Published:Updated:

100 கோழிகள், மாதம் ரூ.24,000... மேய்ச்சல் முறை கோழி வளர்ப்பு!

கோழி வளர்ப்பு
பிரீமியம் ஸ்டோரி
கோழி வளர்ப்பு

கால்நடை

100 கோழிகள், மாதம் ரூ.24,000... மேய்ச்சல் முறை கோழி வளர்ப்பு!

கால்நடை

Published:Updated:
கோழி வளர்ப்பு
பிரீமியம் ஸ்டோரி
கோழி வளர்ப்பு

குறைவான முதலீடு, குறைவான பராமரிப்பு, கணிசமான வருமானம் என்பதால் நாட்டுக் கோழி வளர்ப்புச் சமீபகாலமாக அதிக வரவேற்பைப் பெற்றுள்ளது. அந்த வரிசையில், நாட்டுக்கோழி வளர்த்து, குஞ்சுகளை விற்பனை செய்து நல்ல வருமானம் பார்த்து வருகிறார் ஆறுமுகச்சாமி.

தென்காசி மாவட்டம், சங்கரன்கோவிலில் இருந்து புளியங்குடி செல்லும் சாலையில் 7 கி.மீ தொலைவில் உள்ளது வீரிருப்புக் கிராமம். சாலையின் முகப்பிலேயே உள்ளது இவரது நாட்டுக்கோழிப் பண்ணை. கோடைமழை லேசாகத் தூறிக்கொண்டிருந்த ஒரு காலை வேளையில் ஆறுமுகச்சாமியைச் சந்தித்தோம். நம்மை அறிமுகப் படுத்தியதும் உற்சாகமாகப் பேசத் தொடங்கினார். ‘‘எனக்குப் பூர்வீகமே பக்கத்துல இருக்குற ஊத்துமலை கிராமம்தான். பத்தாம் வகுப்பு வரைக்கும்தான் படிச்சேன். பிறகு லாரி டிரைவா இருந்தேன். அதுல போதுமான வருமானம் கிடைக்கல. சொந்த நிலம் இருந்ததுனால வேறு ஏதாவது தொழில் செய்யலாம்னு யோசிச்சேன்.

ஆடு வளர்க்கலாம்னு தோணுச்சு. ஆனா, முதலீடு அதிகமாகுமேன்னு முயல் வளர்த்தேன். நிறைய குட்டிகள் கிடைச்சது. ஆனா, சந்தை வாய்ப்பு சரியா அமையாதுனால 2 வருஷத்துல அதைக் கைவிட்டுட்டேன். நெல் அறுவடை செய்யுற மிஷினை வாங்கி அறுவடை பணிகளுக்குப் போனேன். அதுல அறுவடை நேரத்துல மட்டும்தான் வருமானம் கிடைச்சது. தொடர் வருமானம் கிடைக்கிற மாதிரி ஏதாவது செய்யலாம்னு யோசிச்சபோதுதான் ‘கோழி வளர்க்கலாமே, ஆடு வளர்ப்பைவிட முதலீடும் குறைவு. பராமரிப்பும் குறைவு’ன்னு நண்பர் ஒருவர் சொன்னார்.

பண்ணையில் கோழிகளுடன் ஆறுமுகச்சாமி
பண்ணையில் கோழிகளுடன் ஆறுமுகச்சாமி

எனக்கும் அதுதான் சரின்னு தோணுச்சு. எடுத்தவுடனே கோழி வளர்ப்புல இறங்காம, ஏற்கெனவே கோழி வளர்க்குறவங்களைப் போய்ச் சந்திச்சேன். கோழி வளர்ப்பில இருக்குற நிறை, குறைகளைத் தெரிஞ்சுக் கலாம்னு கோவில்பட்டி, விருதுநகர், மதுரை, திண்டுக்கல்னு பல ஊர்கள்ல அலைஞ்சு, 15 பண்ணையாளர்களைச் சந்திச்சேன். அவங்களோட வளர்ப்பு முறை, தீவன மேலாண்மை, நோய் மேலாண்மையைப் பற்றிக் கேட்டுத் தெரிஞ்சுகிட்டேன்.

‘மேய்ச்சல் முறைதான் சிறந்தது, தீவனச் செலவுகளை எந்தளவுக்கு குறைக்கிறோமோ அந்தளவுக்கு வருமானம், அதேசமயம் கோழிகளுக்கு நோய் வராமல் பார்த்துக் கொண்டாலும் நல்ல வருமானம் பார்க்கலாம்’ இதுதான் பெரும்பாலானவங்க கருத்தா இருந்துச்சு. 2017-ம் வருஷத்துல கோழி வளர்ப்பை ஆரம்பிச்சேன். இப்போ முட்டையிடும் பருவத்துல 100 சிறுவிடை நாட்டுக்கோழிகளும், 20 சேவல்களும் இருக்கு” என்றவர் நிறைவாக வருமானம் பற்றிப் பேசினார்.

‘‘தீவனச் செலவுகளை எந்தளவுக்கு குறைக்கிறோமோ அந்தளவுக்கு வருமானம், அதேசமயம் கோழிகளுக்கு நோய் வராமல் பார்த்துக் கொண்டாலும் நல்ல வருமானம் பார்ககலாம்.’’



“முட்டைகளை அப்படியே விற்பனை செய்யாம இன்குபேட்டர் மூலம் குஞ்சுகளாகப் பொரிச்சு ஒருநாள் குஞ்சுகளாக விற்பனை செய்றேன். 100 கோழிகள் மூலம் வாரத்துக்கு 125 முட்டைகள்வரை கிடைக்குது. மாசத்துக்குணு கணக்கு போட்டா 500 முட்டைகள் கிடைக்குது. இதுல, சின்ன முட்டைகள், கீறல் விழுந்த முட்டைகள்னு 80 முட்டைகள்வரை கழிவு போயிடும். மீதமுள்ள 420 முட்டைகளைக் குஞ்சு பொரிக்க வைத்தால் 400 குஞ்சுகள் கிடைக்கும்.

தீவனம் எடுக்கும் கோழிகள்
தீவனம் எடுக்கும் கோழிகள்

ஒருநாள் குஞ்சாக 60 ரூபாய்க்கு விற்பனை செய்றேன். அந்த வகையில் ரூ.24,000 மாத வருமானமாக் கிடைக்குது. இதுல பராமரிப்பு, தீவனச் செலவு ரூ.6,000 ஆகும். அதைக் கழிச்சா 18,000 ரூபாய் லாபம்தான். இதுல குஞ்சு பொரிக்க வைக்க முடியாத முட்டை களைத் தனியா விற்பனையும் செய்றேன். அதன் மூலமா கிடைக்குற உபரி வருமானம் தனி.

ரோட்டு மேலயே பண்ணை இருக்கிறதுனால இங்கேயே நேரடியா வந்து முன்பதிவு செஞ்சு குஞ்சுகளை வாங்கிட்டுப் போயிடுறாங்க. மதுரையைத் தலைமையிடமாகக் கொண்ட ‘தூய நாட்டுக்கோழி வளர்ப்போர் சங்க’த்தில் உறுப்பினரா இருக்கேன். அதுல 70 பேர் உறுப்பினரா இருக்காங்க. அந்தச் சங்கத்தின் ‘வாட்ஸ் அப்’ குரூப் மூலமாவும் குஞ்சுகளை விற்பனை செய்றேன்.

அதனால எனக்கு விற்பனைக்கு எந்த வில்லங்கமுமே இல்ல. குறைவான முதலீட்டில், குறைவான பராமரிப்புல கிடைக்குற இந்த வருமானத்தை நான் பெருசாப் பார்க்கிறேன்” என்றார் சந்தோஷம் பொங்க.

தொடர்புக்கு,
ஆறுமுகச்சாமி,
செல்போன்: 98942 38157.

கொட்டகைச் சுத்தம் அவசியம்!

நாட்டுக்கோழி வளர்ப்பு குறித்து ஆறுமுகச்சாமி சொல்லியவை இங்கே பாடமாக இடம் பெறுகிறது...

தாய்க்கோழிகள் வளர்ப்பதற்காக 30 அடி நீளம், 10 அடி அகலம் 7 அடி உயரத்திலும், குஞ்சுகளை அடைப்பதற்காக 20 அடி நீளம், 10 அடி அகலம் 7 அடி உயரத்திலும் கொட்டகை அமைக்க வேண்டும். தரைப்பகுதி சிமென்ட் தரையாக இருப்பது நல்லது. கொட்டகை காற்றோட்டமாக இருக்க வேண்டும். கொட்டகைக்குள் தரையின் மேல் இரண்டு இன்ச் உயரத்துக்கு மணல் அல்லது தென்னை நார்க்கழிவுகளைப் போட வேண்டும். கொட்டகையின் இரண்டு பக்கங்களிலும் கோழிகள் அமர்வதற்காக சவுக்குக் கம்புகள் அமைக்க வேண்டும். கோழிகள் முட்டையிடுவதற்காகக் கொட்டகையின் சுவர்களில் சிறு அறைகள்போல அமைத்து, அதில் நார்ப்பெட்டிகள், பனையோலைப் பெட்டிகள், எண்ணெய் டின்கள் ஆகியவற்றை வரிசையாக அடுக்கி வைக்கலாம். நார்ப்பெட்டிகள், ஓலைப்பெட்டிகள் சற்று விலை அதிகம் என்பதால், எண்ணெய் டின்களை விலைக்கு வாங்கி அதில் மூடிப்பகுதியில் இரண்டு இன்ச் உயரத்துக்கு மட்டும் தடுப்புபோல வைத்து, டின்னை கிடைமட்டமாக வைத்து விட வேண்டும். அதற்குள் வைக்கோலை நிரப்ப வேண்டும். இந்தத் தடுப்பால், முட்டைகள் கீழே விழாது.

தீவனம் எடுக்கும் கோழிகள்
தீவனம் எடுக்கும் கோழிகள்

தினமும் காலையில் 6 மணிக்குக் கோழிகளை மேய்ச்சலுக்குத் திறந்துவிட்ட பிறகு கழிவுகளை அகற்றி கொட்டகையைச் சுத்தம் செய்துவிட வேண்டும். 3 மாதத்துக்கு ஒருமுறை கொட்டகையின் தரைப்பகுதியில் போடப்பட்டுள்ள மணல் அல்லது தென்னைநார்க்கழிவை அப்புறப்படுத்திவிட்டு, சிமென்ட் தரைப்பகுதியில் சுண்ணாம்பு அடித்துவிட்டு அதன் மேல் புதியதாக மணல் அல்லது தென்னை நார்க்கழிவை போட வேண்டும். 15 நாள்களுக்கு ஒருமுறை, 10 லிட்டர் தண்ணீரில் 5 கிராம் மஞ்சள்தூள் கலந்தும், 10 லிட்டர் தண்ணீரில் 500 மி.லி வேப்பிலைச்சாறு கலந்தும் சுழற்சி முறையில் கொட்டகைக்குள்ளும் வெளியிலும் கைத்தெளிப்பானால் தெளிக்க வேண்டும். இதனால், கிருமிகளின் தாக்குதல், தொற்று ஏதுமிருக்காது.

அடர்தீவனம்

தலா 25 கிலோ அடர்தீவனமாகக் கம்பு, மக்காச்சோளம், கோதுமை, அரிசிக்குருணை, அரிசித் தவிடு, 5 கிலோ கருவாட்டுத்தூள், 1 கிலோ கல் உப்பு ஆகியவற்றை மொத்தமாக ரைஸ் மில்லில் திரித்துக்கொள்ள (நொய்யாக்கிக்கொள்ள) வேண்டும். தினமும் காலையில் 7 முதல் 8 மணிக்குள்ளும், மாலை 3 முதல் 4 மணிக்குள்ளும் அடர்தீவனம் வைக்க வேண்டும். இரண்டு வேளையும் அடர்தீவனத்தில் 3 கிலோவை எடுத்துப் பிட்டுப் பதத்துக்குத் தீவனத் தட்டுகளில் பிசைந்து வைக்க வேண்டும். இது தவிர வாரத்தில் 2 நாள்கள் காலை வேளையில் பசுந்தீவனமாக அசோலா, கீரைகள், காய்கறிகள் ஆகியவற்றையும் தீவனமாகக் கொடுக்கலாம். தீவனம் வைத்தபிறகு தண்ணீரை மாற்றிவிட வேண்டும். தீவனம், தண்ணீர்த் தட்டுகளைத் தினமும் தண்ணீரால் கழுவி சுத்தம் செய்வது அவசியம்.

ஆற வைக்கப்பட்ட வெந்நீர்

தினமும் காலையில் மேய்ச்சலுக்காகக் கோழிகளைத் திறந்துவிட்ட பிறகு, தட்டுகளில் நன்கு ஆறவைக்கப்பட்ட வெந்நீரை ஊற்றி வைக்க வேண்டும். இதுதவிர, நோய் எதிர்ப்பு சக்தி அதிகரிப்பதற்காக மாதத்தில் திங்கள்கிழமைகளில் மட்டும் காலையில் வெந்நீருடன் சிலவற்றைக் கலந்து கொடுக்கலாம். முதல் திங்கள்கிழமை, வெந்நீரில் மஞ்சள்தூளும், இரண்டாவது திங்கள்கிழமை சுக்கு, சின்னவெங்காயத்தை இடித்தும், (சுக்குவை முதல்நாள் இரவில் ஊறவைத்து மறுநாள் காலையில் சின்ன வெங்காயத்துடன் கலந்து அரைத்துக்கொள்ள வேண்டும்) மூன்றாவது திங்கள்கிழமை அதிமரத்தூளைக் கலந்தும், நான்காவது திங்கள்கிழமை வசம்புத்தூளைக் கலந்தும் தண்ணீர்த் தட்டுகளில் வைக்க வேண்டும். மஞ்சள்தூள், சுக்கு, சின்ன வெங்காயம், அதிமதுரத்தூள், வசம்புத்தூள் ஆகியவற்றை ஒரு கோழிக்கு ஒரு கிராம் வீதம் கலந்துகொள்ள வேண்டும்.

மேய்ச்சலில் கோழிகள்
மேய்ச்சலில் கோழிகள்

சளியைப் போக்க ரசம் சாதம்

கோழி வளர்ப்பைப் பொறுத்தவரையில் சளிப்பிரச்னைதான் பெரும் பிரச்னை. இதைத் தவிர்க்க, வாரத்தில் திங்கள், புதன், வெள்ளி ஆகிய கிழமைகளில் மாலைத் தீவனமாக ரசம்சாதம் வைக்கலாம். ஒரு கிலோ அரிசியைத் தண்ணீரில் நான்கு முறை நன்கு அலசிக்கொள்ள வேண்டும். பிறகு, விறகடுப்பில் குழைவான பதத்தில் சாதத்தை வடித்துக்கொள்ள வேண்டும். இந்தச் சாதத்தில் அரை லிட்டர் அளவு ரசம் ஊற்றிப் பிசைந்து தீவனத் தட்டுகளில் வைக்கலாம். ரசத்தில் மிளகு, சீரகம், பூண்டு ஆகிய பொருள்களை வழக்கத்தைவிடச் சற்றுக் கூடுதலாகச் சேர்க்க வேண்டும்.

தடுப்பூசி அவசியம்

மூன்று மாதத்துக்கு ஒருமுறை கோழிகளுக்குக் கால்நடை மருத்துவரால் பரிந்துரைக்கப்பட்ட தடுப்பூசியைப் போட வேண்டும். தடுப்பூசி போடுவதற்கு ஒரு வாரத்துக்கு முன்பு குடற்புழு நீக்கம் செய்ய வேண்டும். குடற்புழு நீக்கம் செய்ய வெண்பூசணியைச் சிறுசிறு துண்டுகளாக வெட்டிக் கூடாரத்தின் 4 மூலைப் பகுதிகளில் தட்டுகளில் வைக்க வேண்டும். அந்நாளில் மதியம் 12 மணிவரை மேய்ச்சலுக்குத் திறந்துவிடக் கூடாது. தண்ணீரும் வைக்கக் கூடாது. கோழியின் மூக்கில் நீர் வடிதல், அடிக்கடி வாயைத் திறந்து மூடுதல், கழுத்தைத் திருப்பி வைத்துக்கொண்டு நிற்பது, இது போன்ற அறிகுறிகள் தென்பட்டால் கோழிக்குச் சளி பிடித்துள்ளது எனத் தெரிந்துகொள்ளலாம். சளி பிடித்திருந்தாலோ, சோர்வாகக் காணப்பட்டாலோ அந்தக் கோழிகளை உடனடியாகத் தனிமைப்படுத்த வேண்டும்.

புதிதாகக் கோழி வளர்ப்பில் இறங்குபவர்கள் கவனத்துக்கு

‘‘கோழி வளர்ப்பவர்களோட வளர்ப்பு முறை, தீவனம், நோய் மேலாண்மையைப் பற்றித் தெளிவாகக் கேட்டுத் தெரிந்துகொள்ள வேண்டும். பெரிய கோழிகளாக வாங்காமல், ஒரு நாள் அல்லது ஒரு மாதக் குஞ்சுகளாக வாங்கி வளர்ப்பது சிறந்தது. முதலிலேயே அதிக எண்ணிக்கையில் தொடங்காமல் ஒரு வருடத்துக்குப் பிறகு எண்ணிக்கையை அதிகரிக்கலாம். மேய்ச்சலுக்கான இடம் கூடுதலாக இருக்க வேண்டும். ஒரு வருடத்தைத் தாண்டிதான் வருமானத்தைப் பற்றி யோசிக்க வேண்டும். கூண்டு முறையைவிட மேய்ச்சல் முறையே சிறந்தது. முட்டைகளாக விற்பனை செய்வதைவிடக் குஞ்சுகளாகவும், விடலைக் கோழிகளாகவும் விற்பனை செய்தால் நல்ல வருமானம் பார்க்கலாம்” என்கிறார் ஆறுமுகச்சாமி.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism