Published:Updated:

வெகுமானம் தரும் வெண்பன்றி வளர்ப்பு! - 17 பன்றிகள், மாதம் ரூ. 30,000

வெண்பன்றி வளர்ப்பு
பிரீமியம் ஸ்டோரி
வெண்பன்றி வளர்ப்பு

கால்நடை வளர்ப்பு

வெகுமானம் தரும் வெண்பன்றி வளர்ப்பு! - 17 பன்றிகள், மாதம் ரூ. 30,000

கால்நடை வளர்ப்பு

Published:Updated:
வெண்பன்றி வளர்ப்பு
பிரீமியம் ஸ்டோரி
வெண்பன்றி வளர்ப்பு

“குறைந்த நாள்களில், குறைந்த முதலீட்டில், சாதாரண பராமரிப்பில் அதிக எடை, அதிக லாபம்… இவையெல்லாம் வெண்பன்றி வளர்ப்பில் மட்டுமே சாத்தியம்” என்று தன்னம்பிக்கையுடன் பேசுகிறார் தூத்துக்குடியைச் சேர்ந்த ராஜபெருமாள்.

ராஜபெருமாள்
ராஜபெருமாள்

தூத்துக்குடி மாவட்டம், ஆத்தூரிலிருந்து 3 கி.மீ தொலைவிலுள்ள கீரனூரில் இருக்கிறது ராஜபெருமாளின் வெண்பன்றிப் பண்ணை. கொட்டகைக்குள் பன்றிகளுக்குப் பசுந்தீவனமாக அகத்திக்கீரையைக் கொடுத்துக்கொண்டிருந்தவரிடம் பேசினோம்.

“12-ம் வகுப்பு வரைக்கும்தான் படிச்சேன். பிறகு அப்பாவுடன் விவசாய வேலைகளைப் பார்க்க ஆரம்பிச்சிட்டேன். அப்பா காலத்துல சிறிது ரசாயன உரம் கலந்துதான் விவசாயத்தைச் செஞ்சுட்டு வந்தோம். சின்ன வயசுல இருந்தே நான் விகடனின் தீவிர வாசகன். ‘பசுமைவிகடன் ஆரம்பிச்சதுல இருந்து இப்போ வரைக்கும் வாசிச்சிட்டு வர்றேன். அதுல, வெண்பன்றி வளர்ப்பு குறித்த கட்டுரை வெளியாகியிருந்தது. ஏற்கெனவே ஆடு, மாடு, கோழி, முயல்னு எனக்கு கால்நடைகள் வளர்ப்பு மீதான ஆர்வம் உண்டு. இதில், வித்தியாசமா வெண்பன்றி வளர்ப்பு குறித்து ‘பசுமை’யில் படிச்சதும் ஆர்வம் அதிகமாகிடுச்சு. முதலில் மூணு பன்றிப் பண்ணைகளைப் பார்வையிட்டேன். நெல்லையிலிருந்து 12 வெண்பன்றிக் குட்டிகளை வாங்கிட்டு வந்து வீட்டுக்குப் பின்னாடி தோட்டத்திலிருந்த கட்டடத்தில் அறை அமைச்சு, அதில் அடைச்சு வளர்க்க ஆரம்பிச்சேன். தீவனத்துக்காக வாழைக்காய், வாழையிலை, காய்கறிக் கழிவுகளைப் போட்டேன். ஆறு மாசத்துக்குப் பிறகு ஊருக்கு வெளியில இருக்கும் என் நிலத்துல கொட்டகை அமைச்சு வளர்க்க ஆரம்பிச்சேன். தனியாகப் பண்ணை ஆரம்பிச்சு 13 வருஷம் ஆகுது. இப்போ 15 தாய்ப் பன்றிகளும், இரண்டு ஆண் பன்றிகளும், 150 குட்டிகளும் இருக்குது” என்றவர் தீவனம் பற்றிப் பேசத் தொடங்கினார்.

ஒட்டுமொத்த விகடனுக்கும் ஒரே ஷார்ட்கட்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
வெகுமானம் தரும் வெண்பன்றி வளர்ப்பு! - 17 பன்றிகள், மாதம் ரூ. 30,000

ஹோட்டல் கழிவு, பசுந்தீவனம்!

தினமும் காலையில 9 மணியிலிருந்து 10 மணிக்குள்ள ஹோட்டல் கழிவுகளைப் போடுவோம். மதியம் 2 மணி முதல் 3 மணிக்குள்ள பெரிய பன்றிகளுக்கு மூணு கிலோவும், சின்னப் பன்றிகளுக்கு ரெண்டு கிலோவும், குட்டிப் பன்றிகளுக்கு அரைக்கிலோ அளவும் காய்கறிக் கழிவுகளைப் போடுவோம். மதியம் 5 மணி முதல் 6 மணிக்குள்ள மறுபடியும் ஹோட்டல் கழிவுகளைப் போடுவோம்.

கால்நடை வளர்ப்பு
கால்நடை வளர்ப்பு

காய்கறிக்கழிவுகள், ஹோட்டல் கழிவுகள் பற்றாக்குறை இருக்குற நாள்கள்ல அரிசித் தவிட்டை பிட்டுப் பதத்தில் பிசைஞ்சு பெரிய பன்றிகளுக்கு ரெண்டு கிலோவும், சிறிய பன்றிகளுக்கு ஒரு கிலோவும், குட்டிகளுக்கு அரைக்கிலோவும் வைப்போம்.

பன்றி வளர்ப்பில் அருவருப்பு இல்லாமல் ஆர்வம் இருக்கணும். மூன்று மாநில பன்றிப் பண்ணைகளுமே விற்பனைக்குக் கேரளாவை நம்பித்தான் இருக்குது.

காலை, மதியம், மாலை மூணு வேளையும் தண்ணீர்த் தொட்டியில தண்ணியை மாத்திக்கிட்டே இருக்கணும். ஒவ்வொரு தடவையும் தண்ணி வைக்குறதுக்கு முன்னாடி பன்றிக்கழிவுகளை அகற்றிடணும். இதுதவிர, வாரத்துக்கு ஒரு முறை முருங்கைக்கீரை அல்லது அகத்திக்கீரையை மதியவேளையில கொடுக்கலாம்’’ என்றவர் விற்பனை மற்றும் வருமானம் குறித்துப் பேசத் தொடங்கினார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கால்நடை வளர்ப்பு
கால்நடை வளர்ப்பு

120 குட்டிகள், ஆண்டுக்கு ரூ.11,88,000 வருமானம்!

‘‘15 பெண் பன்றிகள் மூலமா, சராசரியாக வருஷத்துக்கு 120 குட்டிகள் கிடைக்குது. ஒரு பன்றி, 90 கிலோ எடையில, கிலோ 110 ரூபாய்னு விற்பனை செய்யறேன். அந்தக் கணக்குல 120 குட்டிகள் விற்பனை மூலம் வருஷத்துக்கு 11,88,000 ரூபாய் வருமானம் கிடைக்கும். அதாவது மாசத்துக்கு 99,000 ரூபாய் வருமானம். இதுல வேலையாள் கூலி, மருத்துவச் செலவு, தீவனம் உள்ளிட்ட செலவுகளுக்கு மாசம் 70,000 ரூபாய்க்கு மேல செலவாகும். இதைக் கழிச்சுப் பார்த்தா மாசத்துக்கு 30,000 ரூபாய் அளவுக்கு லாபம் கிடைச்சுடும். பன்றிகளுக்கான தீவனச் செலவுகளை எவ்வளவு குறைக்கிறோமோ அந்த அளவுக்கு லாபமும் கிடைக்கும்.

பண்ணையில் பன்றிகள்
பண்ணையில் பன்றிகள்

ஆரம்பத்திலிருந்து கேரளாவில்தான் விற்பனை செய்யறேன். தமிழ்நாடு, ஆந்திரா, கர்நாடகா ஆகிய மூணு மாநில பன்றிப் பண்ணைகளுமே கேரளாவை நம்பித்தான் இருக்குது. பண்ணைக்கே வந்து எடைபோட்டு பன்றிகளை ஏத்திட்டுப் போறாங்க” என்றவர் இறுதியாக, ‘‘பன்றி வளர்ப்பில் அருவருப்பு கூடாது; ஆர்வம் இருக்கணும்.

“காய்கறிக்கழிவுகள், ஹோட்டல் கழிவுகள் பற்றாக்குறை இருக்குற நாள்கள்ல அரிசித் தவிட்டை பிட்டுப் பதத்தில் பிசைஞ்சு பன்றிகளுக்கு உணவாகக் கொடுப்போம்.”

உருவம், உறுமல் சத்தத்துக்கு பயப்படக் கூடாது. பழகிட்டா சாதுவான பிராணியாகிடும். தினமும் பண்ணையின் சுத்தம், பன்றிகளின் சுத்தம். இதை மட்டும் கடைப்பிடிச்சாலே பன்றி வளர்ப்பில் நல்ல லாபம் பார்க்கலாம்” எனச் சிரித்தபடி விடைகொடுத்தார்.

தொடர்புக்கு, ராஜபெருமாள், செல்போன்: 86800 42077

பன்றிகள் தேர்வில் கவனம்!

னப்பெருக்கம் அல்லது வளர்ப்புக்காகத் தேர்வு செய்யப்படும் பன்றிகளில் கவனமாக இருக்க வேண்டும். ஆறு முதல் ஏழு மாதக் குட்டிகளாகவும், உடல் திரட்சியாகவும் இருக்க வேண்டும். ஆண் பன்றியாக இருந்தால் 90 முதல் 100 கிலோ எடையுடன், உடல் நீளவாக்கில் இருக்க வேண்டும். முன்னங்கால் குட்டையாகவும், பின்னங்கால் சற்று நீண்டும், காதுகள் விரைப்பாகவும் இருக்க வேண்டும்.

பெண் பன்றியாக இருந்தால் 80 முதல் 90 கிலோ எடையுடன், உடல் வளைந்தும், அடிவயிற்றுப் பகுதியில் 12 முதல் 14 காம்புகளுடனும் இருக்க வேண்டும். வளர்ப்புக்காகப் பண்ணைக்குப் புதிதாக வாங்கி வரும் பன்றிகளுக்கு உரிய தடுப்பூசிகள் போட்டு, 15 நாள்கள் வரை தனி அறையில் அடைக்க வேண்டும். இந்த நாள்களில் அவை வழக்கமான தீவன முறைக்கு மாறிவிடும். அத்துடன் நோய்த்தாக்குதல் ஏதாவது இருக்கிறதா என்பதையும் கண்டறிந்து, அதன் பிறகு பன்றிகளுடன் அடைக்கலாம்.

ஆண்டுக்கு இரண்டு ஈத்துகள்!

பெண் பன்றிகள் எட்டாம் மாதத்தில் பருவத்துக்கு வரும். உறுமல் சத்தத்துடன் சரியாகத் தீவனம் எடுக்காமல் அடிக்கடி சிறுநீர் கழித்துக்கொண்டேயிருக்கும். இனப்பெருக்க உறுப்புகள் தடித்தும் சிவந்தும் காணப்படும். இது சினைப் பருவத்துக்கான அறிகுறி. ஆறு மாதங்களுக்கு ஒரு முறை என ஆண்டுக்கு இரண்டு முறை ஈத்துக்கு வரும். `ஐந்து பெண் பன்றிகளுக்கு ஒரு ஆண் பன்றி’ என்ற விகிதத்தில் இணை சேர்க்கலாம். ஆண் பன்றி இருக்கும் அறைக்குள் பெண் பன்றியை அடைத்துவிட்டால், மூன்று முதல் ஐந்து நாள்களுக்குள் இணை சேர்ந்துவிடும்.

இணை சேர்த்ததிலிருந்து 110 முதல் 115-வது நாளுக்குள் குட்டிகள் போடும். 10 நாள்களுக்கு முன்னரே சினைப்பன்றியைத் தனிமைப்படுத்தி, கவனமாகக் கண்காணித்து வர வேண்டும். ஒரு பன்றி, ஒரே ஈத்தில் குறைந்தபட்சம் எட்டு குட்டிகள் முதல் அதிகபட்சமாக 13 குட்டிகள் வரை ஈனும். குட்டிபோட்ட அன்றே ஆண், பெண் பன்றிகளை அடையாளம் காணலாம். 55 முதல் 60-வது நாளுக்குள் குட்டிகளைப் பிரித்துவிட வேண்டும். குட்டிகளைப் பிரித்த 15 நாள்களுக்குள் தாய்ப் பன்றிகள் மீண்டும் இணைசேரத் தயாராகிவிடும்.

கொட்டகைச் சுத்தம் அவசியம்!

ன்றி வளர்ப்பைப் பொறுத்தவரை மேய்ச்சல் முறையைவிடக் கொட்டகை முறையே சிறந்தது. பெரிய பன்றிகளுக்கான ஒரு அறை, பத்தடி நீளம், ஒன்பதடி அகலம், நான்கடி உயரம் இருப்பதுபோல அமைத்துக்கொள்ள வேண்டும். (இது ஆறு பன்றிகள் அடைப்பதற்கான அளவு) குட்டிப்பன்றிகளைத் தனியாக அடைக்க 15 அடி நீளம், 10 அடி அகலத்தில் அறை அமைத்துக்கொள்ள வேண்டும். பன்றிகளின் எண்ணிக்கைக்கு ஏற்பக் கூடுதலாக அறைகளை அமைத்துக்கொள்ளலாம்.

தரைத்தளத்தில் சொரசொரப்பான கற்கள் அல்லது கடப்பாக்கல் பதிக்கலாம். சிறுநீர், பன்றிகளைக் குளிப்பாட்டும் தண்ணீர் தேங்கி நிற்காதபடி தரையைச் சரிவாக அமைக்க வேண்டும். சினைப் பன்றிகள், ஆண் பன்றிகள், குட்டிப்பன்றிகள் எனப் பிரித்து, தனித்தனி அறைகளில் அடைக்க வேண்டும். தினமும் காலையில் முந்தைய நாளில் மீதமான தீவனக் கழிவுகள், பன்றிக் கழிவுகள் ஆகியவற்றை அப்புறப்படுத்திவிட்டு, அறையைச் சுத்தம் செய்து, பன்றிகளைக் குளிப்பாட்ட வேண்டும்.

தடுப்பூசி அவசியம்!

பிறந்த குட்டிகளுக்கு ரத்தச்சோகை ஏற்படாமலிருக்க மூன்று நாள்களுக்குள் குட்டிகளுக்கும் தாய்ப்பன்றிகளுக்கும் கால்நடை மருத்துவரால் பரிந்துரைக்கப்பட்ட இரும்புச்சத்து ஊசி போட வேண்டும். ஐந்து முதல் ஏழு நாள்களுக்குள் பல் வெட்ட வேண்டும். 45 நாள்களுக்குள் ஆண் குட்டிகளுக்கு ஆண்மை நீக்கம் செய்ய வேண்டும்.

கழிச்சல்நோய் வராமலிருக்கத் தடுப்பூசியும், ஆறாம் மாதத்தில் பன்றிக்காய்ச்சல் தடுப்பூசியும், ஆண்டுக்கு ஒரு முறை கோமாரிநோய்த் தடுப்பூசியும் போட வேண்டும். ஐந்தாம் மாதத்துக்குப் பிறகு ஆண், பெண் பன்றிகளைத் தனித்தனியே பிரித்துவிட வேண்டும். இரண்டு மாதங்களுக்கு ஒரு முறை அனைத்துப் பன்றிகளுக்கும் குடற்புழு நீக்கம் செய்ய வேண்டும். இவற்றைக் கால்நடை மருத்துவரின் பரிந்துரைப்படி செய்ய வேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism