Published:Updated:

இயற்கை வேளாண்மை 13 : வேம்பு... பயிரைக் காக்கும் போராளி!

இயற்கை வேளாண்மை
பிரீமியம் ஸ்டோரி
இயற்கை வேளாண்மை

ஆய்வுப் பார்வையும் அறிவியல் உண்மையும்!

இயற்கை வேளாண்மை 13 : வேம்பு... பயிரைக் காக்கும் போராளி!

ஆய்வுப் பார்வையும் அறிவியல் உண்மையும்!

Published:Updated:
இயற்கை வேளாண்மை
பிரீமியம் ஸ்டோரி
இயற்கை வேளாண்மை
யற்கை விவசாயத்தில் அதிக பயன்பாட்டில் உள்ள ஒரு பொருள் வேம்பு. வேப்ப எண்ணெய், வேப்பிலைக் கரைசல், வேப்பங்கொட்டை கரைசல் ஆகியவை பயிர் பாதுகாப்பில் செய்யும் நன்மைகள் ஏராளம். அவற்றைப் பற்றி இந்த இதழில் பார்க்கலாம்.
இயற்கை வேளாண்மை 13 : வேம்பு... பயிரைக் காக்கும் போராளி!

‘வேம்பு’ என்பது ஆங்கிலத்தில் ‘நீம்’ எனப்படுகிறது. ‘நிம்பா’ என்ற சமஸ்கிருத வார்த்தையிலிருந்து மருவிய ஆங்கில வார்த்தைதான் ‘நீம்’. ‘நிம்பா’ என்றால் ‘சர்வரோக நிவாரணி’ என்று பொருள். பல நூறு ஆண்டுகளுக்கு முன்பே வேம்பை மனிதர்கள் மருந்துப் பொருளாகப் பயன்படுத்த தொடங்கிவிட்டார்கள். முதன் முதலில் தோல் சம்பந்தப்பட்ட பிரச்னைகளுக்கு மேல் பூச்சாக வேம்பு பயன்படுத்தப்பட்டிருக்கிறது. மனிதர்களுக்குப் பயன்படுத்திய பிறகு, பயிர் பாதுகாப்பில் பயன்படுத்தத் தொடங்கினார்கள். தற்போது பயன்பாட்டில் உள்ள அனைத்துத் தாவரப் பூச்சிவிரட்டி கரைசல்களிலும் மனிதனுக்குச் சிறிதளவேனும் ஒவ்வாமை ஏற்படுத்தக்கூடிய ஒரு வேதிப்பொருள் இருக்கும். அது பூச்சிகளுக்கு எப்படி ஒவ்வாமை ஏற்படுத்துகிறதோ அதுபோல மனிதர்களுக்கும் ஒவ்வாமை ஏற்படுத்தும். ஆனால் தீங்கு விளைவிக்காது.

ஒட்டுமொத்த விகடனுக்கும் ஒரே ஷார்ட்கட்!

இயற்கை வேளாண்மை 13 : வேம்பு... பயிரைக் காக்கும் போராளி!

அந்த வகையில் பயிர்களுக்குப் பயன்படுத்தும் அனைத்து தாவரப் பூச்சிவிரட்டிகளிலும், மனிதனுக்கு வேதியியல்-ஒவ்வாமை ஏற்படுத்தாத ஒரு தாவரப் பொருள் உண்டென்றால் அது வேம்புதான். 99.89% நன்மை பயக்கும் செயல்கள்தான் மேலோங்கி நிற்கும். எஞ்சியுள்ளவை மனிதனுக்கு ஒவ்வாமை ஏற்படுத்தக்கூடிய வேதி நச்சு மிக மிகக் குறைந்த அளவுதான்(0.11%). ஆகவே வேம்பு மனிதனையும் பயிர்களையும் காக்கும் போராளித்தாவரம் என்றே சொல்லலாம். இதனுடைய தாவரவியல் பெயர் அசாடிராக்டா இண்டிகா (Azadirachta indica). பண்டைத்தமிழ் குடிகள் இதைக் ‘கிராமத்து மருந்தகம்’ என்று அழைத்தார்கள். ‘அசா’ என்றால் ‘சுதந்திரமான’ எனப் பொருள்படும். ‘டிராக்டா’ என்றால் மரம். ஆகவே வேம்புவை ‘சுதந்திர மரமாக’ப் பாவித்து, இந்தியக் கலாசாரங்களில் ஒன்றிணைந்து, இந்தியர்களால் விரும்பி வளர்க்கக்கூடிய மரமாக இன்றளவும் இருக்கிறது. இந்தியாவைத் தாயகமாகக்கொண்ட வேம்பிலிருந்து தயாரிக்கக்கூடிய பூச்சிவிரட்டிகள் மற்றும் இடுபொருள்கள் அனைத்தும் எளிதில் மட்கக்கூடியவை. சுற்றுச்சூழலுக்குப் பங்கம் விளைவிக்காதவை.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

வேம்பில், பயிர்களுக்குத் தீமை செய்யும் பூச்சிகளை விரட்டுவதற்கான இரண்டாம் நிலை வேதிப்பொருள்கள் இருக்கின்றன. அதிலும் வேப்பங்கொட்டையில்தான் இவை அதிகம். அடுத்ததாக, இலை. மூன்றாவது பூக்களில் இவை இருக்கும். பூச்சிவிரட்டிக்குக் காரணமான இரண்டாம் நிலை வேதிப்பொருள்கள் வேம்புவில் நூற்றுக்கும் மேற்பட்ட இரண்டாம் நிலை வேதிப்பொருள்கள் இருந்தாலும், அசாடிராக்டின், அசாடிராடோன், நிம்பின், நிம்பிடின், நிம்பினின், நிம்போலைட்ஸ், சொலானின், வேப்பினின், விலாசினின், பிளாஸிநெல்லோன் ஆகியவை பூச்சிகளின் ஆதிக்கத்தை வலுவிழக்கச்செய்யும் முக்கியமான வேதிக்கூறுகள். வேப்ப எண்ணெயில் இருக்கும் அமினோ அமிலங்கள் ஒலிக் அமிலம் 50 முதல் 60 சதவிகிதம், பால்மிட்டிக் அமிலம் 13 முதல் 15 சதவிகிதம், ஸ்டீரிக் அமிலம் 11 முதல் 12 சதவிகிதம், லினோலிக் அமிலம் 10 முதல் 12 சதவிகிதம், ஆக்ஸாசிடிக் அமிலம் 1 முதல் 3 சதவிகிதம். இவை அமினோ அமிலங்கள். இந்த அமினோ அமிலங்கள் மற்றும் ஏற்கெனவே சொன்ன இரண்டாம் நிலை வேதிப்பொருள்கள், இரண்டும் சேர்கிறபோது தீமை செய்யும் பூச்சிகளுக்கு எதிரான விரட்டக்கூடிய அல்லது பூச்சிகளின் செயல்பாட்டினை முடக்கக்கூடிய தன்மையைப் பயிர்களில் உருவாக்கிக்கொடுக்கும்.

இயற்கை வேளாண்மை 13 : வேம்பு... பயிரைக் காக்கும் போராளி!

இரண்டாம்நிலை வேதிப்பொருள்களின் செயல்பாடுகள்

பூச்சிகளின் உடலியல் உருமாற்றத்தில் ‘எக்டைசோன்-20-மோனோசைஜீனேஸ்’ என்ற என்சைம் முக்கியப் பங்காற்றுகிறது. இந்த என்சைம்தான் பூச்சிகள், புழுவிலிருந்து உருமாற்றம் பெற்று முதிர்பூச்சியாக மாற உதவும். இந்த உருமாற்ற நிகழ்வுகள் சரியாக இருந்தால் மட்டும்தான் பூச்சிகள் முழு உருவம் பெற்று, செடியில் சாற்றை உறுஞ்சியோ அல்லது கடித்து உண்டோ சேதாரம் ஏற்படுத்தும். மனிதர்கள் மனிதர்களாகப் பிறந்து விடுகிறோம். ஆனால் பூச்சிகள் அப்படி இல்லை. முட்டை, புழு (3-4 இன்ஸ்டார் நிலை), கூட்டுப்புழு, முதிர்பூச்சியென நான்கு பரிணாம நிலைகளில் உருமாற்றம் பெற வேண்டும். அந்த வளர்சிதை மாற்றத்தைச் சரியாகச் செயல்படுத்துவதுதான் இந்த என்சைம்களின் பணி.

வேம்பிலிருந்து தயாரிக்கக்கூடிய பூச்சிவிரட்டிகள் மற்றும் இடுபொருள் அனைத்தும் எளிதில் மட்கக்கூடியவை. சுற்றுச்சூழலுக்குப் பங்கம் விளைவிக்காதவை.

அசாடிராக்டின்

வேம்பில் உள்ள இரண்டாம்நிலை வேதிக்கூறான அசாடிராக்டின், மேற்சொன்ன இந்த என்சைமின் செயல்பாட்டை முடக்கி வைக்கிறது. அதனால் வளர்சிதை மாற்றங்கள் பாதிக்கப்படுகின்றன. இதனால் புழு அடுத்த நிலைக்குப் போக முடியாது. மேலும், பூச்சிகளின் இனப்பெருக்கம் மற்றும் முட்டையிடும் தன்மைக்குக் காரணமாக இருப்பது, பூச்சிகளின் உடலில் உருவாகும் ‘புரோதோராக்ஸிகோ ட்ராபிக்’ மற்றும் ‘அல்லாடோட்ராபின்ஸ்’ என்ற ஹார்மோன்கள். அசாடிராக்டின் இந்த ஹார்மோனைகளின் சுய உற்பத்தித் திறனைப் பூச்சிகளில் முடக்கி விடுகிறது. இந்த இரண்டு முக்கியமான விளைவுகள், அசாடிராக்டின் மூலமாக நடப்பதால் பூச்சிகளின் முட்டை இடும் திறன் குறையும். அப்படியே முட்டை பொரிந்தாலும் புழுவோடு நின்றுவிடும். புழு, பூச்சி எந்த நிலையிலிருந்தாலும் அசாடிராக்டினை நுகர்ந்தபிறகு அடுத்த நிலைக்குச் செல்ல முடியாது. அத்தனை வீரியமானது அசாடிராக்டின்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

சொலானின் மற்றும் மீலியான்ட்ரால்

இவை தவிர, ‘சொலானின்’ மற்றும் ‘மீலியான்ட்ரால்’ என்று இரு இரண்டாம்நிலை வேதிப்பொருளின் பணியானது, பூச்சிகள் செடியைக் கடிக்கவிடாமல் சோம்பேறித்தனத்தை உருவாக்கும். பூச்சிகளுக்குப் பிடிக்காத ஒவ்வாமை வாசனையைப் பயிரில் ஏற்படுத்தும். இதனால் பூச்சிகள் உண்பதை நிறுத்தும். கொடூர பசி இருந்தாலும் உணவெடுக்க வேண்டும் என்ற எண்ணம் பூச்சிகளுக்கு உருவாகாது.

இயற்கை வேளாண்மை
இயற்கை வேளாண்மை

நிம்பின் மற்றும் நிம்பிடின்

பொதுவாக வைரஸ் நோய்கள் சாறு உறிஞ்சும் பூச்சிகளால் பயிர்களுக்கு ஏற்படுகிறது. வேம்பில் உள்ள ‘நிம்பின்’ மற்றும் ‘நிம்பிடின்’ போன்ற இரண்டாம் நிலை வேதிக்கூறுகள்,

சாறு உறிஞ்சும் பூச்சிகள் ஒரு செடியிலிருந்து அடுத்த செடிக்கு வரும்போது, முதல் செடியில் இருக்கும் சில வைரஸ்களையும் கொண்டு வரும். ‘நிம்பின்’ மற்றும் ‘நிம்பிடின்’ வேதிப்பொருள்கள் பூச்சிகளின் உணவுத்தேடல் உணர்வை நிறுத்தி வைக்கும். அதனால் பூச்சிகள் மிகவும் சோர்ந்து போகும். அடுத்த பயிருக்குப் போனாலும் சோர்ந்து போய், செடியிலிருந்து சறுக்கி கீழே விழுந்துவிடும். இதன் மூலம் வைரஸ் பரவல் தடுக்கப்படுகிறது.

இயற்கை வேளாண்மை 13 : வேம்பு... பயிரைக் காக்கும் போராளி!

கோல்சைசின்

பூச்சிகளின் புழுக்கள் மெல்லிய மேல் தோலை விலக்கி, அடுத்த நிலைக்கு மாறும். இதைத் தடுக்கிறது ‘கோல்சைசின்’ என்ற இந்த இரண்டாம் நிலை வேதிப்பொருள். பொதுவாகப் புழுவின் உடல் மேற்புறம் சற்று ஈரப்பதமாக இருக்கும். புழு உடலைச் சுருக்கி, விரித்துத்தான் நகரும். இந்த வேதிப்பொருள், புழு உடலின் மேற்பகுதியை வறண்டதாக மாற்றிவிடும். அதனால் சுருங்கி விரிந்து நகர முடியாது. மேற்புற திசுக்கள் பிரிந்து, அடுத்த நிலைக்கு மாறும் நிகழ்வு தடுக்கப்படும். ஒருவேளை நம் கவனிப்பைத்தாண்டி புழுக்கள் முதிர்பூச்சிகள் நிலையை அடைந்திருந்தால், பறக்கும் தன்மையைப் பாதிக்கும். வேகத்தைக் குறைக்கும். வண்டு வகையான பூச்சிகள் புழு நிலையிலேயே நின்றுபோகும். சில வகைப்பூச்சிகளில் இறக்கை முளைப்பதற்கு முன்பாக, இளம் பூச்சியாக இருக்கும். அதனை ‘நிம்ப்’ என்பார்கள். இந்த வேதிப்பொருள், அந்த நிலையிலேயே அதன் வளர்ச்சியை, நிறுத்திவிடும். மொத்தத்தில் வேம்பின் இரண்டாம் நிலை வேதிக்கூறுகள் யாவும் விஷமாகச் செயல்பட்டு, புழு, பூச்சிகளைக் கொல்லாது. ஆனால், அவற்றின் செயல்பாட்டை முடக்கி, உணவு உண்ண முடியாமல், பறக்க முடியாமல், இனப்பெருக்கம் செய்ய முடியாமல் பல்வேறு சிக்கல்களைப் பூச்சிகளில் ஏற்படுத்திப் பயிரைக் காக்கும். வேப்பெண்ணெய் பயன்படுத்திய, 420 வகையான பூச்சிகளில் மேலே சொன்ன மாற்றங்கள் இருப்பது உலகம் முழுவதும் பல்வேறு ஆராய்ச்சிகளின் வாயிலாக உறுதிப்படுத்தப்பட்டுள்ளது.

ஆக, வேம்பில் உள்ள இந்த இரண்டாம்நிலை வேதிப்பொருள்கள்தான் முக்கியமானது. வேப்பிலை, பூ, விதை ஆகியவற்றில் உள்ள இரண்டாம் நிலை வேதிப்பொருள்களை முறையான தொழில்நுட்பங்களைப் பயன்படுத்தி அதன் மூலக்கரைசலைப் பிரித்தெடுத்துப் பயன்படுத்தினால்தான் முழுமையான பலன் கிடைக்கும். வேப்பெண்ணெய், வேப்பங்கொட்டை கரைசல், வேப்பிலைக் கரைசல் ஆகிய மூன்றும் இயற்கை விவசாயத்தில் முக்கியப் பங்கு வகிக்கின்றன. அவற்றைப் பற்றி அடுத்த இதழில் பார்ப்போம்.

-வளரும்

20 முதல் 50 கிலோ வேப்பங்கொட்டை

வேம்பு நட்ட 4-5 ஆண்டுகளில் பூப்பூக்கும். காய் தரும். முழுப் பலனை 10-12 ஆண்டுகளிலிருந்து கொடுக்கும். ஆரம்பக்காலத்தில் மரம் ஒன்றுக்கு 5-20 கிலோ வேப்பங்கொட்டை கிடைக்கும். நல்ல வளர்ச்சியடைந்த வேம்பு 12 வருடங்கள் கழித்து வருடத்திற்கு 35-50 கிலோ வேப்பங்கொட்டைகளைத் தரும். நன்கு உலர்ந்த ஒரு கிலோ வேப்பங்கொட்டையிலிருந்து 400-430 மி.லி வேப்ப எண்ணெய் கிடைக்கும். நிழலில் குளிர்ந்த பகுதிகளில் இருப்பு வைக்கலாம். சூடான இடத்தில் வைத்தால் பூச்சிவிரட்டி குணாதியங்களின் செயல்பாடு குறையும். வேம்பு மரங்கள் 150 முதல் 200 ஆண்டுகள்வரை நிறைவான பலனைத்தரும்.

வேம்பு வரலாறு

1919-ம் ஆண்டில்தான் வேம்பில் உள்ள இரண்டாம் நிலை வேதிப்பொருள்களின் பயன்பாடு கண்டுபிடிக்கப்பட்டது. மார்கோசிக் அமிலம் முதலில் கண்டறியப்பட்டது. 1930 முதல் இதைத்தவிரப் பூச்சிவிரட்டியாகப் பயன்படுத்தத் தொடங்கினார்கள். 1942-ல் நிம்பின், நிம்பிடின், நிம்பிநைன் பயன்பாடுகள்பற்றி ஆராய்ச்சிகள் விளக்கப்பட்டன.

1963-க்குப் பிறகுதான் அசாடிராக்டின் பயன்பாடு தெரிய வருகிறது. அதைத்தொடர்ந்து மீலியான்ட்ரால், சொலானின் பற்றிய ஆய்வு முடிவுகள் நல்ல செய்திகளைத் தந்தன. பட்டர் ஒர்த் மற்றும் மார்கன் ஆகியோர், 1968-ம் ஆண்டு ‘லண்டன்-வேதியியல் தகவல்தொடர்புகள்’ என்ற ஆராய்ச்சி இதழில் வெட்டுக்கிளிகளின் பாதிப்பிற்கு ஒரு தீர்வாக வேம்பு பொருள்களைப் பயன்படுத்தலாமெனப் பதிவு செய்திருக்கிறார்கள். மனிதர்களுக்கும் பங்கம் விளைவிக்காத, சுற்றுச்சூழலுக்கு உகந்த 21-ம் நூற்றாண்டின் சக்திவாய்ந்த பூச்சிவிரட்டியென 1989-ம் ஆண்டு உலக சுகாதார நிறுவனம் அறிவித்தது. இன்று உலகம் முழுவதும் பயன்படுத்தக்கூடிய பூச்சிவிரட்டியாக வேம்புக் கரைசல் இருக்கிறது. மொத்தத்தில் தீமை செய்யும் பூச்சிகளுக்கு எதிரி. நன்மை செய்யும் பூச்சிகளுக்கு நண்பன்.

தரிசு நிலங்களில் வேம்பு

து இந்தியாவைத் தாயகமாகக் கொண்ட பயிர். நமது சொத்து. உலகின் வளர்ந்த பநாடுகளில் குறிப்பாக வெப்ப மண்டல நாடுகளில், பயன்பாட்டுக்கு இல்லாத நிலங்களில் வேம்பு பயிர் செய்யும் முறையைக் கையாளத் தொடங்கிவிட்டார்கள். ஆனால் இந்தியாவில் நிறைய நிலங்கள் தரிசாகக் கிடக்கின்றன. குறைந்தபட்சம் அதில் வேம்பை நடவு செய்யலாம். இதனால் கிராமப்புற பொருளாதாரம் உயரும். புவி வெப்பமயமாதல், புற ஊதாக் கதிர்களின் தாக்குதல்களிலிருந்து மனித இனம் ஓரளவு தற்காத்துக்கொள்ளத் தரிசு நிலங்களில் வேம்பு பயிரிட வேண்டும் என உலக சுகாதார நிறுவனம் பரிந்துரைக்கிறது. ஒரு சதுரமீட்டரில், ஒரு நொடிக்கு 14 மைக்ரோ கார்பன்-டை-ஆக்சைடை வேம்பு உள்ளிழுக்கிறது. உலகநாடுகள் இதன் பயனைப் புரிந்துகொண்டு பயன்படுத்துகின்றன.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism