Published:Updated:

செம்மறி ஆடு வளர்ப்பு... ஒரு விவசாயியின் லாப-நஷ்டக் கணக்கு!

ஆடுகளுடன் அழகேசன்
பிரீமியம் ஸ்டோரி
ஆடுகளுடன் அழகேசன்

கால்நடை

செம்மறி ஆடு வளர்ப்பு... ஒரு விவசாயியின் லாப-நஷ்டக் கணக்கு!

கால்நடை

Published:Updated:
ஆடுகளுடன் அழகேசன்
பிரீமியம் ஸ்டோரி
ஆடுகளுடன் அழகேசன்

பாரம்பர்ய விதைகள், மண்ணுக்கும் விளைச்சலுக்கும், உடலுக்கும் உத்தரவாதமாக இருப்பதைப்போல கால்நடைகளும் நம் தட்பவெப்பநிலைக்கும் வருமானத்துக்கும் உத்தரவாதமாக இருந்து வருகின்றன. அந்த வகையில் நல்ல விற்பனை வாய்ப்பு இருப்பதால் பலரும் ஆடு வளர்ப்பைத் தேர்ந்தெடுக்கிறார்கள்.

அந்த வகையில் தமிழ்நாட்டில் மேச்சேரி செம்மறியாடுகள் மிகவும் பிரபலமானவை. இந்த இன செம்மறியாடுகளை வளர்த்து நல்ல வருமானம் பார்த்து வருகிறார் சேலம் மாவட்டம், காடையாம்பட்டி வட்டம், மரக்கோட்டையைச் சேர்ந்த விவசாயி அழகேசன்.

3 மாதம் வளர்த்து விற்பனை

ஒரு மாலைப் பொழுதில் அவரது பண்ணைக்குச் சென்றோம். ஆடுகளுக்குத் தீவனம் வைத்துக்கொண்டிருந்தவர் மகிழ்ச்சியோடு வரவேற்றுப் பேசினார். “எனக்கு 5 ஏக்கர் நிலமிருக்கு. எல்லாமே மேட்டுநிலம்தான். நிலக்கடலை, காராமணி, கேழ்வரகுனு மேட்டு வெள்ளாமை நடக்குது. அதனால, முழுக்க விவசாயத்த நம்பியிருக்க முடியல. சில கான்ட்ராக்ட் வேலைகளைச் செஞ்சுகிட்டு வந்தேன். போன வருஷம் கொரோனா ஊரடங்கு போட்டதால, அந்த கான்ட்ராக்ட் வேலையும் செய்ய முடியல. வேறு என்ன தொழில் செய்யலாம்னு யோசிச்சுகிட்டு இருந்தப்ப ஆடு, மாடுகள வளர்க்கலாம்னு தோணுச்சு. எங்க பகுதில மேய்ச்சல் முறையில செம்மறியாடுகள நிறைய வளர்ப்பாங்க. அதனால நாமும் செம்மறியாடு வளர்ப்புல இறங்கலாம்னு முடிவு பண்ணினேன். என்னால ஆடுகள ஓட்டிட்டுப் போய் மேய்ச்சிட்டு வர்றதுக்கெல்லாம் சாத்தியமில்ல. அதனால, பண்ணை முறையில வளர்க்கலாம்னு முடிவு செஞ்சேன். அதிலும் பெட்டை ஆடுகள வளர்க்கிறதவிட கிடாக்குட்டிகள வாங்கிட்டு வந்து 3 மாசம் வளர்த்து விக்கணும்னு முடிவு செஞ்சேன்” என்று ஆடு வளர்ப்புக்கு வந்த கதையைச் சொன்னவர் தொடர்ந்தார்.

ஆடுகளுடன் அழகேசன்
ஆடுகளுடன் அழகேசன்


“ஆடு வளர்க்கிறதுல எனக்கு அனுபவம் இல்ல. எல்லாம் ஆடு வளர்க்கிறவங்கள பார்த்து வளர்ந்த அனுபவம்தான். மேச்சேரி சந்தையில இருந்து முதல்ல 49 கிடாக்குட்டிகள வாங்கிட்டு வந்து வளர்த்தேன். ஒரு குட்டி 5,000 முதல் 6,500 ரூபாய் விலையில கிடைக்குது. நான் 6,200 விலையில வாங்கிட்டு வந்தேன். இந்தக் குட்டிகள் 2 - 3 மாச வயசுடையவை. ஆடு வளர்ப்புக்காக 30-க்கு 20 சதுர அடியில கொட்டகை அமைச்சேன். இந்த அளவுல 50 ஆடுகள் வரை வளர்க்கலாம். நான் 49 குட்டிகள வளர்த்தேன். தினமும் அடர்தீவனம், கடலைக்கொடி, பசுந்தீவனம் கலந்து கொடுத்தோம். மூணு வேலை தண்ணி வெச்சோம். வாங்கிட்டு வந்த ஒரு வாரத்துல நோய் எதிர்ப்பு சக்திக்காகத் தடுப்பூசி போட்டுவிட்டோம். அவ்வளவுதான் மத்தபடி தானாவே வளர்ந்து வந்துச்சு. சரியா 3 மாசத்துல விற்பனைக்குத் தயாராகிடுச்சு. அடுத்த சுற்றுக்காக 49 குட்டிகள வாங்கிட்டு வந்து கொட்டகைக்கு எதிரிலேயே 30-க்கு 20 சதுர அடியில கம்பி வலையால் ஆன திறந்தவெளி பட்டி போட்டு வளர்த்துட்டு வந்தோம்.

‘‘மற்ற ரக ஆடுகளைவிட இந்த ஆடுகளில் எலும்பைவிட சதைப்பகுதியின் அளவு அதிகம். அதே போன்று தோலும் வலுவானதாக இருக்கும்.’’


3 மாதத்தில் 25-30 கிலோ எடை அதிகரிக்கும்

முதல் சுற்று ஆடுகளை முழுக்க விற்று முடிச்சதும், இரண்டாவது சுற்று ஆடுகளை உள்ளே கொண்டு வந்துவிட்டோம். அதுக வளர்ந்ததும் ரெண்டாவது சுற்று விற்பனையும் முடிஞ்சிடுச்சு. இப்போ மூணாவது சுற்றுக்கு 32 கிடாக்கள் வளர்த்து விற்பனைக்குத் தயாராயிடுச்சு. அடுத்த சுற்றுக்கு வெளியில 32 கிடாக்கள் தயாரா பட்டில இருக்கு. சந்தையில இருந்து கிடா குட்டியை வாங்கிட்டு வரும்போது 10-15 கிலோ எடையில் இருக்கும். அதை மூன்று மாதங்கள் வளர்த்தால் 25-30 கிலோ எடைக்கு வரும்” என்றவர் நிறைவாக வருமானம் குறித்துப் பேசினார்.

ஆடுகளுடன் அழகேசன்
ஆடுகளுடன் அழகேசன்



“முதல் சுற்றுல 47 குட்டிகள வாங்கிட்டு வந்ததுல எந்தப் பிரச்னையும் இல்லாம 47 கிடாக்கள விற்பனை செஞ்சிட்டேன். ஒரு கிலோ உயிர் எடை ரூ.350. சராசரியா ஒரு கிடா 27 கிலோ என்ற வகையில 4,44,150 ரூபாய் வருமானம். 47 குட்டிகள ஒரு குட்டி 6,200 ரூபாய்னு வாங்கிட்டு வந்த வகையில 2,91,400 ரூபாய் ஆனது. குட்டிகளோட விலை உச்சத்தில் இருந்தபோது வாங்கினதால இந்த விலை. சீஸன் இல்லாத நேரத்துல வாங்கினா ஒரு குட்டி 5,000 ரூபாய்தான். குட்டிகள வாங்கிட்டு வந்து வளர்த்து விக்குறதுக்கு 100 நாள்கள் ஆயிடுச்சு. அதுக்கான அடர்தீவனம், பராமரிப்புனு 90,000 ரூபாய் செலவாச்சு. பசுந்தீவனம், அடர்தீவனம் இரண்டையும் வாங்கினதால இந்தச் செலவு. இல்லைனா இதுல செலவு பெருவாரியா குறையும். ஆக, 100 நாள்கள்ல செலவுனு பார்த்தா 3,81,400 ரூபாய். இதுபோக 62,750 ரூபாய் லாபமா நின்னுச்சு.

பெரிய பராமரிப்புத் தேவையில்லை

2-வது சுற்றுல 49 குட்டிகள வாங்கிட்டு வந்ததுல 2 குட்டிகள் இறந்தது போச்சு. 47 கிடாக்கள வளர்த்து விற்பனை செஞ்சிட்டேன். ஒரு கிலோ உயிர் எடை ரூ.340. விற்பனை செய்த 47 கிடாக்கள் மூலமா ரூ.4,31,460 வருமானம். இதுல 49 குட்டிகள வாங்கிட்டு வந்த செலவு, தீவனம், போக்குவரத்துனு 3,84,000 ரூபாய் செலவு. அதுபோக 47,460 ரூபாய் லாபமா நின்னுச்சு. இந்த வருமானம் குறைவா இருக்கிறதா தெரியலாம். ஆனா, குறுகிய நாள்கள்ல ஒரு லட்சம் ரூபாய்க்கு மேல லாபம் எடுத்திருக் கேன். உடனடியா ஆடு வளர்ப்பு தொழில தொடங்கணும்கிறதால இதுல செலவு கொஞ்சம் அதிகமயிடுச்சு. கொஞ்சம் பொறுமையா குட்டிகள தேடி வாங்கி, நாம தீவனத்த உற்பத்தி பண்ணி போட்டிருந்தா 100 நாள்கள்ல 2 லட்சம் வரை லாபம் பார்த்திருக்கலாம். இந்தச் செம்மறியாடு வளர்ப்புக்கு பெருசா பராமரிப்பெல்லாம் செய்யல. தீவனம் போடுறோம், தண்ணி வைக்கிறோம் அவ்வளவுதான். இவ்வளவுக்கும் என்னோட விவசாயம், நல்லது, கெட்டதுனு பாத்துக்கிட்டே இந்த வருமானம் எடுத்திருக்கேன்.

ஆடுகளுடன் அழகேசன்
ஆடுகளுடன் அழகேசன்



அடுத்து 3-வது சுற்று, 4-வது சுற்று இருக்கு. விற்பனைக்கு எந்தப் பிரச்னையும் இல்ல. பண்ணைக்கிட்டே வந்து வாங்கிட்டு போயிடுறாங்க. பக்ரீத், ரம்ஜான், தீபாவளி, உகாதி மாதிரி விஷேச நாள்களைக் கணக்கு வெச்சு வளர்த்தா நல்லாவே விலை கிடைக்குது. வெளியில போய் எங்கும் மேய்க்காம இருக்கிற இடத்திலிருந்து நம்ம வேலைகளையும் பாத்துக்கிட்டு பண்ணையும் பராமரிக்கிறதால, ஆடு வளர்ப்பு நல்லாவே செட்டாயிடுச்சு. இனிமேதான் பெட்டை ஆடுகளையும் வளர்க்கணும்னு இருக்கேன். ஆடுகள்ல நோய்த் தாக்குதலைக் கட்டுப்பாடோடு வெச்சுகிட்டா செம்மறியாடு வளர்ப்பு செம்மையா இருக்கும்” என்று விடை கொடுத்தார்.



தொடர்புக்கு, அழகேசன்,

செல்போன்: 94430 29683.

பிரியாணிக்கு ஏற்ற இறைச்சி

பிரியாணி தயாரிக்க, கொழுப்பு நிறைந்த செம்மறியாட்டுக் கறிதான் அதிகம் பயன்படுத்தப்படுகிறது. காரணம் வெள்ளாடுகளில் கொழுப்புத் தன்மை குறைவு, செம்மறியாடுகளில் கொழுப்பு அதிகம். அதனால், செம்மறியாட்டுக் கறியைப் பயன்படுத்தி சமைக்கப்படும் பிரியாணி சற்றே சுவை கூடுதலாக இருக்கும் என்கிறார்கள் விவரமறிந்தவர்கள்.

இறைச்சிக்காக வளர்க்க ஏற்றது!

மேச்சேரி செம்மறியாடுகள் குறித்து கால்நடை மருத்துவரும், மேச்சேரி செம்மறியாடுகள் குறித்து ஆய்வு செய்தவருமான முனைவர் திருவேங்கடனிடம் பேசினோம். “அங்கீகரிக்கப்பட்ட செம்மறியாட்டு இனங்களிலேயே அதிகம் வளர்க்கப்படுவது மேச்சேரி செம்மறியாடுகள்தான். இது செம்பழுப்பு நிறத்தில் வெள்ளைத் திட்டுக்களோடு காணப்படும் (வளர்ந்த ஆடுகளில் வெள்ளைத் திட்டுக்கள் தெரியாது). அதாவது துவரம்பருப்பின் தோல் நிறத்தில் இருக்கும். இதற்காகவே ஈரோடு மாவட்டத்தில் இந்த ஆட்டை ‘துவரம்செம்பிளி’ என்று அழைப்பார்கள். ‘மேய்ச்சல் ஏரி’ என்பது மருவியே ‘மேச்சேரி’ என்றானது. அந்த அளவுக்கு மேச்சேரி ஊரைச் சுற்றி மேய்ச்சல் சார்ந்த ஆடு வளர்ப்பு அதிகம். இங்கிருந்து பரவலாகி சேலம், ஈரோடு, நாமக்கல், கரூர், தர்மபுரி மற்றும் திண்டுக்கல் மாவட்டத்தின் சில பகுதிகள் என்று வளர்க்கப்படுகிறது. கிட்டத்தட்ட 10 லட்சம் ஆடுகள் இருப்பதாகப் புள்ளிவிவரம் சொல்கிறது.

பண்ணையில் ஆடுகள்
பண்ணையில் ஆடுகள்



பொதுவாகச் செம்மறியாடுகள் களைகளைத்தான் அதிகம் சாப்பிடும். ஆனால், இந்த ஆடுகள் களைகளோடு மர இலைகள், வேலியில் வளரும் கொடிகளையும் அதிகம் சாப்பிடும். மற்ற ரக ஆடுகளைவிட இந்த ஆடுகளில் எலும்பைவிட சதைப்பகுதியின் அளவு அதிகம். அதே போன்று தோலும் வலுவானதாக இருக்கும். இது தோல் சார்ந்த பொருள்கள் தயாரிக்கப் பயன்படுகிறது. இந்த ரக ஆடுகளின் பெட்டை மற்றும் கிடாக்களில் கொம்பு முளைக்காது. இதன் உடல் அமைப்பில் உள்ள அத்தனை உறுப்புகளும் கணக் கச்சிதமாக இருக்கும். கட்டுக்கோப்பான உடலமைப்பைக் கொண்டது. அதனால் ஆடுகளின் வளர்ச்சி சீராக இருக்கும். கச்சைக்கட்டி, ராமநாதபுரம் வெள்ளை, கீழக்கரிசல், வேம்பூர், சென்னை சிவப்பு ஆகிய தமிழகச் செம்மறியாட்டு ரகங்களில், இறைச்சிக்காக அதிகம் வளர்க்கப்படுவது மேச்சேரி செம்மறி ஆடுகள்தான்.

மேய்ச்சலில் செம்மறியாடுகள்
மேய்ச்சலில் செம்மறியாடுகள்



மேச்சேரி ஆட்டின் சிறப்புகளை உணர்ந்து தமிழ்நாடு அரசு 1978-ம் ஆண்டு 160 ஏக்கர் பரப்பளவில் மேச்சேரியை அடுத்த பொட்டனேரியில் ஆடு ஆராய்ச்சி நிலையத்தை அமைத்தது. அங்கு இதனுடைய மரபணுவைச் சேகரித்துப் பரவலாக்கம் செய்து வருகிறார்கள். இதோடு சேலம் கறுப்பு என்ற வெள்ளாட்டினத்தையும் இந்த ஆராய்ச்சி மையத்தில் பரவலாக்கி வருகிறார்கள். கரூர், ஈரோடு சுற்றுவட்டார மாவட்டங்களில் கொரங்காடு என்று சொல்லப்படும் நிலங்களில் இதை அதிகம் மேய்க்கலாம். இனவிருத்திக்காக வளர்ப்பவர்கள் நல்ல தரமான கிடாக்களிலிருந்து இனவிருத்தியைப் பெருக்கலாம். இந்த ஆட்டைக் கொட்டகைக்குள் அடைத்துதான் வளர்க்க வேண்டும் என்பதில்லை. திறந்தவெளி பட்டிகளிலேயே அடைத்து வளர்க்கலாம். ஆடுகள் மூலமாகக் கிடைக்கும் எரு மூலமாகவும் வருமானம் பார்க்கலாம்” என்றார்.

ஒன்றரை ஆண்டுகள், ரூ.2.5 லட்சம் வருமானம்

சேலம் மாவட்டம், காடையாம்பட்டி வட்டம், காட்டுவலவு கிராமத்தைச் சேர்ந்த கோவிந்தராஜ் மேச்சேரி செம்மறியாடுகளை மேய்ச்சல் முறையில் வளர்த்து வருகிறார். அவரிடம் பேசினோம். “25 வருஷமா பட்டி அமைச்சு செம்மறியாடுகளை வளர்த்திட்டு வர்றேன். இந்த ஆடுகள் எங்க விட்டாலும் கிடைக்கிறத மேய்ஞ்சு நல்லா வளரும். இந்தப் பகுதில நிறைய மேட்டுநிலம்தான். ஆறு மாசத்துக்குத்தான் நிலத்துல வெள்ளாமை இருக்கும். மத்த நேரங்கள்ல இந்த நிலங்கள்ல புல் இருக்கும். அதைத்தான் இந்த ஆடுகள் மேயுது. என் அனுபவத்துல இந்த ஆடுகள்ல நோய்த் தாக்குதல் பெருசா ஏற்பட்டதில்ல. ஒன்றரை வருஷத்துல 27 ஆடுகள் மூலமா 54 குட்டிகள் கிடைக்குது. ஒரு குட்டி 4,000 - 5,000 ரூபாய் விலை போகுது. 3 மாசம் வளர்த்து விற்பனை செஞ்சிடுவேன். இதுமூலமா கிட்டத்தட்ட ரெண்டரை லட்சம் ரூபாய் வருமானம் கிடைச்சிடுது. அதனால, பிரச்னை இல்லாம வருமானம் எடுத்துட்டு இருக்கேன். எனக்கு இந்த ஆடுகள்தான் வாழ்க்கையே. பல நல்லது கெட்டதுகள இதை வெச்சுதான் செஞ்சிருக்கேன்” என்றார்.

கோவிந்தராஜ்
கோவிந்தராஜ்

இந்த ஆடுகள் எங்கு கிடைக்கும்?

சேலம் மாவட்டம், கொளத்தூர், மேட்டூர், மேச்சேரி, ஓமலூர், தாரமங்கலம் பகுதிகளிலும், அங்கே நடைபெறும் சந்தைகளிலும் இந்த ஆடுகளை வாங்கலாம். மேச்சேரியில் உள்ள ஆடு ஆராய்ச்சி நிலையத்திலும் முன்பதிவு அடிப்படையில் வாங்கிக் கொள்ளலாம்.

தொடர்புக்கு,

பேராசிரியர் மற்றும் தலைவர், மேச்சேரி ஆடு ஆராய்ச்சி நிலையம், பொட்டனேரி-636453 தொலைபேசி: 04298 262023