Published:Updated:

சிறைச்சாலையில் விளையும் இயற்கைக் காய்கறிகள்!

சங்கர், சண்முகசுந்தரம்
பிரீமியம் ஸ்டோரி
News
சங்கர், சண்முகசுந்தரம்

முயற்சி

‘விவசாயம்தான் எங்களின் சந்தோஷத்தை மீட்டுத் தந்திருக்கிறது.

அதிலும், இயற்கை விவசாயத்தில் மகசூலைப் பார்க்கும்போது நாங்கள் அடையும் சந்தோஷத்தை வார்த்தைகளால் சொல்லவே முடியாது’ ஒருமித்த குரலில் சொல்கிறார்கள் திருச்சி மத்திய சிறைச்சாலைச் சிறைவாசிகள்.

வெங்காயம் காயவைக்கும் பணியில் சிறைவாசிகள்
வெங்காயம் காயவைக்கும் பணியில் சிறைவாசிகள்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

திருச்சி சுப்பிரமணியபுரம் பகுதியில் அமைந்திருக்கிறது திருச்சி மத்திய சிறைச்சாலை. சுமார் 250 ஏக்கரில் அமைந்திருக்கும் சிறைச்சாலையைச் சுற்றி சுமார் 100 ஏக்கர் விவசாய நிலங்கள் முட்கள் முளைத்து, புதர் மண்டிக்கிடந்தன. அவற்றைத் திருத்தி, சுமார் 25 ஏக்கரில் இயற்கை விவசாயம் மூலம் வாழை, செங்கரும்பு, சின்ன வெங்காயம், சோளம், கம்பு, எள் உள்ளிட்ட பயிர்களைச் சாகுபடி செய்கிறார்கள் சிறைவாசிகள். மேலும், ஆடு, மாடு, கோழி மற்றும் மீன் வளர்ப்பு என ஒருங்கிணைந்த பண்ணையம் அமைத்திருக்கிறார்கள்.

திருச்சி மத்திய மண்டல சிறைத்துறை டி.ஐ.ஜி சண்முகசுந்தரம் மற்றும் சிறைக் கண்காணிப்பாளர் சங்கர் ஆகியோருடன் அந்த விவசாய நிலங்களைப் பார்வையிட்டோம்.

சிறைச்சாலையில் விளையும் இயற்கைக் காய்கறிகள்!

“கடந்த வருடத்தைவிட இந்த முறை சின்ன வெங்காயம், செங்கரும்பு இரண்டிலும் நல்ல மகசூல் கிடைத்திருக்கிறது’’ என்று முகம் மலரப் பேச ஆரம்பித்தார் டி.ஐ.ஜி சண்முகசுந்தரம்.

“சினிமாவில் பார்ப்பதுபோல் அல்லாமல் சிறைக்குள் நல்ல, ஆரோக்கியமான சூழலை உருவாக்கத் தொடர்ந்து முயன்றுவருகிறோம். அதன் தொடர்ச்சிதான் இயற்கை விவசாயம். தற்போது தமிழக அரசு அனைத்து மத்திய சிறைகளிலும் திறந்தவெளித் தோட்டம் அமைக்க உத்தரவிட்டிருக்கிறது. மேலும், `சிறைவாசிகளை வெளியிலெடுத்து அவர்களுக்குத் தோட்ட வேலை வழங்கலாம்’ என்று சிறைத்துறை ஆணை பிறப்பித்துள்ளது. அதன் அடிப்படையில், நன்னடத்தையுள்ள சிறைவாசிகளை இந்தப் பணிகளில் ஈடுபடுத்துகிறோம். விளைபொருள் விற்பனை மூலம் கிடைக்கும் தொகையில் 40 சதவிகிதம் சிறையின் நலத்திட்டங்களுக்கும், 40 சதவிகிதம் சிறை நிர்வாகச் செலவினங்களுக்கும், 20 சதவிகிதம் வேலை செய்யும் சிறைவாசிகளின் ஊதியத்துக்கும் வழங்கப்படுகின்றன.

பசுமை விகடன் மூலம் இயற்கை வேளாண் விஞ்ஞானி நம்மாழ்வார், சிறைவாசிகளுக்கு பயிற்சி கொடுத்தார். ஒரு நாள் வேலை செய்தால், தண்டனைக் கைதிகளின் தண்டனை ஒரு நாள் கழிக்கப்படும்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

சிறைவாசிகள், தாங்கள் சிறைச்சாலையில் இருக்கிறோம் என்ற உணர்வில்லாமல், ஊரில் இருப்பதாக நினைத்து வேலை செய்கிறார்கள். மேலும், திறந்தவெளித் தோட்டத்தில் ஒரு நாள் வேலை செய்தால், தண்டனைக் கைதிகளின் தண்டனை ஒரு நாள் கழிக்கப்படும் என்பதால் இன்னும் ஆர்வமாகவும், மிகுந்த ஈடுபாட்டுடனும் பணியாற்றுகிறார்கள். இதனால் சிறைக்குள் பல்வேறு பிரச்னைகள் குறைந்திருக்கின்றன.

முயல்கள்
முயல்கள்

நாங்கள் விளைவிக்கும் காய்கறிகளை சிறைவாசிகளுக்கான உணவு தயாரிக்கப் பயன்படுத்திக்கொள்கிறோம். இதனால் உணவுப் பொருள் வாங்கும் செலவு குறைந்திருக்கிறது. முன்பைவிடக் கூடுதலாகக் காய்கறிகளைப் பயன்படுத்துகிறோம். `இயற்கையான காய்கறியை உண்கிறோம்’ என்ற உணர்வுடன் அரசின் பணத்தையும் மிச்சப்படுத்தி வருகிறோம்.

14 வருடங்களுக்கு முன்னர் பசுமை விகடன் மூலம் இயற்கை வேளாண் விஞ்ஞானி நம்மாழ்வாரை அழைத்து வந்து சிறைவாசிகளுக்கு மண்புழு உரம் தயாரித்தல், இயற்கை விவசாயம் ஆகியவை குறித்த பயிற்சிகள் வழங்கப்பட்டன. அடுத்தடுத்து சிறைவாசிகள் விடுதலை ஆனதால் நடுவில் தொய்வு ஏற்பட்டது. ஆனாலும், இயற்கை விவசாயத்தை முன்னெடுப்பதற்கான முயற்சிகள் குறையவே இல்லை.

உழவுப் பணியை மேற்பார்வையிடுதல்
உழவுப் பணியை மேற்பார்வையிடுதல்

ஒருங்கிணைந்த பண்ணையம் அமைக்கும் முயற்சியில் ஆரம்பத்தில் நிறையச் சிக்கல்களைச் சந்தித்தோம். சிறைவாசிகள் சிலரே, ‘இதெல்லாம் ஒத்துவருமா’ என்று கேட்டார்கள். அவர்களுக்கு பதில் சொல்ல வேண்டிய கட்டாயத்தில் இது குறித்துத் தேடியபோது மீண்டும் எங்களுக்குப் பசுமை விகடன் உதவியாக இருந்தது. பசுமை விகடன் இதழ்களை வாங்கி வந்து சிறைவாசிகளிடம் கொடுத்துப் படிக்க வைத்தோம். அதன் பிறகே அவர்களுக்கு இயற்கை விவசாயம் மீது நம்பிக்கை வந்தது. தொடர்ந்து, பசுமை விகடனில் வெளியாகும் முன்னோடி விவசாயிகளின் அனுபவங்களை முன்மாதிரியாகக் கொண்டு விவசாயம் செய்ய ஆரம்பித்தோம். அந்த வகையில் பஞ்சகவ்யா, அமுதக் கரைசல் உள்ளிட்டவற்றை நாங்களே தயாரித்தோம். அவற்றோடு அசோலாவையும் தயாரித்தோம்” என்றார்.

ஆடுகள்
ஆடுகள்

தொடர்ந்து பேசிய கண்காணிப்பாளர் சங்கர், “எங்களின் இடைவிடாத முயற்சியின் மூலம் இரண்டு ஏக்கரில் வாழையும், எட்டு ஏக்கரில் 900 மா மரங்களும், முந்திரி, ஆரஞ்சு, சாத்துக்குடி, கொய்யா, சப்போட்டா, எலுமிச்சை, சீத்தா, நெல்லி, முருங்கை, தென்னை, தேக்கு உள்ளிட்ட மரங்களும், கத்திரி, தக்காளி, பச்சை மிளகாய், உளுந்து, வெண்டை, புடலை, மரவள்ளிக்கிழங்கு, அவரை உள்ளிட்ட காய்கறிகளும் பயிரிட்டிருக்கிறோம்.

அதுமட்டுமல்லாமல் மலைப்பகுதிகளில் மட்டுமே பயிரிடப்படும் பீட்ரூட், கேரட் உள்ளிட்ட காய்கறிகளை தலா 10 சென்ட் நிலத்தில் பயிரிட்டிருக்கிறோம். அதுவும் நல்ல முறையில் வளர்ந்திருக்கிறது. அடுத்த வருடம் பீட்ரூட், கேரட் கூடுதலாகப் பயிரிடவிருக்கிறோம்.

‘‘கடந்த அக்டோபர் மாதம் முதல் மரம் வளர்ப்பதை ஊக்குவிக்கும் வகையில் சிறையிலிருந்து விடுதலையாகிப் போகிறவர்களுக்கும், முதல் தடவை சிறைக்கு வந்து செல்பவர்களுக்கும் மரக்கன்றுகள் வழங்கி வருகிறோம்.’’

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

மேலும் தட்டைப்பயறு, எள், சோளம் உள்ளிட்டவற்றையும் சிறுகீரை, புளிச்சக்கீரை, முளைக்கீரை ஆகியவற்றையும் முழுக்க இயற்கை விவசாயத்தில் பயிர் செய்துவருகிறோம். 27 மாடுகள், 40 ஆடுகள் மற்றும் கோழிகள், முயல்களை வளர்க்கிறோம். மாட்டுச் சாணத்தை ஆரம்பத்தில் வயல்களுக்கு உரமாக மட்டும் பயன்படுத்திவந்தோம். தற்போது சாண எரிவாயு தயாரித்து, சிறைத்துறை சார்பில் இயங்கிவரும் உணவகத்துக்குப் பயன்படுத்துகிறோம். இதன் மூலம் எங்களுக்கு மாதம் இரண்டு சிலிண்டர் செலவு குறைந்திருக்கிறது. மேலும், எரிவாயுக்கு பயன்படுத்திய பிறகு கிடைக்கும் சாணக் கழிவுகளை மண்புழு உரம் தயாரிக்கப் பயன்படுத்திக்கொள்கிறோம்.

களையெடுக்கும் பணியில்
களையெடுக்கும் பணியில்

மழைநீர்ச் சேகரிப்புக்காகச் சிறை வளாகத்தில் மூன்று பெரிய குளங்கள் வெட்டப்பட்டன. அந்தக் குளங்களில் மழைநீரைச் சேகரிப்பதால் தற்போது நிலத்தடி நீர்மட்டம் அதிகரித்துள்ளது. துளியும் தண்ணீர்த் தட்டுப்பாடு இல்லை. மேலும், தேங்கியுள்ள தண்ணீரில் சுமார் 4500-க்கும் மேற்பட்ட மீன்குஞ்சுகளை வளர்த்து வருகிறோம். கடந்த முறை பயிர்களைத் தாக்கும் பூச்சிகளைத் தடுப்பது எப்படி என்பது தெரியாமல் தவித்துப் போனோம்” எனக் கூறிக்கொண்டிருந்தபோதே இடைமறித்த டி.ஐ.ஜி சண்முக சுந்தரம்,

அசோலா வளர்ப்பு
அசோலா வளர்ப்பு

“கரும்பு, மக்காச் சோளத்தைத் பூச்சி மற்றும் புழுக்கள் தாக்கும்போது அதை எப்படிக் கட்டுப்படுத்துவது என்பது தெரியாமல் தவித்துப்போனோம். அதனால் மருந்தடிக்கும் சூழலுக்குத் தள்ளப்பட்டோம். அதற்கு மனம் ஒப்பவில்லை. அதற்குத் தீர்வு காண, பசுமை விகடன் சார்பில் வெளியிடப்பட்ட நூல்களை வாங்கினோம். அவற்றில் சோளத்தைத் தாக்கும் புழுக்களை விரட்டுவதற்கு வேப்பெண்ணெய், புங்க எண்ணெய், சோப்புக் கரைசல் உள்ளிட்டவற்றைப் பயன்படுத்தும் முறை குறித்தும், பூச்சிகளை விரட்ட வேப்பங்கொட்டை, மிளகாய், பெருங்காயம், வெள்ளைப்பூண்டு பயன்படுத்திக் கரைசல் தயாரிப்பது, பயன்படுத்துவது குறித்தும் கூறப்பட்டிருந்தன. அதன்படி செயல்பட்டோம். மெள்ள மெள்ள பாதிப்புக் குறைந்தது. இனி, 100 சதவிகிதம் இயற்கை விவசாயத்தின் மூலம் பயிரிடுவதற்கு நம்பிக்கை கிடைத்திருக்கிறது.

சிறைவாசிகளின் உழைப்பில் செழிக்கும் தோட்டம்
சிறைவாசிகளின் உழைப்பில் செழிக்கும் தோட்டம்

கடந்த இரண்டு வருடங்களாக செங்கரும்பு பயிரிட்டுவருகிறோம். இந்த வருடம் சுமார் ஒன்றே கால் ஏக்கரில் பயிரிடப்பட்ட செங்கரும்பு தமிழக அரசின் பொங்கல் பரிசு திட்டத்துக்கு விநியோகம் செய்யப்பட்டது. இங்கு விளைந்த சின்ன வெங்காயம், தக்காளி உள்ளிட்ட அனைத்துக் காய்கறிகளையும் சிறைத்துறை மூலம் இயங்கும் அங்காடி மூலம் பொதுமக்களுக்கு நேரடியாக விற்பனை செய்தோம். குறிப்பாக, சின்ன வெங்காயத்தை மார்க்கெட் விலையைவிட 20 சதவிகிதம் குறைவாக விற்றோம். அதை வாங்கிச் சென்ற பொதுமக்களுக்கும் மகிழ்ச்சி.

கடந்த அக்டோபர் மாதம் முதல் மரம் வளர்ப்பதை ஊக்குவிக்கும் வகையில் சிறையிலிருந்து விடுதலையாகிப் போகிறவர்களுக்கும், முதல் தடவை சிறைக்கு வந்து செல்பவர்களுக்கும் மரக்கன்றுகள் வழங்கிவருகிறோம். அந்த வகையில் மாதம் 1,500 மரக்கன்றுகள் கொடுத்துவருகிறோம். இது போன்று தொடர்ந்து சிறைவாசிகளின் மனநிலை மாற்றத்துக்காக நல்ல விஷயங்களை முன்னெடுத்திருக்கிறோம். எங்களுக்கு லாபம் முக்கியமில்லை” என்கிறார் நம்பிக்கையுடன். `சிறை, சிறைவாசிகளின் மனதைத் திருத்தும் இடம்’ என்பார்கள். மனம் மட்டுமன்றி உடல் ஆரோக்கியம் மற்றும் நஞ்சில்லா விளைபொருள்கள் மூலம் சமூகத்துக்கும் நன்மை செய்து வருகிறது இந்தச் சிறைச்சாலை.