Published:Updated:

ஏரி காட்சிப் பொருள் அல்ல... விவசாயிகளின் வாழ்வாதாரம்!

ஏரிக்குள் பறவைகள்
பிரீமியம் ஸ்டோரி
News
ஏரிக்குள் பறவைகள்

திட்டம்

மிழ்நாட்டில் உள்ள மிகவும் பிரமாண்டமான ஏரிகளில் முதன்மையானது கரைவெட்டி ஏரி.

1,100 ஏக்கர் பரப்பளவில் பரந்து விரிந்து காட்சி அளிக்கும் இந்த ஏரி, அரியலூர் மாவட்டம், திருமானூர் அருகே உள்ள கரைவெட்டி கிராமத்தில் அமைந்துள்ளது.

சோழர்கள் ஆட்சிக்காலத்தில் அமைக்கப்பட்ட இந்த ஏரி, காமராஜர் ஆட்சிக்காலத்தில் விரிவுபடுத்தப்பட்டது. இந்த ஏரியில் தண்ணீர் நிறைந்திருக்கும்போது, லட்சக்கணக்கான பறவைகள் இங்கு வந்து செல்வது வழக்கம். இதனால் 2001-ம் ஆண்டு முன்னாள் முதல்வர் ஜெயலலிதா ஆட்சிக்காலத்தில் இந்த ஏரி, பறவைகள் சரணாலயமாக அறிவிக்கப்பட்டது.

கரைவெட்டி ஏரியில் விவசாயிகள்
கரைவெட்டி ஏரியில் விவசாயிகள்

இத்தனை நடந்தாலும், ‘‘இந்த ஏரி கடந்த 50 ஆண்டுகளில் ஒரு முறை கூடத் தூர்வாரப்படவில்லையென’’ ஆதங்கப்படுகிறார்கள் இப்பகுதி மக்கள். இந்நிலையில், இங்கு மண் திட்டுகள் மற்றும் கட்டடங்கள் அமைத்துச் சுற்றுலாப் பயணிகளை ஈர்க்க, 5 கோடி ரூபாய் நிதி ஒதுக்கியுள்ளது தமிழக அரசு. இதற்கு விவசாயிகள் மத்தியில் கடும் எதிர்ப்புகள் கிளம்பியுள்ளன.

ஏரிக்குள் தோண்டப்பட்டிருக்கும் மண் திட்டுகள்
ஏரிக்குள் தோண்டப்பட்டிருக்கும் மண் திட்டுகள்

இது தொடர்பாகப் பேசிய கீழக்காவாட்டாங்குறிச்சியைச் சேர்ந்த விவசாயி தங்க.சண்முகசுந்தரம், “இந்த ஏரி மூலமா சுமார் ஒரு லட்சம் ஏக்கர் விளைநிலங்களில் விவசாயம் நடக்கும். இப்ப 20 அடி உயரத்துக்கு வண்டல் சேர்ந்து, மேடாகிக் கிடக்கு. அதனால முழுமையாகத் தண்ணீர் தேக்க முடியலை. இந்த ஏரியை நம்பி பாசனம் பெற்ற விளைநிலங்கள் பாதிக்கப்பட்டிருக்கு. இதைத் தூர்வாரி, ஆழப்படுத்தணும்னு நீண்டகாலமாகக் கோரிக்கை வெச்சுகிட்டு இருக்கோம். தமிழக அரசு கண்டுக்கல. ஆனால், இப்ப, இதுல மண் திட்டுகள் அமைக்கவும், அலுவலக கட்டடங்கள் கட்டவும் 4.95 கோடி நிதி ஒதுக்கியிருக்கு. ஏரியில் மண் திட்டுகள் அமைச்சா, தண்ணீர் தேக்கப்படும் அளவு குறைஞ்சி, விவசாயத்துக்குக் கடுமையான பாதிப்பு ஏற்படும்’’ என்றார்.

ஏரிக்குள் பறவைகள்
ஏரிக்குள் பறவைகள்

இதே பகுதியைச் சேர்ந்த விவசாயி அய்யப்பன், ‘‘இந்த ஏரியின் மொத்த பரப்பு 1,100 ஏக்கராக இருந்தாலும்கூட, குறிப்பிட்ட 300 ஏக்கர்லதான் அதிகமாகத் தண்ணீர்த் தேங்கி நிற்கும். இதுதான் ஏரியின் இதயப்பகுதினு சொல்லலாம். எட்டு திட்டுகளையும் இங்கேதான் அமைக்குறதா இருந்தாங்க. ஒவ்வொரு திட்டும் தலா 20 ஏக்கர். இதனால் கடுமையான பின்னடைவுகள் ஏற்படும். விவசாயிகளின் எதிர்ப்பு அதிகமானதுனால, நீர்ப்பிடிப்பு பகுதியை விட்டுட்டு, ஏரியின் வேற பகுதியில திட்டுகள் அமைக்கத் தீர்மானிச்சிருக்காங்க. அதுவும்கூடதேவையில்லாததுதான்’’ என்றார்.

தங்க.சண்முகசுந்தரம், அய்யப்பன்
தங்க.சண்முகசுந்தரம், அய்யப்பன்

இதுகுறித்துப் பொதுப்பணித்துறை உதவிச் செயற்பொறியாளர் ஜெயராமனிடம் பேசினோம். “விவசாயம் எந்தளவுக்கு முக்கியமோ, அந்தளவுக்குப் பறவைகளும் முக்கியம். நாங்க அமைக்கப்போற எட்டு திட்டுகள்லயும் பத்தாயிரம் மரங்கள் வளர்க்க முடியும். இதுதான் பறவைகளுக்குப் பிடித்த இயல்பான சூழல். ஏரியை ஆழப்படுத்தணும்ங்கறது விவசாயிகளோட முக்கியக் கோரிக்கை. 60,000 கனமீட்டர் மண்ணை ஏரியிலிருந்து வெளியேத்தி அப்புறப்படுத்தப்போறோம். 40,000 கனமீட்டர் வண்டல் மண்ணை விவசாயத்துக்கு எடுத்துக்கிட்டுப் போக விவசாயிகளுக்கு அனுமதி கொடுக்குறோம். தண்ணீர்த் தேக்கி வைக்க, இதுல அகழியும் வெட்டப்போறோம். இதைதவிர இன்னும் ஒரு லட்சம் கன மீட்டருக்கு மண்ணைத் தூர்வாரி, ஏரியை ஆழப்படுத்த, மாவட்ட நிர்வாகத்துக்குக்கிட்ட நிதி கேட்டிருக்கோம். இந்தத் திட்டத்துல எந்த ஒரு சிறு முறைகேடும் நடக்காது” எனத் தெரிவித்தார்.

கரைகளில் மரங்கள் வளர்ப்பதுதான் தீர்வு!

ப்பிரச்னை குறித்துப் பேசும் சுற்றுச்சூழல் செயற்பாட்டாளர் ரமேஷ் கருப்பையா, “இதில் பொதுப்பணித்துறை அதிகாரிகள் தரப்பில், வெளிப்படைத்தன்மை இல்லை. இதற்கான பணிகள் தொடங்கப்பட்டபோது, 4.95 கோடி ரூபாய் மதிப்பீட்டில், 8 மண் திட்டுகள் அமைக்கப்போவதாகத் தெரிவித்தார்கள். இதற்கு விவசாயிகள் கடும் எதிர்ப்பு தெரிவித்தபோதும், தூர்வாரும் பணிகள்குறித்து அதிகாரிகள் உறுதி அளிக்கவில்லை.

ரமேஷ் கருப்பையா
ரமேஷ் கருப்பையா

விவசாயிகளின் எதிர்ப்பு காரணமாக, தற்போது பணிகள் நிறுத்தப்பட்டுள்ளன. எதிர்ப்பைச் சமாளிப்பதற்காகவே இப்போது தூர்வாரும் பணிகள் குறித்து அதிகாரிகள் பேசுகிறார்கள். ஆனாலும் உறுதி அளிக்கவில்லை. 40,000 கனமீட்டருக்கு விவசாயிகளும், ஒரு லட்சம் கனமீட்டருக்கு அரியலூர் மாவட்ட நிர்வாகமும் தூர்வாரும் பணி மேற்கொள்ளும் என்றால், இந்த 5 கோடி எதற்கு என்பதுதான் இப்பகுதி மக்களின் கேள்வி. இதில் முறைகேடுகள் நடைபெற வாய்ப்புள்ளன. விவசாயிகளின் ஆலோசனைப்படி இந்தத் தொகை முழுவதையும், ஆக்கபூர்வமாகவும் நேர்மையாகவும் பயன்படுத்த வேண்டும்.

விவசாயிகளுக்குக் கிடைத்த முதல்கட்ட வெற்றியாக, ஏரியின் நீர்ப்பிடிப்புப் பகுதியில் தற்போது அமைக்கப்பட்டுக் கொண்டிருந்த திட்டுகள் ஆரம்ப நிலையிலேயே அகற்றப்பட்டுள்ளன. ஆனாலும் ஏரியின் வேறு பகுதியில் திட்டுகள் அமைக்க இருக்கிறார்கள். இதுவும் தவிர்க்கப்பட வேண்டும். தமிழர் பாரம்பர்ய நீர் மேலாண்மையின்படி எந்த ஒரு ஏரிக்குள்ளும் செயற்கையான மணல் திட்டுகள் அமைக்கப்பட்டதே இல்லை. தண்ணீர்த் தேக்கி வைத்து விவசாயத்திற்குப் பயன்படுத்துவதற்காகத்தான் ஏரிகள் உருவாக்கப்பட்டன. இதன் கரைகளில் உள்ள ஆலம், அரசு, நீர்மருது, பூவரசு, வேம்பு உள்ளிட்ட மரங்களில்தான் பறவைகள் கூடுகட்டி வாழ்ந்தன. 1950-களில் தொழில் புரட்சியின் காரணமாக, எரிபொருள் தேவைக்காக, உலக வங்கியின் வற்புறுத்தலின் காரணமாக, ஏரிக்குள் சீமைக்கருவேல மரங்களை வனத்துறையினர் வளர்த்து விவசாயிகளுக்குப் பாதகம் விளைவித்தார்கள். அப்போதும்கூடத் திட்டுகள் அமைக்கவில்லை.

எந்த ஏரியில் மணல் திட்டுகள் அமைத்து, மரங்கள் வளர்க்கப்பட்டதால், அதிகளவில் பறவைகள் வந்தன? பறவைகளை வரவழைக்க இப்படியொரு ஆலோசனையை எந்தப் பறவையியல் ஆய்வாளர் தெரிவித்தார் என்பதையும் பொதுப்பணித்துறையினர் வெளிப்படையாகத் தெரிவிக்க வேண்டும்.

1998-ம் ஆண்டுக் கரைவெட்டி ஏரியில் 10 திட்டுகள் அமைத்தார்கள். அனைத்தும் அந்த ஆண்டே கரைந்துவிட்டன. ஏரிகளின் முதன்மையான பயன்பாடு விவசாயம்தான். இதனூடாகப் பறவைகளும் இளைப்பாறலாம். திட்டுகளால் எந்தப் பயனும் இல்லை. கரைகளில் அதிகளவில் மரங்கள் வளர்ப்பதன் மூலமாக மட்டுமே பறவைகளுக்கு நன்மை செய்ய முடியும். சமீபகாலமாக, ஏரிகளை அழகியல் சார்ந்ததாக மட்டுமே பார்க்கக்கூடிய நகர்ப்புற மனோபாவம் அதிகரித்து வருகிறது. ஏரிக்குள் திட்டுகள் அமைத்து மரங்கள் வளர்க்கும் கலாசாரம் தற்போது அதிகரித்து வருகிறது. இது பிழையானது. ஏரியை ஆழப்படுத்துவதும், கரைகளில் அதிகளவில் மரங்கள் வளர்ப்பதும்தான், விவசாயிகளுக்கும் பறவைகளுக்கும் ஒருசேர நன்மை செய்வதாகும்” என்று சொல்லிமுடித்தார்.