Published:Updated:

விளைச்சலைக் கூட்டும் வேஸ்ட் டீகம்போஸர்! - விழுப்புரத்தில் கூடிய இயற்கை விவசாயிகள்!

நிகழ்வில் பேசும் வேளாண்துறை இயக்குநர் தட்சிணாமூர்த்தி...
பிரீமியம் ஸ்டோரி
நிகழ்வில் பேசும் வேளாண்துறை இயக்குநர் தட்சிணாமூர்த்தி...

நிகழ்ச்சி

விளைச்சலைக் கூட்டும் வேஸ்ட் டீகம்போஸர்! - விழுப்புரத்தில் கூடிய இயற்கை விவசாயிகள்!

நிகழ்ச்சி

Published:Updated:
நிகழ்வில் பேசும் வேளாண்துறை இயக்குநர் தட்சிணாமூர்த்தி...
பிரீமியம் ஸ்டோரி
நிகழ்வில் பேசும் வேளாண்துறை இயக்குநர் தட்சிணாமூர்த்தி...

‘இயற்கை விவசாயத்தில் புதிய புரட்சி, வேஸ்ட் டீகம்போஸர்... 20 ரூபாயில் வாழ்நாள் முழுவதும் இயற்கை உரம்!’ என்ற தலைப்பில்... கழிவு களை மட்கவைக்கும் கண்டுபிடிப்பு பற்றிய கட்டுரை இரண்டு ஆண்டுகளுக்கு முன்பு வெளியானது. அதைத்தொடர்ந்து ஏராளமான வாசகர்கள் பசுமை விகடனைத் தொடர்புகொண்டு ‘வேஸ்ட் டீகம்போஸர்’ (Waste Decomposer) வேண்டும் எனக் கேட்டனர். உத்தரப்பிரதேச மாநிலம், காஸியாபாத்தில் இயங்கிவரும் தேசிய இயற்கை விவசாய மையத்தை (National Centre of Organic Farming) தொடர்புகொண்டு, 1,000 வேஸ்ட் டீகம்போஸர் பாட்டில்கள் வாங்கி விவசாயிகளுக்கு வழங்கப்பட்டது. தொடர்ந்து விவசாயிகள், ‘எங்களுக்கும் டீகம்போஸர் வேண்டும்’ எனக் கோரிக்கை வைத்தபடியே இருந்தனர். மீண்டும் தேசிய இயற்கை விவசாய மையத்தைத் தொடர்புகொண்டு டீகம்போஸர் பாட்டில்களை வாங்கியது பசுமை விகடன்.

கூட்டத்தில் கலந்துகொண்டோர்
கூட்டத்தில் கலந்துகொண்டோர்

அதை விவசாயிகளிடம் சேர்க்கும்வகையில், செப்டம்பர் 14-ம் தேதி, தேசிய இயற்கை விவசாய மையம், தமிழ்நாடு அரசு வேளாண்மைத்துறை, விழுப்புரம் ரோட்டரி சங்கத்துடன் இணைந்து, ‘இயற்கை விவசாயத்தின் புதிய புரட்சி வேஸ்ட் டீகம்போஸர்’ என்ற ஒருநாள் கருத்தரங்கை விழுப்புரம் ஶ்ரீஜெயசக்தி திருமண மண்டபத்தில் நடத்தியது பசுமை விகடன். தமிழ்நாட்டின் பல்வேறு பகுதிகளிலிருந்து 900 பேர் இக்கருத்தரங்கில் கலந்துகொண்டு சிறப்பித்தனர்.

வரவேற்புரை ஆற்றிய விழுப்புரம் ரோட்டரி சங்கத் தலைவர் பாலகுருநாதன், “விழுப்புரம் ரோட்டரி சங்கம் சார்பில், பலவிதமான சமூக சேவைகளைச் செய்துவருகிறோம். அதில் அரசுப் பள்ளி மாணவர்களுக்கு உதவும்வகையில் பணிகள் செய்துவருகிறோம். அந்தவகையில் பசுமை விகடனோடு சேர்ந்து விவசாயிகளுக்காக இக்கருத்தரங்கை நடத்துவது மகிழ்ச்சியாக உள்ளது” என்றார் உற்சாகத்தோடு.

பாலகுருநாதன், காங்கேயன், ராமமூர்த்தி
பாலகுருநாதன், காங்கேயன், ராமமூர்த்தி

விழுப்புரம் ரோட்டரி சங்க துணை ஆளுநர் எம்.காங்கேயன், “விழுப்புரம் ரோட்டரி சங்கம் மூலமாக 45 அரசுப் பள்ளிகளுக்கு 75 லட்சம் ரூபாயில் கம்ப்யூட்டர் வாங்கிக் கொடுத்திருக்கிறோம். கழிப்பறைகள் கட்டிக் கொடுத்திருக்கிறோம். இதைத் தவிர்த்து மாதந்தோறும் இயற்கை விவசாயத்து கென்று சின்ன சின்ன கூட்டங்களை நடத்தி வருகிறோம்” என்றார் முத்தாய்ப்பாக.

நிகழ்வில் பேசும் வேளாண்துறை இயக்குநர் தட்சிணாமூர்த்தி...
நிகழ்வில் பேசும் வேளாண்துறை இயக்குநர் தட்சிணாமூர்த்தி...

விழுப்புரம் ரோட்டரி சங்க மாவட்ட பொறுப்பாளரும் ஓய்வுபெற்ற வேளாண் இணை இயக்குநருமான ராமமூர்த்தி “ஐ.டியில் வேலைசெய்யும் பலரை இயற்கை விவசாயத்துக்கு அழைத்துவந்த பெருமை பசுமை விகடனையே சேரும். விவசாயம், கல்வி, மருத்துவம், ஆன்மிக நிகழ்ச்சிகளுக்காக இந்த மண்டபத்தை இலவசமாகவே வழங்கிவருகிறேன். இயற்கையை நேசிக்க வேண்டும், இயற்கையோடு இணைந்து வாழ வேண்டும் என்பதே எங்கள் நோக்கம். இதற்காக மாதந்தோறும் மூலிகை சம்பந்தமான கூட்டங்களையும் நடத்தி வருகிறேன்” என்றார். தொடர்ந்து விழுப்புரம் ரோட்டரி சங்க முன்னாள் துணை ஆளுநர் சரவணக்குமார், முன்னாள் தலைவர் கந்தன் ஆகியோர் உரையாற்றினர்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer
தேநீருக்குப் பதிலாக கேழ்வரகுக்கூழ்
தேநீருக்குப் பதிலாக கேழ்வரகுக்கூழ்

மரக்கன்று நட்டு நிகழ்ச்சியைத் தொடங்கிவைத்து சிறப்புரை ஆற்றிய தமிழ்நாடு அரசு வேளாண்துறை இயக்குநர் வ.தட்சிணாமூர்த்தி ஐ.ஏ.எஸ், “வேளாண்மைத்துறையில் விவசாயிகளுக்காகப் பல்வேறு திட்டங்களை முன்னெடுத்துவருகிறோம். விவசாய நிலங்களில் அதிகம் செயற்கை உரங்களைப் போடாதீர்கள். அதனால் மண்ணின் வளம் குறையத் தொடங்கும் என்பதைப் புரிந்துகொள்ளுங்கள். விவசாயிகள் தங்களுடைய விளைநிலத்தின் மண் வளத்தைத் தெரிந்துகொள்ள மண்வள அட்டையைப் பெற்று மண் பரிசோதனை செய்துகொள்ளலாம். மூன்று வருடங்களுக்கு முன்பு இயற்கை விவசாயத்தில் நல்ல மகசூலைப் பெற வேண்டும் என்பதற்காகப் பாரம்பர்ய வேளாண் வளர்ச்சி திட்டத்தின் கீழ் சுமார் 2,500 ஏக்கர் நிலத்தில் இயற்கை விவசாயம் செய்ய ஊக்குவிக்கப்பட்டது. தற்போது அதை 7,500 ஏக்கராக அதிகரிக்க உள்ளோம். ஜீரோ பட்ஜெட் விவசாயத்தை மத்திய, மாநில அரசுகள் இணைந்து ஒவ்வொரு மாவட்டத்திலும் செயல்படுத்த உள்ளோம். இந்தத் திட்டத்தில் மாவட்டத்திற்கு நான்கு பேரைத் தேர்ந்தெடுத்து அவர்களுக்கு முறையான பயிற்சிகளை அளிப்போம். அந்த நான்கு பேரின்மூலம் மற்ற விவசாயிகளுக்கும் அவை முழுவதுமாகக் கற்றுத்தரப்படும். தற்போது அதற்கான பணிகளும் நடைபெற்றுக் கொண்டிருக்கின்றன.

டீகம்போஸர் வாங்க வரிசையில் 
ஆர்வமோடு நிற்கும் விவசாயிகள்
டீகம்போஸர் வாங்க வரிசையில் ஆர்வமோடு நிற்கும் விவசாயிகள்

ஒருமுறை இந்த வேஸ்ட் டீகம்போஸரை வாங்கினால் வாழ்நாள் முழுவதும் பயன்படுத்தலாம். இதைப் பயன்படுத்துவதால் தாவரங்களில் வேர் சம்பந்தப்பட்ட நோய்கள் வருவதில்லை. இதோடு, கூடுதல் மகசூலும் கிடைக்கிறது. விவசாயிகள் பயன்படுத்த வேண்டிய முக்கிய இயற்கை இடுபொருள் இது” என்றவர் வேளாண் துறையின் மூலம் செயல்படுத்தப்படும் திட்டங்களைப் பயன்படுத்திக்கொள்ள அழைப்புவிடுத்தார். தேநீர் இடைவேளையில் தேநீருக்குப் பதிலாக சுவையான கேழ்வரகுக் கூழ் வழங்கப்பட்டது.

வேல்முருகன், ஸ்டீபன் ஜெபகுமார், ஜஸ்வந்த் சிங்
வேல்முருகன், ஸ்டீபன் ஜெபகுமார், ஜஸ்வந்த் சிங்

தொடர்ந்து வேஸ்ட் டீகம்போஸர் தயாரிப்பு, பயன்பாடுகள் குறித்துப் பேச மேடையேறிய பாரம்பர்ய வேளாண் வளர்ச்சித்திட்ட ஒருங்கிணைப்பாளர் பொ.வேல்முருகன், “வேஸ்ட் டீகம்போஸர் மண்ணின் வளத்தை அதிகரிக்கும். இதைப் பயன்படுத்தி ‘ஜீரோ பட்ஜெட் விவசாயத்தை’ முழுமையாகச் செய்ய முடியும். இந்த டீகம்போஸர் பசுமாட்டின் சாணத்தில் உள்ள நுண்ணுயிர்களைக் கொண்டு உருவாக்கப்பட்டுள்ளது. ஒருமுறை வாங்கிவிட்டால், திரும்பி வாங்க வேண்டிய அவசியம் இல்லை. முன்னதாகப் பயன்படுத்தி வந்த கரைசலில் ஒரு பகுதியைத் தாய்த் திரவமாகக் கொண்டு மீண்டும் டீகம்போஸர் கரைசலைத் தயாரித்துக்கொள்ளலாம். இதன்மூலம் மகசூல் அதிகரிக்கும். இது சொட்டு நீர்ப் பாசனம் வழியாகக் கொடுப்பதற்கும் ஏற்றது” என்று ஆலோசனை வழங்கினார்.

அவரைத் தொடர்ந்து பேசிய, திருவள்ளூர் மாவட்ட இயற்கை விவசாயி ஸ்டீபன் ஜெபகுமார், “இந்த 20 ரூபாய் வேஸ்ட் டீகம்போஸர் ஒரு நாட்டு மாட்டுக்குச் சமம். 30 கிராம் அளவுள்ள பாட்டிலில் ஒரு நாட்டு மாடே உள்ளது என்று சொல்லலாம். இந்த வேஸ்ட் டீகம்போஸரைப் பயன்படுத்தி ஒரு மாதத்தில் பண்ணைக் கழிவுகளை மட்கச் செய்துவிடலாம். 60 சதவிகிதம் வரை ஈரப்பதம் உள்ளவாறு, டீகம்போஸரைக் கழிவுகள் மீது தெளிக்க வேண்டும்.

சுப்பு, இளங்கோவன்
சுப்பு, இளங்கோவன்

மண் வளமாக இருந்தால்தான் மகசூலும் நன்றாக இருக்கும். நான் வேஸ்ட் டீகம்போஸரை பயன்படுத்தி 400 தென்னை, 400 கொய்யா, இரண்டு ஏக்கரில் காய்கறிகள், 1 ஏக்கரில் பந்தல் காய்கறிகளையும் சாகுபடி செய்து வருகிறேன்” என்றவர் தொடர்ந்து விவசாயிகள் கேட்ட கேள்விகளுக்குப் பதிலளித்தார், ஸ்டீபன் ஜெபக்குமார்.

அடுத்துப் பேசிய சென்னையைச் சேர்ந்த மாடித்தோட்ட விவசாயி ஜஸ்வந்த் சிங், “இயற்கையைப் பேணிப் பாதுகாத்து இயற்கை யோடு ஒன்றிணைந்து வாழ்வது நமது தார்மிகக் கடமையாகும். அதை அடிப்படையாகக் கொண்டு நம்முடைய விவசாயமும், மாடித்தோட்டமும் இயற்கையாக அமைய வேண்டும். மண்ணில் ரசாயன உரத்தைக் கொட்டுவதைத் தவிர்த்து இயற்கையைப் பாதுகாக்கும்படி வலியுறுத்தி வருகிறேன். மரங்களை வளர்த்து, நம்முடைய அடுத்த தலைமுறைக்கு வரமாகக் கொடுத்துச் செல்ல வேண்டும். இல்லையென்றால் நம்முடைய வாரிசுகளும் நம்மை வசைபாடும். வீட்டில் உள்ள சிறிய இடத்திலாவது முடிந்தவரை விவசாயம் செய்யுங்கள். அதன் மூலமாகவே வீட்டின் பல்வேறு தேவைகளைப் பூர்த்தி செய்து விடலாம்” என்றார்.

வேஸ்ட் டீகம்போஸர் நாட்டு மாட்டுக்குச் சமம். வேஸ்ட் டீகம்போஸர் என்ற பெயரை மாற்ற வேண்டும்.

முன்னோடி விவசாயி ‘மதுராந்தகம்’ சுப்பு பேசும்போது, “இந்தியாவில் எந்தப் பத்திரிகை நிறுவனமும் ஒரு தொழில்நுட்பத்தைப் பற்றி எழுதுவதோடு நிறுத்திக்கொள்ளும். ஆனால், பசுமை விகடன்தான் அந்தத் தொழில்நுட்பத்தை விவசாயிகளிடம் கொண்டுவந்து சேர்க்கும் பணியைச் செய்கிறது” என்றார்.

தஞ்சாவூர் மாவட்டம் குடவாசல் பகுதியைச் சேர்ந்த முன்னோடி விவசாயி இளங்கோவன், ‘‘வேஸ்ட் டீகம்போஸர் என்ற பெயரை மாற்ற வேண்டும். இந்தப் பெயரால், இது கம்போஸ்ட் தயாரிக்க மட்டும்தான் பயன்படும் என்று புரிந்துகொள்ளப்படுகிறது. பயிரின் வளர்ச்சிக்கும், நோய் எதிர்ப்பு சக்திக்கும், நல்ல மகசூலுக்கும் இது பயன்படுகிறது. இதை விவசாயிகள் பயன்படுத்தத் தொடங்கினால், செலவு குறைந்து லாபம் அதிகரிக்கும்’’ என்றார் அக்கறையுடன். தொடர்ந்து முசிறி யோகநாதன், கூ.ரா.அம்மாசையப்பன், தரணிவாசலு ஆகியோர் உரையாற்றினர்.

மதிய உணவுக்குப் பிறகு கருத்தரங்கிற்கு வந்திருந்த அனைத்து விவசாயிகளுக்கும் வேஸ்ட் டீகம்போஸர் பாட்டில்கள் வழங்கப்பட்டன. வேஸ்ட் டீகம்போஸரைப் பெற்றுக்கொண்ட விவசாயிகள் புன்னகையோடு புறப்பட்டனர்.

கேள்வியும் பதிலும்!

நிகழ்வில் வேஸ்ட் டீகம்போஸர் பற்றி விவசாயிகள் எழுப்பிய கேள்விகளும், வல்லுநர்கள் வழங்கிய பதில்களும்!

வேஸ்ட் டீகம்போஸரைப் பயன்படுத்தி, தென்னை மட்டைகளை எப்படி மட்கவைப்பது?

தென்னை மட்டைகளின்மீது நேரடியாக டீகம்போஸர் கரைசலைப் பயன்படுத்தக் கூடாது. தென்னை மட்டைகளைத் தூளாக்கி, அதன்மீது வேஸ்ட் டீகம்போஸர் கரைசலைத் தெளித்து கிளறிவிட்டு வர வேண்டும். அப்போதுதான் தென்னை மட்டைகள் மட்கும்.

வேஸ்ட் டீகம்போஸர் கரைசல் தயாரிக்க வெல்லத்துக்குப் பதில் வேறு என்ன பயன்படுத்தலாம்?

வெல்லம்தான் சேர்க்க வேண்டும் என்பதில்லை. பனம்பழம், பப்பாளி போன்ற பழங்களையும் மொலாசஸ் மாதிரியான இனிப்புப் பொருள்களையும் சேர்க்கலாம். நுண்ணுயிர்களுக்கு உணவு வேண்டும் என்பதால்தான் வெல்லம் போன்ற இனிப்புப் பொருள்கள் சேர்க்கப்படுகிறது. ஒருமுறை டீகம்போஸர் பாட்டிலைத் திறந்துவிட்டால் முழுவதுமாகப் பயன்படுத்திவிட வேண்டும்.

கரைசல் தயாராகிவிட்டது என்பதை எப்படித் தெரிந்துகொள்வது?

கரைசலின் மேற்புறம் வெண்மையான படலம் படரும். இதுதவிர, புளித்த வாடை வீச ஆரம்பிக்கும். இவற்றை வைத்து டீகம்போஸர் கரைசல் தயாராகிவிட்டது என்பதைத் தெரிந்து கொள்ளலாம்.

ஒரு ஏக்கருக்கு எவ்வளவு பயன்படுத்தலாம்?

ஒரு ஏக்கருக்கு 200 லிட்டர் கரைசலை ஒருமுறை பயன்படுத்தலாம். நிலத்தின் தன்மையைப் பொறுத்து விவசாயிகள் இதைக் கூடவோ குறையவோ பயன்படுத்தலாம்.

வேஸ்ட் டீகம்போஸர் கரைசலை என்னென்ன பயிருக்குப் பயன்படுத்தலாம்?

இதற்குக் குறிப்பிட்ட பயிர்தான் என்ற வரையறை இல்லை. நெல், காய்கறிகள், பழமரப்பயிர்கள், மரங்கள் என அனைத்துப் பயிர்களுக்கும் பயன்படுத்தலாம். வாரம் ஒருமுறை 200 லிட்டர் என்ற கணக்கில் வேஸ்ட் டீகம்போஸர் கரைசலைக் கொடுத்து வரலாம்.

என்னென்ன வழிகளில் பயிருக்குக் கொடுக்கலாம்?

இலைவழி, பாசன வழியென இரண்டு முறைகளில் நிலத்துக்குக் கொடுக்கலாம். இலை வழியில் பயிர் பாதுகாப்பும், பாசன வழியில் மண்வளமும் மேம்படும். இலை வழி தெளிக்கும்போது, ஒரு லிட்டர் வேஸ்ட் டீகம்போஸர் கரைசலுடன் 10 லிட்டர் தண்ணீரைக் கலந்து தெளிக்கலாம்.

ஏற்கெனவே பயன்படுத்தி வரும் இடுபொருள்களுடன் சேர்த்துப் பயன்படுத்தலாமா?

விவசாயிகள் முன்னரே பயன்படுத்தி வரும் இயற்கை இடுபொருள்களான பஞ்சகவ்யா, அமுதக்கரைசல் ஆகியவற்றுடன் இரண்டு நாள்கள் இடைவெளிவிட்டு டீகம்போஸர் கரைசலைப் பயன்படுத்தலாம்.

டீகம்போஸரைப் பயன்படுத்தி விதை நேர்த்தி செய்வது எப்படி?

ஒரு லிட்டர் வேஸ்ட் டீகம்போஸர் கரைசலை 300 கிராம் வெல்லத்தோடு நன்றாகக் கலந்துகொள்ள வேண்டும். இதை 20 கிலோ விதையில் கலந்து, நன்றாகப் பிசைய வேண்டும். பிறகு 30 நிமிடங்கள் நிழலில் உலர்த்தி விதைப்புக்குப் பயன்படுத்த வேண்டும்.

முதல் நன்றி!

வேஸ்ட் டீகம்போஸர் நிகழ்ச்சியில் கலந்துகொண்டவர்களின் கருத்துகள்!

மதன், தேனி:

விளைச்சலைக் கூட்டும் வேஸ்ட் டீகம்போஸர்! - விழுப்புரத்தில் கூடிய இயற்கை விவசாயிகள்!

“பசுமை விகடன் நடத்திய இரண்டாவது வேஸ்ட் டீகம்போஸர் நிகழ்வு இது. இரண்டு நிகழ்விலுமே பங்கேற்றதில் கூடுதல் தகவல்களைத் தெரிந்துகொண்டேன். டீகம்போஸரைப் பற்றித் தெரியவும் வைத்து, அதை விவசாயிகளிடம் கொண்டு போய்ச் சேர்க்கிறது, பசுமை விகடன். இதற்கான முதல் நன்றி பசுமை விகடனுக்குத்தான்.”

விளைச்சலைக் கூட்டும் வேஸ்ட் டீகம்போஸர்! - விழுப்புரத்தில் கூடிய இயற்கை விவசாயிகள்!

வெங்கட், சென்னை:

“தமிழகத்தில் டீகம்போஸரைப் பரவலாகக் கொண்டுபோய்ச் சேர்த்ததில் பசுமை விகடனுக்குத்தான் பங்கு அதிகம். பசுமாடுகள் இல்லாத விவசாயிகளுக்கு, வேஸ்ட் டீகம்போஸர் அதிகப் பலன் கொடுக்கும். ஒரு விவசாயி நேரடியாக வாங்கும்போது கொஞ்சம் சிரமங்கள் இருக்கிறது. அந்தச் சிரமங்களைப் பசுமை விகடன் எடுத்துக்கொண்டு, விவசாயிகளுக்கு வாங்கிக்கொடுப்பது வரவேற்கத்தக்க விஷயம். கருத்தரங்கில் பேசியவர்களின் மூலம் எனக்குள் இருந்த சந்தேகங்கள் தீர்ந்தன.”

விளைச்சலைக் கூட்டும் வேஸ்ட் டீகம்போஸர்! - விழுப்புரத்தில் கூடிய இயற்கை விவசாயிகள்!

தயாரிப்பு முறை!

ஒரு பிளாஸ்டிக் டிரம்மில் 200 லிட்டர் கொள்ளளவு கொண்ட தண்ணீர் எடுத்துக்கொள்ள வேண்டும் (உப்புத் தண்ணீர் மற்றும் கார்ப்பரேஷன் தண்ணீரைப் பயன்படுத்த வேண்டாம்). இதில் இரண்டு கிலோ வெல்லம், ஒரு பாட்டில் டீகம்போஸரைச் சேர்த்துக் கலக்க வேண்டும். பிறகு நிழற்பாங்கான இடத்தில் வைத்து 7 நாள்கள் வரை தினமும் இரண்டு முறை, குச்சியால் கலக்கிவந்தால் ஏழாவது நாள் வேஸ்ட் டீகம்கரைசல் தயாராகிவிடும்.