Published:Updated:

பாரம்பர்யம் பேசிய நெல் திருவிழா!

பாரம்பர்யம்
பிரீமியம் ஸ்டோரி
பாரம்பர்யம்

பாரம்பர்யம்

பாரம்பர்யம் பேசிய நெல் திருவிழா!

பாரம்பர்யம்

Published:Updated:
பாரம்பர்யம்
பிரீமியம் ஸ்டோரி
பாரம்பர்யம்

கிரியேட் - நமது நெல்லை காப்போம் மற்றும் பசுமை விகடன் இணைந்து நடத்திய நெல் திருவிழா கடந்த செப்டம்பர் 6-ம் தேதி தஞ்சாவூரில் நடைபெற்றது. திண்டுக்கல் காந்தி கிராமம் பல்கலைக் கழகத்தில் பணிபுரிந்த விஞ்ஞானி முனைவர் உதயகுமார், இயற்கை விவசாயத்தில் நுண்ணுயிர்களின் அவசியம் குறித்து பசுமை விகடனில் தொடர் கட்டுரை எழுதினார். அந்தக் கட்டுரைகளின் தொகுப்பு, ‘லாபத்தை பெருக்கும் நுண்ணுயிர்கள்’ என்ற புத்தக மாகியுள்ளது. அந்தப் புத்தகத்தை வெளியிடும் நிகழ்வும் நடைபெற்றது. புத்தகத்தைக் கால்நடை மூலிகை மருத்துவர் புண்ணிய மூர்த்தி வெளியிட்டார். வரவேற்புரையாற்றிய நமது நெல்லை காப்போம் அமைப்பின் தஞ்சை மாவட்ட அமைப்பாளர் அன்புச் செல்வன், ‘‘தமிழ்நாட்டில் பாரம்பர்ய நெல் ரகங்கள் மற்றும் இயற்கை விவசாயம் வளர்ச்சி அடைந்ததற்குப் பசுமை விகடனின் பங்களிப்பு மகத்தானது. நம்மாழ்வாரின் கனவும் நனவாகிக்கொண்டிருக்கிறது’’ என்றார்.

விழாவில்
விழாவில்


இயற்கை மருத்துவர் கோ.சித்தர், ‘‘மனித உடலுக்கு ஊட்டச்சத்துகளும் தாது உப்புகளும் மிகவும் அவசியம். பாரம்பர்ய நெல் ரகங்களின் அரிசியில் இவை நிறைந்திருக்கிறது. இந்த அரிசி பட்டை தீட்டப்படாமல் இருந்தால்தான் முழுமை யான சத்துகள் உடலுக்குக் கிடைக்கும். ஆனால், பாரம்பர்ய நெல் ரகங்கள் உற்பத்தி செய்யும் விவசாயிகளில் பலர், இதன் மகத்துவத்தை உணராமல் பட்டை தீட்டிவிடுகிறார்கள். இது தவிர்க்கப்பட வேண்டும்’’ என்றார்.

பூச்சியியல் வல்லுநர் ‘பூச்சி’ செல்வம், “பயிர்களை பாதிக்கக்கூடிய பூச்சிகளைக் கட்டுப்படுத்த, வேப்பங்கொட்டை கரைசல் மிகவும் சிறந்தது. கடைகளில் வேப்பம் புண்ணாக்கு, வேப்ப எண்ணெய் வாங்கி பயன்படுத்துவதை இயன்ற வரை தவிர்க்க வேண்டும். பெரும்பாலும் அவை கலப்படமாக உள்ளது. நீங்களே வேப்பங் கொட்டையைச் சேகரித்து தூளாக்கி பயன் படுத்தினால் கண்கூடாகப் பலன் கிடைக்கும்’’ என்றார்.

தஞ்சாவூரைச் சேர்ந்த மகப்பேறு மருத்துவர் ராதிகா மைக்கேல், ‘‘பாரம்பர்ய நெல் ரகங்களின் மகத்துவத்தை பலரும் நெகிழ்ந்து பேசுகிறார்கள். எனக்கும் இதில் ஆர்வமாக உள்ளது. என்னிடம் மருத்துவம் பார்க்க வரும் கர்ப்பிணிப் பெண்களுக்கு இவற்றை கொடுத்து, இதனால் ஏற்படும் பலன்களை ஆவணப்படுத்தப்போகிறேன்’’ என்றார்.

விழாவில் கலந்துகொண்ட விவசாயிகளுக்கு, பாரம்பர்ய நெல் தலா 2 கிலோ அன்பளிப்பாக வழங்கப்பட்டது. இரவு உணவாக, கறுப்புக் கவுனி பாயசம், முடக்கத்தான் மூலிகை மற்றும் கருங்குறுவை அரிசி கலந்த தோசை, பலதானிய சப்பாத்தி, கருங்குறுவை இட்லி வழங்கப்பட்டன. இந்நிகழ்வில் ராஜராஜன் உழவர் உற்பத்தியாளர் நிறுவனத்தின் நிர்வாக இயக்குநர் மணிமொழியன் மற்றும் கிரியேட் அமைப்பின் நிர்வாகிகள் துரைசிங்கம், டாக்டர் ரகுநாதன், வரதராஜன் உள்ளிட்ட பலர் உரையாற்றினார்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism