Published:Updated:

மாதம் ரூ.46,200 பால், பனீர், தயிர்... மதிப்புக்கூட்டல் கொடுக்கும் மகத்தான லாபம்!

ஒட்டுமொத்த விகடனுக்கும் ஒரே ஷார்ட்கட்

Use App
பால் கறக்கும் பணியில் மகனுடன் சந்திரசேகரன்
பால் கறக்கும் பணியில் மகனுடன் சந்திரசேகரன்

மதிப்புக்கூட்டல்

பிரீமியம் ஸ்டோரி
பாலை கூட்டுறவு சங்கத்துக்கு கொடுக்கும்போது ஒரு குறிப்பிட்ட அளவுதான் வருமானம் கிடைக்கும். அந்த அளவை எப்போதும் தாண்டாது.

அரசு மற்றும் தனியார் பால் நிறுவனங்கள் பால் விலையை உயர்த்தினாலன்றி அதற்கு வேறு வழியில்லை. நாளுக்கு நாள் தீவனச் செலவு, கறவை மாடு பராமரிப்புச் செலவு அதிகரித்துக்கொண்டே இருக்கிறது. இதனால் பால் உற்பத்தியாளர் களுக்குப் பாலை மட்டுமே விற்பனை செய்யும்போது போதுமான வருமானம் கிடைப்பதில்லை. இந்நிலையில் பால் உற்பத்தியாளர்கள் மாற்று வழியை யோசிக்க வேண்டிய சூழல் உருவாகியுள்ளது. அந்த வகையில், பால் மதிப்புக்கூட்டலில் ஈடுபட்டு நல்ல வருமானம் எடுத்து வருகிறார் செங்கல்பட்டு மாவட்டம், சிங்கபெருமாள் கோவில் அடுத்த அனுமந்தபுரத்தைச் சேர்ந்த பால் உற்பத்தியாளர் சந்திரசேகரன். இவர் பால், பனீர், தயிர் என்று மதிப்புக்கூட்டி விற்பனை செய்து வருகிறார். ஓர் அதிகாலை வேளையில் பண்ணையில் இருந்தவரைச் சந்தித்தோம்.

பால் கறக்கும் பணியில் மகனுடன் சந்திரசேகரன்
பால் கறக்கும் பணியில் மகனுடன் சந்திரசேகரன்

‘‘நான் 5-ம் வகுப்பு வரைக்கும் படிச்சிருக்கேன். நாலரை ஏக்கர் நிலமிருக்கு. அதுல நிலக்கடலை, தர்பூசணி, நெல் சாகுபடி செய்றோம். அதோட 15 மாடுகளை வெச்சிருக்கோம். நான் 1998-ம் வருஷத்திலிருந்து பால் கறந்து விற்பனை செய்துகிட்டிருக்கேன். அப்போ ஒரு லிட்டர் பாலை 6 ரூபாய்க்கு ஊத்துவேன். ஆனா, அது கட்டுப்படியாகலைன்னு சென்னையில கொண்டு போய் டீக்கடை, ஹோட்டல்களுக்கு ஒரு லிட்டர் 10 ரூபாய்க்கு வித்துட்டு திரும்புவேன். சென்னை-செங்கல்பட்டு லோக்கல் டிரெயின்ல வெண்டார் கம்பார்ட்மென்ட்ல பாலை ஏத்திக்கிட்டுப் போவேன். இப்படியே ரொம்ப வருஷம் ஓடிச்சு. 2010-ம் வருஷம் காட்டுப்பாக்கம் (வேளாண் அறிவியல் நிலையம்) கே.வி.கேயில பனீர் தயாரிக்கும் பயிற்சி கொடுக்கிறதா கேள்விப்பட்டு, அதுல கலந்துகிட்டேன். அந்தப் பயிற்சிதான் என் வாழ்க்கையை மாத்தப்போகுதுனு அப்போ தெரி யாது” என்று முன்கதை சொன்னவர் தொடர்ந்தார்.

பாலைச் சூடு செய்தல்
பாலைச் சூடு செய்தல்
வடிகட்டுதல்
வடிகட்டுதல்

‘‘பாலை மதிப்புக்கூட்டுறதுல நெய், பால்கோவா, ரோஸ்மில்க், பாதாம் பால், பனீர்’னு நிறைய இருக்கு. அதுல பனீர்தான் ரொம்ப எளிதானது. நாம தயாரிக்கிற பனீருக்கும், தனியார் பால் நிறுவனங்கள் தயாரிக்கிற பனீருக்கும் வித்தியாசம் இருக்குது. அவங்க வெண்ணெய் எடுத்த பால்ல பனீர் தயாரிப்பாங்க. நாங்க அப்படியில்ல... நேரடியாகவே கறந்த பால்ல இருந்து பனீர் தயாரிக்கிறோம். அதனால சுவையும் தரமும் நல்லா இருக்குது. ஆரம்பத்துல சென்னை ராயப்பேட்டையில இருக்குற கம்பெனிக்குத்தான் ஒரு கிலோ பனீர் 150 ரூபாய்னு மொத்தமாகக் கொடுத்துட்டு இருந்தேன். பிறகு செங்கல்பட்டு, மறைமலைநகர், சிங்கப்பெருமாள் கோவில் பகுதிகள்ல இருக்கிற ஹோட்டல்கள்ல ஆர்டர் பிடிச்சு பனீர், தயிர் அதிகம் கொடுக்கிறேன். இப்ப நேரடியா விக்கிறதால ஒரு கிலோ பனீர் 260-300 ரூபாய்னு வித்துட்டு இருக்கேன்” என்றவர் அதற்கான பில்களைக் காண்பித்தார். அதை நாம் பார்த்த பிறகு தொடர்ந்தார்.

வினிகர் சேர்த்தல்
வினிகர் சேர்த்தல்
குடும்பத்தினருடன்
குடும்பத்தினருடன்

“எங்கிட்ட 15 மாடுக இருக்குது. அதுல 3 மாடுக இப்போ பால் கறக்குது. சுற்றுவட்டாரத்துல இருக்குறவங்களுக்கு 40 மாடுகளை வாங்கிக் கொடுத்திருக்கேன். அதுல 20 மாடுகளுக்கு மேல பால் கறக்குது. மாடு வளர்க்கிறவங்களுக்கு ஒரு லிட்டருக்கு 25 ரூபாய்னு கொடுக்கிறேன். இப்போ மாடுகளுக்கு நல்லா மேய்ச்சல் இருக்கிறதால மொத்தம் ஒரு நாளைக்கு 200 லிட்டர் பால் கிடைக்குது. அதுவே கோடைக்காலத்துல 150 லிட்டரா குறைஞ்சுடும். 200 லிட்டர் பால்ல 80 லிட்டர் பாலை சொசைட்டிக்கு ஊத்திடுறோம். அங்க சராசரியா ஒரு லிட்டருக்கு 25 ரூபாய் கிடைக்குது. அத அப்படியே மாடு வளர்க்கிறவங்களுக்குப் போயிடுது. மீதி பால்லதான் மதிப்புக்கூட்டுறேன். 98 லிட்டர் பாலை பனீர் தயாரிக்கிறதுக்குப் பயன்படுத்துறேன். 7 லிட்டர் பால் காய்ச்சுனா ஒரு கிலோ பனீர் கிடைக்கும். அந்த வகையில 98 லிட்டர் பாலுக்கு 14 கிலோ பனீர் கிடைக்கும். மீதியிருக்குற 22 லிட்டர் பாலைக் காய்ச்சி உறைய வெச்சா 20 லிட்டர் தயிர் கிடைக்கும்’’ என்றவர் வருமானம் குறித்துப் பேசினார்.

மாதம் ரூ.46,200 பால், பனீர், தயிர்... மதிப்புக்கூட்டல் கொடுக்கும் மகத்தான லாபம்!
பிழிதல்
பிழிதல்

“ஒரு நாளைக்கு 14 கிலோ பனீர் எடுக்கிறோம். ஒரு கிலோ 260-300 ரூபாய் வரை விலை போகுது. குறைஞ்சபட்சம் 260 ரூபாய்னு வெச்சுக்கிட்டாலே 3,640 ரூபாய் வருமானம். ஒரு லிட்டர் தயிர் 50 ரூபாய்க்கு விக்கிறேன். ஒரு நாளைக்கு விற்பனையாகுற 20 லிட்டர் தயிர் மூலமா 1,000 ரூபாய் வருமானம். இந்தப் பனீர், தயிருக்கு 120 லிட்டர் பாலைப் பயன்படுத்துறேன். 120 லிட்டர் பால்ல இருந்து தினமும் 4,640 ரூபாய் வருமானம் கிடைக்குது. இதே பாலை சொசைட்டிக்கு ஊத்துனா, ஒரு லிட்டர் 25 ரூபாய் என்ற கணக்குல 3,000 ரூபாய்தான் கிடைக்கும். மதிப்புக்கூட்டி விற்பனை செய்றதால எனக்குக் கூடுதலா 1,640 ரூபாய் லாபமா நிக்குது. இதுல போக்குவரத்து, வினிகர்னு 100 ரூபாய் செலவு போக ஒரு நாளைக்கு நிகர லாபமா 1,540 ரூபாய் கிடைக்குது. மாசத்துக்கு 46,200 ரூபாய் லாபமா கிடைச்சிட்டு இருக்குது. பால் வரத்துக்கு ஏற்ப இந்த வருமானத்துல மாற்றம் இருக்கும்” என்றவர் நிறைவாக,

தயாராகப் பனீர்
தயாராகப் பனீர்


“பால் சொசைட்டிக்கு ஊத்தறதை மட்டுமே நம்பிட்டு இருந்தா, வருமானத்த அதிகப்படுத்த முடியாது. இப்படி மதிப்புக் கூட்டிய பொருள்களை உற்பத்தி செஞ்சா தான் பால்ல வருமானம் எடுக்க முடியும். இந்த மதிப்புக்கூட்டிய பொருள்களுக்கு ஒரு மார்க்கெட்டைப் பிடிச்சு வெச்சுக்கணும். நேரத்துக்கு டெலிவரி, தரம்னு சரியா இயங்கினா மார்க்கெட் நிலைக்கும். இன்னொன்னு குடும்பமா இந்தத் தொழிலை செய்றோம். நான், இன்ஜினீயரிங் படிச்ச என் மகன், மனைவினு மூணு பேரும் உழைக் கிறோம். தினமும் 20 மாடுகளுக்கு மேல பால் கறக்கிறேன். தொடர் முயற்சி இருந்தால், பால்ல நல்ல வருமானம் எடுக்க முடியும்” என்று விடைகொடுத்தார்.

தொடர்புக்கு, சந்திரசேகரன், செல்போன்: 94449 31414

குறிப்பு: சொந்தப் பாலுக்கான விலையும் 25 ரூபாய் என்று வழங்கப்பட்டிருப்பதால், தீவனச் செலவு, பராமரிப்புச் செலவு அதிலேயே அடங்கும்.
குறிப்பு: சொந்தப் பாலுக்கான விலையும் 25 ரூபாய் என்று வழங்கப்பட்டிருப்பதால், தீவனச் செலவு, பராமரிப்புச் செலவு அதிலேயே அடங்கும்.

பனீர் தயாரிப்பது எப்படி?

70 லிட்டர் கொள்ளளவு கொண்ட அலுமினிய பாத்திரத்தில் 50 லிட்டர் பாலை ஊற்றிச் சூடு செய்ய வேண்டும். பால் பொங்கி வரும் வரை சூடு செய்ய வேண்டும். பொங்கி வந்து 5 நிமிடங்களுக்குப் பிறகு, அதில் பால் திரிவதற்கு ஏற்றவாறு வினிகரை (சுமார் 30-100 மி.லி) ஊற்ற வேண்டும். பால் திரிந்தவுடன் சற்று நீண்ட கைப்பிடியுள்ள பெரிய கரண்டியில் எடுத்து, காட்டன் வேட்டியில் வடிகட்ட வேண்டும். வடிகட்டிய பிறகு காட்டன் வேட்டியில் உள்ளதை நன்கு பிழிய வேண்டும். பிழிந்த பிறகு, கனமான பொருளைக் கொண்டு அழுத்தினால் பனீர் தயார். பிறகு, நம் தேவைக்கேற்ற அளவில் வெட்டி விற்பனை செய்யலாம்.

தயிர்

11 லிட்டர் பாலை எடுத்து நன்கு கொதிக்கும் வரை சூடு செய்ய வேண்டும். கொதித்த பிறகு அது 10 லிட்டர் பாலாகச் சுண்டியிருக்கும். அதை அப்படியே ஓர் இரவு முழுவதும் ஆற வைக்க வேண்டும். காலையில் அதில் சுமார் 100 மி.லி மோரை உறை ஊற்ற வேண்டும். 3 மணி நேரம் கழித்து அப்படியே விற்பனைக்குக் கொண்டு செல்லலாம். இந்தத் தயிர் இரண்டு நாள்கள் வரை புளிக்காது.

பால் மதிப்புக்கூட்டலுக்கு இங்கு பயிற்சி கிடைக்கும்

செங்கல்பட்டு-காஞ்சிபுரம் மாவட்டம், காட்டுப்பாக்கம் வேளாண் அறிவியல் நிலைய இணைப் பேராசிரியர், முனைவர் மா.விமலாராணியிடம் பேசினோம். “பாலைக் கொண்டு 70 வகையான மதிப்புக்கூட்டப்பட்ட பொருள்களை உருவாக்க முடியும். அதில் பனீர் தயாரிப்பது மிகவும் எளிதானது. பாலைச் சூடுசெய்து வினிகர் சேர்த்தால் பால் திரியும். திரிந்த பிறகு, உருவாகும் சென்னாவை (பிசிறுகள்) பிழிந்து அழுத்தினால் பனீர் தயார். ஒரு மணி நேர வேலைதான். அந்தச் சென்னாவைப் பனீருக்காக அழுத்தாமல் அப்படியே ரசகுல்லா தயாரிக்கலாம். வடிக்கப்பட்ட தண்ணீரில் சத்துகள் அடங்கியுள்ளன. இதைக் கொண்டு ஃப்ளவர்டு மில்க் தயாரிக்கலாம்.

புளித்த தயிரை வீட்டுக்கு வேண்டுமென்றால் பயன்படுத்தலாம். ஆனால், வர்த்தக ரீதியாகக் கொண்டு செல்லும்போது பாலைச் சூடு செய்யும்போதே சிறிதளவு சர்க்கரை, பால் பவுடர் கலந்து பிறகு, உறைவிட்டால் விரைவில் புளிக்காது. பாலிலிருந்து க்ரீம் எடுத்துவிட்டு பிறகும் அந்தப் பாலை பயன்படுத்தலாம். பாலைச் சுண்ட காய்ச்சி, கலக்கிக்கொண்டே வந்தால் பால்கோவா தயார். அதிலேயே பால் பவுடர் கலந்தால் பால்பேடா தயார். சாக்லேட் பவுடர் கலந்தால் பால் பர்ஃபி தயார் செய்துவிட முடியும். கறந்த பால் அதிகபட்சம் 5 மணி நேரம்தான் தாங்கும். அதையே குறைந்த வெப்பநிலையில் சூடு செய்து, உறைநிலையில் வைத்தால், இரண்டு நாள்கள் தாங்கும். பாலில் குளோப் ஜாமூன், ரோஸ்மில்க் தயாரிக்கலாம். மேற்கண்டவை அனைத்தும் மிகவும் எளிமையான முறையில் தயாரிக்கக்கூடியவை. இவையனைத்துக்கும் எங்கள் வேளாண் அறிவியல் நிலையத்தில் பயிற்சி அளிக்கிறோம்.

விமலாராணி
விமலாராணி

அதேபோன்று பால் பொருள்களுக்கு எஃப்.எஸ்.எஸ்.ஐ தரச்சான்றிதழ் மற்றும் உரிமம் வாங்குவதற்கும் வழிகாட்டுகிறோம். ஆண்டுக்கு 12 லட்சத்துக்குள் வர்த்தகம் செய்பவர்களுக்கான தரச் சான்றிதழுக்கு ரூ.100தான். அதற்கு மேல் வர்த்தகம் செய்பவர்களுக்கான உரிமம் ரூ.2000தான் ஆகும். பால் மதிப்புக்கூட்டப்பட்ட பொருள்கள் தயாரிக்கப் பெரிய முதலீடு வேண்டியதில்லை. தொழிற்சாலையாகச் செய்பவர்களுக்குத்தான் பெரிய முதலீடு தேவைப்படும். பால் பொருள்கள் குழந்தைகளுக்கும் பெரியவங்களுக்கும் மிகவும் பிடித்தவை. அதனால் வீட்டிலிருந்தேகூடச் செய்யலாம்” என்றார்.

தொடர்புக்கு, முனைவர். விமலாராணி, செல்போன்: 99942 83960

மேலும் விவரங்களுக்கு: வேளாண் அறிவியல் நிலையம், காட்டுப்பாக்கம். செல்போன்: 99405 42371

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு