Published:Updated:

பூச்சி மேலாண்மை: 18 - சேமிப்பில் கரையும் தானியங்களும் தடுக்கும் முறைகளும்!

பூச்சி மேலாண்மை
பிரீமியம் ஸ்டோரி
News
பூச்சி மேலாண்மை

பூச்சிகளும் நம் நண்பர்களே..! - 2.0

பூச்சிகள், பயிர்களில் இழப்பையும், மனிதர்கள், கால்நடைகளில் நோயையும் ஏற்படுத்துகின்றன என்று பார்த்தோம். ஆனால், அதைத் தாண்டியும் பூச்சிகளின் தாக்குதல் இருக்கிறது. தானியங்களை வயலில் மட்டும் அழிப்பதில்லை; அறுவடை முடிந்து சேமிக்கும் தானியங்களையும் அழிக்கின்றன பூச்சிகள். உற்பத்திசெய்வதைவிட, அதைச் சேமித்துவைக்க அதிகம் மெனக்கெட வேண்டியிருக்கிறது. பழங்காலத்தில் உணவு தானியங்களை, தானியக் குதிர்களில் சேமித்தார்கள். பாஞ்சாலங்குறிச்சிக் கோட்டையில் உணவு தானிய சேமிப்பு மிகச்சிறப்பாக இருந்ததாக வரலாறு சொல்கிறது. ஆனால் தற்போது உணவு தானிய சேமிப்பு, பெரும் சவாலாக இருக்கிறது.

நீ.செல்வம்
நீ.செல்வம்

`அறுவடைக்குப் பிறகு தானியங்களைச் சேமிக்கும்போது, இந்தியாவில் ஏற்படும் இழப்பு 14 மில்லியன் மெட்ரிக் டன்’ என்கிறது ஒரு புள்ளிவிவரம். இதன் மதிப்பு 7,000 கோடி ரூபாய். பூச்சிகள், பறவைகள், ஈரப்பதத்தில் ஏற்படும் மாற்றம் ஆகியவற்றால் இந்த இழப்பு ஏற்படுகிறது. இதில் பூச்சிகளால் மட்டும் ஏற்படும் இழப்பு 1,300 கோடி ரூபாய். `சாதாரணப் பூச்சி’ என நினைக்கிறோம். ஆனால், அது ஏற்படுத்தும் சேதாரம் பிரமிப்பை ஏற்படுத்துகிறது. `இந்தியாவில் உணவு தானியங்களில் ஏற்படும் இழப்பைத் தடுத்தால், மூன்றில் ஒரு பங்கு ஏழைகளுக்கு உணவு கொடுக்க முடியும்’ என்கிறது 1999-ம் ஆண்டு வெளியான உலக வங்கியின் அறிக்கை.

தானியங்களை முழுமையாகத் தின்று அழிப்பது, மேம்போக்காகத் தின்று சேதப்படுத்துவது என சேமிக்கும் தானியங்களில், இரண்டுவிதமான பூச்சித் தாக்குதல்கள் இருக்கின்றன. தானியங்களை முழுமையாக உண்ணும் பூச்சிகள் என்று பார்த்தால், அரிசி கூன்வண்டு; தானியங்கள், அந்துப்பூச்சிகள், கிழங்குகளில் வரும் வண்டுகள்; அவற்றில் வரும் அந்துப் பூச்சிகள்; புளி மற்றும் நிலக்கடலையைத் தாக்கும் வண்டுகள் ஆகியவை முக்கியமானவை.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
பூச்சி மேலாண்மை: 18 - சேமிப்பில் கரையும் தானியங்களும் தடுக்கும் முறைகளும்!

இந்தப் பூச்சிகள் உண்டு மிச்சமாகும் தானியங்களை, சிவப்பு நிற மாவு வண்டு, நீண்ட தலையுள்ள மாவு வண்டு, அரிசி அந்துப்பூச்சி, அத்தி மற்றும் பாதாம் பருப்புகளைச் சாப்பிடும் அந்துப்பூச்சி, இந்திய அந்துப்பூச்சி போன்ற பூச்சிகள் உண்டு சேதப்படுத்துகின்றன. `உணவு தானிய சேமிப்பில் 600 வகையான பூச்சிகள் பாதிப்பை ஏற்படுத்துகின்றன என்பதைக் கண்டுபிடித்திருக்கிறார்கள்ஆராய்ச்சியாளர்கள். அவற்றில் 100 வகையான பூச்சிகள் முழுமையான பொருளாதாரச் சேதத்தை ஏற்படுத்தக்கூடியவை.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

தானியங்களைப் பூச்சிகள் உண்டு இழப்பை ஏற்படுத்துவதைவிட, அவை வெளியிடும் கழிவுகளால் தானியங்களில் ஏற்படும் கலப்படம் பெருத்த சேதாரத்தை ஏற்படுத்துகின்றன. பல நேரங்களில் கழிவுகளில் நிலவும் ஈரப்பதத்தால் கிருமிகள் உருவாகின்றன. அவற்றின் மூலம் இழப்பு ஏற்படுகிறது. சேமிக்கப்படும் தாவரங்களில் பூச்சிகளால் மட்டும் 2 முதல் 4.2 சதவிகிதம் சேதாரம் ஏற்படுகிறது. எலிகளால் 2 முதல் 5 சதவிகிதமும், பறவைகளால் 0.85 சதவிகிதமும், ஈரப்பத மாற்றத்தால் 0.68 சதவிகிதமும் இழப்பு ஏற்படுகிறது.

பூச்சி மேலாண்மை: 18 - சேமிப்பில் கரையும் தானியங்களும் தடுக்கும் முறைகளும்!

தானியங்களை உண்ணும் பூச்சிகளால் தானியங்களின் எடை குறைகிறது. அரிசியின் எடை 20 மில்லிகிராம் என வைத்துக்கொண்டால், அரிசி அந்துப்பூச்சி அதில் 14 மில்லிகிராமை உண்டுவிடும். ஒரு பெண் அரிசி அந்துப்பூச்சி, ஆண்டுக்கு மூன்று தலைமுறைகள் மூலம் 15,00,000 சந்ததிகளை உருவாக்கும். ஒரு பூச்சி, ஓர் அரிசியை உண்டால், மொத்தம் 15,00,000 அரிசி காலியாகிவிடும். இதன் எடை 30 கிலோ. ஆக, ஒரு தாய் அந்துப்பூச்சி மூலம் 30 கிலோ அரிசி வீணாகிறது என்றால், மொத்த பூச்சிகளால் ஏற்படும் சேதாரத்தை யோசித்துப் பாருங்கள்.

சிட் டோட் ரோகா செரளா அந்துப்பூச்சி மூன்று தலைமுறைகளில் 50 கிலோ அரிசியைக் காலிசெய்துவிடுகிறது. பூச்சித் தாக்குதலால் தானியங்களின் தரத்தில் ஏற்படும் இழப்பு, தானியத்தின் உள்ளடக்கத்தில் ஏற்படும் வேதியியல் மாற்றங்கள், பூச்சி, தானியங்களுக்கு நடுவில் கழற்றிப்போடும் தோல் மற்றும் கழிவுகள், அவற்றில் உருவாகும் கிருமிகள் போன்றவற்றால் தானியங்களில் பல்வேறு வகையான மாசுகள் ஏற்படுகின்றன.

பூச்சி மேலாண்மை
பூச்சி மேலாண்மை

இதனால் நெல் சேமிப்பில் 3.6 முதல் 41 சதவிகிதம் வரை விதைகளின் முளைப்புத்திறன் பாதிக்கப்படுகிறது. தானியங்களை மட்டுமல்லாமல் கொள்கலன்களையும் பூச்சிகள் சேதப்படுத்துகின்றன. சணல் பை, பாலித்தீன் பைகள், சேமிப்பு அறைகளிலிருக்கும் மரச்சட்டங்கள் ஆகியவற்றைச் சிதைக்கும் அசுரப் பூச்சிகளும் இருக்கின்றன. பூச்சிகளால் உணவு தானிய இழப்பு, கொள்கலன் இழப்பு ஏற்படுகின்றன.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

எடை குறைவு, முளைப்புத்திறன் இழப்பு, நுகர்வோர் விருப்ப இழப்பு, ஊட்டச்சத்து மதிப்பு இழப்பு, தூய்மைக்கேடு மற்றும் பூஞ்சைகள் உருவாவது போன்ற பாதிப்புகளைத் தடுக்க, பல்வேறு முறைகளைக் கையாள்கிறார்கள். தானியச் சேமிப்புக் கிடங்குகளில், மரச்சட்டங்களில் தானிய மூட்டைகளை அடுக்கிவைத்துப் பாதுகாக்கிறார்கள். போதுமான காற்றோட்டம், தரையிலிருந்து பத்தடி உயரம் எனப் பாதுகாப்பு பலமாக இருக்கிறது. ஆனாலும் வில்லன் உள்ளே நுழைந்துவிடுகிறான். விரட்ட வேறு வழியில்லாமல் ரசாயனப் புகை நஞ்சைப் பயன்படுத்துகிறார்கள்.

அலுமினியம் பாஸ்பேட், எத்திலின் டை புரோமைடு போன்ற மிகக் கொடுமையான விஷங்களைப் பயன்படுத்துகிறார்கள். அதனால் போடப்படும் புகைமூட்ட நச்சு தானியங்களிலும் படிகிறது. இப்படிச் சேமிக்கப்படும் தானியங்களை உண்டுதான் உயிர் வாழ்ந்துகொண்டிருக்கிறோம். அவற்றை உண்பதால் மனிதர்களுக்குப் பலவிதமான நோய்கள் ஏற்படுகின்றன.

‘‘தானியங்களைப் பூச்சிகள் உண்டு இழப்பை ஏற்படுத்துவதைவிட, அவை வெளியிடும் கழிவுகளால் தானியங்களில் ஏற்படும் கலப்படம் பெருத்த சேதாரத்தை ஏற்படுத்துகின்றன.’’

பழங்காலத்தில் செம்மண், களிமண் பூச்சுப் பயன்படுத்தினார்கள். வேப்பிலை, நொச்சி இலைகளை தானிய மூட்டைகளின் இடையில் அல்லது தானியங்களுக்குள் வைத்து பூச்சித் தாக்குதலிலிருந்து தானியங்களைப் பாதுகாத்தார்கள். தற்போது, கொள்முதல் அளவு அதிகரிக்க அதிகரிக்க, இயற்கையான தானிய சேமிப்பு முறைகளைப் பயன்படுத்த முடியவில்லை. சேமிக்கும் அளவு அதிகரிக்கும் நிலையில் புகை நஞ்சு பயன்படுத்தாமல் சேமிக்க முடியுமா என்பதும் மிகப்பெரிய கேள்வியாக இருக்கிறது.

நெல், அரிசி, கேழ்வரகு, கம்பு, உளுந்து, பச்சைப்பயறு ஆகியவற்றை மண் குதிர்கள், தொம்பைகள், பெரிய பானைகளில் சேமித்துவருகிறார்கள் சில விவசாயிகள். இப்படிச் சேமிக்கும்போது சில தானியங்களைச் செம்மண்ணில் புரட்டி, காயவைத்து சேமிக்கிறார்கள். வேப்பிலை, நொச்சி இலைகளைப் போட்டும் பாதுகாக்கிறார்கள். பெரும்பாலான விவசாயிகள், சாக்குப் பைகளில் மூட்டைகளாகப் பிடித்து சேமிக்கின்றனர்.

இந்த மூட்டைகளைச் சேமிக்கும் அறையில் பலகையைவைத்து, அதன்மீது மூட்டைகளை அடுக்கிவைக்கிறார்கள்.

இப்படிப்பட்ட விவசாயிகளுக்காக, புதுச்சேரி வேளாண் அறிவியல் நிலையம், கயிரமோன் பொறி ஒன்றைக் கண்டுபிடித்தது. அதிலுள்ள வாசனைக்காக, தானியத்தைத் தாக்கும் பூச்சிகள் பொறிக்குள் வந்து சிக்கிக்கொள்ளும்.

`கயிரமோன்’ என்ற ஹார்மோன் தானியங்களைத் தாக்கும் பூச்சிகளிலிருந்து எடுக்கப்பட்டது. இது சுற்றுச்சூழலைப் பாதுகாக்கக்கூடியது. இதைச் சுலபமாகப் பயன்படுத்தலாம். ஆறு மாதங்களுக்கு மேல் பயறு வகைகளைச் சேமித்துவைப்பவர்கள், அவற்றில் நல்லெண்ணெய் தடவி சேமிக்கலாம். அப்படிச் செய்தால் பயிறைத் தாக்கும் வண்டுகள் உள்ளே போகாது. நிலக்கடலையைச் சேமித்துவைக்கும் விவசாயிகள் மஞ்சள் கலந்து வைக்க வேண்டும்.

-வளரும்