Published:Updated:

விவசாயிகளும் தொழில்முனைவோர் ஆகலாம்!

கறவை மாடு
பிரீமியம் ஸ்டோரி
கறவை மாடு

நீங்கள் கேட்டவை

விவசாயிகளும் தொழில்முனைவோர் ஆகலாம்!

நீங்கள் கேட்டவை

Published:Updated:
கறவை மாடு
பிரீமியம் ஸ்டோரி
கறவை மாடு

‘‘எங்கள் பண்ணையிலுள்ள கறவை மாடுகளின் பாலில் கொழுப்புச்சத்து குறைவாக இருக்கிறது. அதை நிவர்த்தி செய்வது எப்படி?’’

கே.சுந்தரம், நாவக்குறிச்சி.

‘‘கொழுப்புச்சத்து குறைவாக இருந்தால், பாலுக்கான விலையும் குறையும். அது ஏன் குறைகிறது என்பதை விவசாயிகள் அறிந்துகொள்ள வேண்டியது அவசியம். பொதுவாக, கறவை மாடுகளின் இனத்தைப் பொறுத்து கொழுப்புச்சத்தின் அளவு வேறுபடும்.

விவசாயிகளும் தொழில்முனைவோர் ஆகலாம்!

ஒட்டுமொத்த விகடனுக்கும் ஒரே ஷார்ட்கட்!

ஹோல்ஸ்டீன் ஃபிரீசன் (Holstein Friesian) கறவை மாட்டின் பாலில் 3.5 சதவிகிதம்தான் கொழுப்புச்சத்து இருக்கும். இதுவே ஜெர்சி மாட்டில் 4.5 சதவிகிதமும், நாட்டு மாடுகளில் 4.5 சதவிகிதமும் இருக்கும். குறிப்பாக, பசு மாடுகளைவிட எருமைப் பாலில் 6-8 சதவிகிதம் கொழுப்புச்சத்து கூடுதலாக இருக்கும்.

மாடுகளின் வயது அதிகரிக்கும்போது பாலில் கொழுப்புச்சத்து குறையும். இளம் பசுக்களின் பாலில் கொழுப்புச்சத்து அதிகமாகவும், வயதான பசுக்களில் குறைவாகவும் காணப்படும்.

ஒவ்வோர் ஈற்றிலும் கறவையின் ஆரம்பகாலத்தில் அதாவது, முதல் மூன்று மாதங்களுக்குப் பாலில் கொழுப்புச்சத்து குறைவாகவும், இடைப்பட்ட காலம், பால் வற்றும் காலத்தில் அதிகமாகவும் இருக்கும்.

கறவை மாடு
கறவை மாடு

நாள்தோறும் 12 மணிநேர இடைவெளியில் பால் கறக்க வேண்டும். குறிப்பாக, கறவை நிலையிலுள்ள மாட்டின் மடியிலுள்ள பால் முழுவதையும் நன்றாகக் கறக்க வேண்டும். முழுமையாகக் கறக்கவில்லையென்றால் பாலிலிருக்கும் கொழுப்புச்சத்து குறைய வாய்ப்பிருக்கிறது. பால் உற்பத்தி அளவு அதிகரிக்கும்போதும் குறையும். மாடுகள் சினைப் பருவத்துக்கு வரும் ஓரிரு நாள்களில் கொழுப்புச்சத்து குறைவாக இருக்கும்.

தீவனத்தை மாவாக அரைத்துக் கொடுக்கும்போதும், உருண்டையாகக் கொடுக்கும்போதும், பசுந்தீவனத்தை மிகச்சிறிய துண்டுகளாக (அரை அங்குலத்துக்கும் குறைவான அளவில்) கொடுக்கும்போதும் பாலில் கொழுப்புச்சத்து குறையும்.

மேலும், தீவனத்தில் நார்ச்சத்து குறையும்போதும், அடர் தீவனத்தை நார்ச்சத்துள்ள தீவனங்களைவிட அதிகமாகக் கொடுக்கும்போதும் கொழுப்புச்சத்து குறையும். அதே நேரத்தில் வெயில் காலத்தில் கொழுப்பு குறைவாகவும், மழைக்காலத்தில் அதிகமாகவும் காணப்படும். எனவே, இதை கவனத்தில் கொண்டு செயல்பட்டால் கொழுப்புச்சத்து கூடி விவசாயிகளுக்குக் கொழுத்த வருமானம் கிடைக்கும்.”

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

‘‘வேளாண் விளைபொருள்களைச் சந்தைப்படுத்த விரும்புகிறேன். அதற்கு வழிகாட்டும் அமைப்பு பற்றிச் சொல்லுங்கள்...’’

ஆர்.சுகந்தி, பண்ணைக்காடு.

‘‘கோயம்புத்தூரிலுள்ள தமிழ்நாடு வேளாண்மைப் பல்கலைக்கழகம் 2007-ம் ஆண்டு வேளாண் வணிக மேம்பாட்டு இயக்ககத்தை உருவாக்கியது. விவசாயப் பெருமக்களில் பலரையும் தொழில் முனைவோராக்கி அவர்களின் வருவாயைப் பெருக்குவதற்கும், வாழ்க்கைத்தரத்தை உயர்த்துவதற்கும், வேளாண் மாணாக்கரிடையே தொழில் முனைப்பை உருவாக்குவதற்கும் என வேளாண் வணிக மேம்பாட்டு இயக்ககம் செயல்பட்டுவருகிறது.

இந்த அமைப்பு தானிய சேமிப்பில் வரும் பூச்சி, முட்டைகளை நீக்கும் கருவி, உடனடி கம்பு உணவு தயாரிக்கும் கலவை, பஞ்சகவ்யா தயாரிக்கும் முறை, திருந்திய நெல் சாகுபடிக்கான பல வரிசை களையெடுக்கும் கருவி போன்றவற்றை மேம்படுத்தி வணிகரீதியாக வெற்றி பெற உதவிவருகிறது.

வேளாண் தொழில் முனைவோர் மற்றும் வேளாண் தொழில் நிறுவனங்கள், தமிழ்நாடு வேளாண்மைப் பல்கலைக்கழகத்தின் தொழில்நுட்ப வணிக மேம்பாட்டுக் கூடத்தில் (Technology Business Incubator) அடிப்படை உறுப்பினராகச் சேரலாம்.

இதன் மூலம் தொழில் மேம்பாட்டுக்கான வணிக வழிகாட்டுதல்கள், தொழில்நுட்ப, வணிக மேலாண்மை குறித்த ஆலோசனைகள், திறன் மேம்பாட்டுக்கான பயிற்சிகள், தரப் பரிசோதனைக்கான வசதிகள், மதிப்புக்கூட்டப்பட்ட உணவுப் பொருள் தயாரிப்பதற்கான வசதிகள், சந்தைப் படுத்துதலுக்கான வழிகாட்டுதல்கள் மற்றும் நிதிஉதவி பெறுவதற்கான வழிகாட்டுதல்கள், தமிழ்நாடு வேளாண்மைப் பல்கலைக் கழகத்தின் தொழில்நுட்பங்களைப் சந்தைப்படுத்துதலுக்கு வழிகாட்டும் தகவல்கள், உணவு பதப்படுத்தும் தொழிற்கூடம் மற்றும் ஆய்வகங்களைப் பயன்படுத்துதல் போன்றவற்றைப் பெறலாம்.

மேலும் உழவர் தினம், கொடீசியாவில் நடக்கும் வேளாண் கருத்து காட்சியில் தங்களின் பொருள்களைக் காட்சிப்படுத்த வாய்ப்புகள் வழங்கப்படுகின்றன.’’

தொடர்புக்கு:

இயக்குநர்,

வேளாண் வணிக மேம்பாட்டு இயக்ககம்,

தமிழ்நாடு வேளாண்மைப் பல்கலைக்கழகம்,

கோயம்புத்தூர் - 641003

தொலைபேசி: 0422 6611310, 2449378.

‘‘மக்காச்சோளம் சாகுபடி செய்யும்போது, பயிர் எண்ணிக்கை குறைவாக இருக்கிறது. என்ன காரணம், இதைச் சரிசெய்வது எப்படி?’’

தே.மீனாட்சிசுந்திரம், சத்திரம்.

‘‘மக்காச்சோளத்தின் மகசூலை நிர்ணயிப்பதில் செடிகளின் எண்ணிக்கை முக்கியமானது. விதைப்பு செய்த 7 அல்லது 8-ம் நாளில் நல்ல தரமான செடிகளை விட்டு விட்டு, வளர்ச்சி குறைவான செடிகளை நீக்கிவிட வேண்டும். வெதுவெதுப்பான வெந்நீரில் மக்காச்சோள விதைகளை மூன்று மணி நேரம் ஊறவைத்து நிழலில் உலர்த்தி, செடிகள் முளைக்காத இடத்தில் விதைக்க வேண்டும். இதன் மூலம் விதைகள் நன்றாக முளைப்பதோடு, குருத்துப்பூச்சித் தாக்குதலும் குறையும் எனக் கண்டறிந்திருக்கிறார்கள் விஞ்ஞானிகள்.

மக்காச்சோளம்
மக்காச்சோளம்

கரிசல் மண்ணில் விதையை ஆழமாக விதைக்கக் கூடாது. குறைந்த ஆழத்தில் அதாவது இரண்டு சென்டிமீட்டரில் விதைக்க வேண்டும். காரணம், கரிசல் மண்ணில் நீர் அதிக நேரம் தேங்கி நிற்கும். மேலே நடவு செய்த விதைகள் முழுமையாக ஊறிவிடும். விதை உறிஞ்சுவதற்குத் தேவையான நீர் கிடைத்து முளைக்க ஏதுவாக இருக்கும். கரிசல் மண்ணில் ஆழமாக விதைக்கும்போது, வேகமாக முளைப்பதில் பிரச்னை ஏற்படும்.

செம்மண் பாங்கான பூமியில் விதையைக் கொஞ்சம் ஆழமாக விதைப்பு செய்ய வேண்டும். அதாவது மூன்று சென்டிமீட்டரிலிருந்து நான்கு சென்டிமீட்டருக்குள் விதைக்க வேண்டும். ஏனெனில், செம்மண் பூமியில் நீர் விரைவாகக் கீழே சென்றுவிடும். ஆழமாக நடவு செய்யப்பட்ட விதைகள் தேவையான நீரை உறிஞ்சி விரைவாக முளைக்கும். மேலாக விதைப்பு செய்யப்பட்ட விதைகளுக்குச் சரியான நீர் கிடைக்காமல் முளைப்பு திறன் பெறாமல் போய்விடும். இது விவசாயிகளின் அனுபவப் பாடம்.’’

விவசாயிகளும் தொழில்முனைவோர் ஆகலாம்!

விவசாயம், கால்நடை, மீன்வளம் மற்றும் சுற்றுச்சூழல் என்று பல துறைகள் பற்றி வாசகர்களின் சந்தேகங்களுக்கான பதில்களை உரிய நிபுணர்களிடம் பெற்றுத் தருவதற்காகவே ‘புறா பாண்டி’ சும்மா ‘பரபர’த்துக் கொண்டிருக்கிறார். உங்கள் கேள்விகளை ‘நீங்கள் கேட்டவை’, பசுமை விகடன், 757, அண்ணா சாலை, சென்னை-2 என்ற முகவரிக்குத் தபால் மூலமும், pasumai@vikatan.com என்ற முகவரிக்கு இ-மெயில் மூலமும், 99400 22128 என்ற எண்ணுக்கு வாட்ஸ்அப் மூலமும், facebook.com/PasumaiVikatan என்ற முகவரிக்கும், twitter.com PasumaiVikatan என்ற முகவரிக்கும் அனுப்பலாம்.