Published:Updated:

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

இடுபொருள்கள்
பிரீமியம் ஸ்டோரி
இடுபொருள்கள்

கொரோனா காலத்தில் கைகொடுக்கும் துறைகள்!

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

கொரோனா காலத்தில் கைகொடுக்கும் துறைகள்!

Published:Updated:
இடுபொருள்கள்
பிரீமியம் ஸ்டோரி
இடுபொருள்கள்
கொரானோ பரவல் காரணமாகத் தமிழ்நாடு அரசு வேளாண்மைத் துறையின் கீழ் மேற்கொள்ளப் பட்டுவரும் பணிகள் குறித்து வேளாண்துறை இயக்குநர் வ.தட்சிணாமூர்த்தியிடம் பேசினோம்.

“ஊரடங்கு காரணமாக வேளாண்மைப் பணிகளை அத்தியாவசியப் பணிகளாகக் கருதி, பல்வேறு நடவடிக்கைகளை எடுத்து வருகிறோம். தமிழகத்தில் தற்போது கோடைப் பருவத்தில் 55,860 ஏக்கர் பரப்பளவில் நெல், பயறு வகைகள், எண்ணெய் வித்துகள் உள்ளிட்ட பயிர்கள் சாகுபடி செய்யப்பட்டுவருகின்றன. நடவுப் பணிகள் மற்றும் விதைப்புக்கு, தமிழக அரசின் முன்னோடி திட்டமான கூட்டுப் பண்ணையத் திட்டத்தின் மூலம் வழங்கப்பட்ட வேளாண் கருவிகள் மூலம், உழவுப் பணிகளும் நடவுப் பணிகளும் மேற்கொள்ளப்பட்டுவருகின்றன. ஏற்கெனவே, பயிரிடப்பட்டு அறுவடை நிலையிலுள்ள நெல், நிலக்கடலை, எள் போன்ற பயிர்களை 5.73 லட்சம் ஏக்கரில் அறுவடை எந்திரங்கள் மூலம் அறுவடை செய்திட வேளாண் பொறியியல் துறை மூலம் உரிய ஏற்பாடுகள் செய்யப்பட்டுள்ளன. இதற்கு வேளாண்மை பொறியியல் துறை மூலம் வழங்கப்படும் வாடகை இயந்திரங்களையும் பயன்படுத்திக்கொள்ளலாம்.

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

ஒட்டுமொத்த விகடனுக்கும் ஒரே ஷார்ட்கட்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

நெல் விற்பனை

தமிழ்நாட்டிலுள்ள 278 ஒழுங்குமுறை விற்பனைக் கூடங்கள் மற்றும் தேவையான இடங்களில் அமைக்கப்பட்டிருக்கும் நேரடி நெல் கொள்முதல் நிலையங்கள் மூலமும், நெல் கொள்முதல் செய்ய நடவடிக்கை எடுக்கப்பட்டிருக்கிறது. அதனால் இருப்பிலுள்ள நெல்லைக் கொள்முதல் நிலையங்கள் மூலம் விற்பனை செய்யலாம்.

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

விதைகளை விற்கும் விரிவாக்க மையங்கள்

குறுவை மற்றும் சித்திரைப் பட்டத்துக்குத் தேவையான சுமார் 19,526 மெட்ரிக் டன் நெல், உளுந்து, எண்ணெய் வித்துகள் ஆகியவை அரசு வேளாண் விரிவாக்க மையங்களில் இருப்பு வைக்கப்பட்டுள்ளன. தேவைப்படுவோர் அருகிலுள்ள வேளாண் விரிவாக்க மையத்தை அணுகலாம் அல்லது உழவன் செயலி மூலம் விதை இருப்பை அறிந்துகொண்டு, சம்பந்தப்பட்ட வேளாண் அலுவலர் மூலம் வாங்கிக்கொள்ளலாம்.

144 தடைக்காலத்தில், விவசாயிகளுக்குத் தேவையான வேளாண் இடுபொருள்கள் அவர்களின் கிராமங்களிலேயே கிடைக்க வாகனங்கள் மூலம் ‘நடமாடும் வேளாண் விரிவாக்க மையங்கள்’ ஏற்படுத்தப்பட்டுள்ளன. அந்தந்தப் பகுதிகளில் அலுவலர்களிடம் தகவல் பெற்று இந்த நடமாடும் வண்டியின் மூலம் பெற்றுக்கொள்ளலாம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

சில விவசாயிகள், விளைபொருள்களை விற்பனை செய்ய முடியாமல் உதவி கேட்கிறார்கள். வேளாண் இயந்திரங்கள் 90 நாள்களுக்கு வாடகையின்றி உபயோகப்படுத்திக் கொள்ள ஏற்பாடு செய்யப்பட்டுள்ளது.

கிருஷ்ணகிரி, தருமபுரி மாவட்டங்களில் தனியார் விதை விற்பனை நிலையங்கள் மூலம் விவசாயிகளுக்குத் தேவையான பல்வேறு வகையான காய்கறி விதைகள், தானிய விதைகள், குழித்தட்டு காய்கறி விதை நாற்றுகள் உள்ளிட்டவற்றை ‘நடமாடும் விதை விற்பனை ஊர்திகள்’ மூலம் விவசாயிகளின் இருப்பிடங்களுக்கே சென்று விற்பனை செய்யும் நடைமுறை தொடங்கப்பட்டுச் செயல்பட்டுவருகிறது.

வ.தட்சிணாமூர்த்தி, குமார்
வ.தட்சிணாமூர்த்தி, குமார்

தமிழ்நாடு அரசின் வேளாண்மைத்துறையும் டாஃபே நிறுவனமும் இணைந்து, 12,770 மாஸே ஃபெர்குசன், எய்ச்சர் டிராக்டர்கள், வேளாண் இயந்திரங்கள் ஆகியவற்றை அனைத்துவிதமான விவசாயப் பணிகளை மேற்கொள்வதற்காக சிறு, குறு விவசாயிகள் கொரோனா காலத்தில் 90 நாள்களுக்கு வாடகையின்றி உபயோகப்படுத்திக்கொள்ள ஏற்பாடு செய்யப்பட்டிருக்கிறது.

அனைத்து மாவட்டங்களிலும் உழவர்-உற்பத்தியாளர் குழுக்கள் மூலம் காய்கறி, பழங்கள், மளிகைப் பொருள்கள் உள்ளிட்ட அத்தியாவசியப் பொருள்கள் மக்களுக்குக் கிடைக்க வழிவகைச் செய்யப்பட்டு, 6,000 உழவர்- உற்பத்தியாளர் குழுக்கள் மூலம் ‘நடமாடும் காய்கறி வண்டிகள்’ மூலம் விற்பனை செய்துவருகின்றனர். விவசாய விளைபொருள்கள் தேக்கம் அடையக் கூடாது என்பதற்காக கவனமாகச் செயல்பட்டுவருகிறோம்.

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

விவசாய வேலைகளைச் செய்யும் வேளாண் தொழிலாளர்களும் கருவிகளும் தங்கு தடையின்றி மாநிலம் முழுக்க, அனைத்து மாவட்டங்களுக்கும் செல்ல நடவடிக்கை எடுக்கப்பட்டுவருகிறது. எங்கேயாவது தடுத்து நிறுத்தப்பட்டால் வேளாண்துறை அலுவலர் மற்றும் அதிகாரிகளைத் தொடர்புகொள்ளலாம். தேவைப்பட்டால், அருகிலுள்ள வேளாண்மை உதவி அலுவலர், (அல்லது) வேளாண்மை அலுவலர் (அல்லது) வேளாண்மை உதவி இயக்குநர் போன்ற அதிகாரிகளைத் தொலைப்பேசியிலோ அல்லது உழவன் செயலி மூலமாகவோ அல்லது நேரிலோ தொடர்புகொண்டு பயன் பெறலாம். உழவன் செயலியில் அனைத்து வேளாண்துறை விரிவாக்க அலுவலர் முதல் உயர் அதிகாரிகள்வரை அனைவரின் செல்போன் எண்கள் கொடுக்கப் பட்டுள்ளன. அந்த எண்களில் தொடர்பு கொண்டால் வழிகாட்டுவார்கள்” என்றார்.

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

கொரோனா ஊரடங்கு நேரத்தில் விவசாயிகளுக்கு உதவுவதற்காகப் பல்வேறு நடவடிக்கைகளில் ஈடுபட்டு வருகிறது தமிழ்நாடு வேளாண்மைப் பல்கலைக்கழகம். இது தொடர்பாக, வேளாண் பல்கலைக்கழகத் துணைவேந்தர் முனைவர் குமாரிடம் பேசினோம். “இது இக்கட்டான காலகட்டம். விவசாயிகளுக்கு உதவுவதற்காக 28 மாவட்டங்களிலும் விஞ்ஞானிகளை நியமித்தோம். அவர்களின் செல்போன் எண்களையும் வெளியிட்டோம். அது விவசாயிகளுக்குப் பலனுள்ளதாக இருக்கிறது. அனைத்து மாவட்டங்களிலும் விவசாயிகளிடமிருந்து அழைப்புகள் வருகின்றன. பல்வேறு சந்தேகங்களை விவசாயிகள் கேட்கிறார்கள். அவர்களுக்குத் தெளிவாக விளக்கம் கொடுத்துவருகிறார்கள் எங்கள் விஞ்ஞானிகள். நானும் திண்டிவனம், ஏத்தாப்பூர் பகுதிகளுக்கு ஆய்வுக்காகச் சென்றேன். பணிகள் சிறப்பாக நடைபெற்றுவருகின்றன. பல பகுதிகளில் விவசாயிகளின் நிலங்களுக்குத் தேவையான ஆலோசனைகள் கொடுக்க விஞ்ஞானிகள் செல்கிறார்கள். பெரும்பாலான விவசாயிகள் விதைகள் கேட்கிறார்கள். பல்வேறு தொழில்நுட்ப விளக்கம் கேட்கிறார்கள். இன்னும் சில விவசாயிகள், விளைபொருள்களை விற்பனை செய்ய உதவி கேட்கிறார்கள். அவர்களை வேளாண்மை விற்பனைத்துறையுடன் தொடர்புபடுத்தி விற்பனைக்கு வழிவகை செய்து கொடுக்கிறோம். அடுத்த பருவத்துக்கான பணிகளுக்குத் தயாராக இருக்கிறோம். ஊரடங்கு காலகட்டம் என்றில்லை; அவர்களுக்கு ஆலோசனை தேவைப்படும் போதெல்லாம் அந்தந்தப் பகுதியிலிருக்கும் பல்கலைக்கழக மையங்களை அணுகலாம்’’ என்றார்.

சரண்யா
சரண்யா

கால்நடை மருத்துவர்களும் ஊரடங்கு நேரத்தில் பணிகளைச் செய்துவருகிறார்கள். `கால்நடை பராமரிப்புத்துறையின் கீழ் இயங்கும் ஆவின் நிறுவனத்திலுள்ள கால்நடை மருத்துவர்கள் அனைவரும் கொரோனா நேரத்தில் விடுமுறை எடுக்கக் கூடாது. விவசாயிகளுக்கு உதவியாக இருக்க வேண்டும்’ என்று ஆவின் மேலாண் இயக்குநர் வள்ளலார் உத்தரவிட்டார். அதைத் தொடர்ந்து, அனைத்து மாவட்டங்களிலும் மருத்துவர்கள் பணியிலிருந்தனர். இந்த நிலையில் சேலம் மாவட்டம், வாழப்பாடி அருகேயுள்ள வேப்பிலைப்பட்டி கிராமத்தைச் சேர்ந்த தமிழரசன் என்பவரின் மாடு ஏப்ரல் 4-ம் தேதி அதிகாலை 4 மணிக்குக் கன்று ஈன முடியாமல் வேதனைப்பட்டிருக்கிறது. உடனடியாக அவர், ஆவின் பால் சேகரிப்புக்குழு உதவிப் பொது மேலாளர், கால்நடை மருத்துவர் மாலதிக்குத் தகவல் சொல்லியிருக்கிறார். உடனே அவர் மருத்துவர் சரண்யாவுக்குத் தகவல் சொல்லியிருக்கிறார். கொரோனா காலகட்டத்தில், வெளியில் நடமாட அனைவரும் பயந்துகிடக்கும் சூழலில், அதிகாலை நேரத்தில் அந்த விவசாயி வீட்டுக்குச் சென்றிருக்கிறார் மருத்துவர் சரண்யா. மாட்டைப் பரிசோதனை செய்ததில் கன்றின் தலை வலது பக்கமாகத் திரும்பி இருந்ததால் மாடு கன்று ஈன முடியாமல் கஷ்டப்பட்டது தெரியவந்தது. 15 நிமிடப் போராட்டத்துக்குப் பிறகு கன்றின் தலையைப் பழையநிலைக்குக் கொண்டு வந்தார். பிறகு கன்றின் கீழ்த்தாடை, முன்னங்கால் இரண்டிலும் கயிற்றைக் கட்டி, ஆண் கன்றை உயிருடன் வெளியே எடுத்தார் சரண்யா.

நம்மிடம் பேசிய விவசாயி தமிழரசன், “ஊரடங்கு நேரத்துல போன் பண்ணினதும் சிரமம் பார்க்காம வந்து கன்னுக்குட்டியை காப்பாத்திக் கொடுத்துட்டாங்க. இதுக்கு எப்படி நன்றி சொல்றதுன்னே தெரியலை. ஆவினுக்கும், டாக்டர் சரண்யாவுக்கும் நன்றி’’ என்றார் நெகிழ்ச்சியாக.

இது தொடர்பாக மருத்துவர் சரண்யாவிடம் பேசினோம். “வழக்கமான நேரமாக இருந்தால், அருகேயிருக்கும் கால்நடை மருத்துவர்களை வைத்து வைத்தியம் பார்த்துவிடுவார்கள். இது இக்கட்டான நேரம் என்பதால், அதற்கும் வழியில்லை. எனவே, பால் உற்பத்தியாளர்கள் சிரமப்படக் கூடாது என்பதற்காக எப்போதும் தயார்நிலையில் இருக்கும்படி எங்கள் நிர்வாகம் அறிவுறுத்தியிருக்கிறது. அதன்படி, தமிழரசன் மாட்டுக்குப் பிரசவம் பார்த்தேன். கன்றின் தலை திரும்பி, சிக்கலான நிலையிலிருந்தது. போராடி அதைச் சரி செய்தேன்’’ என்றவர் கன்று ஈனுதல் தொடர்பாக, கால்நடை வளர்ப்போர் தெரிந்துகொள்ள வேண்டிய விஷயங்களைப் பகிர்ந்துகொண்டார்.

“மாடுகள் கன்று ஈன முடியாமல் இருக்கச் சில காரணங்கள் இருக்கின்றன. உடல் பெரிதான கன்றுகள், குறுகிய இடுப்பு எலும்புள்ள மாடு, ஈனும் காலத்தில் நோய்வாய்ப்படுதல், சினைப்பருவ காலத்தில் சமச்சீர் உணவு கிடைக்காதது, கர்ப்பப்பை முறுக்கம், கர்ப்பப்பைவாய் விரியாமை, போதிய உடல் வளர்ச்சி இல்லாத கிடேரிகளைச் சினைப்படுத்துதல், கன்றுகளிலுள்ள சில பிறவிக் கோளாறுகள், கர்ப்பப்பையில் கன்று நேராக இல்லாமல் குறுக்கே இருப்பது... கறவை மாடுகள் கன்று ஈனும் தறுவாயில் இந்த அறிகுறிகள் தென்பட்டால் உடனே தகுந்த கால்நடை மருத்துவரை அணுகி சிகிச்சை அளிக்க வேண்டும்’’ என்றவர்,

‘‘மாடு கன்று ஈனுவதற்கு முன்பாகப் படுத்துப் படுத்து எழுந்துகொண்டிருக்கும். முக்கிக்கொண்டிருக்கும். அந்த நேரத்தில் பனிக்குடம் அறையின் வெளியே தெரிய ஆரம்பிக்கும். பிறகு கன்றின் கால்கள் பனிக்குடத்தை உடைத்து அல்லது கிழித்து வெளியே வர ஆரம்பிக்கும். அதன் பிறகு கன்றின் இரண்டு கால்களும் நீட்டியவாறு அதன் மீது தலை இருக்கும். இந்த நிலையில் மாடு அதிகமாக முக்கி, கன்றை வெளியே தள்ளும். சாதாரணமாக, பனிக்குடம் வெளியே தெரிந்த இரண்டு மணி நேரத்துக்குள் மாடு கன்றை வெளியே தள்ளிவிடும். அதற்கு மேலும் கன்று ஈனாமல் இருப்பது, கன்றின் ஒரு கால் மட்டும் வெளியே வந்து தலை வெளியே வராமல் முக்கிக்கொண்டு இருப்பது மாடு தானாகக் கன்று ஈன முடியாமல் சிரமப்படுவதற்கான அறிகுறிகள். இந்த அறிகுறிகள் தென்பட்டால் உடனடியாக மருத்துவரை அணுக வேண்டும்’’ என்றார் அக்கறையுடன்.

விளைபொருள்களைக் கொண்டு செல்ல உதவும் செயலி!

த்திய வேளாண் மற்றும் விவசாயிகள் நல்வாழ்வுத்துறை அமைச்சகம் சார்பில் ஓரிடத்திலிருந்து மற்றோர் இடத்துக்கு வேளாண் விளைபொருள்களைக் கொண்டு செல்ல, செயலி ஒன்று அறிமுகப்படுத்தப்பட்டிருக்கிறது. இந்தச் செயலியின் பெயர் ‘கிசான் ரத்.’ இந்தச் செயலியில் முதலில் செல்போன் எண், மாநிலம், மாவட்டம், தொகுதி, ஊராட்சியின் பெயரைப் பதிவுசெய்து, கடவுச் சொல்லை உருவாக்க வேண்டும். பிறகு உழவர், சேவை செய்பவர், வர்த்தகர் என மூன்று பிரிவுகள் இருக்கும். உழவர் என்றால், பொருள்களை விளைய வைப்பவர்; சேவை செய்பவர் என்பவர், உழவர்கள் விளைவித்த பொருள்களை ஓரிடத்திலிருந்து மற்றோர் இடத்துக்குக் கொண்டு செல்ல ஆர்வமுள்ளவர்; வர்த்தகர் என்பவர் வாங்குபவர் என்ற பிரிவின் கீழ் வருவார். இவற்றில் ஏதாவது ஒன்றைத் தேர்வு செய்து செல்போன் எண், கடவுச் சொல்லைக் கொடுத்து உள்ளே சென்றால், எந்த மாநிலம், மாவட்டம், ஊராட்சி, எவ்வளவு பொருள் போன்ற விவரங்கள் கேட்கப்படும். அந்த விவரங்களை அளித்து இந்தச் சேவையைப் பெறலாம்.

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

செயலியைத் தரவிறக்கம் செய்ய இந்த இணைய முகவரிக்குச் செல்லவும் அல்லது கியூ ஆர் கோடை ஸ்கேன் செய்யவும். https://bit.ly/2zbHtw1

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

நாங்களும் உதவி செய்கிறோம்!

ஞ்சாவூர் பயிர் பதனீட்டுக் கழகம், கொரோனா காலத்தில் எடுத்துவரும் நடவடிக்கைகள் குறித்து அதன் இயக்குநர் முனைவர் அனந்த ராமகிருஷ்ணனிடம் பேசினோம். “நாங்கள் விவசாயிகளையும் நோயாளிகளையும் போட்டுக் குழப்பிக்கொள்ளவில்லை. விவசாயிகளுக்கு, கூழாக்கும் இயந்திரத்தை உழவர்-உற்பத்தியாளர் நிறுவனங்கள் மூலம் உதவக் கொடுத்திருக்கிறோம். எங்கள் பதனீட்டுக் கழகத்திலுள்ள மதிப்புக் கூட்டல் இயந்திரங்கள் மூலம் கொரோனோ நோயாளிகளுக்குத் தேவையான இஞ்சி, மஞ்சள், சாறு வகைகள் மற்றும் ரொட்டிகள் ஆகியவற்றைத் தயார் செய்து கொடுத்துக்கொண்டிருக்கிறோம்” என்றார்.

அனைத்துவிதமான பாலையும் கொள்முதல் செய்வோம்!

வின் செயல்பாடுகள் குறித்து அதன் நிர்வாக இயக்குநர் வள்ளலார் பேசும்போது, “பால் உற்பத்தியாளர்களால் உற்பத்தி செய்யப்படும் அனைத்து வகையான பாலையும் கொள்முதல் செய்துவருகிறோம். பெரும்பாலான தனியார் நிறுவனங்கள் பால் கொள்முதலை நிறுத்திவிட்ட நிலையில், அவற்றையும் கொள்முதல் செய்வதற்காக 7,840 புதிய உறுப்பினர்களைச் சேர்த்து 210 சார்பு கொள்முதல் நிலையங்கள், 102 புதிய ஆரம்பப் பால் உற்பத்தியாளர் சங்கங்களைத் தொடங்கியிருக்கிறோம். 72 மூடப்பட்ட ஆரம்பப் பால் உற்பத்தியாளர் சங்கங்களைப் புதுப்பித்திருக்கிறோம். இதன் மூலம் வழக்கமாகக் கொள்முதல் செய்வதைவிட மூன்று லட்சம் லிட்டர் பாலை கூடுதலாகக் கொள்முதல் செய்கிறோம். கொள்முதல் செய்யப்படும் மொத்த பாலுக்கும் மாதமொன்றுக்கு 294 கோடி ரூபாய் அளவில் கிராமப்புற விவசாயிகளுக்கு அவர்களின் வங்கிக் கணக்கில் நேரடியாகப் பணம் செலுத்தப்பட்டுவருகிறது. பால் உற்பத்தியாளர்களுக்குத் தேவைப்படும் கால்நடைத் தீவனம், ஊட்டச்சத்துக் கலவை, பசுந்தீவனம் ஆகியவை தடையின்றி கிடைக்க ஏற்பாடுகள் செய்யப்பட்டுள்ளன. கால்நடை மருத்துவர்கள் அனைவரும் பால் உற்பத்தியாளர்களின் இருப்பிடத்துக்கே சென்று கால்நடைகளைப் பரிசோதித்து, தேவையான மருத்துவ உதவிகள், மருந்துகள், தடுப்பூசிகள் வழங்குகிறார்கள். செயற்கைக் கருவூட்டல் தொய்வு இல்லாமல் தொடர்ந்து நடைபெற்றுவருகிறது.

அரசு: நடமாடும் வேளாண் விரிவாக்க மையங்கள்... இருப்பிடத்திற்கே வரும் இடுபொருள்கள், விஞ்ஞானிகள்!

தமிழகம் முழுவதும் தினமும் சுமார் 1.8 லட்சம் லிட்டர் பால் கூடுதலாக விற்பனை செய்யப்படுகிறது. சென்னையில் சராசரியாக 13.06 லட்சம் லிட்டரும், மாவட்ட ஒன்றியங்களில் 13.03 லட்சம் லிட்டரும் தினமும் விற்பனை செய்யப்பட்டுவருகின்றன. சென்னையில் 25 தற்காலிகப் பாலகங்கள், இதர மாவட்டங்களில் 50 தற்காலிகப் பாலகங்கள் மூலம் பொதுமக்களின் இருப்பிடத்துக்கே சென்று பால் பொருள்கள் விற்பனை செய்யப்படுகின்றன. முதியோர், ஆதரவற்றோர், மாற்றுத்திறனாளிகள் இல்லங்களுக்கு இலவசமாகப் பால், ரொட்டி, பால் பவுடர் மற்றும் அவர்களுக்குத் தேவைப்படும் பொருள்களை இலவசமாக வழங்கிவருகிறோம். முதலமைச்சரின் உத்தரவின்படி, மாற்றுத்திறனாளிகள் நலத்துறை மற்றும் ஆவின் நிறுவனம் இணைந்து 6,800 மாற்றுத்திறனாளி காப்பகங்களுக்கு ஆவின் நறுமணப் பால், பிஸ்கட், சாக்லேட் அடங்கிய பொருள்கள் இலவசமாக வழங்கப்பட்டுவருகின்றன’’ என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism