Published:Updated:

இயற்கை வேளாண்மை : 9 - நல்ல மகசூலுக்கு உதவும் உயிர் உரங்கள்!

இயற்கை வேளாண்மை
பிரீமியம் ஸ்டோரி
இயற்கை வேளாண்மை

ஆய்வுப் பார்வையும் அறிவியல் உண்மையும்!

இயற்கை வேளாண்மை : 9 - நல்ல மகசூலுக்கு உதவும் உயிர் உரங்கள்!

ஆய்வுப் பார்வையும் அறிவியல் உண்மையும்!

Published:Updated:
இயற்கை வேளாண்மை
பிரீமியம் ஸ்டோரி
இயற்கை வேளாண்மை
யிர் உரங்கள் என்பது மண்ணில் இருக்கும் உரங்களை நுண்ணுயிரிகளின் சக்திகளால் பயிரின் வளர்ச்சிக்கும் மகசூல் பெருக்கத்துக்கும் உதவிடும் ஆற்றல் சக்திகள்.

மண்ணில் எந்த உரங்களை இட்டாலும் அதைப் பயிர்கள் எடுத்துக்கொள்ளும் வகையில் மாற்றிக் கொடுக்கும் வேலையைச் செய்யும் ஊடகம். மண்ணின் வளத்தை அதிகப்படுத்தக்கூடிய உயிர்சக்தி உரங்கள், நுண்ணுயிர்களை அடிப்படையாகக்கொண்ட உரங்கள் என்பதால் ‘உயிர் உரங்கள்’ என்று அழைக்கப்படுகிறது.

இயற்கை வேளாண்மை : 9 - நல்ல மகசூலுக்கு உதவும் உயிர் உரங்கள்!

ஒட்டுமொத்த விகடனுக்கும் ஒரே ஷார்ட்கட்!

உயிர் உரங்கள் எனச் சொல்லப்பட்டாலும், இவை பயிர்களுக்கு மட்டுமல்லாது மண்ணில் பல்வேறு நன்மைகளைச் செய்யும் நுண்ணுயிர்களின் தொகுப்பு. பொதுவாக, மண்ணில் இடும் உரங்கள், அந்தப் பயிருக்கான வளர்ச்சியை மட்டுமே கொடுக்கும். ஆனால், உயிர் உரங்கள், பயிர் வளர்ச்சி, மண்வளம், நோய்த் தடுப்பு எனப் பல வகைகளிலும் பயன்படுகிறது. இவற்றை வேதியியல் உரங்களைப் போல, நேரடியாகப் பயிகளுக்கான பயன் என்பதைவிட, நாம் மண்ணில் இடும் உரம் எதுவாயினும் அவை பயிர்களுக்குக் கிடைக்கும் வண்ணம் செய்யும் அற்புத நுண்ணுயிரிகள்.

பரிந்துரைக்கப்பட்ட அளவைவிட அதிகளவு ரசாயனங்களைப் பயன்படுத்துவதால் மண்ணின் கட்டமைப்புச் சிதைக்கப்படும். அப்படிச் சிதைந்துபோயுள்ள மண்ணில் உயிர் உரங்களைப் பயன்படுத்துவதால் எதிர்பார்த்த பலன் கிடைக்காது. உயிர் உரங்களில் உள்ளவை நுண்ணுயிர்கள் என்பதால், அவை வாழ மண்ணின் கட்டமைப்பு ஓரளவுக்காவது சீராக இருக்க வேண்டும். தொடர்ச்சியாக இயற்கை உரங்களிட்டு மண்ணின் அங்கக கரிமச்சத்தை வளப்படுத்தியுள்ள நிலங்களில் உயிர் உரங்களை இட்டால் பயிர் வளர்ச்சி, மகசூல் என அனைத்தும் விவசாயிகளின் வருவாய்க்கு வித்திடும். மண்ணை வளமாக்கும் நுண்ணுயிர்களைக் கலவையாக்கி, திட வடிவிலோ, திரவ வடிவிலோ கொடுப்பதுதான் உயிர் உரங்கள்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer
இயற்கை வேளாண்மை
இயற்கை வேளாண்மை

இயற்கையாகவே மண்ணில் நிறைய சத்துகள் இருக்கின்றன. ஆனால், அவை பயிர் எடுத்துக் கொள்ளும் வகையில் இருக்காது. பயிர் ஒரு பக்கம், சத்து ஒரு பக்கம் இருக்கும். அதனால் பெரிய பயன் இருக்காது. அந்த இடத்தில் உயிர் உரங்கள் இடும்போது, சத்துகளைப் பயிர்கள் எடுக்கும் வகையில் மாற்றித் தருகின்றன. பயிர் மற்றும் சத்துகளுக்கு இடையிலான இடைவெளியை நிரப்புவதுதான் உயிர் உரங்களின் முக்கியப் பணி. பொதுவாகக் காற்றில் உள்ள தழைச்சத்து மற்றும் மண்ணில் உள்ள தழை மற்றும் மணிச்சத்து பயிர் எடுக்க முடியாத நிலையில் இருக்கும். நாம் எவ்வளவுதான் உரங்களைப் போட்டாலும், பயிர்களால் அதை எடுத்துக்கொள்ள முடியாது. அந்த உரங்களைக் கரைத்து அல்லது இடம்பெயரச்செய்து பயிர்களுக்குக் கொடுக்கக்கூடிய இந்த நன்மை செய் நுண்ணுயிரிகளான, பாக்டீரியாக்கள் மற்றும் பூஞ்சைகள் மண்ணிலிருந்தால்தான் உரத்துக்கான பலன் கிடைக்கும். ஆகவே, இவற்றை அடிப்படையாகக்கொண்ட உயிர் உரங்களை இடுவது இயற்கை வேளாண்மைக்கு மிக மிக அவசியம். உயிர் உரங்களை நான்கு வகைகளாகப் பிரிக்கலாம். பாக்டீரியாக்களை அடிப்படையாகக் கொண்டவை; பூஞ்சைகளை அடிப்படையாகக் கொண்டவை; பாசிகளை அடிப்படையாகக் கொண்டவை; அங்கக கரிமத்தை அடிப்படையாகக் கொண்டவை. ரைசோபியம், அனபீனா, அசிட்டோபாக்டர், அனபீனா நாஸ்டாக், கிளாஸ்டிரிடியம், அசோஸ்பைரில்லம் போன்றவை பாக்டீரியாக்களை அடிப்படையாகக் கொண்ட உயிர் உரங்களாகப் பயன்படுத்தப்பட்டு வருகின்றன. ரைசோபியம் மற்றும் அனபீனா மண்ணில் உரம் போட்டபிறகு இணைந்து வாழக் கூடியவை. இவை காற்றில் இருக்கக்கூடிய தழைச்சத்தை மண்ணில் நிலைநிறுத்தும். அனபீனா நாஸ்டாக், கிளாஸ்டிரிடியம் போன்றவை தனித்து வாழக் கூடியவை. மேலும் இவை தழைச்சத்தை மண்ணில் நிலை நிறுத்தக்கூடிய உயிர் உரங்கள். அசோஸ்பைரில்லம் கூடி இணைந்து வாழ்ந்து வளிமண்டல தழைச்சத்தைப் பயிர்களுக்குக் கிடைக்கச்செய்யும். இவற்றைத் தவிர, மண்ணில் உள்ள மணிச்சத்தைப் பயிர்கள் எடுத்துக்கொள்ளும் வகையில் கரைத்துக்கொடுக்கும் பாக்டீரியாக்களான சூடோமோனஸ் ஸ்ட்ரையேட்டா, பேசில்லஸ் மெக்காடிரியம், பேசிலஸ் சப்டிலிஸ் மற்றும் சர்குலன்ஸ் ஆகியவை மண்ணில் மணிச்சத்தை நிலை நிறுத்தக்கூடிய பாக்டீரியா உயிர் உரங்கள். மேற்கூறிய அனைத்தும் பாக்டீரியாக்களை அடிப்படையாகக் கொண்ட உயிர் உரங்களாகும். பூஞ்சைகளை அடிப்படையாகக் கொண்ட உயிர் உரங்கள். வேம் என்று சொல்லப்படும் வாஸ்குலார் ஆர்பஸ்குலார் மைக்கோரைசா. வேம் வகையில் குலோமஸ், ஸ்கிளிரோசிஸ்டிஸ், அக்ஃலோஸ்போரா பூஞ்சைகள் முக்கியமானவை. எக்ஃடோமைக்கோரைஷா உயிர் உர வகையில், அமானிட்டா, போலிடஸ், லக்காரியா, பிசோலித்தஸ் ஆகியவை வெளிப்பகுதியில் ஒட்டி வாழும் பூஞ்சைகள். இவை தவிர ரைசக்டோனியா சொலானி என்னும் பூஞ்சையானது ஆர்க்கிட் மைக்கோரைசா என்னும் உயிர் உர வகையையும், பிஸிஷெல்லா எரிகே பூஞ்சைகள் எரிகாய்ட்மைக்ரிசா என்னும் உயிர் உர வகையையும் சேர்ந்தது. இவை மண்ணில் பயிர்களுக்குக் கிடைக்கா வண்ணம் இருக்கும் மணிச்சத்தை இடம்பெயரச்செய்து பயிர்களின் தூருக்கும் வேருக்கும் கிடைக்கச்செய்யும் பூஞ்சைகளை அடிப்படையாகக் கொண்ட உயிர் உரங்களாகும். இவை தவிர, அஸ்பெர்ஜிலல்லஸ் அவாமோரி மற்றும் பெனிசிலியம் ஆகிய பூஞ்சைகள் மண்ணில் பயிர்களுக்கு இருக்கும் மணிச்சத்தைக் கரைத்து பயிர்களுக்குக் கிடைக்கச்செய்யும். பாசிகளை அடிப்படையாகக் கொண்ட உயிர் உரங்கள். நீலப் பச்சைப்பாசி மற்றும் அசோலா ஆகியவை பாசிகளை அடிப்படையாகக் கொண்டவை. அங்கக கரிமத்தை அடிப்படையாகக்கொண்ட உயிர் உரங்கள். இதில் டிரைக்கோடெர்மா, செல்லுலோமோனஸ் ஆகியவை செல்லுலோலைடிக் மட்கும் வகை உயிர் உரத்தையும், அகாரிகஸ், ஆர்த்தோ ஃபேக்டர் ஆகியவை லிக்னோலைட்டிக் என்னும் மட்கும் வகை உயிர் உரத்தையும் சேர்ந்தவை.

இவை அங்கக பொருள்களை மட்க வைக்கக்கூடிய உயிர் உரங்கள். பல நேரங்களில் துத்தநாகம் மற்றும் சிலிக்கேட் நுண்ணூட்டச்சத்துகள் மண்ணிலிருந்தும் பயிர்களுக்குக் கிடைக்காது. பேசில்லஸ் என்னும் பாக்டீரியா இந்த நுண்ணூட்டச்சத்துகளைக் கரைத்து பயிர்களுக்கு வழங்க வல்லது. உயிர் உரங்களின் பயன்கள் விதைநேர்த்தி, மண்ணில் இடுதல், பயிர்களின் மேல் தெளித்தல் போன்ற மூன்று வகைகளில் பயன்படுத்தலாம். குறைந்த செலவில், காற்றில் இருக்கும் தழைச்சத்து மண்ணில் நிலைநிறுத்தப்படும். மண்ணில் இருக்கும் தழைச்சத்தைப் பயிர்கள் எடுத்துக்கொள்ள உதவியாக இருக்கும். மண்ணில் உள்ள அனைத்து சத்துகளையும் எடுத்துக்கொள்ள உதவும். மண்ணில் அங்கக கரிமத்தை அதிகரித்து, உள்கட்டமைப்பைச் சீராக்கும். பயிர் வளர்ச்சிக்கு உதவும். இவை, ஆரோக்கியமான மண்ணை உருவாக்கும் பணியைச் செய்கின்றன. பயிரின் வளர்ச்சி, பூக்கும் திறன், காய்க்கும் திறன், மகசூல் ஆகிய அனைத்துக்கும் உதவி செய்கின்றன.

இயற்கை வேளாண்மை
இயற்கை வேளாண்மை

உயிர் உரங்கள்மூலம் நுண்ணுயிரிகள் மண்ணில் வளர வளர, மண்ணில் இயற்கையாக இருக்கும் பயிரின் வேர்ப் பகுதியில் நோய் உண்டாக்கும் நுண்ணுயிரிகளின் வளர்ச்சி குறைந்துபோகும். உதாரணமாகச் சூடோமோனஸ் மற்றும் டிரைக்கோடெர்மா மண்ணில் இட்டால், வேர் வளரும் பகுதிகளைச்சுற்றி இந்த நன்மை செய்யும் நுண்ணுயிர்கள் பன்மடங்கு பெருகி, வேரழுகல் நோயை ஏற்படுத்தும் தீமை செய்யும் நுண்ணுயிர்களின் பல்கிப்பெருகும் வேகத்தைக் குறைத்து வேரழுகளிலிருந்து காக்கும். பயிர்களில் இயற்கையாகவே சுரக்கும் வளர்ச்சி ஹார்மோன்களின் உற்பத்தி வேகத்தைத் துரிதப்படுத்தும். பயிர்களில் நோய் எதிர்ப்பு சக்தியையும் உருவாக்குகின்றன. இப்படிப் பலவகையான காரணிகளால் மகசூல் அதிகரிக்கிறது. இந்த உயிர் உரங்கள் இடுவதால் எந்தப் பக்கவிளைவுகளும் இல்லை.

இயற்கை வேளாண்மை
இயற்கை வேளாண்மை

தற்போதைய நமது செயற்கை விவசாயத்தின் ரசாயனங்களால் மண்ணின் கட்டமைப்புச் சிதையும்போது, அதைப் பாதுகாக்கும் வேலையையும் இவை செய்கின்றன. தொடர் பயன்பாட்டில் 10 முதல் 20 சதவிகிதம் மகசூல் அதிகரித்துள்ளதை பல்வேறு ஆய்வுகள் உறுதி செய்துள்ளன. குறைந்த செலவில் நிறைவான பலன் கொடுக்கக்கூடியவை உயிர் உரங்கள்.

இயற்கை வேளாண்மை
இயற்கை வேளாண்மை

ரைசோபியம், அசோஸ்பைரில்லம், அசிட்டோபாக்டர், பாஸ்போபாக்டீரியா போன்ற நுண்ணுயிர் உரங்களையும், சூடோமோனஸ், டிரைக்கோடெர்மா போன்ற நுண்ணுயிர் நோய் எதிர்ப்பு கலவைகளையும் ஒவ்வொரு பயிருக்கும் பயன்படுத்தினால், தரமான நிறைவான மகசூல் கிடைக்கும்.

- வளரும்

உயிர் உரத்தின் வரலாறு!

லகின் முதல் உயிர் உரம் ரைசோபியம். 1679-ல் ஜெர்மனியைச் சேர்ந்த மால்பீஜி என்ற அறிஞர், பயறு வகை பயிர்களில் வேர்முடிச்சைக் கண்டறிந்தார். ஆனால், அது பூச்சிகளின் முட்டை அல்லது ஒட்டுண்ணி எனப் பதிவு செய்தார். பிறகு, 1888-ல் ஜெர்மனியின் ஹெல்மேன் ஹெல்ரீகல் என்ற அறிஞர், பயறுவகை பயிர் வேர்முடிச்சானது காற்றிலுள்ள தழைச்சத்தை மண்ணில் நிலை நிறுத்துவதைப் பதிவு செய்தார். அதே 1888-ல் டச்சு (ஹாலந்து) நாட்டைச்சேர்ந்த மார்ட்டினஸ் பீஜெர்னக் என்ற நுண்ணுயிரி ஆராய்ச்சியாளர், வேர்முடிச்சுகளில் இருப்பது ரைசோபியம் எனப் பதிவு செய்தார். அவர் ஒரு தாவரவியலாளரும்கூட. தாவரங்களில் இருக்கக்கூடிய வேர் முடிச்சுகளில் இப்படியோர் ஆற்றல் இருக்கிறது. வேர் முடிச்சுகள்மூலம், பக்கத்தில் உள்ள செடிகளுக்கும் பயன் இருக்கிறது எனக் கண்டுபிடித்தார். இந்த அறிவியல் உண்மை தெரிவதற்கு முன்பே, வேர்முடிச்சுப் பயிர்களைச் சாகுபடி செய்த மண்ணை எடுத்து, வேறு இடத்திலிருந்த பயிருக்குக் கொடுத்து வந்த பழக்கம் நடைமுறையிலிருந்தது. மார்ட்டினஸ், வேர்முடிச்சுகளிலிருந்த ரைசோபியத்தைப் பிரித்து எடுத்தார். 1895-ம் ஆண்டுதான் இது விவசாயப் பயன்பாட்டுக்கு வந்தது. நோபிள் மற்றும் ஹில்ட்னர் என்ற இருவரும்தான், வேர் முடிச்சுகளிலிருந்து நைட்ராஜின் என்ற மூலக்கூற்றைப் பிரித்து, ரைசோபியத்தை வணிகரீதியாக உருவாக்கினார்கள். 1901-ம் ஆண்டு மார்ட்டினஸ் பீஜெர்னகால் கண்டுபிடிக்கப்பட்டது அசிட்டோபாக்டர். பிறகு, 1930-ம் ஆண்டு ரஷ்யா விஞ்ஞானிகளால் அசிட்டோபாக்டர் மற்றும் நீலப் பச்சைப்பாசி இரண்டும் வணிகரீதியாக்கப் புழக்கத்துக்குக் கொண்டு வரப்பட்டது. 1930-ல் கிழக்கு ஐரோப்பிய, பாஸ்போபாக்டீரியா வணிகத்திற்குக் கொண்டு வந்தது. 1956-ம் ஆண்டுதான் இந்தியாவில் முதல் உயிர் உரம் அறிமுகப்படுத்தப்பட்டது. ரைசோபியம் என்ற உயிர் உரத்தை ஐ.ஏ.ஆர்.ஐ மூலம் கொண்டு வந்தார்கள்.

உயிர் உரங்களுக்கான ஊடகம்!

ன்மை செய்யும் நுண்ணுயிர்களை ஓர் ஊடகத்தில் சேர்க்கிறார்கள். அந்த ஊடகம், நுண்ணுயிர் நீண்ட நாள் வாழ ஏற்றதாக இருக்க வேண்டும். பீட், லிக்னைட் பவுடர், வெர்மிகுலேட் பவுடர், அரிசி, கோதுமை தவிடு, ராக்பாஸ்பேட் எனப் பலவற்றை ஊடகமாகப் பயன்படுத்தலாம். திரவ உயிர் உரங்களுக்கும் பல்வேறு ஊடகங்கள் பயன்படுத்தப்படுகின்றன.

ரைசோபியம்!

ண்ணில் இருக்கக்கூடிய பாக்டீரியாக்களை எடுத்து ஓர் ஊடகத்தில் வளர்த்து உருவாக்கியதுதான் ரைசோபியம். உளுந்து போன்ற பயறு வகைப்பயிர்களின் வேர் முடிச்சுப் பகுதியில் வாழக்கூடிய பாக்டீரியாக்கள் மண்ணில் தழைச்சத்தை நிலைநிறுத்துபவை. அந்தப் பாக்டீரியாக்கள் மூலம் தயாரிக்கப்படும் வீரியமான உயிர் உரம்தான் ரைசோபியம். இதுதான் முதன் முதலில் கண்டுபிடிக்கப்பட்ட உயிர் உரம். பயன்பாட்டில் அதிகம் இருக்கக்கூடியது.

அசிட்டோபாக்டர்

து ஒரு கிராம் அங்கக கரிமத்தில் 2 முதல் 15 மில்லி கிராம் தழைச்சத்தை நிலைநிறுத்துகிறது.

அசோஸ்பைரில்லம்

து தழைச்சத்தை நிலைநிறுத்துவதுடன், சுற்றுச்சூழலைத் தாங்கி வளரும் ஆற்றலைப் பயிருக்குக் கொடுக்கிறது. வெயில், மழை, வறட்சியென அனைத்து சூழ்நிலைக்கும் ஒரு பயிர் தாங்கி வளரக்கூடிய தன்மையை இது கொடுக்கிறது. இன்டோல் அசிட்டிக் அமிலம் என்ற ஒரு ஹார்மோன் பயிரில் உற்பத்தியாகும். அது பயிர் வளர்ச்சிக்குத் தேவையான ஆக்ஸின் ஹார்மோனைச் செடி சுயமாகச் சுரக்கத் தூண்டும். அதைச் சில நேரங்களில் உற்பத்தி செய்ய முடியாமல் பயிர் திணறிக் கொண்டிருக்கும். அசோஸ்பைரில்லம் மண்ணில் இட்டால், அது, பயிர் அந்த ஹார்மோனை உற்பத்தி செய்ய உதவியாக இருக்கும்.

நீலப் பச்சைப்பாசி மற்றும் அசோலா

தில் நீலப் பச்சைப்பாசி, ஒரு ஹெக்டேர் நிலத்தில் 10 முதல் 20 கிலோ தழைச்சத்தை மண்ணில் நிலைநிறுத்தும். அசோலா 40 முதல் 60 கிலோ வரை நிலைநிறுத்தும். நாம் அசோலாவைத் தீவனமாகப் பயன்படுத்துகிறோம். ஆனால், அதுவும் காற்றில் உள்ள தழைச்சத்தைச் சிறியளவில் மண்ணில் நிலைநிறுத்துகிறது. அசோலாவை மண்ணில் இட்டால், அது மட்கி, அதன் மூலமும் தழைச்சத்து மண்ணுக்குக் கிடைக்கும்.

மண்புழுக்கள் அல்ல... நுண்ணுயிர்கள்!

டந்த இதழில் ‘மண்ணை விரைவில் வளமாக்கும் மண்புழு உரம்’ என்ற தலைப்பில் வெளியான தொடர் கட்டுரையில், ‘மண்புழு உரம் போட்ட இடங்களில் 20 சதவிகிதம் அதிக அளவில் நுண்ணுயிர்கள் பெருகியது நிரூபிக்கப்பட்டிருக்கிறது. உதாரணமாக நிலத்தில் சுமார் 1000 நுண்ணுயிர்கள் இருந்தால் மண்புழு உரம் இட்ட நிலங்களில் 20,000 மண்புழுக்கள் இருக்கும்’ என அச்சாகியிருந்தது. மண்புழு உரம் இட்ட நிலங்களில் 20,000 நுண்ணுயிர்கள் இருக்கும் என்பதற்குப் பதிலாக 20,000 மண்புழுக்கள் எனத் தவறாக இடம்பெற்றுவிட்டது.

பயன்படுத்தும் முறை விதைநேர்த்தி

200 மி.லி அரிசி வடிகஞ்சியில், ஒரு ஹெக்டேருக்கு தேவையான விதைகளைக் கலந்துகொள்ள வேண்டும். அதில் 200 கிராம் உயிர் உர பவுடரைத் தூவிக் கலந்து, 30 நிமிடங்கள் நிழலில் உலர்த்தி விதைக்க வேண்டும். விதைநேர்த்தி செய்த 24 மணி நேரத்தில் விதைத்து விட வேண்டும். 200 கிராம் உயிர் உரத்தை 10 கிலோ விதைக்குப் பயன்படுத்தலாம்.

நாற்றுகளை நேர்த்தி செய்வதற்கு, ஒரு ஹெக்டேர் நாற்றுகளுக்கு, 1 கிலோ உயிர் உரத்தை, 4-5 லிட்டர் நீரில் கலந்து, அதில் நாற்றின் வேர் அடித்தண்டு பகுதி 5 முதல் 10 நிமிடங்கள் வரை முக்கி எடுத்துப் பயன்படுத்த வேண்டும். நேரடியாக மண்ணில் உயிர் உரங்களைப் பயன்படுத்த 200 கிலோ தொழுவுரத்தில், 4 கிலோ உயிர் உரங்களைக் கலந்துகொள்ள வேண்டும். இதை 12 மணி நேரம் வைத்திருந்து மண்ணில் பயன்படுத்தலாம். மற்ற உரங்களைப்போலப் பல மாதங்கள் வைத்துப் பயன்படுத்த முடியாது.

உயிர் உரங்களை வாங்கும்போது, காலாவதி தேதியைப் பார்த்து வாங்க வேண்டும். வெயிலில் வைக்கக் கூடாது. திரவ உயிர் உரத்தை அதிக நாள்கள் வைத்திருக்கலாம். திரவ உரத்தை இலைவழித் தெளிப்புக்கு அதிகம் பயன்படுத்துகிறார்கள்.