Election bannerElection banner
Published:Updated:

மண்பானையிலும் மகசூல் எடுக்கலாம்... எப்படி? - மாடித்தோட்ட ஆலோசனைகள்! - வீட்டுக்குள் விவசாயம் - 19

மண்பானை மாடித்தோட்டம்
மண்பானை மாடித்தோட்டம்

வீட்டுத்தோட்டம் மற்றும் மாடித்தோட்டம் வாயிலாக ஒவ்வொரு வீட்டிலும் பசுமையை உருவாக்க வழிகாட்டும் தொடர்..! #VeetukkulVivasayam #DIYTerraceGarden - பாகம் - 19

வீட்டுத்தோட்டம் வைக்கிறதுல அனுபவம் முக்கியம் என்று பார்த்தோம். அதேபோல நம்ம இடத்தில இருக்கக்கூடிய பொருள்களைப் பயன்படுத்தி தோட்டம் அமைப்பதும் முக்கியமானது. அதற்கு நம்ம கொஞ்சம் புத்தியை செலவு பண்ணினா போதும். கடந்த பகுதியில் சில ஆலோசனைகளை நமக்கு வழங்கினார் எக்ஸ்னோரா நிர்மல். அவருடைய வீடு ஒரு பூங்கா மாதிரி இருக்கும். வீடு முழுக்க பசுமையாகப் பல விருதுகள் வாங்கி இருக்காரு. இன்னும் என்ன செய்யலாம்னு யோசிச்சு, யோசிச்சு பல்வேறு விதமான ஐடியாக்களை சமூகத்துக்கு வழங்கி இருக்காரு. அவருடைய தோட்டத்தில செயல்படுத்தி அதுல இருக்க நல்லது கெட்டது தெரிஞ்ச பிறகுதான் அதை மக்களுக்குச் சொல்லறதை வழக்கமா வெச்சிருக்காரு. வீட்டுத்தோட்டம் தொடர்பான நடமாடும் பல்கலைக்கழகமா இருக்குற நிர்மல் இந்தப் பகுதியில சில ஆலோசனைகளைச் சொல்லப்போறாரு. குறிப்பா மண்பானை, பிளாஸ்டிக் டிரம், மூங்கில் கட்டைகள் இது மூணுலயும் பயிர்களை வளர்க்குற முறைகளைப் பற்றி நிர்மல் சொல்லும் ஆலோசனை என்னன்னு பார்க்கலாம் வாங்க.

நிர்மல்
நிர்மல்

``பொதுவா மக்கள் காசு போட்டவுடனே பொருள் வரணும்னு எதிர்பார்க்கிறாங்க. ஆனால், பொறுமையும் கொஞ்சம் அவசியம். அந்த வகையில், இன்றைக்கு வீட்டுத்தோட்டம் அமைப்பதில் மக்களிடம் ஆர்வம் அதிகரித்து வருகிறது. அது ஆரோக்கியமான செய்திதான். வீட்டுத்தோட்டம் அமைக்க வேண்டும் என்றால் அதிக செலவு செய்ய வேண்டும் என்று பலரும் யோசிக்கிறார்கள். உண்மையில் அதிக செலவு செய்யத் தேவையேயில்லை. வீட்டுத்தோட்டம் என்பது உங்கள் மன அமைதிக்காக, ஆரோக்கியமான காய்கறிக்காக நீங்கள் அமைப்பது. அதில் வேறு யாரும் விதிமுறைகள் வகுக்க முடியாது. பொதுவாக, ஒரு செடி வளர்வதற்குத் தேவையானது ஓர் ஊடகம். அது பை, தொட்டி, சாக்கு என எதுவாக வேண்டுமானாலும் இருக்கலாம். அடுத்து, அது வளரத் தேவையான சத்துகள், தண்ணீர் இவை மூன்றும்தான் அடிப்படை. இவை இருந்தால் போதும், நமது விருப்பத்துக்கேற்ப விவசாயம் செய்யலாம். உங்கள் இடத்தில், உங்களால் எவ்வளவு செலவு முடியும் எனத் திட்டமிடுங்கள். அதற்கேற்ப செயல்பட்டால் போதும். உதாரணமாகப் பழைய பானைகள் இருந்தால்கூடப் போதும் செடிகளை வளர்க்கலாம். அந்த வகையில் மிகவும் செலவு குறைந்த மூன்று முறைகளில் செடிகளை வளர்க்கும் முறைகளைப் பார்ப்போம்.

மண்பானைகளிலும் செடிகளை வளர்க்கலாம்

வழக்கமாகப் பானையின் வாய் பகுதியில்தான் செடிகளை வளர்ப்பார்கள். ஆனால், குழி விவசாயம் (Pole Farming) முறையில் பானையின் பக்கவாட்டிலும் துளையிட்டு அதில் நாற்றுகளை நடவு செய்து பயிர் வளர்க்கலாம். இந்த முறையில் எனது வீட்டில் தக்காளி, மிளகாய், கத்திரி, வெண்டிக்காய் சாகுபடி செய்து மகசூல் எடுத்திருக்கிறேன்.

பானையில் தக்காளி
பானையில் தக்காளி
நிர்மல்
மாடித்தோட்டத்துல பயிர்கள் வாடிப் போகுதா? நீங்க பண்ணவேண்டியது இதுதான்! - வீட்டுக்குள் விவசாயம் - 18

துளை போட்டபிறகு, உரக்கலவையால் நிரப்பி ஒன்றின் மீது ஒன்றாக அடுக்கிக்கொள்ள வேண்டும். அதில் நாம் பயிர் செய்ய வேண்டிய நாற்றுகளை நடவு செய்ய வேண்டும். நாற்றுகளை மேல் நோக்கி நேராகத்தான் நடவு செய்ய வேண்டும் என்பதில்லை. பக்கவாட்டிலும் நடவு செய்யலாம். நான்கு பானைகளில் 16 செடிகளை நடலாம். பானையில் மேல்பகுதியில் அழகு பூச்செடிகளை நடவு செய்தால் பார்க்க அழகாக இருக்கும். மேற்பகுதியில் மண்ணுக்குக் கீழே விளையக்கூடிய கிழங்கு வகை பயிர்கள், முள்ளங்கி போன்றவற்றை நடவு செய்யலாம். அந்தப் பயிர்களைப் பக்கவாட்டில் நடவு செய்யக் கூடாது. அப்படி நடவு செய்தால் சைஸ் பெரிதானால் அறுவடை செய்வதில் சிக்கலாகி விடும்.

இது மாதிரி மொட்டை மாடியில் நான்கு மூலைகளில் வைத்தால்கூட 50 செடிகள் வளர்க்கலாம். பானைகளில் தக்காளி, கத்திரி, மிளகாய், வெண்டி மாதிரியான வீட்டுக்குத் தேவையான காய்கறிகளைச் சாகுபடி செய்யலாம். இந்த முறை ரொம்ப ரொம்ப சுலபமான முறை. எங்கள் வீட்டில் இந்த முறையில் நான் செடிகளை வளர்த்து வருகிறேன். குறிப்பாகத் தக்காளிச் செடி வழக்கமாக மேல் நோக்கித்தான் போகும். ஆனால், இந்த முறையில் கீழ் பக்கம் தொங்குகிறது. நல்ல மகசூல் கிடைக்கிறது. இது நான் அனுபவபூர்வமாகத் தெரிந்துகொண்டது. ஒரு பயிர் அறுவடை முடிந்த பிறகு, பானைகளில் உள்ள உரங்களைக் கலக்கி விட்டு, மீண்டும் அடுக்கி, வேறு பயிர்களை நடவு செய்து சாகுபடியைத் தொடரலாம். ஒருதடவை வாங்கிய பானையைப் பல ஆண்டுகள் பயன்படுத்தலாம்.

பக்கவாட்டில் விளையும் பயிர்கள்
பக்கவாட்டில் விளையும் பயிர்கள்
நிர்மல்

இதே முறையைப் பெரிய பிளாஸ்டிக் டிரம்களிலும் பயன்படுத்தலாம். 100, 200 லிட்டர் கொள்ளளவு கொண்ட பிளாஸ்டிக் டிரம்களில் பக்கவாட்டில் துளைபோட்டு காய்கறி பயிர்களை வளர்க்கலாம். டிரம்களைப் பயன்படுத்தும்போது வீட்டுக் கழிவுகளையும் அதில் சேர்த்துக்கொள்ளலாம். 200 லிட்டர் கொள்ளளவு கொண்ட டிரம்மில் 20 துளைகள் வரை போட்டு, நாற்று நட்டு செடிகளை வளர்க்கலாம். இந்த முறையிலும் நான் எங்க வீட்டுல நிறைய செடிகள் வளர்த்துட்டு இருக்கேன். இதுவும் செலவு குறைந்த முறை. இந்த முறையில வீட்டோட கழிவுகளையும் உரமாக மாற்ற முடியும். ‌

டிரம் மூலம் விவசாயம்
டிரம் மூலம் விவசாயம்
நிர்மல்

மூங்கில் கட்டைகளிலும் இதே முறையில பயிர் வளர்க்கலாம். மூங்கில் கட்டைகளில் இயற்கையாகவே ஒரு கணுவுக்கும் மற்றொரு கணுவுக்கும் இடையே இடைவெளி இருக்கும். அதனால் அதை மேல்பக்கம் கொஞ்சம் பட்டை எடுத்துவிட்டு, ஒரு அறையில் உரக்கலவையை நிரப்பி, அதில் நாற்றுகளை நட்டுத் தொங்கவிடலாம். இப்படி செலவு குறைந்த பல்வேறு முறைகளில் வீட்டுத்தோட்டத்தில் விவசாயம் செய்யலாம்'' என்றார்.

இது போன்ற இன்னும் பல தகவல்களை நிர்மல் பகிர்ந்துகொண்டார். அவற்றை அடுத்த பகுதியில் பார்க்கலாம்.

- வளரும்
Election bannerElection banner
அடுத்த கட்டுரைக்கு