Published:Updated:

காற்று அடித்தாலும் கதிர் சாயாத நெல் ரகம்! - பாரம்பர்ய விதைகளைப் பாதுகாக்கும் கல்லூரிப் பேராசிரியர்!

கொட்டாரச் சம்பா நெல் வயலில் சாலமன் ஜீவா
பிரீமியம் ஸ்டோரி
கொட்டாரச் சம்பா நெல் வயலில் சாலமன் ஜீவா

பாரம்பர்யம்

காற்று அடித்தாலும் கதிர் சாயாத நெல் ரகம்! - பாரம்பர்ய விதைகளைப் பாதுகாக்கும் கல்லூரிப் பேராசிரியர்!

பாரம்பர்யம்

Published:Updated:
கொட்டாரச் சம்பா நெல் வயலில் சாலமன் ஜீவா
பிரீமியம் ஸ்டோரி
கொட்டாரச் சம்பா நெல் வயலில் சாலமன் ஜீவா
‘விதைகளே பேராயுதம்’ என்ற நம்மாழ்வாரின் கருத்து ஏற்படுத்திய தாக்கத்தால் இயற்கை விவசாயத்துக்கு மாறியிருக்கிறார் கன்னியாகுமரி மாவட்டம் புத்தளம் பகுதியைச் சேர்ந்த கல்லூரிப் பேராசிரியர் சாலமன் ஜீவா. கல்லூரிப் பணிகளுக்கிடையில் கடந்த 13 ஆண்டுகளாகக் கன்னியாகுமரி மாவட்டத்தின் பாரம்பர்ய நெல் விதைகளைச் சேகரித்து, பாதுகாத்து வருகிறார். புத்தளத்தில் உள்ள நெல் வயலைக் கண்காணித்துக் கொண்டிருந்த சாலமன் ஜீவாவை, ஓர் காலைவேளையில் சந்தித்து உரையாடினோம்.

“எங்க குடும்பம் பாரம்பர்யமா விவசாயக் குடும்பம்தான். தாத்தா விவசாயம் பண்ணிகிட்டிருந்தார். அப்பா புத்தளம் ஸ்கூல்ல ஆசிரியரா வேலை பார்த்துகிட்டே, விவசாயம் செய்துகிட்டிருந்தார். இப்ப ஓய்வு பெற்றதுக்கு அப்புறமும் விவசாயம் செய்துகிட்டுதான் இருக்கிறாரு. அப்பா, தாத்தா எல்லாம் இயற்கை முறையில விவசாயம் செய்துகிட்டிருந்தாங்க. கல்லூரியில தாவரவியல் பேராசிரியரா இருக்கிறேன். அதனால தாவரங்கள் பத்தி அறிவியல்பூர்வமான விஷயங்கள் தெரியும்.அதனால ‘அட்வான்ஸ் டெக்னாலஜி’ பயன்படுத்தி விவசாயம் பண்ணணும்னு நினைச்சேன். அதுக்காக ரசாயன உரம் பயன்படுத்திதான் ஆரம்பத்துல விவசாயம் செய்தேன். அந்தச் சமயத்துல என் அம்மா, ‘அப்பா, தாத்தா எல்லாம் எவ்வளவு அழகா விவசாயம் பண்ணிகிட்டிருக்காங்க. நீ என்னன்ன சாக்கு கணக்கில யூரியா சுமந்துகிட்டு கெடக்கிற’ன்னு கிண்டலா கேட்பாங்க. நான் ரசாயனம் மூலம் விளைவிக்கிறத காட்டிலும் அப்பா நிறைய நெல் விளைவிச்சார்’’ என்று சொல்லிச் சிரித்தவர், தான் இயற்கை வழி வேளாண்மைக்கு வந்த விதம் குறித்துப் பேசினார்.

கள்ளன்சம்பா பாரம்பர்ய நெல் சாகுபடி வயல்
கள்ளன்சம்பா பாரம்பர்ய நெல் சாகுபடி வயல்

தாக்கத்தை ஏற்படுத்திய புத்தகம்

‘‘2003-ம் ஆண்டு நான் காலேஜ் படிக்கும்போதே நம்மாழ்வார் பத்திக் கேள்விப்பட்டிருந்தேன். ரசாயன விவசாயத்தை அம்மா விமர்சித்ததுமே நம்மாழ்வார்தான் நினைவுக்கு வந்தார். உடனே இயற்கை விவசாயத்துக்கு மாறிட்டேன். நம்மாழ்வார் எழுதிய ‘விதைகளே பேராயுதம்’ங்கிற புத்தகம் என் மனசுல பெரிய தாக்கத்தை ஏற்படுத்திச்சு. அதுக்கு பிறகுதான் கன்னியாகுமரி மாவட்டத்தோட பாரம்பர்ய நெல் ரகங்களோட விதைகளைத் தேடிப் பயணப்பட்டேன்” என்றவர் விதைச் சேகரிப்பு குறித்து விவரித்தார்.

“கன்னியாகுமரி மாவட்ட மண்ணுக்கு ஏத்த விதைகள் என்னன்னு தேட ஆரம்பிச்சேன். நாம இழந்த பாரம்பர்ய விதைகளைத் திரும்பக் கொண்டுவரணும்னு என்னுடைய பயணம் தொடர்ந்தது. பழைய நெல் ரகங்களுக்குப் பெயர்களையும், எந்தச் சீசன்ல எதைப் போடுவாங்கன்னும் அப்பாகிட்ட கேட்டுத் தெரிஞ்சிகிட்டேன். பிறகு ஒவ்வொரு இடமா போய் விவசாயிகளைச் சந்திச்சு விதைகளைச் சேகரிக்கத் தொடங்கினேன். இதுவரைக்கும் கன்னியாகுமரி மாவட்டத்தோட 61 வகையான பாரம்பர்யமான நெல் ரகங்களைச் சேகரிச்சிருக்கிறேன்.

கொட்டாரச் சம்பா நெல் வயலில் சாலமன் ஜீவா
கொட்டாரச் சம்பா நெல் வயலில் சாலமன் ஜீவா

இந்த வருஷம் இருக்க விதையை அடுத்த வருஷம் அதே சீசன்ல முளைக்கப் போடணும். இல்லைன்னா அது முளைக்கும் தன்மையை இழந்திடும். அதனாலதான் ஒவ்வொரு சீசன்லயும் நெல்லைப் போட்டுப் போட்டு விதைகளைச் சேகரிச்சு பாதுகாத்துட்டு வர்றேன். எனக்கு மொத்தம் 5 ஏக்கர் வயல் இருக்கு. அதுல ஒரு ஏக்கர் நிலத்தில ஒரு சதுர மீட்டர்ல ஒரு ரகம்னு எல்லா வகையான நெல் ரகங்களையும் ஒவ்வொரு சீசன்லயும் நடவு செய்திருக்கிறேன்’’ என்றவர் அந்த நிலத்துக்கு நம்மை அழைத்துச் சென்றார்.

‘‘இந்த வயல்ல நீங்க பார்த்தீங்கன்னாத் தெரியும். ஒவ்வொரு பயிரும் ஒரு விதமா இருக்கும். அறுவடை செய்யும்போது சரியா தரம் பிரிச்சு அறுத்து விதைகளைச் சேகரிப்பேன். சில ரகங்களை நண்பர்களிடம் கொடுத்துப் பயிரிட சொல்லி, 61 நெல் ரகங்களையும் பாதுகாத்துகிட்டிருக்கிறேன். மற்ற ஊர்கள்ல இருக்க ரகங்களைப் பல அமைப்புகள் சேகரிச்சு வெச்சிருக்கிறாங்க. ஆனா, நம்ம ஊர் நெல் ரகங்களை நாமதான் பாதுகாக்கணும். நம்ம மண்ணுக்குரிய நெல் ரகங்களைக் கைவிட்டுடக் கூடாது. அதனால பாரம்பர்ய விதைச் சேகரிப்பைக் கடந்த 13 வருஷமா செய்துகிட்டு வர்றேன். எனக்கு எப்ப நேரம் கிடைக்குமோ அந்தச் சமயத்தில எல்லாம் விதை தேடல்ல ஈடுபடுறேன்” என்றவர் நெல் சாகுபடி செய்யும் பருவம் குறித்து பேசினார்.

காற்று அடித்தாலும் கதிர் சாயாத நெல் ரகம்! - பாரம்பர்ய விதைகளைப் பாதுகாக்கும் கல்லூரிப் பேராசிரியர்!

வால்சிறை மீண்டான்

“கன்னியாகுமரி மாவட்டத்தில ரெண்டு போகமா நெல் பயிரிடுறாங்க. கன்னிப்பூ, கும்பப்பூ அப்பிடிங்கிற பேர்ல ரெண்டு போகங்களையும் சொல்வாங்க. சில இடங்கள்ல சம்பாப்பூ, வால்சிறை மீண்டான்பூ அப்பிடின்னும் சொல்வாங்க. சம்பாப் பூ போகத்துல அதிகமா கட்டிச்சம்பா, கள்ளன்சம்பா நெல் ரகங்கள் பயிரிடுறாங்க. அடுத்ததா வால்சிறை மீண்டான் பூ போகத்துல வால்சிறை மீண்டான் வகை நெல்லைப் பயிரிட்டு வந்திருக்கிறாங்க. இது நீண்டநாள் பயிர். மற்ற பயிர்களெல்லாம் 135 நாள்கள்ல விளையும். வால்சிறை மீண்டான் 160 நாள்கள் பயிர். அந்தக் காலத்தில ‘பத்திய கஞ்சி’ தயாரிக்க வால்சிறை மீண்டான் அரிசியைப் பயன்படுத்தியிருக்கிறாங்க. சுலபமா செரிமானம் ஆகும்கிறதுக்காகச் சுகமில்லாதவங்களுக்கு (நோயாளிகள்) இந்த அரிசிக் கஞ்சி கொடுப்பாங்க” என்றவர் மேலும் சில நெல் ரகங்களைப் பற்றியான தகவல்களை அடுக்கினார்.

வெட்டையில் முட்டி மொட்டைக் குறுவை

“வால்சிறை மீண்டான் நெல் பயிரிட்ட பிறகு அதிக மழை காரணமா பயிர் அழிஞ்சுபோச்சுன்னா, உடனே வீரடங்கான் ரக நெல்லைப் பயிரிட்டு வந்திருக்கிறாங்க. அந்த நெல் 90 நாளிலேயே பயிராகிடும். வீரடங்கான் ரகத்தை ராதாபுரம் பக்கத்துல சீலாத்தி குளம்ங்கிற பகுதியில ஒரு விவசாயிகிட்ட இருந்து சேகரிச்சேன். போன வருஷம் வீரடங்கான் பயிரிட்டோம். இந்த வருஷமும் போட்டிருக்கேன். மத்தபடி அரிக்கிராவி, வரவழகி, அன்னம் அழகி, மைக்குறுவை, பனங்குறுவை, காடை கழுத்தான், செம்ப மார்த்தாண்டான்’னு பல ரகப் பாரம்பர்ய நெல்களைச் சேகரிச்சேன். அதில், ‘வெட்டையில் முட்டி மொட்டைக் குறுவை’ என்ற ஒரு ரகம் இருக்கு. இது நல்லா காத்தடிச்சி கதிர் தரையில சாய்ஞ்சாலும் நெல் உதிர்ந்துபோகாது. கருங்குறுவை போன்ற ரகங்கள் எல்லாம் காத்தடிச்சாலே உதிர்ந்துபோகும்.

காற்று அடித்தாலும் கதிர் சாயாத நெல் ரகம்! - பாரம்பர்ய விதைகளைப் பாதுகாக்கும் கல்லூரிப் பேராசிரியர்!

ஆரல்வாய்மொழி பகுதியில காத்து அதிகமா அடிக்கிறதுனால அங்க ‘வெட்டையில் முட்டி மொட்டைக் குறுவை’ ரகம் விளைவிக்கப்பட்டிருக்கு. அடுத்ததா ‘பூதகாளி கருப்பன்’ அப்பிடின்னு ஒருவகை நெல் ரகம் இருக்கு. அந்த நெல்லைப் பார்த்தா கரு கருன்னு இருக்கும். தெள்ளாந்தி பகுதியில இந்த நெல்லு அதிகமா பயிரிட்டிருக்காங்க. நெல்லைப் பார்க்கிறதுக்கு அழகா இருக்கும்ங்கிறதுனால ‘அன்னம் அழகி’ங்கிற பெயரை ஒரு ரகத்துக்கு வெச்சிருக்கிறாங்க. கொட்டாரச் சம்பான்னு ஒரு ரகம் இருக்கு. அதில் நார்ச்சத்து அதிகம். கொழுப்பைக் குறைக்கும் தன்மை அந்த நெல்லுல இருக்கு. கொட்டாரச் சம்பா, கட்டிச்சம்பா நெல்லோட தவிட்டைச் சிறுநீரக நோயாளிகளுக்குக் கொடுக்கிறாங்க. அந்த அளவுக்கு மருத்துவக் குணம் நிறைஞ்சதுனு சொல்றாங்க.

இலங்கை ரகங்களும் இருக்கு

180 நாள்கள்ல பயன் தரும் ‘வல்லரக்கன்’ ரக நெல் இருக்கு. இப்படிக் கன்னியாகுமரி மாவட்ட மண்ணில் மட்டும் விளையக்கூடிய பல ரகங்கள் இருக்கு. இதுபோக வெளியே உள்ள சில நெல் ரகங்களும் வெச்சிருக்கேன். மதுரை செந்நெல், கறுப்புக்கவுனி மாதிரி 10 வகை நெல் விதைகளைப் பாதுகாத்து வெச்சிருக்கேன். தமிழ் ஈழத்தில் (இலங்கை) உள்ள 10 ரகப் பாரம்பர்ய நெல் ரகங்களையும் பாதுகாத்து வெச்சிருக்கிறேன். முத்துச் சம்பா, கீரிச்சம்பா, கோரச்சம்பா, வாய்க்கால் விரியன், வரப்பு விரியன், வெள்ளை மொட்டை, மொட்ட சிவப்பு, முருங்கைக்காயன் மாதிரியான இலங்கை ரகங்களும் இருக்குது. முருங்கைகாயன், அங்க உள்ள ஒரு பிரபலமான ரகம். வழக்கமா அரிசியோட மேல் பகுதி சிவப்பா இருக்கிறதைப் பார்த்திருப்பீங்க. ஆனா, கோரச்சம்பா அரிசியை உடைச்சு பார்த்தா உள்ளேயும் சிவப்பாகவே இருக்கும். இந்தியா முழுசும் ஒரு லட்சத்துக்கு மேல நெல் ரகங்கள் இருந்திருக்கு” என்றவர் தனது இயற்கை விவசாய அனுபவங்களைப் பகிர்ந்துகொண்டார்.

“நான் 2010-ம் வருஷத்துல இருந்து இயற்கை விவசாயம் பண்ண ஆரம்பிச்சேன். அப்ப என்னைப் பார்த்து ‘இயற்கை போகுது, நாட்டு விவசாயி’னு நண்பர்கள் கிண்டல் பண்ணினாங்க. நான் இயற்கை விவசாயத்துல ஜெயித்த பிறகு எல்லோரும் என் வழியை ஏத்துக்கிட்டாங்க. இப்ப எங்க ஊர்லயே இருபதுக்கும் அதிகமான விவசாயிகள் இயற்கை முறைக்கு மாறிட்டாங்க. முதல்ல நான் பஞ்சகவ்யா, ஜீவாமிர்தம் எல்லாம் போட்டு நிலத்தை வளப்படுத்தினேன். அதனால வயல் எப்பவும் வளமாகவே இருக்கும். ‘அடி காட்டுக்கு, நடு மாட்டுக்கு, நுனி வீட்டுக்கு’ இதை நம்மாழ்வார் அடிக்கடி சொல்வார். அதன்படி வயல்ல இருந்து எடுக்கிறதில நமக்குத் தேவைப் போக மீதியை வயலுக்கே உணவா கொடுத்தா நிலம் வளமா இருக்கும்.

ரசாயனத்தில இருந்து இயற்கை முறைக்கு மாறின பிறகு லாபம் அதிகமாக ஆரம்பிச்சது. ரசாயனத்துல விளைவிச்ச நெல் ஒரு கோட்டை (87 கிலோ) 1,200 ரூபாய்க்கு விற்றது. இயற்கை முறையில விளைவிச்ச நெல் ஒரு கோட்டை 2,500 ரூபாய்க்கு விற்பனை ஆகுது. ஊர்ல உள்ளவங்களே நெல்லைப் போட்டிபோட்டு வாங்கிட்டு போறாங்க. மிச்சமுள்ள நெல்லை நாகர்கோவில்ல இருக்க ‘வரபிரசாதம்’ங்கிற நம்மாழ்வார் இயற்கை அங்காடிக்குக் கொடுக்கிறேன். அவங்க ஒரு கிலோ நெல்லுக்கு 30 ரூபாய் தர்றாங்க’’ என்றவர் நிறைவாக,

‘‘ரசாயனத்துல கிடைக்கிற விளைச்சலைவிட, இயற்கை விவசாயத்துல அதிக விளைச்சல் எடுக்க முடியுது. ரசாயனத்துல லாபம் கிடைச்சா கிடைக்கும், இல்லைன்ன இல்ல. சில சமயத்துல போட்ட பணமும், நெல் விற்றுக் கிடைக்கிற தொகையும் சமமா இருக்கும். ஆனா இயற்கை விவசாயத்துல கண்டிப்பா லாபம் கிடைக்கும்’’ என்றார் நம்பிக்கையுடன்.

தொடர்புக்கு, சாலமன் ஜீவா, செல்போன்: 99522 02112

ஒரு ஏக்கருக்கு 50,000 ரூபாய்!

நெ
ல் சாகுபடியில் வருமானம் குறித்து பேசிய சாலமன் ஜீவா, ‘‘இயற்கை விவசாயம்னாலே பாரம்பர்ய நெல் ரகங்களைத்தான் போடணும். இப்ப உள்ள வீரிய ரகங்களெல்லாம் பூச்சிகளுக்குத் தாக்குப்பிடிக்காது. நம்ம பாரம்பர்ய நெல்லுக்கு நோய் வராது, வறட்சியையும் தாங்கும். பசுந்தாள்களை அடியுரமா போடுறதுனால களையும் குறைவாகத்தான் வளரும். நான் நேரடியா நெல்லை விதைச்சு பயிர் செய்யுறேன். இதனால விதை குறைவா செலவாகும். நடுவதற்கான செலவு இல்ல. அந்தத் தொகையை முதல் களை எடுக்கிறதுக்குக் கூலியா கொடுப்பேன். ஒருமுறை மட்டும்தான் களை எடுப்பேன். நிலம் வளமில்லாம இருந்தாத்தான் களை வரும். நம்ம நெல் வேகமா வளருறதுனால அந்த நிழல்ல களை, ஒரு கட்டத்துக்குமேல வளராது.

இயற்கை விவசாயத்துல ஒரு ஏக்கருக்குச் செலவு 10,000 ரூபாய். ஒரு ஏக்கர்ல சராசரியா 25 கோட்டை நெல் கிடைச்சாலும் சுமார் 62,500 ரூபாய் கிடைக்கும். செலவு போகச் சுமார் 50,000 ரூபாய் லாபம் கிடைக்கும்” என்றார்..

கன்னியாகுமரியின் தனிச்சிறப்பு ரகங்கள்

வி
தைநெல் சேகரிப்பு தொடர்பாகப் பேசிய சாலமன் ஜீவா, “ரிச்சார்யாங்கிறவர் 40,000 நெல் ரகங்களைச் சேகரிச்சு வெச்சிருக்கிறார். பசுமைப் புரட்சிக்குப் பிறகு இந்த ரகங்களெல்லாம் போயிடுச்சி. பலர் வெவ்வேறு பகுதிகளில விளையுற நெல் ரகங்களைச் சேகரிச்சு வெச்சிருக்கிறாங்க. ஆனா கன்னியாகுமரி மாவட்ட நெல் ரகங்களை யாரும் சேகரிச்சதா தெரியல. அதனாலதான் நான் அந்த முயற்சியில இறங்கினேன். கன்னியாகுமரி மாவட்ட நெல் ரகங்கள் மற்ற மாவட்டத்துக்கு ஒத்துவராது. இங்க அதிகமா மழை பெய்யும். குளத்துத் தண்ணீர் பாசனத்துல விவசாயம் செய்யுறாங்க. மற்ற மாவட்டங்கள்ல பூமிக்கடியில கிடைக்கிற போர் தண்ணியில விவசாயம் செய்யுறாங்க.நான் கல்லூரியில வேலை பார்த்துகிட்டே இயற்கை விவசாயத்தையும், பாரம்பர்ய விதைத் தேடறதையும் ஒரு வழக்கமாக வெச்சுட்டு இருக்கேன்’’ என்கிறார்.

இது தொழில் இல்லை... கலாசாரம்!

“2007-ம்
வருஷத்தில இருந்தே நெல் விதைகளைச் சேகரிக்கத் தொடங்கினேன். ஒரே நெல் ரகத்துக்கு ஒவ்வோர் இடத்துலயும் ஒவ்வொரு பெயர் வெச்சிருக்கிறாங்க. அந்த வகையெல்லாம் கண்டுபிடிச்சு விதைகளைத் தரம் பிரிச்சு வெச்சிருக்கேன். சில விவசாயிகள்கிட்ட இருந்து காசு கொடுத்து விதை வாங்கியிருக்கிறேன். பலர் விவசாயம் மேல இருக்க ஆர்வத்தால இலவசமாகத்தான் விதை கொடுத்தாங்க. விவசாயம் மேல ஆர்வம் உள்ளவங்க அதைத் தொழிலாப் பார்க்கமாட்டாங்க... நம்ம கலாசாரமா பார்க்கிறாங்க’’ என்கிறார் சாலமன் ஜீவா.

கல்லூரித் தோட்டம்

யற்கை முறையில் பாரம்பர்ய நெல் பயிரிடும் சாலமன் ஜீவா, வயல் ஓரத்தில் வெண்டை, கத்திரி என வீட்டுக்குத் தேவையான காய்கறிகளையும் பயிர் செய்கிறார். மேலும் கல்லூரி மாணவர்களிடம் இயற்கை விவசாயத்தை ஊக்குவிக்கும் விதமாகக் கல்லூரியில் காய்கறித் தோட்டம் போட்டு, அதில் விளையும் காய்கறிகளை மாணவர்களே எடுத்துக்கொள்ள வழிவகைச் செய்திருக்கிறார். காய்கறி விதைகளை மாணவர்களிடம் கொடுத்து, வீட்டுத்தோட்டம் உருவாக்கவும் வழிகாட்டுகிறார். “நம்மாழ்வார் சொன்ன கருத்துகளை நாம செயல்படுத்துவதோடு, அதைப் பரப்பும் முயற்சியா கல்லூரி மாணவர்களிடம் எடுத்துச் செல்கிறேன்” என்கிறார் சாலமன் ஜீவா.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism