Published:Updated:

கதவணை கட்டாதீங்க! - கதறும் கரூர் விவசாயிகள்... காதுகொடுக்குமா புதிய அரசு?

கரூர்
பிரீமியம் ஸ்டோரி
News
கரூர்

கடந்த 10 வருஷமா திருப்பூர் மாவட்டத்துல இருக்குற சாயப்பட்டறைகள்ல இருந்து வெளியேறுற கழிவுநீரை நொய்யல் ஆத்துலதான் கலந்துவிடுறாங்க.

‘‘எங்கள் பகுதியில் கதவணை கட்ட வேண்டும்’’ என்று கேட்டுப் போராடும் விவசாயிகளைத்தான் நாம் அடிக்கடி பார்த்திருப்போம். ஆனால், ‘‘கதவணை கட்டாதீங்க’’ என்று கதறிக்கொண்டிருக்கிறார்கள் கரூர் விவசாயிகள். ‘‘அணையில் நீர் தேங்கினால், நொய்யல் ஆற்றிலிருந்து வரும் கழிவுநீர் தேங்கி, கிட்டத்தட்ட 30,000 ஏக்கர் விவசாய நிலம் பாழாகிவிடும்’’ என்பதுதான் அவர்களின் கதறலுக்குக் காரணம். முந்தைய அ.தி.மு.க அரசு தொடங்கிவைத்த இந்தத் திட்டத்தை மு.க.ஸ்டாலின் தலைமையிலான தி.மு.க அரசு தடுத்து நிறுத்த வேண்டும் என்பது விவசாயிகளின் கோரிக்கையாக இருக்கிறது.

கதவணை கட்டாதீங்க! - கதறும் கரூர் விவசாயிகள்... காதுகொடுக்குமா புதிய அரசு?

கரூர் மாவட்டம், புகழூரில் காவிரி ஆற்றுக்குக் குறுக்கே 406 கோடி ரூபாய் செலவில் கட்டப்படவிருக்கும் கதவணைக்குத்தான் அந்தப் பகுதியைச் சேர்ந்த ஆயிரக்கணக்கான விவசாயிகள் எதிர்ப்பு தெரிவிக்கிறார்கள். திருக்காட்டுத்துறையைச் சேர்ந்த விவசாயி டி.கே.சுப்ரமணியன் நம்மிடம், ‘‘எங்க பகுதியில அணை கட்டி தண்ணி தேங்கினா நிலத்தடி நீர்மட்டம் உயரும்; விவசாயம் செழிக்கும்னு நினைச்சோம். ஆனா, இங்கே அணை கட்டினா, எங்க பகுதி விவசாயம் பாழாப்போயிரும் போலருக்கு.

அணை கட்டுறதுக்காக அடிக்கல் நாட்டியிருக்குற புகழூர்ல இருந்து மேற்கே 8 கிலோமீட்டர் தூரத்துல இருக்குற சேங்கல் பகுதியில, கோவை மாவட்டம் வெள்ளியங்கிரி மலையில இருந்து வரும் நொய்யல் ஆத்துத் தண்ணி கலக்குது. கடந்த 10 வருஷமா திருப்பூர் மாவட்டத்துல இருக்குற சாயப்பட்டறைகள்ல இருந்து வெளியேறுற கழிவுநீரை நொய்யல் ஆத்துலதான் கலந்துவிடுறாங்க. அந்தக் கழிவுநீர்தான் புகழூர் கதவணையில தேங்கும். அதனால, கரூர், நாமக்கல் மாவட்டங்களைச் சேர்ந்த நூத்துக்கணக்கான கிராமங்கள்ல நிலத்தடி நீர் விஷமாகும். 30,000 ஏக்கர் விவசாய நிலம் பாலையாகும். அணை கட்டினா எங்க வாழ்வாதாரமே போயிடும்’’ என்றார் கலக்கமாக.

காவிரி ஆறு பாதுகாப்பு இயக்க ஒருங்கிணைப்பாளர்களில் ஒருவரான விஜயன், ‘‘நொய்யல் ஆற்றில் எவ்வித சுத்திகரிப்புமின்றி ஆண்டு முழுக்க 8,000 டி.டி.எஸ் முதல் 16,000 டி.டி.எஸ் வரை (300 டி.டி.எஸ் வரைதான் பயன்படுத்தத் தகுந்தது) உப்புத்தன்மையுடன் வருகிற கழிவுநீர்தான் ஆற்றின் குறுக்கே கட்டப்படும் புகழூர் கதவணையில் தேங்கும். அதனால், மற்றொரு நொய்யல் ஒரத்துப்பாளையம் அணையாக புகழூர் அணை பயனற்றதாக மாறிவிடும். ஏற்கெனவே, ஈரோடு மாவட்டம், வெண்டிபாளையத்தில் காவிரி ஆற்றின் குறுக்கே கட்டப்பட்டுள்ள தடுப்பணையில் ஈரோடு - பள்ளிபாளையம் சாக்கடை மற்றும் சாயப்பட்டறை, தோல் ஆலைக் கழிவு நீரும் தேங்கியிருப்பதால், அந்த நீர் எதற்கும் பயனற்றதாக மாறிவிட்டது. அதே நிலைதான் புகழூரிலும் ஏற்படும்.

அணை கட்டப்பட்டு கழிவுநீர் தேங்கினால், கரூர் மாவட்டத்திலுள்ள 14 கூட்டுக்குடிநீர் திட்டங்கள், நாமக்கல் மாவட்டத்துக்குச் செல்லும் கூட்டுக்குடிநீர் திட்டங்கள் ஆகியவற்றுக்காக எடுத்துச் செல்லப்படும் குடிநீர் விஷமாகும். அதனால், கரூர் மாவட்ட குடிநீர் ஆதாரமும் விவசாயமும் கால்நடை வளமும் கடுமையாக பாதிப்படையும். கரூர், நாமக்கல் மாவட்ட மக்களுக்குப் புற்றுநோய், மலட்டுத்தன்மை, ஆஸ்துமா உள்ளிட்ட நோய்கள் ஏற்பட வாய்ப்புண்டு. ஏற்கெனவே, கரூர் மாவட்டத்தில் திருப்பூர் சாயக்கழிவு கலந்துவரும் நொய்யல் ஆற்றங்கரையில், நிலத்தடி நீர் விஷமாகி 20,000 ஏக்கர் விவசாய நிலங்கள் பாலைவனமாகிவிட்டன’’ என்று எச்சரித்தார்.

கதவணை கட்டாதீங்க! - கதறும் கரூர் விவசாயிகள்... காதுகொடுக்குமா புதிய அரசு?

மற்றோர் ஒருங்கிணைப் பாளரான ராஜேஷ் கண்ணன், ‘‘டி.என்.பி.எல் ஆலைக்கு ஆண்டு முழுவதும் தடையில்லாமல் காவிரியிலிருந்து தண்ணீர் எடுக்கத்தான் புகழூரில் கதவணை கட்ட ஆர்வம் காட்டுகிறார்கள். புகழூர் கதவணையில், நொய்யல் ஆற்றுக் கழிவுநீர் தேங்குவதால் ஏற்படவிருக்கும் பாதிப்பு பற்றி அதிகாரிகள் கவலைப்படவேயில்லை. நொய்யல் ஆற்றில் வரும் கழிவுநீர் காவிரி ஆற்றில் கலப்பதைத் தடுத்து நிறுத்திய பிறகுதான், புகழூரில் கதவணை கட்ட வேண்டும். விவசாயிகளின் இந்தக் கோரிக்கையை ஏற்று கதவணை கட்டும் திட்டத்தைப் புதிய அரசு உடனே தடுத்து நிறுத்த வேண்டும்’’ என்று கோரிக்கை விடுத்தார்.

பொதுப்பணித்துறையின் புகழூர் கதவணை சிறப்புத் திட்ட உதவிப் பொறியாளர் விஜயகுமாரிடம் பேசியபோது, ‘‘அரசு உத்தரவுப்படி இங்கு அணை கட்டும் பணியைத் தொடங்கவிருக்கிறோம். மற்றபடி, நொய்யல் ஆற்றுத் தண்ணீரின் தன்மை குறித்து மாசு கட்டுப்பாட்டு வாரியம்தான் சொல்ல வேண்டும்’’ என்றார்.

மாசு கட்டுப்பாட்டு வாரிய கரூர் மாவட்டப் பொறியாளர் ரவிச்சந்திரனிடம் பேசினோம். ‘‘நொய்யல் ஆற்றில் ஓடும் தண்ணீரில் ஒருகாலத்தில் டி.டி.எஸ் அதிகமாக இருந்தது உண்மைதான். ஆனால், இப்போது 1,200-க்கு குறைவாகத்தான் உள்ளது. காவிரியில் புகழூர் டி.என்.பி.எல் ஆலை அருகே தண்ணீரின் தன்மையை அறியும் கருவி வைத்துள்ளோம். இப்போது, நொய்யலில் கழிவுநீர் வருவதில்லை. அப்படியே வந்தாலும், உடனே நடவடிக்கை எடுப்போம். அதோடு, நிரந்தரமாக அணை அமையவிருக்கும் இடத்தில் ஒரு ஏக்கர் நிலத்தில் ஆய்வகமும் அமைக்கவிருக்கிறோம்’’ என்றார்.

சுப்ரமணியன், ராஜேஷ் கண்ணன், விஜயன்
சுப்ரமணியன், ராஜேஷ் கண்ணன், விஜயன்

நொய்யல் ஆற்றில் மட்டுமல்லாமல் காவிரியிலும் கழிவுநீர் கலப்பதைத் தடுத்து நிறுத்தி, விவசாயிகளுக்கு பாதிப்பு இருக்காது என்பதை உறுதிசெய்த பின்னரே புகழூரில் கதவணை கட்ட வேண்டும். அதைச் செவ்வனே செய்ய வேண்டியது புதிய அரசின் கடமை!