Published:Updated:

இனிப்புச் சுவையுள்ள பப்ளிமாஸ் பழங்கள் - தோட்டக்கலை ஆராய்ச்சி மையம் அறிமுகம்!

பப்ளிமாஸ்
பிரீமியம் ஸ்டோரி
பப்ளிமாஸ்

அறிமுகம்

இனிப்புச் சுவையுள்ள பப்ளிமாஸ் பழங்கள் - தோட்டக்கலை ஆராய்ச்சி மையம் அறிமுகம்!

அறிமுகம்

Published:Updated:
பப்ளிமாஸ்
பிரீமியம் ஸ்டோரி
பப்ளிமாஸ்

சிட்ரஸ் பழங்கள் என்று அறியப்படும் எலுமிச்சை, ஆரஞ்சு, சாத்துக்குடி பற்றி நாம் அதிகம் கேள்விப்பட்டிருப்போம். ஆனால், இந்தக் குடும்பத்தைச் சேர்ந்த பப்ளிமாஸ் பழங்கள் சாகுபடி பற்றி அதிகம் கேள்விப்பட்டிருக்க மாட்டோம். இந்தப் பப்ளிமாஸ் பழங்களின் சாகுபடியை அதிகரிக்கும் நோக்கில் பெங்களூருவில் உள்ள இந்தியத் தோட்டக்கலை ஆராய்ச்சி மையம் (IIHR) புதிய ரகங்களை வெளியிட்டுப் பரப்பி வருகிறது.

இதுகுறித்து நம்மிடம் பேசிய இந்தியத் தோட்டக்கலை ஆராய்ச்சி மைய முதன்மை விஞ்ஞானி சங்கரன், ‘‘வைட்டமின் ‘சி’ சத்து நிறைந்த ‘சிட்ரஸ்’ பழங்களில் எலுமிச்சை, ஆரஞ்சு, சாத்துக்குடிக்கு அடுத்து பப்ளிமாஸ் (Pummelo) பழங்கள் முக்கியப் பங்கு வகிக்கின்றன. பொதுவாக, பப்ளிமாஸ் பழங்கள் அதிக புளிப்பு மற்றும் கசப்புத்தன்மை காரணமாக இந்தியாவில் பிரபலமாகவில்லை. இதன் பூர்வீகமான மலேசியாவிலும் இதன் பயன்பாடு குறைவுதான். ஆனால், தாய்லாந்தில் பப்ளிமாஸ் பழங்களின் தன்மையை மேம்படுத்தியிருக்கிறார்கள். இனிப்பு பப்ளிமாஸ் பழங்களைப் பரவலாக்கி அங்கே அதிகம் சாப்பிடப் பயன்படுத்துகிறார்கள்.

சங்கரன்
சங்கரன்


எலுமிச்சை விளையும் பகுதிகளில்
சாகுபடி செய்யலாம்

அதேபோன்று இந்தியாவிலும் இனிப்புச் சுவையுள்ள பப்ளிமாஸ் ரகங்களை உருவாக்க வேண்டும் என எண்ணி 2020-ம் ஆண்டு ‘அர்கா சந்திரா,’ ‘அர்கா ஆனந்தா’ என்ற இரண்டு இனிப்புச் சுவையுள்ள பப்ளிமாஸ் ரகங்கள் இந்தியத் தோட்டக்கலை ஆராய்ச்சி மையத்தால் வெளியிடப்பட்டன. இரண்டும் வெவ்வேறு நிறங்களில் இருக்கும். தென்னிந்தியாவில் எலுமிச்சைச் சாகுபடிதான் அதிகம் நடைபெறுகிறது. தென்னிந்தியாவின் ஒரு சில பகுதிகளில் ஆரஞ்சு, சாத்துக்குடி சாகுபடி செய்யப்பட்டாலும் வட இந்தியாவிலிருந்துதான் அதிகம் வருகின்றன. இந்தப் பப்ளிமாஸ் ரகங்களை எலுமிச்சைச் சாகுபடி செய்யப்படும் அனைத்து இடங்களிலும் சாகுபடி செய்யலாம்.

‘‘பெங்களூரு அடுத்த ஹெசரகட்டாவில் இருக்கும் இந்தியத் தோட்டக்கலை ஆராய்ச்சி மையத்தில் ஒரு கன்று 100 ரூபாய் விலையில் கிடைக்கிறது.’’


இதய நோயாளிகளுக்கு ஏற்றது

தோல் கடினத்தன்மை கொண்ட நமது ஊர் கிச்சிலிப் பழங்களின் சகோதரன் என்றே இந்த பப்ளிமாஸ் பழங்களைச் சொல்லலாம். இதன் தோலும் கடினமானதுதான். சிட்ரஸ் பழக் குடும்பங்களிலேயே வைட்டமின் சி, வைட்டமின் பி அதிகம் இருப்பது பப்ளிமாஸ் பழங்களில்தான்.

அதோடு பீட்டா கரோட்டின், போலிக் அமிலம் ஆகியவை அதிக அளவு நிறைந்திருப்பதால் கர்ப்பிணிப் பெண்களுக்கு மிகவும் ஏற்றது. பொட்டாசியம் நிறைந்திருப்பதால் இதய நோயாளிகள் விரும்பிச் சாப்பிடலாம். இதோடு வைட்டமின் ஏ, வைட்டமின் பி1, பி2 உள்ளிட்ட சத்துகள் நிறைந்துள்ளன. இதைச் சாப்பிடுவோருக்குச் சிறுநீர் நன்றாகக் கழியும். இப்படிப் பல நன்மைகள் கொண்ட பப்ளிமாஸ் பழங்களைத் தோட்டமாக வளர்த்துச் சாகுபடி செய்பவர்கள் மிகவும் குறைவு. இதைச் சாகுபடி செய்தால் நல்ல வருமானம் பெறலாம்’’ என்றவர் மகசூல் பற்றிய தகவலையும் பகிர்ந்துகொண்டார்.

பப்ளிமாஸ்
பப்ளிமாஸ்


‘‘மர வகையைச் சேர்ந்த பப்ளிமாஸை ஒருமுறை நடவு செய்தால் 25 ஆண்டுகளுக்கு மேல் அறுவடை செய்யலாம். குட்டை மர வகையைச் சேர்ந்த இந்த ரகங்களை 15-க்கு 15 அடி இடைவெளியில் நடவு செய்யலாம். நடவு செய்து தேவையான உரங்களை இட்டு வளர்த்து வந்தால் 3 ஆண்டுகளில் வளர்ந்துவிடும். நான்காவது ஆண்டிலிருந்து மகசூல் கொடுக்கும். ஒரு மரத்திலிருந்து 80 - 100 பழங்கள் கிடைக்கும்.

`அர்கா சந்திரா’ (Arka Chandra) என்ற ரகத்தில் சதைப்பகுதிகள் வெண்மை நிறத்தில் இருக்கும். அறுவடையாகும் நான்காவது ஆண்டிலிருந்து ஒரு மரத்திலிருந்து 35 - 40 கிலோ பழங்கள் கிடைக்கும். ஒரு பழம் 800 கிராமிலிருந்து 1 கிலோ வரை எடை இருக்கும். ‘அர்கா ஆனந்தா’ (Arka Anantha) ரகத்தில் பழத்துக்குள் இருக்கும் சதைப்பகுதிகள் இளஞ்சிவப்பு நிறத்தில் இருக்கும். நான்காவது ஆண்டில் ஒரு மரத்திலிருந்து 45 - 50 கிலோ பழங்கள் கிடைக்கும். ஒரு பழம் 900 கிராமி லிருந்து 1.2 கிலோ வரை எடை இருக்கும். பப்ளிமாஸ் ஆண்டுக்கு இரண்டு முறை காய்க்கும் தன்மை கொண்டது’’ என்றவர் நிறைவாக விற்பனை வாய்ப்பைப் பற்றிப் பேசினார்.

பப்ளிமாஸ்
பப்ளிமாஸ்


‘‘பீகார், உத்தரப் பிரதேசம், வடகிழக்கு மாநிலங்களில் அதிகம் சாப்பிட இதைப் பயன்படுத்துகிறார்கள். அதே போன்று வெளிநாடுகளுக்கு ஏற்றுமதியும் செய்யலாம். இதற்குத் தேவையுள்ள இடங்களை அறிந்து அங்கே விற்பனை செய்தால் நல்ல வருமானம் பெறலாம். பெரிய பராமரிப்பு தேவையிருக் காது. அறுவடை செய்வதும் எளிது. பூச்சித்தாக்குதலும் அவ்வளவாக இருக்காது. பெங்களூருவை அடுத்த ஹெசரகட்டாவில் இருக்கும் இந்தியத் தோட்டக்கலை ஆராய்ச்சி மையத்தில் ஒரு கன்று 100 ரூபாய் விலையில் கிடைக்கிறது. தேவைப்படுவோர் வாங்கிக் கொள்ளலாம். அதற்கான தொழில்நுட்பமும் இங்கே கிடைக்கும்” என்றார்.


தொடர்புக்கு,

முனைவர் சங்கரன், இந்தியத் தோட்டக்கலை ஆராய்ச்சி மையம், ஹெசரகட்டா, பெங்களூரு. செல்போன்: 96207 73809

பாசனம் மட்டுமே போதும்

செங்கல்பட்டு மாவட்டம், சாத்தனஞ்சேரியைச் சேர்ந்த விவசாயி தனபால் தன்னுடைய தோட்டத்தில் பப்ளிமாஸ் மரங்களை வளர்த்து வருகிறார். அவரிடம் பேசினோம். “10 வருஷத்துக்கு முன்ன வீட்டுக்கு வாங்கி வந்த பப்ளிமாஸ் பழங்களிலிருந்து விதைகளை எடுத்துத் தோட்டத்தில் விதைத்தோம். அதுல 4 மரங்கள் வளர்ந்து இப்போது மகசூல் கிடைச்சிட்டு இருக்கு. இதை விற்பனைக்கெல்லாம் கொண்டு போவதில்லை. உறவினர்கள், நண்பர்களுக்குக் கொடுத்துவிடுவேன். நம்ம ஊர் எலுமிச்சை, நார்த்தங்காய் மாதிரிதான். புளிப்பு அதிகம்.

தனபால்
தனபால்


சில ஆண்டுகளுக்கு முன்பு ரெண்டு பப்ளிமாஸ் மரக்கன்றுகளை நர்சரியிலிருந்து வாங்கிட்டு வந்து வெச்சோம். அதுல இருந்து கிடைச்ச பழங்கள்ல புளிப்போடு லேசான இனிப்பும் கலந்திருக்கு. ஒரு பப்ளிமாஸ் குறைந்தபட்சம் அரைக்கிலோவுக்கு மேல்தான் எடை இருக்கும். ஜூன் மாசத்திலிருந்து ஆகஸ்ட் வரை காய்க்கும். ரெண்டாவது காய்ப்பைக்கூடப் பார்த்திருக் கேன். பப்ளிமாஸில் பழ ஈ தாக்குதல் இருக்கும். பழ ஈ மட்டுமல்ல, எந்தப் பூச்சித்தாக்குதல் இருந்தாலும், வேப்ப எண்ணெய், வேப்பங்கொட்டை கரைசல் தெளித்தே கட்டுப்படுத்திவிடலாம். இதற்கு நல்லா தண்ணீர் பாசனம், தொழுவுரம் கொடுத்துட்டு வந்தாலே போதும். வளர்ச்சி நன்றாக இருக்கும். நான்கு பேர் உள்ள ஒரு குடும்பத்துக்கு ஒரு பழமே போதுமானது. சுளைகள் நிறைய இருக்கும். சாப்பிடுவதற்கும் மிருதுவாக இருக்கும். வருமானத்துக்கும் வாய்ப்பிருந்தால் இதன் சாகுபடி இன்னும் அதிகரிக்கும்” என்றார்.

தொடர்புக்கு, தனபால், செல்போன்: 90032 51050.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism