Published:Updated:

பலே வருமானம் தரும் பல்பயன் வேளாண் காடு!

முனைவர் பார்த்திபன்
பிரீமியம் ஸ்டோரி
முனைவர் பார்த்திபன்

அறிமுகம்

பலே வருமானம் தரும் பல்பயன் வேளாண் காடு!

அறிமுகம்

Published:Updated:
முனைவர் பார்த்திபன்
பிரீமியம் ஸ்டோரி
முனைவர் பார்த்திபன்

விவசாயிகளுக்கு மாத வருமானம் தரும் வகையில் ‘பல்பயன் வேளாண் காடுகள்’ என்கிற மாதிரிப் பண்ணை வடிவத்தை உருவாக்கியுள்ளார் கோயம்புத்தூர், மேட்டுப்பாளையத்தில் இயங்கிவரும் வனக்கல்லூரி மற்றும் ஆராய்ச்சி நிலையத்தின் பேராசிரியர் மற்றும் தலைவர் முனைவர் பார்த்திபன். இயற்கை எழில் கொஞ்சும் கல்லூரி வளாகத்தின் ஒரு பகுதியில் அமைந்துள்ள பல்பயன் வேளாண் காடுகளைப் பார்த்திபன் நமக்கு அறிமுகம் செய்துவைத்து விளக்கினார்.

வனக்கல்லூரியில் அமைக்கப்பட்டிருக்கும் 
மாதிரித் தோட்டம்
வனக்கல்லூரியில் அமைக்கப்பட்டிருக்கும் மாதிரித் தோட்டம்

‘‘பிற துறைகளில் உள்ளவர்கள் மாத ஊதியம் பெறுவதுபோல, விவசாயிகளும் பெற வேண்டும் என்கிற நோக்கில் இந்தப் பண்ணையை வடிவமைத்துள்ளேன். ஒரு ஏக்கர் பரப்பளவில் இதை அமைத்துள்ளோம். வெளியாட்களை வேலைக்கு வைத்துக்கொள் ளாமல், குடும்பத்தில் உள்ளவர்கள் மட்டுமே ஈடுபடும் வகையில் உருவாக்கப்பட்டுள்ளது. குறிப்பாகச் சிறு குறு விவசாயிகளுக்கு மிகவும் ஏற்றப் பண்ணைத்திட்டம் இது’’ என்று முகவுரை கூறிய பார்த்திபன், பல்பயன் வேளாண் காடுகளின் வடிவமைப்பு மற்றும் பயிர் சாகுபடி விவரங்களை விளக்கினார்.

“சதுரவடிவில் உள்ள ஒரு ஏக்கர் நிலத்திற்குள் படுக்கவைத்த வண்டிச்சக்கரம்போல் காட்சி தரும் வகையில், வட்ட வடிவ முறையில் அமைக்கப்பட்டிருக்கிறது இந்தப் பல்பயன் வேளாண் காடுகள் பண்ணை. நிலத்தின் மையத்தில் பத்தடிக்குப் பத்தடி அளவில் ஒரு சிறிய கொட்டகை அமைத்துக்கொள்ள வேண்டும். அங்கிருந்து நிலத்தின் நான்கு திசைகளிலும் நடந்து சென்று வரும் வகையில் பாதை அமைக்க வேண்டும். கொட்டகையை மையமாக வைத்து, வட்ட வடிவில் பயிர்களை நடவு செய்ய வேண்டும். ஒவ்வொரு வட்டமும், நடுவில் உள்ள பாதை காரணமாக நான்கு பாகங்களாக இருக்கும்.

கொட்டகையைச் சுற்றி ஆறு அடுக்குகளாக (வட்டங்களாக) பயிர்களை நடவு செய்வதுபோல் இந்தப் பண்ணை வடிவமைக்கப் பட்டுள்ளது. முதல் அடுக்கு 3 மீட்டர் அகலத்திலும், அடுத்தடுத்த அடுக்குகள் 5 மீட்டர் அகலத்திலும் இருப்பதுபோல் அமைக்கப்பட்டுள்ளது. முதல் வட்டத்தில் காய்கறிப் பயிர்கள், இரண்டாவது வட்டத்தில் பழவகைச் செடிகள், மூன்றாவது வட்டத்தில் மூலிகைகள், நான்காவது வட்டத்தில் ஓட்டுப்பலகை (பிளைவுட்) மரங்கள், ஐந்தாவது வட்டத்தில் தடிமரங்கள், ஆறாவது வட்டத்தில் அதிக விலைமதிப்புள்ள மரங்கள் என நடவு செய்ய வேண்டும்.

முதல் அடுக்கில் மாத வருமானம் கொடுக்கும் குறுகிய காலப் பயிர்களை நடவு செய்ய வேண்டும். நிலத்தின் நடுவில் உள்ள பாதை காரணமாக வட்டம் நான்கு பாகங்களாக இருக்கும். அதில் ஒரு பாகத்தில் மலர்கள், இரண்டாவது பாகத்தில் கறிவேப்பிலை, மூன்றாவது பாகத்தில் தீவனப் பயிர்கள், நான்காவது பாகத்தில் காய்கறிகள், கீரைகள் நடவு செய்ய வேண்டும். முதல் அடுக்கில் உள்ள மலர்கள், தீவனப்பயிர்கள், காய்கறிகள், கீரைகள், கறிவேப்பிலை ஆகிய பயிர்களால் மாத வருமானம் தொடர்ந்து கிடைக்கும். முதல் வட்டத்தின் வரப்பில் 10 அடி இடைவெளியில் 9 முருங்கைக் கன்றுகள் நடவு செய்யப்பட்டுள்ளன. கீரை 22-ம் நாள் முதல் வருமானம் கொடுக்கும். காய்கறிகள் 50-ம் நாள் முதல் அறுவடைக்கு வரும். தொடர்ந்து நான்கு மாதங்கள் தொடர் வருமானம் பார்க்கலாம். ரகத்தைப் பொறுத்து மலர்கள் மூன்றாம் மாதம் முதல் வருமானம் கிடைக்கும். தொடர்ந்து கறிவேப்பிலை அறுவடைக்கு வரும். முருங்கைச் செடிகள் 18 மாதங்களில் வளர்ந்துவிடும். காய் மற்றும் கீரை மூலம் செடி ஒன்றிலிருந்து 200 ரூபாய் வருமானம் கிடைக்கும்.

ஒட்டுமொத்த விகடனுக்கும் ஒரே ஷார்ட்கட்!

மலைவேம்பு, வெள்ளைக்கடம்பு, சந்தன வேம்பு 5 ஆண்டுகளில் 40,000 ரூபாய் வருமானம் கிடைக்கும். 15 மரங்கள் மூலம் மாதம் 300 இளநீர்க் காய்கள் கிடைக்கும். இதன் மூலம் மாதம் குறைந்தபட்சம் 3,000 வருமானம் கிடைக்கும்.

பண்ணையில் இரண்டு ஆடுகளும், ஒரு கறவை மாடும் அவசியம் இருக்க வேண்டும். அதை மனதில் வைத்துத்தான் தீவனப்பயிர் சாகுபடி செய்யப்பட்டுள்ளது. கறவை மாடு கொடுக்கும் பால் விற்பனையில் ஒரு வருமானமும், அதன் சாணம் தொழுஉரமாகவும் பயன்படும். ஆடு போடும் புழுக்கை மண்ணுக்கு வளம் சேர்க்கும் இயற்கை உரமாக அமையும். இரண்டு ஆடுகள் மூலம் ஆண்டுக்குக் குறைந்தபட்சம் 4 குட்டிகள் கிடைக்கும். 6 மாதங்கள் பராமரிப்புச் செய்து குட்டிகளை விற்பனை செய்தால் 20,000 ரூபாய் கிடைக்கும்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
முனைவர் பார்த்திபன்
முனைவர் பார்த்திபன்

இரண்டாவது அடுக்கில் பழவகைச் செடிகளை வளர்க்கலாம். எலுமிச்சை, கொய்யா, நாவல், சீத்தா ஆகியவற்றில் தலா 5 பழச்செடிகள் நடவு செய்யப்பட்டுள்ளன. இவை 18 மாதங்களில் காய்ப்புக்கு வரும். ஆண்டுக்கு இரண்டு அறுவடை வீதம் 20 மரங்களிலிருந்து குறைந்தபட்சம் 20,000 ரூபாய் வருமானம் கிடைக்கும். மூன்றாவது அடுக்கில் நீர் மருது, ஆடாதொடா, வில்வம், முள் சீத்தா ஆகிய பயிர்கள் நடவு செய்யப்பட்டுள்ளன. இவை இரண்டாவது ஆண்டு முதல் மகசூல் கொடுக்கத் தொடங்கும். இவை மூலம் ஆண்டுக்கும் 10,000 ரூபாய் வீதம் 25 ஆண்டுகள் வரை வருமானம் பார்க்கலாம்.

நான்காவது அடுக்கில் ஓட்டுப்பலகை மரங்களான மலைவேம்பு, வெள்ளைக் கடம்பு, சந்தன வேம்பு, நெல்றை ஆகிய 5 வகை மரங்கள் நடவு செய்யப்பட்டுள்ளன. இவற்றை 5 ஆண்டுகளில் வெட்டி விற்பனை செய்யலாம். அதன் மூலம் 40,000 ரூபாய் வருமானம் கிடைக்கும். 10 ஆண்டுகள் வளர்த்து விற்பனை செய்தால் லாபம் அதிகமாகும். நம் தேவைகளைப் பொறுத்து வெட்டி விற்பனை செய்யலாம்.

‘‘முதல் வட்டத்தில் காய்கறிப் பயிர்கள், இரண்டாவது வட்டத்தில் பழவகைச் செடிகள், மூன்றாவது வட்டத்தில் மூலிகைகள், நான்கு, ஐந்து, ஆறாவது வட்டங்களில் மரப்பயிர்கள் என நடவு செய்ய வேண்டும்.’’

ஐந்தாவது அடுக்கில் தடிமரங்களான தேக்கு, மகோகனி, வெண்தேக்கு, குமிழ் ஆகிய நான்கு மரங்களை நடவு செய்துள்ளோம். நடவு செய்த 10 ஆண்டுகளுக்கு மேல் வெட்டி விற்பனை செய்யலாம். 10 ஆண்டுகளில் வெட்டி விற்பனை செய்தால் 1 லட்சம் ரூபாய் வரை வருமானம் கிடைக்கும். 20 ஆண்டுகள் வளர்த்து விற்பனை செய்தால் 5 மடங்கு விலை கிடைக்கும்.

ஆறாவது வட்டத்தில் சந்தனம், செம்மரம், ரோஸ்வுட்(தோதகத்தி), அகர் ஆகிய விலை உயர்ந்த மரங்களை நடவு செய்திருக்கிறோம். இவை மண்ணிலுள்ள வைப்பு நிதி போன்றவை. ஆண்டுகள் அதிகரிக்க அதிகரிக்க இதன் மதிப்பு பல லட்சங்களில் இருக்கும். தேவைப் பட்டால் 15 ஆண்டுகள் முதல் வெட்டி விற்பனை செய்யலாம்.

தொடர்ந்து ஒரு ஏக்கர் ‘ப’ வடிவ நிலத்தின் எல்லை வரப்பில் 25 அடி இடைவெளியில் 15 இளநீர்த் தென்னங்கன்றுகளை நடவு செய்யலாம். மூன்று ஆண்டுகளில் தென்னை மகசூல் கொடுக்கத் தொடங்கும். ஒரு மரத்திலிருந்து மாதம் 20 இளநீர்க் காய்களைப் பறிக்கலாம். 15 மரங்கள் மூலம் மாதம் 300 இளநீர்க் காய்கள் கிடைக்கும். இதன் மூலம் மாதம் குறைந்தபட்சம் 3,000 ரூபாய் வருமானம் கிடைக்கும். தென்னை வைக்க விரும்பாதவர்கள், எண்ணெய்வித்து மரங்களான காட்டாமணக்கு, புங்கன், இலுப்பை, புன்னை மரங்களை நடவு செய்து 5 ஆண்டுகளில் அவை மூலம் எண்ணெய் உற்பத்தி செய்யலாம்’’ என்ற பார்த்திபன் நிறைவாக,

‘‘இந்தப் பண்ணைத்திட்டம் சிறு குறு விவசாயிகளுக்கானது. எக்காரணம் கொண்டும் பண்ணையில் சம்பள ஆட்களை வைத்துப் பணிகளை மேற்கொள்ளக் கூடாது. குடும்ப உறுப்பினர்கள் மட்டுமே விவசாய வேலைகளைச் செய்ய வேண்டும். கண்டிப்பாக அனைத்துப் பயிர்களுக்கும் சொட்டுநீர்க் குழாய்கள் பொருத்தப்பட வேண்டும். மரங்கள் வளர்ந்ததும் சிறிய வனம்போல மாறிவிடும். பண்ணையின் தட்பவெட்ப சூழலால் மண்ணின் ஈரப்பதம் தொடர்ந்து காப்பாற்றப்படும். இதற்குக் குறைவான பாசனமே போதுமானது. தொடர்ந்து அனைத்து சிறு குறு விவசாயிகளுக்கும் பல்பயன் வேளாண் காடுகள் திட்டம் அரசாங்கத்தின் உதவியுடன் கொண்டு சேர்க்கப்படும்’’ என்றார் மகிழ்ச்சியுடன்.

தொடர்புக்கு, முனைவர் பார்த்திபன், செல்போன்: 88708 08289.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism