Published:Updated:

சர்க்கரை நோயாளிகள் விரும்பும் ஆர்.என்.ஆர்-15048 அரிசி!

ஆர்.என்.ஆர்-15048 அரிசி
பிரீமியம் ஸ்டோரி
News
ஆர்.என்.ஆர்-15048 அரிசி

நீங்கள் கேட்டவை - புறா பாண்டி

‘‘ஆர்.என்.ஆர்-15048 அரிசி ரகத்தை ஆந்திர மாநிலத்திலுள்ள சர்க்கரை நோயாளிகள் விரும்பி வாங்கி உண்பதாகக் கேள்விப்பட்டேன். இது உண்மையா?

- எம்.ரவிசங்கர், மண்ணடி.

மூத்த வேளாண் விஞ்ஞானி, முனைவர் உதயகுமார் பதில் சொல்கிறார்.
புறா பாண்டி
புறா பாண்டி

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

‘‘ஆர்.என்.ஆர்-15048 நெல் ரகத்தை தெலங்கானா மாநிலம், ஹைதராபாத் ராஜேந்திர நகரிலுள்ள தெலங்கானா வேளாண் பல்கலைக்கழகத்தின் விஞ்ஞானிகள் 2015-ம் ஆண்டு வெளியிட்டார்கள். இப்போது இந்திய அளவில் இந்த அரிசியைத் தேடித் தேடி வாங்கிச் சாப்பிடுகிறார்கள். `சர்க்கரை நோயாளிகள் இந்த அரிசியைச் சாப்பிடலாம்’ என்று மருத்துவர்களும் பரிந்துரை செய்கிறார்கள்.

அரிசி
அரிசி

காரணம், இந்த அரிசியைச் சாப்பிடும்போது, ‘ரத்தத்தில் சர்க்கரை அளவு குறைவாகக் கலக்கிறது; கிளைசெமிக் இண்டெக்ஸ் (GI) குறைவாக உள்ளது’ என்கிறார்கள். அதாவது, நம் ஊரில் அதிகமாகச் சாப்பிடப்படும் பொன்னி, சோனா மசூரி மற்றும் சுருதி கோலம் போன்ற அரிசி ரகங்களை விஞ்ஞானிகள் ஆய்வு செய்தார்கள். பொன்னியில் 70, சோனா மசூரியில் 72, சுருதி கோலத்தில் 77 என்ற அளவில் கிளைசெமிக் அளவு இருந்திருக்கின்றன. `கிளைசெமிக் அளவு 55-க்குள் இருந்தால் அந்த அரிசியை சர்க்கரை நோயாளிகள் உண்ணலாம்’ என விஞ்ஞானிகள் கண்டறிந்திருக்கிறார்கள்.

இந்த ஆர்.என்.ஆர்-15048 ரகத்தின் கிளைசெமிக் அளவு 52தான். ஆகையால்தான் ‘சுகர் ஃப்ரீ அரிசி, சர்க்கரைநோய்க்கு ஏற்றது’ என்றெல்லாம் விளம்பரம் செய்யப்படுகிறது. இந்த கிளைசெமிக் அளவு குறைவாக இருப்பதால்தான் நம் பாரம்பர்ய ரகங்களான மாப்பிள்ளைச் சாம்பா, கவுனி அரிசியையும் சர்க்கரை நோயாளிகள் சாப்பிடலாம் என்று சொல்கிறார்கள்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

தென்னிந்தியாவில் சர்க்கரை நோயாளிகள் அதிகமாக இருப்பது தெலங்கானா மற்றும் ஆந்திராவில்தான். அடுத்த இடம் தமிழ்நாட்டுக்குத்தான். ஆனால், தமிழ்நாட்டில் இந்த நெல் ரகத்தை அதிகபட்சம் ஐந்து விவசாயிகளுக்கு மேல் சாகுபடி செய்திருக்க மாட்டார்கள். இது 125 நாள்கள் வயது கொண்டது. அனைத்துப் பகுதிகளிலும் சாகுபடி செய்யலாம். ஏக்கருக்கு 3,000 கிலோ மகசூல் கொடுக்கும் தன்மைகொண்டது. குறிப்பாக, இயற்கை வழிமுறையில் சாகுபடி செய்ய ஏற்ற ரகம். இதை எனக்குத் தெரிந்து திருவாரூர் மாவட்டத்தில் ஒரு விவசாயி தொடர்ந்து சாகுபடி செய்துவருகிறார். அடுத்து, திருவள்ளூர் மாவட்டம், பொன்னேரி பகுதியிலுள்ள விவசாயி மானாவாரியில் சாகுபடி செய்து நல்ல விளைச்சல் பெற்றிருக்கிறார்.

சர்க்கரை நோயாளிகள் விரும்பும் ஆர்.என்.ஆர்-15048 அரிசி!

இணையதளங்களில் ஒரு கிலோ அரிசி 150 ரூபாய்க்கு விற்பனை செய்கிறார்கள். இதிலிருந்தே இந்த அரிசிக்கு இருக்கும் தேவையை அறிந்துகொள்ளலாம். ஆந்திரா மற்றும் தெலங்கானா மக்கள் இதை அதிகமாகச் சாப்பிடுவது மட்டுமல்ல, அதிக அளவு சாகுபடியும் செய்கிறார்கள்.’’

தொடர்புக்கு, செல்போன்: 9442542915.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

‘‘செம்மறி ஆடு வளர்க்க விரும்புகிறோம். அதில் எத்தனை ரகங்கள் உள்ளன... அதன் சிறப்பு அம்சங்களைச் சொல்லுங்கள்?’’

- எஸ்.செண்பகம், ஆற்காடு

‘‘நம் நாட்டில் செம்மறி ஆடுகள் இறைச்சி உற்பத்திக்கும், கம்பளத்துக்கும் வளர்க்கப்படுகின்றன. இந்தியாவில் சுமார் 40-க்கும் மேற்பட்ட செம்மறி ஆட்டு இனங்கள் உள்ளன. தமிழகத்தில் மட்டும் எட்டு வகையான செம்மறி ஆட்டு இனங்கள் இந்திய வேளாண் ஆராய்ச்சிக் கழகத்தால் அங்கீகரிக்கப்பட்டுள்ளன. சென்னை சிவப்பு, மேச்சேரி, ராமநாதபுரம் வெள்ளை, கீழக்கரிசல், வேம்பூர் போன்ற இனங்கள் இறைச்சிக்காக வளர்க்கப்படுகின்றன. கம்பள உற்பத்திக்காக கோயம்புத்தூர் குரும்பை, திருச்சி கருப்பு, நீலகிரி செம்மறி ஆடுகள் வளர்க்கப்படுகின்றன. இவை கம்பள இழை உற்பத்திக்காக வளர்க்கப்பட்டபோதிலும் இறைச்சிக்கும்கூடப் பயன்படுத்தப்படுகின்றன.

செம்மறி ஆடு
செம்மறி ஆடு

செம்மறியாடுகள் எல்லாத் தட்பவெப்ப நிலையிலும் வளரும் தன்மைகொண்டவை. வெப்பப் பிரதேசங்களில் காணப்படும் ஆடுகள் உடல் வெப்பத்தைத் தணிக்கும் வகையில் கம்பளமில்லாத ரோமத்துடனும், நீண்ட கால்களுடனும், பெரிய வால், காது, கழுத்து அமைப்புகளுடனும் இருக்கும்.

குளிர்ப் பிரதேசங்களில் இருக்கும் செம்மறியாடுகள் ரோமத்துடன் காணப்படுவதால், மழைத் தண்ணீர் மற்றும் பனியின் குளிர் உடலில்பட்டு பாதிக்காதவாறு உள்ளன. `தீவனத் தட்டுப்பாடு உள்ள பிரதேசங்களில் வாழும் செம்மறியாடுகள் தங்களுக்குத் தீவனம் சரிவரக் கிடைக்காத காலங்களில் உபயோகித்துக்கொள்வதற்காகக் கொழுப்புச்சத்தைத் தங்கள் உடலில் சேமித்து வைத்துக்கொள்ளும் ஆற்றல் பெற்றவை’ என்று விஞ்ஞானிகள் சொல்கிறார்கள். செம்மறியாடுகள் புல்லின் மேற்பகுதியை மட்டும் மேய்வதால், மேய்ச்சல் தரைகள் அழிவதில்லை; மரங்களையும் அழிப்பதில்லை.

இவை மந்தையாகவே நடமாடுவதால் பராமரிப்பதும்கூட எளிது. நூறு ஆடுகளை மேய்க்க ஒரு ஆள் போதுமானது. செம்மறியாடுகளுக்குப் பெரிய அளவில் கொட்டகை தேவைப்படாது. திறந்தவெளியிலும் பட்டியிலும்கூட வளர்க்கலாம்.

மரப்பயிர்கள் சாகுபடி செய்துள்ள தோட்டங்களில் செலவில்லாமல் களையெடுக்கும் வேலைகளைச் செம்மறியாடுகள் செய்துவிடும். கூடவே, அவற்றின் கழிவுகளை உரமாகவும் வயலுக்குக் கொடுத்துவிடும். செம்மறியாடுகளை வளர்த்தே வாழ்க்கையில் உயர்ந்தவர்கள் இருக்கிறார்கள்.’’

சர்க்கரை நோயாளிகள் விரும்பும் ஆர்.என்.ஆர்-15048 அரிசி!

விவசாயம், கால்நடை, மீன்வளம் மற்றும் சுற்றுச்சூழல் என்று பல துறைகள் பற்றி வாசகர்களின் சந்தேகங்களுக்கான பதில்களை உரிய நிபுணர்களிடம் பெற்றுத் தருவதற்காகவே ‘புறா பாண்டி’ சும்மா ‘பரபர’த்துக்கொண்டிருக்கிறார். உங்கள் கேள்விகளை ‘நீங்கள் கேட்டவை’, பசுமை விகடன், 757, அண்ணா சாலை, சென்னை-2 என்ற முகவரிக்குத் தபால் மூலமும், pasumai@vikatan.com என்ற முகவரிக்கு இ-மெயில் மூலமும், 99400 22128 என்ற எண்ணுக்கு வாட்ஸ்அப் மூலமும், facebook.com/PasumaiVikatan என்ற முகவரிக்கும், twitter.com PasumaiVikatan என்ற முகவரிக்கும் அனுப்பலாம்.