Published:Updated:

70 மாடுகள், 20 ஆடுகள், 30 கோழிகள்! - மாதம் ரூ.76,000

பண்ணையில் பாரதி கருணாநிதி
பிரீமியம் ஸ்டோரி
பண்ணையில் பாரதி கருணாநிதி ( நா.ராஜமுருகன் )

கால்நடை

70 மாடுகள், 20 ஆடுகள், 30 கோழிகள்! - மாதம் ரூ.76,000

கால்நடை

Published:Updated:
பண்ணையில் பாரதி கருணாநிதி
பிரீமியம் ஸ்டோரி
பண்ணையில் பாரதி கருணாநிதி ( நா.ராஜமுருகன் )

தேவையான படிப்பு, கைநிறைய சம்பளம், கிராமத்திலிருந்து நகரத்துக்கு இடம் பெயர்தல் என்று கிராமத்து வாழ்க்கைக்கு முழுக்குப் போட்டவர்கள், மீண்டும் கிராமத்து வாழ்க்கைக்குத் திரும்ப ஆரம்பித் திருக்கும் காலம் இது. இளைஞர்களும்கூட வேலையை உதறிவிட்டு, இப்போது கிராமத்துக்குத் திரும்பிக் கொண்டிருக்கிறார்கள்.

இயற்கை விவசாயம், பாரம்பர்ய விதைகளை மீட்பது, கால்நடை வளர்ப்பு என்று விவசாயத் தொழிலில் தடம் பதிக்கத் தொடங்கியிருக்கிறார்கள். அந்த வரிசையில் பொறியியல் படித்துவிட்டு, தனியார் நிறுவனத்தில் பணிபுரிந்த இளைஞர் பாரதி கருணாநிதி, இப்போது நாட்டுமாடு வளர்ப்பு, ஆடு, கோழி வளர்ப்பு என பண்ணையத்தில் கால்பதித்து, மாதம் ரூ. 76,000 வரை வருமானம் பார்த்து வருகிறார்.

நாமக்கல் மாவட்டம், மோகனூர் ஒன்றியத்தில் உள்ள வளையபட்டி கிராமத்தைச் சேர்ந்தவர் பாரதி கருணாநிதி. தனது பள்ளி கால நண்பரோடு சேர்ந்து, மோகனூர் வண்டிகேட் பகுதியில் ஒருங்கிணைந்த பண்ணையத்தைக் கட்டமைக்க முயற்சி செய்து வருகிறார். மாடுகளுக்குத் தீவனம் வைத்துக்கொண்டிருந்த பாரதி கருணாநிதியைச் சந்தித்துப் பேசினோம்.

பால் கறவையில் பாரதி கருணாநிதி
பால் கறவையில் பாரதி கருணாநிதி


“எங்களுக்கு 10 ஏக்கர் வரை நிலமிருக்கு. எங்க தாத்தா காலம்வரை விவசாயம் நடந்திருக்கு. அப்பா வங்கி வேலைக்குச் போய்ட்டதால, தொடர்ந்து விவசாயம் பண்ண முடியல. எனக்கு சின்ன வயசுல விவசாயத்துல ஆர்வம் வரல. அதனால, பி.இ இன்பார்மேஷன் டெக்னாலஜி இன்ஜினீயரிங் படிச்சிட்டு டெல்லியில் ஒரு கம்பெனியில வேலைக்குச் சேர்ந்தேன். பிறகு, அதே கம்பெனியின் பெங்களூரு கிளைக்குப் பதவி உயர்வுல வந்தேன். ஆனால், அந்த வேலை பிடிக்கல.

காசு பணத்தைத் தாண்டி வாழ்க்கை இருக்கிறதுனு நினைச்சேன். கிராமத்தில் விவசாயம் சம்பந்தமா ஏதாவது பண்ணணும்னு முடிவு பண்ணினேன். 2016-ம் வருஷம் மாசம் ரூ.54,000 சம்பளம் வாங்குன வேலையை ராஜினாமா பண்ணினேன். ‘உனக்குப் புத்திகித்தி கெட்டுப்போச்சா. நல்ல வேலையை விட்டுட்டு, இந்தக் குக்கிராமத்துல வந்து என்ன பண்ணபோற’னு வீட்டுல திட்டுனாங்க. ஆனால், நான் ஒருங்கிணைந்த பண்ணையம் அமைக்கிற முடிவுல உறுதியா நின்னேன்.

தோள் கொடுத்த தோழமை

கோயம்புத்தூர்ல சொந்தமா கம்பெனி வெச்சிருக்க என்னோட பள்ளித்தோழன் தினேஷ் பிரசாத் என்னோட இணைஞ்சு கிட்டான். இந்த மூன்றரை ஏக்கர் நிலத்தைக் குத்தகைக்குப் பிடிச்சேன். தேவையான கொட்டகை அமைச்சேன். முதல்ல, 4 முரா எருமைகள், ஒரு சாஹிவால் மாடு, ஒரு ஹரியானா மாடுனு 6 உருப்படிகள் வாங்கினேன். இதுக்கு ஏழரை லட்சம் செலவாச்சு.

மாடுகள், எருமைகள்
மாடுகள், எருமைகள்


அனுபவம் இல்லாததால, அதிக விலை கொடுத்து வாங்கியது அப்புறம்தான் தெரிய வந்துச்சு. அதோட, ரெண்டு எருமை கன்னுக்குட்டிகள் இறந்துபோச்சு. அப்பத்தான் பயம் வந்துச்சு. இருந்தாலும், முன்ன வெச்ச காலைப் பின்னே வைக்கக் கூடாதுனு ஆறு மாசம் மாடு வளர்ப்பைப் பற்றி முழுமையா ஆய்வு பண்ணினேன். அடுத்து, சரியான வேலை ஆள்கள் கிடைக்காத பிரச்னை ஏற்பட்டுச்சு. 2017-ம் வருஷம்தான் சரியான கூலி ஆள்கள் கிடைச்சாங்க.

‘‘கரூர் காந்திகிராமத்துல பால் அங்காடி ஒண்ணைச் சொந்தமா தொடங்கி, அங்கே கொண்டுபோய்ப் பாலை விற்க ஆரம்பிச்சோம்.’’


2017-ம் வருஷ கடைசியில ஒரு மாடு ரூ.75,000 மதிப்புல 4 கிர் ரக மாடுகளை வாங்கினேன். பிறகு, அப்பா தன்னோட ஓய்வூதிய பணத்தைக் கொடுத்தார். அதுல, ராஜஸ்தான் ரகமான தார்பார்க்கர் மாடு 4, முரா எருமைகள் 4 வாங்கினேன். இப்படியே 6 கிர் மாடுகள், 12 முரா எருமைகள், 8 கன்னுக்குட்டிகள், 2 தார்பார்க்கர் மாடுகள், 2 கன்னுக்குட்டிகள், ஒரு சாஹிவால் பசு, ஒரு கன்னுக்குட்டி, ஒரு ஹரியானா மாடு, ஒரு கன்னுக்குட்டி, ஒரு குஜராத் ரக ராத்தி மாடு, ஒரு குஜராத் ரக காங்கிரேஜ் மாடு, ஒரு கன்னுக்குட்டி, ஒரு காங்கேயம் ரக மாடுனு மொத்தம் 70 மாடுகள் சேர்ந்திடுச்சு. அதுதவிர, 20 நாட்டு வெள்ளாடுகள், 30 பெருஞ்சாதி கோழிகளையும் வாங்கினேன். இது எல்லாத்தையும் சேர்த்து மொத்த முதலீடு 20 லட்சம் ரூபாய் ஆகிடுச்சு. அதுல, பாதி தினேஷ் பிரசாத் கொடுத்தது” என்றவர், பண்ணையைச் சுற்றிக் காட்டினார்.

“எப்பவும் 100 லிட்டர் வரை பால் கிடைக்குமாதிரி மாடுகள பராமரிச்சிட்டு வர்றோம். பால் விற்பனைக்கென்றே கரூர் காந்திகிராமத்துல பால் அங்காடி ஒண்ணைச் சொந்தமா தொடங்கி, அங்கே கொண்டுபோய்ப் பாலை விற்க ஆரம்பிச்சோம். கரூர் அங்காடியில நாட்டுமாட்டுப் பால் லிட்டர் ரூ.80, எருமைப் பால் லிட்டர் ரூ.60 விலையில விற்பனை செய்றோம். இங்க விக்காம மிச்சமாகுற பாலை ஒண்ணாக் கலந்து ஒரு லிட்டர் 46 ரூபாய்னு விற்பனை செய்றோம்.

பால்
பால்
பால் விற்பனை
பால் விற்பனை


காங்கேயம் காளைகளை வெளியில் இனச்சேர்க்கை செய்யப் பயன்படுத்துகிறோம். அதுக்கு, ஒருமுறை இனச்சேர்க்கைக்கு 500 ரூபாய் வாங்குறோம். காளை கன்னுக்குட்டிகளை வருஷத்துக்கு ஒரு தடவை விற்பனை செய்றோம். அதுல 10,000 முதல் 15,000 ரூபாய் வரை வருமானம் வருது. பண்ணையில சேகரமாகும் ஆடு, மாடு சாண எருவை விற்பனை செய்றோம். ஒரு டிப்பர் எரு 2,000 ரூபாய் விலையில மாசத்துக்கு 5 டிப்பர் சாண எருவை விற்பனை செய்றோம்” என்றவர், வேலை ஆள்களுக்கு வேலைகளைக் கொடுத்துவிட்டு, நம்மிடம் வரவுச் செலவு, லாபக்கணக்கை விவரிக்கத் தொடங்கினார்.


மாதம் ரூ.2 லட்சம் வருமானம்

“தினமும் நாட்டு மாட்டுப் பால் 60 லிட்டர் கிடைக்கும். அதுல 30 லிட்டர் பாலை அங்காடியிலேயே ஒரு லிட்டர் 80 ரூபாய்னு விற்பனை செய்றோம். அதுமூலமா, 2,400 ரூபாய் கிடைக்குது. தினமும் 40 லிட்டர் எருமைப் பால் கிடைக்குது. இதுல 30 லிட்டர் பாலை ஒரு லிட்டர் 60 ரூபாய்னு விற்பனை செய்றது மூலமா 1,800 ரூபாய் கிடைக்கும். இரண்டிலிருந்தும் மீதமாகும் 40 லிட்டர் பாலை, ஒரு லிட்டர் 46 ரூபாய்னு வியாபாரிகளுக்கு விற்பனை செய்றோம். அந்த வகையில 1,840 ரூபாய் வரை கிடைக்கும். இப்படி, மூணு வகையிலும் தினமும் 6,040 ரூபாய் வரை வருமானம் வரும். ஒரு மாசத்துக்கு 1,81,200 ரூபாய் வரை வருமானம் கிடைக்கும்.

ஆடு வளர்ப்பு
ஆடு வளர்ப்பு
கோழி வளர்ப்பு
கோழி வளர்ப்பு


அதேபோல், ஆடு, மாடு சாண எரு விற்பனை மூலமா மாசம் 10,000 ரூபாய் வருமானம் கிடைக்கும். தவிர, மாசத்துக்குச் சராசரியாக 3 ஆடுகள், 10 கோழிகள் விற்பனை செய்யுற வகையில் 15,000 ரூபாய் வருமானம் கிடைக்கும். இப்படி, ஒரு மாசத்துக்கு மொத்தம் 2,06,200 ரூபாய் வரை வருமானம் வருது. இதுல, செலவுன்னு பார்த்தால், ஒரு மாட்டுக்குத் தினமும் 6 கிலோ வரை தீவனம் செலவாகுது. கறவை மாடுகள் 10 மாடுகளுக்கு 60 கிலோ தீவனத்துக்குக் கிலோ 22 ரூபாய் கணக்குல மொத்தம் 1,320 ரூபாய் செலவாகுது. வேலை ஆள்களுக்குத் தினமும் சம்பளம் 2,500 ரூபாய் வரை போகுது. மாடுகளுக்குத் தீவனச் செலவு, கூலி ஆள் செலவு மட்டும் தினமும் 4,000 ரூபாய் வரை அகுது. ஒரு மாசத்துக்கு 1,20,000 ரூபாய் வரை செலவாகும். பெட்ரோல் செலவு மாசம் 5,000 ரூபாய். அதேபோல, ஆடு, மாடுகளுக்கு மருந்து வாங்க மாசம் 5,000 ரூபாய் வரை செலவாகும். இப்படி மொத்தமாக, மாசத்துக்கு 1,30,000 ரூபாய் வரை செலவாகும். மொத்த வருமானமான 2,06,200 ரூபாயில், செலவாகுற 1,30,000 ரூபாயை கழித்தால், 76,200 ரூபாய் லாபமாக நிக்கும். 100 மாடுகள்வரை அதிகரிக்கும்போது, வருமானமும் அதிகரிக்கும்’’ என்றவர் நிறைவாக,

‘‘சொந்தமா இடம் வாங்குற முயற்சியில் இருக்கிறோம். போனவருஷம்தான் எனக்கு கல்யாணம் நடந்துச்சு. என் மனைவி பிரியதர்ஷனி, பி.டெக் படிச்சிருக்காங்க. அவங்களும் மட்டுப்பண்ணை வேலைகள்ல எனக்கு ஒத்தாசையா இருக்காங்க. நண்பர் தினேஷ் பிரசாத் வாரத்துக்கு ஒருதடவை பண்ணைக்கு வந்து பார்த்துட்டுப் போறார். கரூர்ல 3 கடைகள் ஆரம்பிக்கிற ஐடியாவும் இருக்கு. தவிர, நாமக்கல் மாவட்டம் முழுக்க எங்க பண்ணைப் பாலை கொண்டு சென்று விற்பனை செய்யவும் திட்டம் இருக்கு” என்று சொல்லி முடித்தார்.


தொடர்புக்கு,
பாரதி கருணாநிதி,
செல்போன்: 99444 65201

நோய் தடுக்கும் முறைகள்

ஆடு, மாடுகளுக்கு வரும் நோய்கள், அவற்றைத் தடுக்கும் வழிமுறைகள் குறித்துப் பேசிய பாரதி கருணாநிதி, “ஆடு, மாடு, கோழிகளை இயற்கை முறையில் வளர்ப்பதால், 99 சதவிகிதம் நோய்த்தாக்குதல் ஏற்படாது. மாடுகள் சாணி போடப் போட அதைச் சுத்தப்படுத்திடுவோம். அதனால, உணவு செரிமானப் பிரச்னை வராது. வருஷா வருஷம் மார்ச், செப்டம்பர் மாசங்கள்ல கோமாரி தடுப்பூசியை அரசு கால்நடை மருத்துவர்கள் போடுவாங்க. எங்க மாடுகளுக்கும் அவங்களையே போடச் சொல்வோம். எருமைகளைத் தினமும் குளிப்பாட்டுவோம். மாடுகளை 3 நாளைக்கு ஒருமுறையும், கன்னுக்குட்டிகளை வாரத்துக்கு ஒருமுறையும் குளிப்பாட்டுவோம். மாடுகளுக்கு வரும் வயிற்றுப்போக்கைத் தடுக்க மாத்திரை கொடுப்போம். மாடுகளுக்கு வரும் செரிமானப் பிரச்னையைத் தடுக்க, எலுமிச்சம் பழச்சாறு, சீரகம், சோடாப்பூ மூணையும் கலந்து கொடுத்தால், சரியாயிரும். அதேபோல், காய்ச்சல் வந்தால், மருத்துவர் ஆலோசனைப்படி ஊசி போட்டு விடுவோம். அதேபோல், 2 மாசத்துக்கு ஒருமுறை மாடுகளுக்குக் கீரிபூச்சி தொல்லையைத் தடுக்க, ஊசி அல்லது மாத்திரை வடிவிலான மருந்தைக் கொடுப்போம்.

எருமைகள்
எருமைகள்
நாட்டு மாடுகள்
நாட்டு மாடுகள்


ஆடுகளுக்குச் சளித்தொல்லை வரும். அந்த நேரத்தில் கருவாடு, மஞ்சள், வேப்பிலை, தும்பைச் செடி எல்லாவற்றையும் சேர்த்து நெருப்பு மூட்டம் போட்டு, அதை ஆடுகளைச் சுவாசிக்க வைப்போம். சளி சரியாயிரும். ஆடுகளுக்கு வயிற்றுப்போக்கு ஏற்பட்டால், மாடுகளுக்குக் கொடுக்குற மாத்திரையையே கொடுப்போம். அதாவது, மாடுகளுக்கு 2 மாத்திரை, கன்னுக்குட்டிகளுக்கு ஒண்ணு அல்லது அரை மாத்திரை, ஆடுகளுக்கு அரை மாத்திரை வீதம் கொடுக்கணும்.

கோழிகளுக்கு வெள்ளைக்கழிச்சல் வராமல் இருக்க 3 மாசத்துக்கு ஒருதடவை லசோட்டா மருந்து போடுவோம். வெள்ளைக்கழிச்சலை தடுக்க, ஆர்.டி.வி.கே மருந்தையும் ஊசிமூலம் செலுத்துவோம். ஆனா, நாங்க கோழிகளை இயற்கைச் சூழல்ல, இயற்கைத் தீவனம் போட்டு வளர்க்குறதால, பெரும்பாலும் சளித்தொல்லை வராது” என்றார்.

பாரதி கருணாநிதி
பாரதி கருணாநிதி

தீவன மேலாண்மை

மாடுகளுக்குக் கொடுக்கப்படும் தீவனம் பற்றிச் சொல்லும் பாரதி கருணாநிதி, “தானிய வகைகளை அரைச்சு தீவனமாக் கொடுக்கிறோம். செஞ்சோளம், கம்பு, மக்காச்சோளம், உளுந்தம் பொட்டு, துவரம் பொட்டு, பிண்ணாக்கு எல்லாம் சேர்த்து மில்லுல கொடுத்து அரைச்சு, அதை மாடுகளுக்குத் தீவனமா கொடுக்கிறோம். கிலோ ரூ.22-க்கு மேல தாண்டாத மாதிரி தீவனம் தயாரிக்கிறோம். 3 ஏக்கர் நிலத்துல இயற்கை முறையில சூப்பர் நேப்பியர் தீவனப்புல்லை வளர்க்கிறோம். மாடுகளைக் குளிப்பாட்டும் நீர், மாடுகளின் கழிவுநீர் மூலமா இந்தத் தீவனப்புல்லை வளர்க்குறோம். மாடுகளுக்கு 65 சதவிகிதம் இந்த சூப்பர் நேப்பியர் தீவனப்புல், 18 சதவிகிதம் சோளத்தட்டு, மீதி 17 சதவிகிதம் அரைச்ச உலர்கலவை தீவனம் கொடுக்கிறோம்.

தீவன வளர்ப்பு
தீவன வளர்ப்பு


மாடுகளுக்குத் தினமும் விடியற்காலை 3 மணி, மதியம் 3 மணினு ரெண்டு வேளை தீவனம் கொடுக்கிறோம். ஒரு வேளைக்கு 65 கிலோ தீவனப்புல், 6 கிலோ தானிய உலர்கலவை தீவனம் கொடுக்குறோம். எருமைக்கு ஒருவேளைக்கு 75 கிலோ தீவனப்புல், 7 கிலோ தானிய உலர்கலவை தீவனமும் கொடுக்கிறோம். மாட்டுக் கன்னுக்குட்டிகளுக்கு ஒருவேளைக்கு 15 கிலோ தீவனமும், எருமை கன்னுக்குட்டிகளுக்கு ஒருவேளைக்கு 25 கிலோ தீவனமும் கொடுக்குறோம். ஆடுகளை இயற்கையா மேய்க்க வைக்கிறோம். கோழிகளையும் இங்கேயே மேய விடுகிறோம். தேவைப்பட்டா, அதுங்களுக்கு மாடுகளுக்குக் கொடுக்கிற தீவனத்தையே கொடுக்கிறோம்’’ என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism