Published:Updated:

நீங்கள் கேட்டவை: ரூ. 50 லட்சம் மானியம் தரும் தென்னை வளர்ச்சி வாரியம்!

தென்னை வளர்ச்சி
பிரீமியம் ஸ்டோரி
தென்னை வளர்ச்சி

புறாபாண்டி - ஓவியம்: வேலு

நீங்கள் கேட்டவை: ரூ. 50 லட்சம் மானியம் தரும் தென்னை வளர்ச்சி வாரியம்!

புறாபாண்டி - ஓவியம்: வேலு

Published:Updated:
தென்னை வளர்ச்சி
பிரீமியம் ஸ்டோரி
தென்னை வளர்ச்சி

“தென்னை வளர்ச்சி வாரியத்தில் செயல்படுத்தப்படும் திட்டங்கள் பற்றிச் சொல்லுங்கள்?’’

பெ.பொன்னம்பலம், விருத்தாசலம்.

பாலசுதாகரி
பாலசுதாகரி

தென்னை வளர்ச்சி வாரியத்தின் தமிழ்நாடு மண்டல இயக்குநர் (பொறுப்பு) டி.பாலசுதாகரி பதில் சொல்கிறார்.

‘‘தென்னை வளர்ச்சி வாரியத்தில் விவசாயிகளுக்காகப் பல்வேறு திட்டங்கள் செயல்படுத்தப்படுகின்றன. முக்கியமான நான்கு திட்டங்கள் குறித்த தகவல்களை உங்களுடன் பகிர்ந்து கொள்கிறேன்.

முதலாவதாக ‘பரப்பு விரிவாக்கத் திட்டம்’ பற்றிப் பார்ப்போம். சிறு குறு விவசாயிகள் தென்னைச் சாகுபடி செய்ய, இத்திட்டத்தின் மூலம் ஊக்கப்படுத்தி வருகிறோம். ஒரு ஹெக்டேர் நிலத்தில் நெட்டை ரகம் சாகுபடி செய்தால் 6,500 ரூபாய் மானியம் கிடைக்கும். கலப்பின ரகங்களுக்கு 6,750 ரூபாயும் குட்டை ரகங்களுக்கு 7,500 ரூபாயும் மானியமாக வழங்கப்படுகிறது. இந்தத் திட்டத்தில் பயன்பெற அருகிலுள்ள வேளாண் விரிவாக்க அலுவலகத்தை அணுகி, உங்கள் நிலத்தில் தென்னைச் சாகுபடி செய்யப்பட்டுள்ளது என்பதற்கான சான்றிதழ் பெற வேண்டும். இதற்கு இரண்டு தவணையாக மானியம் கிடைக்கும்.

நீங்கள் கேட்டவை: ரூ. 50 லட்சம் மானியம் தரும் தென்னை வளர்ச்சி வாரியம்!

இரண்டாவது, ‘சிறிய அளவிலான தென்னை நாற்றுப் பண்ணை’ திட்டமாகும். இத்திட்டத்தின் மூலம் ஒரு ஏக்கர் அளவில் தென்னை நாற்று உற்பத்தி செய்யும் விவசாயிகளுக்கு 2,00,000 ரூபாய் மானியமாக வழங்கப்படுகிறது. ஒரு ஏக்கர் நிலத்தில் 40,000 தென்னங்கன்றுகளை விதைத்து, சுமார் 25,000 நாற்றுகளை உற்பத்தி செய்திருக்க வேண்டும். எல்லா விதமான ரகங்களுக்கும் இந்த மானியம் பொருந்தும். குறைந்தபட்சம் 25 சென்ட் அளவில்கூட நாற்றுப் பண்ணை அமைத்துப் பயன்பெறலாம்.

மூன்றாவது ‘தென்னை தொழில்நுட்ப இயக்கம்’ என்ற திட்டமாகும். இளநீர், தேங்காய்... போன்றவற்றை மதிப்புக்கூட்டி விற்பனை செய்பவர்களுக்குத் திட்ட செலவில் 25%, அதிகபட்சம் 50,00,000 (ஐம்பது லட்சம்) ரூபாய் மானியமாக வழங்கப்படும். தனி விவசாயிகள், விவசாய அமைப்புகள், உற்பத்தியாளர் நிறுவனங்கள், சுயஉதவிக்குழுக்கள்... இத்திட்டத்திற்கான மானியத்தைப் பெறமுடியும்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

நான்காவது ‘தாய் நெற்று உற்பத்தி தோட்டங்கள்’ திட்டம். இந்தத் திட்டம் தாய் நெற்று விதை உற்பத்தி செய்ய உருவாக்கப்பட்டுள்ளது. தரமான தென்னந்தோப்பில் தாய் நெற்றுத் தோட்டங்கள் தேர்வு செய்யப்படும். 4 ஹெக்டேர் அளவுக்குத் தாய் நெற்றுத் தோட்டங்கள் இருக்கலாம். அதிகபட்சமாக 6,00,000 ரூபாய் (25%) மானியம் வழங்கப்படும்.

நீங்கள் கேட்டவை: ரூ. 50 லட்சம் மானியம் தரும் தென்னை வளர்ச்சி வாரியம்!

இந்த நான்கு திட்டங்களிலும் மானியம் பெற, தென்னை வளர்ச்சி வாரியத்தின் இணையதளத்தில் விண்ணப்பங்கள் உள்ளன. அதைப் பதிவிறக்கம் செய்து, உரிய ஆவணங்களை இணைத்து, தமிழ்நாடு மண்டல அலுவலகத்துக்கு அனுப்பி வைக்கவும். ஆய்வு செய்த பிறகு, உங்களுக்கு மானியம் வழங்கப்படும். இத்திட்டங்கள் குறித்துக் கூடுதல் விவரங்கள் தேவைப்பட்டால் எங்கள் அலுவலகத்தைத் தொடர்பு கொள்ளலாம்.’’

தொடர்புக்கு,

இயக்குநர் (பொறுப்பு),

தமிழ்நாடு மண்டல அலுவலகம்,

தென்னை வளர்ச்சி வாரியம்,

எண்.47, டாக்டர் ராமசாமி சாலை,

கே.கே நகர், சென்னை-600078.

தொலைபேசி: 044 23662684, 23663685.

இணையதளம்: coconutboard.nic.in

‘‘ஃபெர்ரோ சிமென்ட் (Ferro Cement) தொழில்நுட்பத்தைப் பயன்படுத்தி ‘பிரதம மந்திரி ஆவாஸ் யோஜனா’ திட்டத்தின் மூலம் வீடுகட்ட முடியுமா, இந்தத் தொழில்நுட்பம் குறித்துச் சொல்லுங்கள்?

ஆர்.கணபதி, திருப்பூர்.

ராஜாராமன்
ராஜாராமன்

புதுச்சேரி அடுத்த ஆரோவில் பகுதியில் பல ஆண்டுகளாக ‘ஃபெர்ரோ சிமென்ட்’ கட்டடத் தொழில்நுட்பத்தை மக்களுக்குக் கற்றுக்கொடுத்து வரும் தொழில்நுட்ப பயிற்றுநர் து.ராஜாராமன் பதில் சொல்கிறார்.

‘‘பிரதம மந்திரி ஆவாஸ் யோஜனா திட்டத்தின் மூலம் வீடு கட்டுபவர்களுக்கு அரசு மானியம் வழங்கப்படுகிறது. தமிழ்நாடு மற்றும் புதுச்சேரி பகுதிகளில் இந்தத் திட்டத்தின் மூலம் மானியம் பெற்று ஃபெர்ரோ சிமென்ட் தொழில்நுட்பத்தில் வீடுகள் கட்டப்பட்டுள்ளன. எனவே நீங்கள் தாராளமாக இந்தத் தொழில்நுட்பத்தில் வீடுகட்டி மானியம் பெறலாம்.

நீங்கள் கேட்டவை: ரூ. 50 லட்சம் மானியம் தரும் தென்னை வளர்ச்சி வாரியம்!

வீடு கட்டுவதில் பலவிதமான தொழில்நுட்பங்கள் இருக்கின்றன. பெரும்பாலான நுட்பங்கள் அதிக செலவு பிடித்தாலும் சூழலுக்கு உகந்ததாக இல்லை. அதற்கு மாற்றாகத்தான் ஃபெர்ரோசிமென்ட் தொழில்நுட்பங்களை முன் வைக்கிறோம். புதுச்சேரி-தமிழக எல்லையில் அமைந்துள்ள ‘ஆரோவில்’ சர்வதேச நகரத்துக்குச் சென்றால்… உங்களின் கண் முன்பாகவே அந்த வீடுகளைக் காண முடியும். வெளிநாட்டினர்தான் இந்தத் தொழில்நுட்பத்தைக் கண்டுபிடித்தார்கள் என்று சிலர் என்னிடம் கேட்பதுண்டு. உண்மையில் இந்த ஃபெர்ரோ சிமென்ட் நுட்பத்தைக் கண்டுபிடித்தது நம் மக்கள்தான் என்பது கவனிக்கத்தக்கது.

அங்கேயுள்ள வீடுகளெல்லாம் அதிகபட்சம் 30 நாள்களில் கட்டப்பட்டவைதான். பெரும்பாலும் வெளிநாட்டினர் வசிக்கும் இந்தப் பகுதியில், ஃபெர்ரோசிமென்ட் தொழில்நுட்பத்தைத் தொடர்ந்து பயன்படுத்தி வருகிறார்கள். இதைப் பற்றிய விவரம் கேட்பவர்களுக்கும் வழிகாட்டி வருகிறார்கள். ‘ஃபெர்ரோஸ்’ (Ferrous) என்ற வார்த்தைக்கு இரும்பு சார்ந்த பொருள் என்று அர்த்தம். செங்கல் இல்லாமல்… இரும்பு, சிமென்ட் மற்றும் மணலைக் கொண்டு மட்டுமே கட்டப்படுவதால் அதற்கு ‘ஃபெர்ரோ சிமென்ட்’ என்று பெயர் சூட்டப் பட்டுள்ளது. நன்றாகக் கட்டட வேலை தெரிந்த கொத்தனார், ஒரே நாளில் இந்தத் தொழில்நுட்பத்தைக் கற்றுக்கொள்ள முடியும். பல ஆண்டுகளுக்கு முன்பு குஜராத்தில் பூகம்பம் (நில அதிர்வு) ஏற்பட்டபோது, அங்கிருந்த பெரிய பெரிய கட்டடங்கள்கூடச் சரிந்து விழுந்துவிட்டன. ஆனால், ஒரே ஒரு கட்டடம் மட்டும் அசையாமல் நின்றது. அது ஆரோவில்லில் பயிற்சிபெற்ற ஒருவரால் ‘ஃபெர்ரோ சிமென்ட்’ தொழில்நுட்பத்தைப் பயன்படுத்திக் கட்டப்பட்ட கட்டடம். அதைப் பார்த்து ஆச்சர்யத்தால் அதிசயித்து நின்றவர்கள், தற்போது குஜராத்தில் இந்த வகைக் கட்டடங்களை அதிகமாக உருவாக்க ஆரம்பித்துவிட்டனர். ஓர் இடத்தில் நீங்கள் நிறையச் செலவு செய்து வீடு கட்டுகிறீர்கள். ஆனால், அந்த இடம் உங்களுக்கு ஏற்றதாக இல்லை. ‘இனி என்ன செய்ய முடியும்’ என்று சகித்துக்கொண்டு வாழ்வீர்கள். ஆனால், ஃபெர்ரோ சிமென்டில் இந்தப் பிரச்னை கிடையாது. காரணம்… வீட்டை அப்படியே பிரித்து, வேறோர் இடத்தில் கட்டிக்கொள்ள முடியும். மேலும், இந்தவகை வீடுகளில் பத்து அடிக்கு ஒன்று என்று, குறைந்தது ஐந்தடி ஆழத்தில் வைக்கப்படும் பில்லர்களை, வீட்டைப் பிரிக்கும்போது வேறு இடத்துக்குக் கழற்றிக்கொண்டு சென்றுவிடலாம். கூடவே, சுவர்கள், கூரை போன்றவை அச்சு போன்ற அமைப்பின்மீது வைத்து வடிவமைக்கப்படுகிறது. கதவு, ஜன்னல் என்று எதற்கும் மரங்களைப் பயன்படுத்தாமல் ஃபெர்ரோ சிமென்ட்டை வைத்தே வேலையை முடிப்பதால், இதை ‘கிரீன் பில்டிங்’ (பசுமைக் கட்டடம்) என்று சொல்கிறார்கள்.

ஆக… இரும்புக் கம்பி, இரும்பு வலை, சிமென்ட், மணலையெல்லாம் தயார் செய்யும் அந்த நிமிடமே, புதுமனைப் புகுவிழா அழைப்பிதழையும் சொந்த பந்தங்களுக்குக் கொடுத்துவிடலாம். அடுத்த ஒரு மாதத்தில் அழகான வீடு எழுந்து நிற்கும். சாதாரண முறையில் கட்டடம் கட்டுவதைக் காட்டிலும், இந்த முறையில் கட்டினால் 30 சதவிகிதம் செலவு குறையும். இந்த நுட்பத்தில் இருநூறு ஆண்டுகளுக்கு முன்பு கட்டப்பட்ட கப்பல்கள்கூட, இன்றைக்கும் நன்றாக உள்ளன. வெளிநாடுகளில் இந்தத் தொழில்நுட்பத்தைப் பயன்படுத்தித்தான், கட்டடங்கள் கட்டப்பட்டு வருகின்றன. இந்த முறையின் மூலம் 10 அடுக்கு மாடிகளைக்கூட எளிதாகக் கட்டிவிடலாம். பூகம்பம், நில அதிர்வு ஏற்படும் பகுதிகளில், இந்தத் தொழில்நுட்பத்தில்தான், வீடு கட்ட வேண்டும் எனச் சர்வதேச அமைப்புகள் தொடர்ந்து சொல்லி வருகின்றன. இந்திய அளவில், ஆரோவில் பகுதியிலும் கேரளா மற்றும் குஜராத் மாநிலங்களிலும் ‘ஃபெர்ரோ சிமென்ட்’ மூலம் வீடு கட்ட வேண்டும் என்ற விழிப்பு உணர்வு ஏற்பட்டுள்ளது. இந்தத் தொழில்நுட்பத்தைப் பரவலாக்க, ஆர்வம் உள்ளவர்களுக்குப் பயிற்சிக் கொடுக்கவும் திட்டமிட்டுள்ளோம்.’’

தொடர்புக்கு, செல்போன்: 88257 22924.

விவசாயம், கால்நடை, மீன்வளம் மற்றும் சுற்றுச்சூழல் என்று பல துறைகள் பற்றி வாசகர்களின் சந்தேகங்களுக்கான பதில்களை உரிய நிபுணர்களிடம் பெற்றுத் தருவதற்காகவே ‘புறா பாண்டி’ சும்மா ‘பரபர’த்துக் கொண்டிருக்கிறார்.

நீங்கள் கேட்டவை: ரூ. 50 லட்சம் மானியம் தரும் தென்னை வளர்ச்சி வாரியம்!

உங்கள் கேள்விகளை ‘நீங்கள் கேட்டவை’, பசுமை விகடன், 757, அண்ணா சாலை, சென்னை-2 என்ற முகவரிக்குத் தபால் மூலமும், pasumai@vikatan.com என்ற முகவரிக்கு இ-மெயில் மூலமும், 99400 22128 என்ற எண்ணுக்கு வாட்ஸ்அப் மூலமும், facebook.com/PasumaiVikatan என்ற முகவரிக்கும், twitter.com/PasumaiVikatan என்ற முகவரிக்கும் அனுப்பலாம்.