Published:Updated:

இனிப்பான வருமானம் கொடுக்கும் ஃபேஷன் ஃப்ரூட்!

பொன்.காட்சிக்கண்ணன்
பிரீமியம் ஸ்டோரி
பொன்.காட்சிக்கண்ணன்

4 ஏக்கர், மாதம் ரூ. 1,20,000...

இனிப்பான வருமானம் கொடுக்கும் ஃபேஷன் ஃப்ரூட்!

4 ஏக்கர், மாதம் ரூ. 1,20,000...

Published:Updated:
பொன்.காட்சிக்கண்ணன்
பிரீமியம் ஸ்டோரி
பொன்.காட்சிக்கண்ணன்

மகசூல்

லைகள், ஆறுகள், அருவிகள் என இயற்கை எழில் கொஞ்சும் பகுதி கம்பம் பள்ளத்தாக்கு. திராட்சைச் சாகுபடிக்குப் பெயர் பெற்ற பகுதி. ஆண்டு முழுவதும் பச்சைப் பசேலென இருக்கும் கம்பம் பள்ளத்தாக்குப் பகுதியில் பந்தல் சாகுபடி அதிகளவில் நடைபெற்று வருகிறது. திராட்சைப் பந்தலுக்கு மத்தியில், ஃபேஷன் ஃப்ரூட் சாகுபடி செய்து அசத்திக்கொண்டிருக்கிறார் பொன்.காட்சிக்கண்ணன்.

‘பட்டாசுப் பழம்’, ‘தாட்பூட் பழம்’ எனப் பல பெயர்களில் அழைக்கப்பட்டாலும், ‘ஃபேஷன் ஃப்ரூட்’ என்று சொன்னால்தான் அடையாளம் கண்டுகொள்ள முடியும். ஃபேஷன் ஃப்ரூட் விவசாயி பொன்.காட்சிக் கண்ணனைச் சந்திக்கச் சென்றோம். தேனி மாவட்டம், கம்பத்திலிருந்து சுருளி அருவிக்குப் போகும் பாதையிலிருக்கிறது சுருளிப்பட்டி. அங்கேயிருக்கும் தோட்டத்தில் கண்ணனைச் சந்தித்தோம்.திராட்சைத் தோட்டங்களுக்கு மத்தியில் அமைந்திருக்கிறது இவரது ஃபேஷன் ஃப்ரூட் தோட்டம். சாதாரணமாகப் பார்த்தால் திராட்சைத் தோட்டம்போலத்தான் தெரிந்தது.

ஃபேஷன் ஃப்ரூட் தோட்டம்
ஃபேஷன் ஃப்ரூட் தோட்டம்

உற்றுப்பார்த்த பிறகுதான் திராட்சைத் தோட்டத்துக்கும் ஃபேஷன் ஃப்ரூட் தோட்டத்துக்குமுள்ள வித்தியாசம் தெரிந்தது. “30 வருஷமா திராட்சைச் சாகுபடி செஞ்சிட்டிருக்கேன். அடிக்கடி கேரளா போவேன். அங்கே ஃபேஷன் ஃப்ரூட் ரொம்பப் பிரபலம். வீடுகள்ல இந்தக் கொடியை வளர்ப்பாங்க. அதுபோக, தனியா பெரிய அளவுலயும் சாகுபடி செய்யறாங்க. இந்தப் பழத்துல வைட்டமின் சி, வைட்டமின் ஏ சத்து அதிகமா இருக்குன்னு சொல்றாங்க.

ஒட்டுமொத்த விகடனுக்கும் ஒரே ஷார்ட்கட்!

ஜூஸ் கம்பெனியிலேயே நாத்து கிடைக்கும். ஒரு நாத்து 40 ரூபாய்னு விக்கிறாங்க. நேரடி கொள்முதல் செய்யற வியாபாரிங்க கிலோவுக்கு 100 ரூபாய் வரைக்கும் கொடுப்பாங்க.

அதனால கேரள மக்கள் தினமும் இதைச் சாப்பிடுறாங்க. குறைஞ்சபட்சம் வாரத்துக்கு ஒரு தடவையாவது இதைச் சாப்பிடாம இருக்க மாட்டாங்க. இடுக்கி மாவட்டத்துல பல இடங்கள்ல ஃபேஷன் ஃப்ரூட் ஜூஸ் தயாரிக்கும் கம்பெனிகள் இருக்கு. அந்த அளவுக்கு அதிக அளவுல சாகுபடி செய்யறாங்க. நம்ம ஊர்லயும் இதைச் சாகுபடி செய்யணும்னு எனக்கு ரொம்ப நாளா ஒரு எண்ணம் இருந்துச்சு. இடுக்கி மாவட்டத்துல சில நண்பர்கள் இருக்காங்க. அவங்ககிட்ட பேசினேன். இதைச் சாகுபடி செய்யும் முறையைச் சொன்னாங்க. கேட்டதும் ரொம்ப சந்தோஷப்பட்டேன். ஏற்கெனவே திராட்சைத் தோட்டம் வெச்சிருக்கேன். இந்தப் பழத்தையும் கிட்டத்தட்ட அதுமாதிரிதான் சாகுபடி செய்யணும்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

ஆனா, திராட்சையைவிட குறைவா பராமரிச்சா போதும்னு சொன்னாங்க. ஜூஸ் கம்பெனியிலேயே நாத்து கிடைக்குது, ஒரு நாத்து 40 ரூபாய்னு விக்கிறாங்க. அங்கேயிருந்த ஒரு ஃபேஷன் ஃப்ரூட் ஜூஸ் கம்பெனியில நாத்துகளை வாங்கிட்டு வந்தேன்’’ என்றபடி நம்மைத் தோட்டத்துக்குள் அழைத்துச் சென்றார்.

பொன்.காட்சிக்கண்ணன்
பொன்.காட்சிக்கண்ணன்

“ஃபேஷன் ஃப்ரூட்ல சிவப்பு, மஞ்சள்னு ரெண்டு வகைகள் இருக்கு. நான் ரெண்டு வகைகள்லயும் நடவு செஞ்சிருக்கேன். பழத்துக்கு வெளியேதான் சிவப்பு, மஞ்சள்னு நிற வித்தியாசம் இருக்கும். ஆனா, உள்ளே கறுப்பு விதைகளோடு மஞ்சள் நிறச் சதைப்பகுதிதான் இருக்கும். நான் முதலில் ஒன்றரை ஏக்கர்ல 10 அடிக்கு 10 அடி இடைவெளியில நாத்துகளை நட்டேன். கொடி வளர்ந்த பிறகு ரொம்ப நெருக்கமாகிடுச்சு. அதனால விளைச்சல் பாதிக்கலைன்னாலும் பழம் பறிக்கறது கஷ்டமாகிடுச்சு.

அடுத்ததா ரெண்டரை ஏக்கர்ல, 20 அடி இடைவெளியில நடவு செஞ்சேன். அப்போ எந்தப் பிரச்னையும் இல்லை. திராட்சையைப் பார்த்துக்குற மாதிரியே இதைப் பார்த்துகிட்டாப் போதும். ஆனா, திராட்சையில செய்யற அளவுக்கு வேலையில்லை. இது நல்ல நோய் எதிர்ப்பு சக்தியோட இருக்கிற பயிர். அதனால பூச்சி, நோய் பிரச்னையும் இதுவரைக்கும் இல்லை. இது, மதியம் 2 மணிக்கு மேலதான் பூக்கும். அதனால, மகரந்தச் சேர்க்கையில் கவனமா இருக்கணும். தேனீக்களை வரவழைக்கணும். அதுக்கான பயோ டானிக், கடைகள்ல கிடைக்குது. நான் அதை மட்டும்தான் தெளிப்பேன். வேற எந்தத் தெளிப்பும் இல்லை. வாரா வாரம் அறுவடை மட்டும்தான் வேலை’’ என்றவர் வருமானம் பற்றிச் சொல்லத் தொடங்கினார். ‘‘சாகுபடிக்கு பந்தல் அமைக்கணும். அதுக்கு ஒரு ஏக்கருக்கு ஒரு லட்ச ரூபாய் வரைக்கும் செலவாகும். என்கிட்ட ஏற்கெனவே பந்தல் இருந்ததுனால அந்தச் செலவு இல்லை. ஒரு ஏக்கருக்கு 200 நாத்துகள் தேவைப்படும். அதுக்கு போக்குவரத்து செலவோடு 10,000 ரூபாய் ஆகும். உழவு, எரு, நடவுன்னு 20,000 ரூபாய் செலவாகும்.

அறுவடை பணியில்...
அறுவடை பணியில்...

இது நிரந்தரச் செலவு. அதுக்குப் பிறகு ஆறு மாசத்துக்கு ஒரு தடவை மட்டும் எரு போடணும். இதுக்கு இலை வெட்டுறது மாதிரியான எந்த வேலையும் இல்லை. அதனால கூலி ஆள் அதிகம் தேவைப்படாது. டானிக் தெளிக்க ஒரு ஆள் போதும். அவருக்குக் கூலி 750 ரூபாய். வாரம் ஒரு தடவை தெளிக்கணும். பழம் பறிக்க அஞ்சு ஆளுங்க தேவைப்படுவாங்க. ஆக மொத்தம் மாசம் 25 முதல் 30 ஆளுங்க தேவைப்படுவாங்க. அவங்களுக்கு 22,500 ரூபாய், டீ செலவு, மத்த செலவுனு மொத்தம் 24,000 ரூபாய் செலவாகும். ஆக, புதுசா நடவு செய்யறவங்களுக்கு 1,30,000 ரூபாய் நிரந்தரச் செலவு. அதுக்குப் பிறகு வருஷத்துக்கு ரெண்டு தடவை எரு வைக்கணும். அதுக்கு 20,000 ரூபாய் செலவாகும். அதை மாசக்கணக்குல பிரிச்சா, மாசம் 2,000 ரூபாய் வரும். ஆக, ஒரு மாசத்துக்கு எருவுக்கு 2,000, சம்பளத்துக்கு 24,000 ரூபாய், மொத்தம் 26,000 ரூபாய் செலவாகும்.வருமானம்னு பார்த்தா ஒரு ஏக்கர்ல இருந்து மாசம் 2,000 கிலோ முதல் 2,500 கிலோ மகசூல் கிடைக்கும். குறைந்தபட்சம் 2,000 கிலோவுக்குக் குறையாம கிடைக்கும்.

இப்போ கிலோ 30 ரூபாய்ல இருந்து 40 ரூபாய் வரைக்கும் விலை கிடைக்குது. கோடைக்காலத்துல 60 ரூபாய் வரைக்கும் விலை கிடைக்கும். வெளிநாட்டுல இருந்து நேரடியா கொள்முதல் செய்யற வியாபாரிங்க கிலோவுக்கு 100 ரூபாய் வரைக்கும் கொடுத்து வாங்குறாங்க.

சராசரியா 30 ரூபாய் கணக்கு வெச்சாலும், 2,000 கிலோவுக்கு மாசம் 60,000 ரூபாய் வருமானமாகக் கிடைக்கும். இதுல செலவு போக, 30,000 ரூபாய் லாபமா நிக்கும். ஆக, நாலு ஏக்கருக்கு 1,20,000 ரூபாய் மாத வருமானமாகக் கிடைக்கும்’’ என்றவர் விற்பனை வாய்ப்பு குறித்து விளக்கினார். ‘‘ஃபேஷன் ஃப்ரூட்டைப் பொறுத்தவரை, மார்க்கெட் மற்றும் சீஸன் அடிப்படையில்தான் விலை நிர்ணயிக்கப்படுது. கேரளாவிலிருந்து வியாபாரிகள் தோட்டத்துக்கே நேரடியா வந்து பழங்களை வாங்கிக்கறாங்க. தேனி மாவட்டம் லோயர்கேம்ப் பகுதியில தனியாருக்குச் சொந்தமான ஃபேஷன் ஃப்ரூட் ஜூஸ் தயாரிக்கும் தொழிற்சாலை இருக்குது. அங்கே தயாராகும் ஜூஸ் துபாய், சவுதி, வளைகுடா நாடுகள், சிங்கப்பூர், மலேசியா நாடுகளுக்கு ஏற்றுமதியாகுது. அந்த கம்பெனிக்காரங்களும் நேரடியா தோட்டத்துக்கே வந்து கொள்முதல் செய்யறாங்க. அதனால விற்பனை செய்யறதுல எந்தச் சிக்கலும் இல்லை’’ என்ற கண்ணன் நிறைவாக,

‘‘ஃபேஷன் ஃப்ரூட் ஜூஸ் துபாய், சவுதி, வளைகுடா நாடுகள், சிங்கப்பூர், மலேசியா நாடுகளுக்கு ஏற்றுமதியாகுது. அந்த கம்பெனிக்காரங்களும் நேரடியா தோட்டத்துக்கே வந்து கொள்முதல் செய்யறாங்க.’’

‘‘மலைப்பாங்கான இடுக்கி, தாண்டிக்குடி, பண்ணைக்காடு பகுதிகள்ல மட்டுமே விளையும் ஃபேஷன் ஃப்ரூட்டை முதல் முறையா கம்பம் பள்ளத்தாக்கு பகுதியில விளையவெச்சிருக்கேன். நல்ல வருமானமும் கொடுக்குது; மனசுக்கு நிறைவாகவும் இருக்குது. மாவட்ட நிர்வாகம், ஃபேஷன் ஃப்ரூட் சாகுபடிக்கு ஊக்கம் கொடுத்தா, போதுமான விலை கிடைக்காம பன்னீர் திராட்சைச் சாகுபடியைக் கைவிட்ட கம்பம் பள்ளத்தாக்கு விவசாயிகள் பலரும் பேஷன் ஃப்ரூட்டைச் சாகுபடி செய்வாங்க’’ என்றார்.

தொடர்புக்கு, பொன்.காட்சிக்கண்ணன், செல்போன்: 97872 92101

ஃபேஷன் ஃப்ரூட் சாகுபடி முறை!

பேஷன் ஃப்ரூட் மலைப்பகுதிகளில் சிறப்பாக வளரும். கம்பம் பள்ளத்தாக்கு போன்ற மிதமான சீதோஷ்ணப் பகுதியிலும் வளரும். நடவு செய்யும் நிலத்தில் ஏக்கருக்கு 6 டன் தொழுவுரம் இட்டு உழவு செய்ய வேண்டும். வரிசைக்கு வரிசை, செடிக்குச் செடி 20 அடி இடைவெளியில் குழியெடுக்க வேண்டும். ஒரு அடி நீள, அகல, ஆழத்தில் குழியெடுத்து நாற்றுகளை நடவு செய்ய வேண்டும். ஒரு குழிக்கு ஒரு நாற்று போதுமானது. நடவு செய்யப்படும் அனைத்து நாற்றுகளும் உயிர்பிழைத்துவிடும்.

இனிப்பான வருமானம் கொடுக்கும் ஃபேஷன் ஃப்ரூட்!

அதன் பிறகு வரிசைக்கு நேராக வாய்க்கால் எடுத்துக்கொள்ள வேண்டும். கொடி வளரத் தொடங்கிய பிறகு, அது படர்வதற்காகப் பந்தல் அமைக்க வேண்டும். கற்கள் நட்டு, மேல் பகுதியில் கம்பிகளைக் குறுக்கும் நெடுக்குமாகக் கட்டி, திராட்சைப் பந்தல்போல் அமைக்க வேண்டும். சணல் கயிற்றால் கட்டி, கொடிகளைப் பந்தலில் ஏற்றிவிட வேண்டும். நடவு செய்த ஆறாம் மாதத்தில் பூவெடுக்கத் தொடங்கும். ஏழு முதல் எட்டாம் மாதத்தில் பழங்களை அறுவடை செய்யலாம். மகரந்தச் சேர்க்கைக்காக பயோ டானிக்குகளைத் தெளிக்க வேண்டும். இந்தப் பயிர் நோய் எதிர்ப்பு சக்தி அதிகம்கொண்டது. எனவே, பூச்சிநோய்த் தாக்குதல் அவ்வளவாக இருக்காது. ஆறு மாதங்களுக்கு ஒரு முறை ஏக்கருக்கு ஆறு டன் தொழுவுரம் இட வேண்டும். அறுவடை தவிர, வேறு பராமரிப்புப் பணிகள் எதுவும் தேவையில்லை. இயற்கையாகவே வளர்ந்துவிடும். செடியிலிருந்து உதிரும் இலைகளால் நிலம் பண்பட்டுவிடும்.

மிதமான தட்பவெப்பநிலை அவசியம்!

தேனி மாவட்டம் பெரியகுளம் தோட்டக்கலைக் கல்லூரியின் முதல்வர் ஆறுமுகத்திடம் ஃபேஷன் ஃப்ரூட் பயிரிடுதல் குறித்து பேசினோம். “ஃபேஷன் ஃப்ரூட் அதிக சத்துகள் நிறைந்த பழம். சாறு மிகுந்த பழம் என்பதால் தொழிற்சாலைகளில் பழக்கூழாகத் தயாரிக்கப்படுகிறது. கேரளாவின் மிதமான தட்பவெப்பநிலை காரணமாக, அங்கே மலைப் பகுதிகளில் அதிகம் பயிரிடப்படுகிறது.

அதே போன்ற தட்பவெப்பநிலை தேனி மாவட்டம் கம்பம் பள்ளத்தாக்கு பகுதியிலும் இருப்பதால் தற்போது அங்கு பயிரிடப்படுகிறது. சமவெளிப் பகுதிகளிலும் சாகுபடி செய்யலாம். ஆனால், விளைச்சல் குறைவாக இருக்கும். மேலும், மண்ணின் பி.ஹெச் (Ph) அளவு 6.5ஆக இருக்க வேண்டும். அப்போதுதான் அதிக விளைச்சல் எடுக்க முடியும். இதுவரை ஃபேஷன் ஃப்ரூட் குறித்து எந்த ஆராய்ச்சியும் மேற்கொள்ளப்படவில்லை. ஆனால், கம்பம் பகுதி விவசாயிகள் ஃபேஷன் ஃப்ரூட் சாகுபடி மீது ஆர்வமாக இருக்கிறார்கள்” என்றார்.

- ஹ.ஷிபானா பாத்திமா