Published:Updated:

சட்டம் : வேளாண்மைத்துறை ஏன் உருவாக்கப்பட்டது?

வேளாண்மை
பிரீமியம் ஸ்டோரி
வேளாண்மை

சட்டப்பஞ்சாயத்து வழிகாட்டும் தொடர்... - 19

சட்டம் : வேளாண்மைத்துறை ஏன் உருவாக்கப்பட்டது?

சட்டப்பஞ்சாயத்து வழிகாட்டும் தொடர்... - 19

Published:Updated:
வேளாண்மை
பிரீமியம் ஸ்டோரி
வேளாண்மை

மிழகத்தில் வேளாண்மை மற்றும் வேளாண் சார்ந்த தொழில்களே பெரும்பாலான மக்களின் வாழ்வாதாரமாக விளங்குகின்றன. எனவே, வேளாண்மையில் நீடித்த நிலையான உற்பத்தியைக் கொண்டுவர வேண்டிய முக்கியப் பொறுப்பு வேளாண்மைத்துறைக்கு இருக்கிறது. வேளாண்மைத்துறையின் பணிகள், செயல்பாடுகள் குறித்துப் பார்ப்போம்.

சிவ.இளங்கோ
சிவ.இளங்கோ

இந்தியப் பஞ்ச ஆணையம் 1880-ம் ஆண்டின் பரிந்துரைபடி வேளாண்மைக்கான ஒரு தனித்துறை 1882-ம் ஆண்டு உருவாக்கப்பட்டது. அதைத் தொடர்ந்து 1904-ம் ஆண்டு வேளாண்மை இயக்குநரைத் தலைவராகக்கொண்டு தேவையான பணியாளர்களுடன் வேளாண்மைத்துறை உருவாக்கப்பட்டது. பொதுக் கல்வித்துறையின் கீழிருந்த வேளாண்மைக் கல்லூரி, 1905-ம் ஆண்டு வேளாண்மைத் துறையின் கீழ் சேர்க்கப்பட்டு இன்று `தமிழ்நாடு வேளாண்மைப் பல்கலைக்கழகம்’ என்ற தனிப்பட்ட அமைப்பாகச் செயல்பட்டு வருகிறது.

மாவட்ட, வட்ட அளவில் வேளாண்மைத் துறையின் நிர்வாக அமைப்பு செயல்பட்டு வருகிறது. மாவட்ட அளவில், மாவட்ட வேளாண்மை இணை இயக்குநர், மாவட்ட வேளாண்மை துணை இயக்குநர்கள், மாவட்ட வேளாண்மை உதவி இயக்குநர்கள் இருக்கிறார்கள். வட்ட அளவில் வேளாண்மை உதவி இயக்குநர், வேளாண்மை அலுவலர், வேளாண்மைத் துணை அலுவலர், வேளாண்மை உதவி அலுவலர் இருக்கிறார்கள். மாநில அளவில் வேளாண்மைத் துறைச் செயலாளர், வேளாண்மைத் துறை இயக்குநர், வேளாண்மைத்துறை கூடுதல் இயக்குநர் உள்ளனர். இவர்கள் மூலம் வேளாண்மைத் துறை கட்டமைக்கப்பட்டிருக்கிறது.

ஒட்டுமொத்த விகடனுக்கும் ஒரே ஷார்ட்கட்!

சட்டம் : வேளாண்மைத்துறை ஏன் உருவாக்கப்பட்டது?

தமிழ்நாடு, 1,076 கிலோமீட்டர் நீளமுள்ள கடற்கரையை உள்ளடக்கிய 130.33 லட்சம் ஹெக்்டேர் நிலப்பரப்புடையது. நாட்டின் மொத்த நிலப்பரப்பில் நான்கு சதவிகிதம் கொண்ட பத்தாவது பெரிய மாநிலமாக இருக்கிறது தமிழ்நாடு. நாட்டின் நீர்வள ஆதாரங்களில் தமிழ்நாடு 3 சதவிகிதத்தை மட்டுமே கொண்டு மிகவும் நீர்ப் பற்றாக்குறை உள்ள மாநிலமாக இருக்கிறது. மேலும் பல்வேறு பருவ மாறுதல்களுக்கு உள்ளாவதால், வேளாண்மையில் ஒரு நிச்சயமற்ற நிலை நிலவுகிறது. வேளாண்மைத்துறையின் பல்வேறு கொள்கைகள் மற்றும் திட்டச் செயல்பாட்டின் வாயிலாக உணவு தானிய உற்பத்தி அதிகரித்து வருகிறது.

தமிழ்நாடு தேசிய அளவில் மக்கள் தொகையில் சுமார் 6 சதவிகிதத்தைக் கொண்டு ஆறாவது அதிக மக்கள்தொகை கொண்ட மாநிலமாக விளங்குகிறது.

சட்டம் : வேளாண்மைத்துறை ஏன் உருவாக்கப்பட்டது?

2015-16-ம் ஆண்டின் பத்தாவது வேளாண்மை கணக்கீட்டின்படி (உத்தேச மதிப்பீடு) தமிழ்நாட்டில் 59.75 லட்சம் ஹெக்டேர் சாகுபடி நிலங்கள் 79.38 லட்சம் நில உடைமைதாரர்கள் வசம் உள்ளன. மொத்த நில உடைமைதாரர்களில் 93 சதவிகிதம் பேர் சிறு மற்றும் குறு விவசாயிகளாக இருக்கிறார்கள். இவர்கள் மொத்த சாகுபடிப் பரப்பளவில் 62 சதவிகிதப் பரப்பில் சாகுபடி செய்துவருகின்றனர். மீதமுள்ள 38 சதவிகித நிலப்பரப்பில் 7 சதவிகித நடுத்தர மற்றும் பெரிய விவசாயிகள் சாகுபடி செய்துவருகிறார்கள்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
சட்டம் : வேளாண்மைத்துறை ஏன் உருவாக்கப்பட்டது?

தமிழ்நாட்டின் ஆண்டு சராசரி மழையளவு 921 மில்லிமீட்டர். நாட்டின் சராசரி அளவான 1,200 மில்லிமீட்டருடன் ஒப்பிடுகையில் குறைவாக உள்ளது. தமிழ்நாடு பல்வேறு பாசன நீர் ஆதாரங்கள் மூலம் பாசனத்தைப் பெற்றுவருகிறது. வாய்க்கால் மூலம் 5.89 லட்சம் ஹெக்டேர், ஏரிகள் மூலம் 3.58 லட்சம் ஹெக்டேர், கிணறு மற்றும் ஆழ்துளைக் கிணறுகள் மூலம் 16.77 லட்சம் ஹெக்டேர், மற்றவை மூலம் 0.02 லட்சம் ஹெக்டேரும் பாசனம் பெறுகிறது. தமிழ்நாட்டின் நிகரப் பாசனப் பரப்பில் 64 சதவிகிதம் கிணறு மற்றும் ஆழ்துளைக் கிணறுகள் மூலமாகவும், 22 சதவிகிதம் வாய்க்கால்கள் மூலமாகவும், 14 சதவிகிதம் ஏரிகள் மூலமாகவும் பாசனம் பெறுகிறது.

‘‘பல்வகைப் பயிர் சாகுபடி செய்வது; மண் வளத்தை மேம்படுத்துவது; உற்பத்தித் திறனை அதிகரிப்பது ஆகிய பணிகளைச் செய்துவருகிறது வேளாண்துறை.’’

வேளாண் உற்பத்தியைப் பெருக்கி, விவசாயிகளின் வருமானத்தை உயர்த்தும் நோக்கத்துடன் விவசாயிகள் மற்றும் அலுவலர்களை உள்ளடக்கி வேளாண்மைத்துறை செயல்பட்டுவருகிறது. இந்தத் துறையின் முக்கியப் பணிகள் பற்றிப் பார்க்கலாம். பகுதிக்கு ஏற்ற பயிர் மேலாண்மைத் தொழில்நுட்பங்களை அறிமுகப்படுத்தி, உணவு தானியங்கள், எண்ணெய் வித்துகள் மற்றும் வணிகப் பயிர்களின் உற்பத்தியை அதிகரிக்க விவசாயிகளுக்கு உதவுவது இதன் முக்கியப் பணி.

விவசாய இடுபொருள்களின் செலவைக் குறைப்பது; இயந்திரமயமாக்கல் மூலமாகப் பண்ணைத் தொழிலாளர்களின் பணிச்சுமையைக் குறைப்பது; அறுவடைக்குப் பிந்தைய மேலாண்மைக்கான செலவைக் குறைப்பது இதன் தலையாய பணிகள்.

சட்டம் : வேளாண்மைத்துறை ஏன் உருவாக்கப்பட்டது?

அறுவடைக்குப் பின்னர் மேற்கொள்ள வேண்டிய நடவடிக்கைகள் மூலம் விவசாயக் குடும்பங்களின் பண்ணை வருமானத்தை அதிகரிக்கச் செய்வது: வேளாண்மையில் பல்வகைப் பயிர்கள் சாகுபடியை ஊக்குவிப்பது; முக்கிய வேளாண் இடுபொருள்கள் உற்பத்தி மற்றும் விநியோகத்துக்குத் தேவையான விரிவான உட்கட்டமைப்பு வசதிகளை விவசாயிகளுக்கு உருவாக்கித் தருவது; மண் பரிசோதனையின் அடிப்படையில் வழங்கப்படும் மண்வள அட்டையில் பரிந்துரைக்கப்பட்ட உர அளவுகளைப் பின்பற்றுவதன் மூலமாக உரச் செலவைக் குறைக்க வழிவகை செய்வதும் இந்தத் துறையின் பணிகளே. சரியான திட்டமிடுதல் மூலமாக கூடுதல் பரப்பில் பல்வேறு பயிர்களை மானாவாரி மற்றும் கோடைப்பருவப் பயிர்களாகச் சாகுபடி செய்ய சிறப்பு கவனம் செலுத்துவது; நீரைச் சிக்கனமாகப் பயன்படுத்தச் செய்வது; ஒருங்கிணைந்த ஊட்டச்சத்து நிர்வாகம் மற்றும் ஒருங்கிணைந்த பயிர்ப் பாதுகாப்பு முறைகளை மேற்கொள்வதன் மூலம் மானவாரி நிலங்களில் மகசூல் இழப்பைக் குறைப்பது; நீடித்த, நிலையான பயிர் உற்பத்தியை உறுதிசெய்ய விவசாயிகளுக்கு உதவுவது; கூட்டுப் பண்ணைத் திட்டத்தின் கீழ் ஏற்படுத்தப்பட்டிருக்கும் உழவர் உற்பத்தியாளர் குழுக்களுக்குப் பண்ணை இயந்திரங்கள் மற்றும் மதிப்புக்கூட்டுதலுக்கான இயந்திரங்கள் வாங்குவதற்கான நிதியுதவி, நுண்ணீர்ப் பாசனம் அமைப்பதற்கான விநியோக உரிமம் ஆகியவற்றை அளிப்பது; வேளாண் இயந்திரங்கள் வாடகை மையம் அமைப்பது; இடுபொருள் விநியோக உரிமம் வழங்குவது; குடிமராமத்துப் பணிகள், மழைநீர்ச் சேகரிப்பு அமைப்புகளை மேற்கொள்ள உழவர் உற்பத்தியாளர் குழுக்களுக்குப் பணி ஆணைகளை வழங்கி விவசாயிகளுக்குப் பண்ணை சாரா வருமானத்தை உயர்த்துவதற்கான வாய்ப்புகளை ஏற்படுத்துவது ஆகிய பணிகளையும் வேளாண்மைத்துறை செய்கிறது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

வேளாண்மை மற்றும் அதைச் சார்ந்த துறைகளை ஒருங்கிணைத்து நவீன தொழில்நுட்பங்களை விவசாயிகளிடம் எடுத்துச் செல்லுவது; சுற்றுச்சூழல் மற்றும் பண்ணை சார்ந்த வழிமுறைகளைக் கடைப்பிடிப்பதன் வாயிலாக இயற்கை வளத்தை மேம்படுத்துவது; உழவன் செயலியில் புதிதாக அறிமுகப்படுத்தப்பட்டிருக்கும் ‘என் பண்ணை வழிகாட்டி’ என்ற சேவை மூலம் விவசாயிகளுக்கு விதைப்பு முதல் அறுவடை வரையிலான பல்வேறு சந்தேகங்களுக்கு உடனுக்குடன் தீர்வு அளிப்பது; செயற்கை நுண்ணறிவு மென்பொருள் போன்றவற்றின் மூலமாகப் பூச்சி மற்றும் நோய் பாதிப்புகளைக் கண்டறிந்து தீர்வு வழங்குவது; வானிலை சார்ந்த சாகுபடி முறைகளை மேற்கொள்வதை ஊக்கப்படுத்துவது; வானிலை மாற்றங்கள் மற்றும் இயற்கை இடர்ப்பாடுகளால் ஏற்படும் இழப்பைக் கருத்தில்கொண்டு பயிர்க் காப்பீடு மற்றும் பயிர் மாற்றுத் திட்டங்களின் வாயிலாக வருமான இழப்பிலிருந்து விவசாயிகளைப் பாதுகாப்பது; விவசாயிகளுக்குக் கூடுதல் வருமானத்தை உறுதிசெய்திட, பண்ணை சார்ந்த இதர தொழில்களை ஒருங்கிணைத்து, ஒருங்கிணைந்த பண்ணை முறையை நிலைப்படுத்துவது; அதன் மூலம் சுற்றுச்சூழலைப் பாதுகாப்பது; பல்வகைப் பயிர் சாகுபடி செய்வது; மண் வளத்தை மேம்படுத்துவது; உற்பத்தித் திறனை அதிகரிப்பது ஆகிய பணிகளைச் செய்கிறது.

சட்டம் : வேளாண்மைத்துறை ஏன் உருவாக்கப்பட்டது?

`உள்ளூர் மற்றும் ஏற்றுமதிக்கு உகந்த தரமான உணவு மற்றும் தீவனப் பொருள்களின் உற்பத்தியை உறுதிசெய்ய வேண்டும்’ என்ற தொலைநோக்குப் பார்வையுடன் சிறந்த வேளாண் செயல்முறைகளை அனைத்து விவசாயிகளும் செயல்படுத்த ஊக்கப்படுத்துவது; பாசன நீர், ஊட்டச்சத்து, பயிர்ப் பாதுகாப்பு, மருந்துகள் மற்றும் தொழிலாளர்கள் திறனைத் திறம்படப் பயன்படுத்துவதன் மூலம் இடுபொருள் செலவைக் கட்டுப்படுத்துவது; இதன் மூலம் இடுபொருள் உபயோகிப்புத் திறனை மேம்படுத்த ஊக்குவிப்பதோடு தரமான விளைபொருள் உற்பத்தியை உறுதி செய்வது; விரிவான விநியோகம் மற்றும் மேலாண்மை அமைப்பின் மூலம் இடுபொருள்களின் தரத்தை உறுதிசெய்வதோடு விநியோகக் கட்டமைப்பை மேம்படுத்துவதும் இதன் பணிகளே.

விவசாயம் மற்றும் அது சார்ந்த தொழில்களில் மகளிரின் பங்களிப்பை அதிகரிக்கத் தேவையான உதவிகளை வழங்குவதன் மூலம் அவர்களின் திறனை மேம்படுத்துவது; சந்தைப்படுத்தும் திறனை மேம்படுத்துவதன் மூலம் விவசாய உற்பத்தியாளர்கள் மற்றும் நுகர்வோருக்கு இடையிலான விலை வித்தியாசத்தைச் சீர்படுத்துவது ஆகியவையும் இந்தத் துறையின் பணிகள்தான்.

நிலத்தடி நீரை மேம்படுத்தவும், வேளாண் உற்பத்தியை அதிகரிக்கவும் கசிவுநீர்க் குட்டைகள், பண்ணைக்குட்டைகள், சமுதாயக் குளங்கள், தடுப்பணைகள், கிராமத்துக் குளங்கள் மூலமாக மழைநீர்ச் சேகரிப்புக் கட்டமைப்புகளை ஏற்படுத்துவது; விவசாயிகளின் உற்பத்தி மற்றும் வருமானத்தை உயர்த்தத் தகவல் தொழில்நுட்பத்தைப் பயன்படுத்தி உரிய வேளாண்மை விரிவாக்க ஆலோசனைகளை உடனுக்குடன் விவசாயிகளுக்கு அளிப்பது; சந்தைத் தேவைக்கு ஏற்ப விவசாயிகள் உற்பத்தி செய்வதை ஊக்குவிப்பது அல்லது விவசாயிகளின் உற்பத்திக்கு ஏற்ப வேளாண் விளைபொருள்களை மதிப்புக்கூட்டி சந்தைப்படுத்த விவசாயிகளுக்கு உதவுவது ஆகிய பணிகளை இந்தத் துறை செய்கிறது.

இதுபோன்ற முக்கியப் பணிகளை, ஆலோசனைகளை வேளாண்மைத் துறை விவசாயிகளுக்குச் செய்து வருகிறது. மேலும் ஆலோசனை பெற உங்கள் வட்ட, மாவட்ட வேளாண்மைத் துறையை அணுகலாம்.

-அடுத்த இதழில் நிறைவு பெறும்.

சிவ.இளங்கோ

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism