Published:Updated:

ரசாயன விவசாயிகளை இயற்கைப் பாதைக்கு மாற்றியவர்!

கோமதிநாயகம்
பிரீமியம் ஸ்டோரி
கோமதிநாயகம்

அஞ்சலி

ரசாயன விவசாயிகளை இயற்கைப் பாதைக்கு மாற்றியவர்!

அஞ்சலி

Published:Updated:
கோமதிநாயகம்
பிரீமியம் ஸ்டோரி
கோமதிநாயகம்

தென் மாவட்டங்களில் தற்சார்பு விவசாயத்தை விவசாயிகள் மத்தியில் பரப்பி வந்ததுடன், நூற்றுக்கணக்கான ரசாயன விவசாயிகளை இயற்கை விவசாயத்தின் பாதைக்குத் திருப்பிய முன்னோடி இயற்கை விவசாயி புளியங்குடி கோமதிநாயகம் (88) உடல்நலக் குறைவால் கடந்த ஜூலை 29-ம் தேதி இயற்கையில் கலந்தார்.

தென்காசி மாவட்டம், சங்கரன்கோவில் அருகில் உள்ள புளியங்குடியைச் சேர்ந்தவர் கோமதிநாயகம். ஓய்வுபெற்ற பள்ளி ஆசிரியர். ‘விவசாயத்தில் மட்டுமல்லாமல் தொழில்நுட்பத் திலும் தற்சார்பு தேவை’ என்பதற்காக, புளியங்குடியில் இவர், தொடங்கிய அமைப்புதான் ‘விவசாயச் சேவா சங்கம்’. சர்வோதய தலைவரான தூத்துக்குடியைச் சேர்ந்த ஏ.பி.சி.வீரபாகு 13.07.1975-ல் இந்தச் சங்கத்தைத் தொடங்கி வைத்தார். கோமதிநாயகமே இச்சங்கத்தின் செயலாளராக இருந்து நடத்தி வந்தார். ஜி.டி.நாயுடு எழுதிய ‘நான் கண்ட உலகம்’, நூலைப் படித்த கோமதிநாயகம் அவரைப் பாராட்டிக் கடிதம் எழுதினார். நாயுடுவின் அழைப்பை ஏற்று அவரைச் சந்தித்தார். நாயுடு சொல்லிக்கொடுத்த மண்வளம் காக்க ‘பலதானிய விதைப்பு’, ‘குலை மிதித்தல்’ ஆகியவற்றைக் கற்றுக்கொண்டு விவசாயிகளுக்கு மண்வளம் காக்கும் பயிற்சி அளித்தவர்.

கோமதிநாயகம்
கோமதிநாயகம்


‘இயற்கை இடுபொருள் தயாரிப்பு’ குறித்து விவசாயிகளுக்குப் பயிற்சி வகுப்புகள் எடுத்ததுடன், நேரடியாகப் பண்ணைகளுக்கும் விவசாயிகளை அழைத்துச் சென்று செயல் வழியாகக் கற்பித்தார்.

‘விவசாயிகள் யாரிடமும் கையேந்தக் கூடாது’ என்பதற்காக விவசாயிகளுக்குத் தேவையான நிதி ஆதாரத்தைச் சுயநிறைவுடன் வட்டியில்லாக் கடனாகப் பெறும் வகையில் 100 உறுப்பினர்களைக் கொண்ட தனித்தனிக் குழுக்களை ஏற்படுத்தி சீட்டு நிர்வாகமும் நடத்தி வந்தார்.

‘வீதியெங்கும் சோலை’ என்ற திட்டத்தை உருவாக்கி புழுதி பறந்த புளியங்குடி நகராட்சி சாலைகளின் இருபுறங்களிலும் பள்ளி, கல்லூரி மாணவர்கள், தன்னார்வலர்களின் ஒத்துழைப்புடன் ஆண்டுக்கு 5,000 மரக்கன்றுகள் வீதம், கடந்த 11 ஆண்டுகளில் 55,000 மரக்கன்றுகளை நட்டுப் பராமரித்திருக்கிறார்.

‘ஒவ்வொரு வீட்டு வாசலிலும் மரக்கன்று நட்டுப் பராமரிக்க வேண்டும்’ என, வீடு வீடாகச் சென்று மரக்கன்றுகளைக் கொடுத்தவர். இவரின் தன்னலமற்ற சேவைக்காக மத்திய அரசின் ‘விருட்ச மித்ரா’ விருதைப் பெற்றார். இவரது நண்பர்களான வேலு முதலியார், அந்தோணிசாமி ஆகியோருடன் இணைந்து இயற்கை விவசாயப் பயிற்சிகளை நடத்தி வந்தார்.

இயற்கையில் கலந்த கோமதிநாயகத்துக்குப் பசுமை விகடன் அஞ்சலியைச் செலுத்துகிறது.