Published:Updated:

பூச்சி மேலாண்மை: 13 - பூச்சிகளையும் கொண்டாடுவோம்!

பூச்சிகளும் நம் நண்பர்களே..! - 2.0

பிரீமியம் ஸ்டோரி

பூச்சி இனங்கள் அழிந்து கொண்டிருக்கின்றனவா… அதிகரித்துக்கொண்டு இருக்கின்றனவா… என இரு வேறு கருத்துகள் நிலவுகின்றன. ஒரு காலத்தில் மழைக்காலம் வந்தாலே வீட்டில் உள்ள கதவுகளை இழுத்து மூடிக்கொள்ளும் அளவுக்குப் பூச்சிகளின் படையெடுப்பு இருந்தது. தற்போது முன்பைப் போல அதிகளவு பூச்சிகள் வருவதில்லை. அதனால், அவற்றின் எண்ணிக்கைக் குறைந்து வருகிறதோ எனத் தோன்றுகிறது.

எந்த விதமான பூச்சி இனங்கள் அதிகரித்து வருகின்றன… எந்த இனப் பூச்சிகள் குறைந்து வருகின்றன… என்ற கேள்விக்குச் சுருக்கமான பதில் இதுதான். வயல்வெளிகளில் உள்ள பூச்சிகள் அதிகரித்து வருகின்றன. வனங்களில் உள்ள பூச்சிகள் அழிந்து வருகின்றன. இது சூழலியலுக்கு மிகப்பெரும் பாதிப்பை ஏற்படுத்தும்.

பூச்சி மேலாண்மை: 13 - பூச்சிகளையும் கொண்டாடுவோம்!

எந்தப் பூச்சிகள் பயிர்களை உண்கின்றனவோ அவை, பூச்சிக்கொல்லி களுக்கு எதிரான எதிர்ப்புசக்திகளை வளர்த்துக் கொண்டு, தங்கள் எண்ணிக்கையைப் பெருக்கி வருகின்றன. அதே நேரத்தில், ஒரு காலத்தில் பெரிய பிரச்னையாக இருந்த மூட்டைப்பூச்சி இன்றைக்கு எங்கே போனது என யோசிக்க வேண்டும். சினிமா தியேட்டரில் படம் பார்க்கவிடாமல் செய்த மூட்டைப்பூச்சிகள் என்ன ஆயின? இப்போது அவற்றின் தொல்லை இல்லை. அதே நேரத்தில் கொசுக்களின் எண்ணிக்கை ஆண்டுக்கு ஆண்டு அதிகரித்துக்கொண்டே இருக்கிறது. அதற்குக் காரணம், மூட்டைப் பூச்சிகளைவிட, கொசுக்களுக்கு எதிராகப் பயன்படுத்தும் ரசாயனங்கள் அதிகம் என்பதுதான்.

‘நீ உஷாராக இரு’ எனத் தன்னை அழித்து மனிதனுக்கு எச்சரிக்கை செய்கின்றன பூச்சிகள். ‘உலகப் பூச்சிகள் தினம்’ எனக் கொண்டாடுவதில்லை; கொண்டாட வேண்டும்!

உண்மையில் பூச்சி இனங்கள் அழிந்து கொண்டிருந்தாலும் அதைப் பற்றித் தெளிவான முடிவு எடுக்க முடியாத நிலைதான் நிலவுகிறது. ஒரு குறிப்பிட்ட பகுதியில், குறிப்பிட்ட இடத்தில், குறிப்பிட்ட காலத்தில் பூச்சிகளின் அடர்த்தி எவ்வளவு இருக்கிறது என்பது தொடர்பான ஆராய்ச்சிகள் மிகவும் குறைவுதான். பூச்சியியல் பற்றிய அறிவியலில் பலவகைகள் இருக்கின்றன. பூச்சிகளின் வகைகளைப் பற்றிய வகைப்பாட்டியல், பூச்சிகளின் உடல்பற்றிய உடலமைப்பு அறிவியல், பூச்சிகளின் வாழ்வியல், பயிர்களுக்கும் பூச்சிகளுக்கும் உள்ள தொடர்பு, ஒவ்வொரு பூச்சியையும் எப்படிக் கொல்லுவது என்பதைச் சொல்லும் நச்சுவியல் எனப் பல படிப்புகள் இருந்தபோதிலும், பூச்சிகள் குறைகின்றனவா என்பது குறித்த ஆய்வுகள் மிகவும் குறைவுதான்.

பூச்சி மேலாண்மை: 13 - பூச்சிகளையும் கொண்டாடுவோம்!

இன்னும் கண்டறியப்படாத பூச்சிகளின் எண்ணிக்கை அதிக அளவில் உண்டு. அவை கண்டுபிடிக்கப்படாமலேயே அழிந்து கொண்டிருக்கின்றன. அதை, ‘மாபெரும் பூச்சி அழிவு’ என்கிறார்கள் ஆராய்ச்சியாளர்கள். இதைப் பற்றிய ஒரு சிறிய ஆராய்ச்சி நடந்தது. 6 கண்டங்கள், 12 நாடுகளைச் சேர்ந்த 24 பூச்சியியல் வல்லுநர்கள் ஆராய்ச்சி செய்தார்கள். அவர்கள் வெளியிட்ட முடிவுகள், ‘பூச்சிகள் கொஞ்சம் கொஞ்சமாக அழிவை நோக்கிச் சென்று கொண்டிருக் கின்றன’ என்பதை அறிவித்தன.

இந்தியாவில் 40 சதவிகிதப் பூச்சிகள் அழிவை நோக்கிச் சென்று கொண்டிருக்கின்றன என்கிறது, மற்றோர் ஆய்வு முடிவு. ஆனால், இதற்கான ஆதாரங்கள் மிக மிகக் குறைவு. ‘போர்ட்டோரிகா என்ற மத்திய அமெரிக்கா நாட்டில் இருக்கும் மழைக்காடுகளில் கடந்த 40 ஆண்டுகளில் 10 முதல் 60 சதவிகிதப் பூச்சிகள் அழிவை நோக்கிச் சென்று கொண்டிருக்கின்றன’ எனக் கண்டறிந்திருக்கிறார்கள். அமெரிக்காவின் ஓஹியோ மாநிலத்தில் நடந்த ஓர் ஆராய்ச்சி முடிவு, ஒவ்வோர் ஆண்டும் 2.5 சதவிகிதப் பூச்சிகள் அழிவை நோக்கிச் சென்று கொண்டு இருக்கின்றன என்கிறது. ஸ்காட்லாந்து பகுதியில் 25 ஆண்டுகளில் ஒரு குறிப்பிட்ட அந்துப்பூச்சி 46 சதவிகிதம் குறைந்திருக்கிறது. நெதர்லாந்தில் 84 சதவிகித வண்ணத்துப் பூச்சிகளின் எண்ணிக்கை குறைந்திருக்கிறது. 1890-ம் ஆண்டு முதல் 2011-ம் ஆண்டு வரையிலான காலகட்டங்களின் அடிப்படையில் நடந்த ஆய்வில் 84 சதவிகித வண்ணத்துப் பூச்சிகளின் எண்ணிக்கை குறைந்துள்ளது தெரியவந்துள்ளது.

பூச்சி மேலாண்மை: 13 - பூச்சிகளையும் கொண்டாடுவோம்!

பூச்சிகளின் வாழ்விடம், வனங்கள்தான். பூச்சிகளின் வாழ்விடத்தை மனிதன் ஆக்கிரமித்துக் கொண்டதால், அது அழிவை நோக்கி சென்று கொண்டிருக்கின்றன. விவசாயத்தை முழு முதல் தொழிலாக ஆரம்பித்தபோதே காடுகளின் அழிவுவும் ஆரம்பித்துவிட்டது. இத்துடன் பூச்சிக்கொல்லிகளின் அதீதப் பயன்பாடும் பூச்சியினத்தை அழித்து வருகிறது.

இன்றைக்கும் வனங்களுக்குள் பூச்சி, ஒரு பிரச்னையே கிடையாது. ஆனால், வயலில்தான் பிரச்னைகள் உள்ளன. காடுகளில் செடிகள், கொடிகள், பெரிய மரங்கள், மலர்கள் எனப் பலவிதமான தாவரங்களிலிருந்து உணவை எடுத்துக் கொள்கின்றன பூச்சிகள். வகை வகையான உணவுகளில் எதை உண்பது எனத் திக்குமுக்காடித் திரிகின்றன பூச்சிகள். ஆனால், வயல்களில் இருக்கும் பூச்சிகளுக்கு ஒரேவிதமான உணவுதான் பெரும்பாலும் கிடைக்கிறது. பருத்தி, நெல், வாழை, கரும்பு மற்றும் காய்கறிப் பயிர்கள் எனக் குறிப்பிட்ட பகுதியில் குறிப்பிட்ட பயிர் மட்டுமே உணவாகக் கிடைக்கிறது. ஒரேவிதமான உணவுகள் ஓர் இடத்தில் கிடைக்கும்போது பூச்சிகளின் உணர்வுத்திறன் மாறுபடுகிறது. நமக்குத் தோதான உணவு கிடைக்கும்போது ஒரு கட்டுக் கட்டிவிட வேண்டும் என்ற மனநிலை பூச்சிகளுக்கும் ஏற்படும். இதனால், பயிர்களுக்குத் தீமை செய்யும் பூச்சிகளின் எண்ணிக்கை அதிகரித்துக்கொண்டே இருக்கின்றன. மறுபக்கம் காடுகளை அழித்துக்கொண்டே இருப்பதால், அங்குள்ள பெரும்பாலான பூச்சி இனங்கள் அழிவை நோக்கிச் சென்று கொண்டேயிருக்கின்றன.

பூச்சி மேலாண்மை: 13 - பூச்சிகளையும் கொண்டாடுவோம்!

மத்திய அமெரிக்காவின் பனாமா மழைக்காடுகளில் வண்டுகளில் உள்ள இனங்கள் மற்றும் பூமியில் உள்ள வண்டுகளின் எண்ணிக்கை போன்றவை குறித்த ஆராய்ச்சியில் ஒரு விஞ்ஞானி ஈடுபட்டார். அங்கு ஓர் இடத்தில், ஒரே வகையான 19 மரங்களைத் தேர்ந்தெடுத்தார். இந்த இடத்தில் ஒரு செய்தியைக் கவனத்தில் வைத்துக்கொள்ளுங்கள். பூச்சிகளின் எண்ணிக்கையைக் கண்டு பிடிக்க நான்கு விதமான வழிகள் இருக்கின்றன.

‘‘யானை, புலி, சிங்கம் போன்ற உயிர்களைப் பற்றிய அக்கறை கொண்டுள்ள மனிதர்கள், சிறிய பூச்சிகளைப் பற்றி அக்கறை கொள்வதில்லை. மற்ற விலங்கினங்களைவிடப் பூச்சிகள், மனித குலத்துக்குச் செய்யும் நன்மைகள் அதிகம்.’’

வலை மூலமாக ஓர் இடத்தில் இருக்கும் பூச்சிகளை அரித்து எடுப்பது, இரவு நேரங்களில் வெள்ளைத் துணிமீது விளக்கு வெளிச்சத்தைப் பாய்ச்சி, அதை நோக்கி வரும் அனைத்து விதமான பூச்சிகளையும் பிடிப்பது, ஒட்டு அட்டைகளை வைத்து அவற்றில் ஒட்டும் பூச்சிகளை ஆராய்ச்சி செய்வது, பூச்சிக்கொல்லிகளைக் கொட்டி, இறந்த பூச்சிகளைச் சேகரித்து ஆராய்ச்சி செய்வது என நான்கு வழிகள் இருக்கின்றன. அந்த விஞ்ஞானி இவற்றில் கடைசி வழியைக் கையாண்டார். மரங்களின் உச்சியில் பூச்சிக்கொல்லிகளைப் புகைமூட்டம்போல மொத்தமாகக் கொட்டினார். அதனால், இறந்து போன பூச்சிகள் மரத்துக்குக் கீழே விழுந்தன. அந்தப் பூச்சிகளைச் சேகரித்து ஆராய்ச்சி செய்தார். அதில் 988 வண்டு இனங்களைக் கண்டறிந்தார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

உலகில் 6,500 வகை உயிரினங்கள் இருப்பதாகச் சொல்கிறார்கள். இந்நிலையில் அந்த விஞ்ஞானி கண்டறிந்த ஆராய்ச்சி முடிவு அதிர்ச்சியை வெளியிட்டது. அந்த ஒரு ஏக்கர் மழைக்காடுகளில் மட்டும் 6,140 வகையான பூச்சிகளைக் கண்டறிந்தார். உலகில் உள்ள மொத்த உயிர்களே 6,500 எனும்போது, பூச்சிகள் மட்டுமே 6,140 வகைகள் இருக்கின்றன என்பது உலகை வியப்படைய வைத்தது.

பூச்சி மேலாண்மை: 13 - பூச்சிகளையும் கொண்டாடுவோம்!

காடுகளில் உள்ள பூச்சிகள் பூச்சிக் கொல்லிகள் பயன்பாடு, வாழ்வியல் மாற்றம், சூழல் மாற்றம் மற்றும் பருவநிலை மாற்றம் போன்றவற்றின் காரணமாக அழிவை நோக்கிச் சென்று கொண்டிருக்கின்றன. உலகில் உள்ள பூச்சியியல் விஞ்ஞானிகள் அனைவரும் பூச்சிகளைப் பற்றிப் பல ஆராய்ச்சிகள் செய்கிறார்கள். பூச்சிகளைப் பற்றிய அறிவை வளர்த்துக் கொள்கிறார்கள். இப்படிப்பட்ட ஆராய்ச்சிகளுக்காகப் பூச்சிக்கொல்லித் தயாரிக்கும் நிறுவனங்கள், பணத்தைக் கொட்டிக் கொடுக்கின்றன. இப்படி நடைபெறும் ஆராய்ச்சிகளின் முடிவுகள், அந்த நிறுவனங்களுக்குத்தான் பயன்படுகின்றன. பூச்சிக்கொல்லிகள் அதிகரிக்க அதிகரிக்க, தீமை செய்யும் பூச்சிகளும் அதிகரிக்கும். அப்போதுதான் அந்த நிறுவனங்கள் தொழில் செய்ய முடியும்.

பூச்சிகளின் வாழ்விடம்பற்றிய ஆராய்ச்சியும், அந்த இடங்களில் அவை இருக்கின்றனவா, அழிந்து வருகின்றனவா என்பது போன்ற அறிவியலை உள்ளடக்கிய பூச்சிக் கணக்கெடுப்பும் நடைபெறுவதில்லை. காரணம், இதற்கு எந்த நிறுவனமும் நிதி அளிப்பதில்லை. உலகச் சுற்றுச்சூழல் அமைப்பும் இதில் விதிவிலக்கல்ல. உலகத்தில் பெரிய உருவ அமைப்பில் உள்ள யானை, புலி, சிங்கம் போன்ற உயிர்களைப் பற்றிய அக்கறை கொண்டுள்ள மனிதர்கள், சிறிய பூச்சிகளைப் பற்றி அக்கறை கொள்வதில்லை. மற்ற விலங்கினங்களை விடப் பூச்சிகள், மனித குலத்துக்குச் செய்யும் நன்மைகள் அதிகம். விவசாயத்துக்கு முக்கியமான மகரந்தச்சேர்க்கை, பூச்சிகளால் மட்டுமே நடைபெறுகிறது. வண்டுகளும், பூச்சிகளும் வண்ணத்துப்பூச்சிகளும் இப்பணியைச் செய்கின்றன.

நீ.செல்வம்
நீ.செல்வம்

உணவு உற்பத்தியில் தொடங்கி மண்ணில் மட்க வைக்கும் பணிவரை பூச்சிகள் இல்லாமல் எதுவுமே இல்லை. பல பகுதிகளில் மனிதர்களுக்கு முக்கிய உணவாகவும் இருக்கின்றன. பூச்சிகளை மட்டுமே உண்டு உயிர் வாழக்கூடிய மனிதர்களின் எண்ணிக்கை அதிகரித்து வருகிறது. இப்படி மனிதனை வாழ வைப்பதற்கான பல பணிகளைப் பூச்சிகள் செய்து வருகின்றன. சூழலுக்குக் கேடு வரும்போதெல்லாம், அவற்றை மனிதர் களுக்குச் சுட்டிக்காட்டுபவை பூச்சிகள்தான். ‘சூழல் அபாயத்தை நோக்கிச் செல்கிறது. நான் அழிந்து கொண்டு இருக்கிறேன். நீ உஷாராக இரு’ எனத் தன்னை அழித்து மனிதனுக்கு எச்சரிக்கை செய்கின்றன பூச்சிகள்.

இத்தனை நன்மைகள் செய்யும் பூச்சிகளைப் பற்றி நாம் நினைப்பதேயில்லை.உலகில் எது எதற்கோ, உலக நாள் கொண்டாடும் நாம், பூச்சிகளுக்காக ஒரு நாளை, ‘உலகப் பூச்சிகள் தினம்’ எனக் கொண்டாடுவதில்லை. அப்படிக் கொண்டாட ஆரம்பிப்பதுதான், பூச்சிகளுக்கு நாம் செய்யும் நன்றிக்கடனாக இருக்கும்.

-பறக்கும்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு