக்கும் வேறொரு குழுவைச் சேர்ந்த பூச்சிக்கொல்லிக்கு அதை நீங்கள் இதுவரை பயன்படுத்தவே இல்லை என்றாலும் எதிர்ப்புத்திறனை வளர்த்துக் கொள்ளும்;

இது, இரண்டும் ஒன்று போலவே நரம்பு மண்டலத்தைப் பாதிக்கக்கூடியவை என்ற அடிப்படையால் நடக்கும். இதற்கு குறுக்கு எதிர்ப்புத்திறன் (Cross Resistance) என்று பெயர். இது தெரியாமல், நீங்கள் மாற்றி மாற்றிப் புதுப்புது பூச்சிக்கொல்லிகளைத் தெளித்துக் கொண்டிருப்பீர்கள்; ஆனால், பூச்சிகள் வயலில் நர்த்தனம் ஆடுவதை மட்டும் நிறுத்தாது. வைரமுதுகுப் பூச்சியும் இதைத்தான் செய்துகொண்டிருந்தது. எனவே, ஹவாய் விஞ்ஞானிகள் அதில் கைவைத்தார்கள்.

பூச்சித் தாக்குதல்
பூச்சித் தாக்குதல்


பூச்சிக்கொல்லி சுழற்சி முறை

ஹவாயின் பயிர்க்காலத்தை ஆறு, ஆறு மாதங்களாக இரண்டு பாகமாக்கினார்கள். முதல் பாகத்தில் என்னென்ன பூச்சிக் கொல்லிகளைத் தெளிக்க வேண்டும்; மறுபாகத்தில் என்னென்ன பூச்சிக் கொல்லிகளைத் தெளிக்க வேண்டும் என்று வகைப்படுத்தினர். முதல் பாகத்தில் பயன்படுத்தப்படும் பூச்சிக்கொல்லிகள், மறுபாகத்தில் இடம்பெறாது. மேலும், முதல் பாகத்திலேயே ஒரு குறிப்பிட்ட பூச்சிக்கொல்லி ஒருமுறைக்கு மேல் பயன்படுத்தப்படாது.

ஒருமுறை நரம்புமண்டலத்தைப் பாதிக்கும் பூச்சிக்கொல்லி பயன்படுத்தப்பட்டால், அடுத்தமுறை உணவு மண்டலத்தைப் பாதிக்கும் பூச்சிக்கொல்லி; அதற்கடுத்த முறை வளர்சிதை மாற்றத்தைப் பாதிக்கும் பூச்சிக்கொல்லி. ஆக, அடுத்தடுத்த முறைகளில் வெவ்வேறு பூச்சிக்கொல்லிகள் பயன்படுத்தப்படுவதாலும், ஆண்டின் ஒருபாதியில் பயன்படுத்தப்படும் பூச்சிக்கொல்லி மறுபாதியில் பயன்படுத்த படாததால், வைரமுதுகுப் பூச்சியால் எதிர்ப்புத்திறனை வளர்த்துக்கொள்ள முடியவில்லை. இதற்குப் பூச்சிக்கொல்லி சுழற்சிமுறை (Pesticide Rotation) என்று பெயர்.

சிரியா விவசாயி
சிரியா விவசாயி


இந்த முறையின் வெற்றியைக் கண்ட ஆஸ்திரேலியா போன்ற மற்ற நாடுகளும், அதை அறிமுகப்படுத்தின. எனவே, வைரமுதுகுப் பூச்சி மட்டுமன்றி நான் மேலே சொன்ன மற்ற பூச்சிகளும் அழிக்கப்பட்டன. ஆனால், மற்ற நாடுகளில், குறிப்பாக வளரும் நாடுகளில் இந்த முறை சாத்தியமா என்றால், இல்லை என்றே சொல்ல வேண்டும். முறையான கண்காணிப்பு இல்லாமையாலும், எல்லா விவசாயிகளும் ஒன்றுபோல இந்த வழிமுறைகளைப் பின்பற்றமாட்டார்கள் என்பதாலும், இந்தத் தொழில்நுட்பம் இந்தியா போன்ற நாடுகளில் சாத்தியம் இல்லை. மேலும், முழுக்க முழுக்கப் பூச்சிக்கொல்லிகளை மட்டுமே அடிப்படையாகக் கொண்ட ஒரு தொழில்நுட்பம் மனிதர்களுக்கும், சுற்றுச்சூழலுக்கும் ஏற்புடையதல்லவே?

எனவே, இந்தத் தத்துவத்தை மட்டும் அடிப்படையாகக் கொண்டு, முற்றிலும் உயிரியல் பூச்சிக்கொல்லிகளைக் கொண்ட ஒரு சுழற்சி முறையை உருவாக்கினோம்.

பாக்டீரியா (பேசில்லஸ் துரிஞ்சியென்சிஸ்), பூஞ்சை (மெட்டாரைசியம் அனிசோபிலியே மற்றும் பவேரியா பேசியானா), வேப்ப எண்ணெய் ஆகியவையே அந்த உயிரியல் பூச்சிக்கொல்லிகள். இவற்றைக் கொண்டு வைரமுதுகுப் பூச்சி முதல் இரண்டாம்நிலை புழு வகைகள், அசுவினி, தத்து பூச்சிகள் என அனைத்தையும் கட்டுப்படுத்தலாம். பொதுவாகவே, ரசாயன பூச்சிக்கொல்லிகளைப் போல இல்லாமல், உயிரியல் பூச்சிக்கொல்லிகள் மிக மெதுவாகவே பூச்சிகளைக் கொல்லும் என்றொரு எண்ணம் விவசாயிகளிடம் இருக்கிறது. ஒருவகையில் அது உண்மையும் கூட. ஆனால், நாம் அவற்றைப் பயன்படுத்தும் வரிசையினைப் பொறுத்து, அவற்றின் திறனை மேம்படச் செய்யலாம்.

காய்கறி வயல்
காய்கறி வயல்


முதலில், வேப்ப எண்ணெயைப் பயன் படுத்தினால், அந்துப்பூச்சிகள் முட்டை இடுவதைத் தடுக்கலாம். அடுத்து, புழுக்கள் உணவு உண்பதைத் தடுக்கவோ, குறைக்கவோ முடியும். அதனால் பூச்சிகள் உடலளவில் வலுவிழந்துபோகும். எனவே, அதற்கடுத்த முறை பாக்டீரிய அல்லது பூஞ்சையால் ஆன பூச்சிக்கொல்லிகளைப் பயன்படுத்தும்போது, பூச்சிகள் விரைந்து கொல்லப்படுகின்றன.

இந்தத் தொழில்நுட்பத்தால் வைரமுதுகுப் பூச்சி முதல் முட்டைக்கோஸ் குடும்பத்தைத் தாக்கும் அத்தனை பூச்சிகளையும் கட்டுப்படுத்தலாம். இதன் கூடுதல் பலன் ஒன்றும் உண்டு; இந்த உயிரியல் பூச்சிக்கொல்லிகள் நாசகாரப் பூச்சிகளை மட்டுமே அழிக்கும். ஆகவே, எவ்வித பாதிப்புமின்றி, மற்ற ஒட்டுண்ணிகள் முதலான இயற்கை எதிரிகள் பல்கிப் பெருகும். உதாரணமாக, ‘டையடிக்மா’, ‘டையட்ரோமஸ்’ மற்றும் ‘கொட்டேசியா’ ஆகியவை அதனதன் வேலையைத் திறம்படச் செய்யும். ஆக, உயிரியல் பூச்சிக்கொல்லிகளும், இயற்கை எதிரிகளும் ஒருங்கிணைந்து செயலாற்றுவதால் நாசகாரப் பூச்சிகள் எப்போதும் கட்டுக் குள்ளேயே இருக்கும் என்பது நிரூபிக்கப் பட்டுள்ளது.

சொல்லப்போனால் அவற்றின் செயல்திறன் ரசாயனப் பூச்சிக்கொல்லிகளைவிட அதிகம். இப்போது இந்தத் தொழில்நுட்பம் கம்போடியா மற்றும் லாவோஸ் நாட்டில் ஆயிரக்கணக்கான விவசாயிகளிடம் பரவலாக்கப்பட்டுக் கொண்டிருக்கிறது. மிக மிக எளிதான இந்தத் தொழில்நுட்பம் இந்தியாவிலும் பின்பற்ற ஏதுவானதே என்பதில் இருவேறு கருத்துக்கு இடமில்லை.

- வளரும்

முனைவர் சீனிவாசன் ராமசாமி
முனைவர் சீனிவாசன் ராமசாமி

பூச்சிகள், பூச்சிக்கொல்லிகளுக்கு எதிரான எதிர்ப்புத்திறனை எப்படி வளர்த்துக் கொள்கின்றன?

ஒரு பூச்சி இனத்தில் இருக்கும் உறுப்பினர்கள் எல்லாமே குறிப்பிட்ட ஒரு பூச்சிக் கொல்லியை ஒன்று போலவே எதிர்கொள்வதில்லை. நம்மில் பலருக்கும், ஒரு குறிப்பிட்ட நோய்க்கு எதிரான எதிர்ப்புத்திறன் எப்படி மாறுபடுகின்றதோ அது போலத்தான் பூச்சிகளுக்கும் எதிர்ப்புத்திறன் மாறுபடுகிறது. ஒரு வயலில் 100 வைரமுதுகுப் பூச்சிகள் இருப்பதாக வைத்துக் கொள்வோம். அதில், 80 பூச்சிகளுக்குக் குறிப்பிட்ட பூச்சிக்கொல்லிக்கு எதிர்ப்புத்திறன் இருக்காது. எனவே, நாம் அந்தப் பூச்சிக்கொல்லியைப் பயன்படுத்தும்போது, அந்த 80 பூச்சிகளும் இறந்துவிடும். ஆனால், இறக்காத எதிர்ப்புத்திறன் மிக்க அந்த 20 பூச்சிகளால்தான் பிரச்னையே. அவை உருவாக்கும் அடுத்த தலைமுறை பூச்சிகள் எல்லாமே எதிர்ப்புத்திறன் மிக்கவையாகவே இருக்கும். ஆக, நாம் தொடர்ந்து அந்தப் பூச்சிக்கொல்லியைப் பயன்படுத்தும்போது, பூச்சிகளின் அடுத்தடுத்த தலைமுறைகள் உருவாகும்போது எதிர்ப்புத்திறன் மிக்கப் பூச்சிகளின் விகிதம் அதிகரித்துக்கொண்டே போகும். முதலில் 20 என்றிருந்த எதிர்ப்புத்திறன் கொண்ட பூச்சிகளின் எண்ணிக்கை அடுத்தடுத்த தலைமுறைகளில் 30, 40, 60 என அதிகரித்துக்கொண்டே சென்று, முடிவில் ஒருகட்டத்தில் முழுக்க முழுக்க எதிர்ப்புத்திறன் கொண்ட பூச்சிகள் மட்டுமே வயலில் இருக்கும். அந்தக் கட்டத்துக்குப் பிறகு, குறிப்பிட்ட அந்தப் பூச்சிக்கொல்லி செயல் இழந்ததாகவே கருதப்படும்.