Published:Updated:

பசி தாங்காமல் கூட்டமாக குப்பைக்கிடங்குக்கு வந்த நாய்கள்! கோழிக்கழிவில் விஷம் வைத்துக் கொன்ற சோகம்

உயிரிழந்த  விலங்குகள்
உயிரிழந்த விலங்குகள்

நீலகிரி மாவட்டம் குன்னூர் அருகில் உள்ள ஓட்டுப்பட்டுரை குப்பைக்கிடங்குப் பகுதியில் கோழிக்கழிவில் விஷம் வைத்துக் கூட்டம் கூட்டமாக நாய், பூனை, காட்டுப்பன்றி, காகம் உள்ளிட்ட விலங்குகள் கொல்லப்பட்டிருக்கலாம் என்ற செய்தி அதிர்ச்சியை ஏற்படுத்தியுள்ளது.

கடந்த 6ம் தேதி காலைப்பொழுது குன்னூர் மக்களை மட்டும் அல்ல ஒட்டுமொத்த விலங்கு நேசர்களையும் அதிர்ச்சியில் உறையச்செய்தது. நீலகிரி மாவட்டம் குன்னூர் நகராட்சியின் ஓட்டுப்பட்டுரை குப்பைக்கிடங்கைச் சுற்றியுள்ள பகுதிகளில் கூட்டம் கூட்டமாக நாய், பூனை, காட்டுப்பன்றி, காகம் உள்ளிட்ட விலங்குகள், பறவைகள் திடீரென மயங்கிச் சுருண்டு விழுந்தன. சில அப்படியே இறந்தன.

மீட்புப்  பணியில் கால்நடை  மருத்துவர்கள்
மீட்புப் பணியில் கால்நடை மருத்துவர்கள்

இதைக்கண்டு அதிர்ந்த சுற்றுவட்டார மக்கள் கால்நடை மற்றும் வனத்துறையினருக்குத் தகவல் தெரிவித்துள்ளனர். மண்டலக் கால்நடைத் துறை இணை இயக்குநர் மற்றும் குழுவினர் விரைந்துவந்து பார்த்தனர். உயிருக்குப் போராடிக்கொண்டிருந்த விலங்குகளுக்குத் தண்ணீர் மற்றும் முதலுதவிகளைச் செய்தனர். எதுவும் பலனளிக்காமல் ஒவ்வென்றாகக் கண்முன்னே 6 நாய், 4 காகம், ஒரு பூனை, காட்டுப்பன்றி உள்ளிட்டவை இறந்தன.

இதுகுறித்து உள்ளூர் மக்கள் தெரிவிக்கையில், ``இந்தக் குப்பைக்கிடங்கு அருகில் வசம்பள்ளம், வாசுகி நகர், வள்ளுவர் நகர் உள்ளிட்ட கிராமங்கள் உள்ளன. இதே பகுதியில் குன்னூர் நகராட்சியின் குப்பைக்கிடங்கும் உள்ளது. குன்னூர் நகரில் சேகரமாகும் குப்பைகள் இங்கு கொண்டுவந்து கொட்டப்படுகிறது.

உயிரிழந்த  விலங்குகள்
உயிரிழந்த விலங்குகள்

இந்தக் குப்பைகளில் உள்ள இறைச்சிக் கழிவுகள், காய்கறி மற்றும் பழம் உள்ளிட்ட உணவுக் கழிவுகளை உன்ன வன விலங்குகளும் வளர்ப்புப் பிராணிகளும் வந்து முகாமிடுகின்றன. கொரோனாவால் தற்போது ஊரடங்கு அமலில் உள்ள நிலையில் மக்கள் நடமாட்டமும் குறைந்துள்ளது. உணவு கிடைக்காத நாய், பூனை போன்றவை உணவு தேடி அதிகளவு வந்தன. இது பிடிக்காத யாரோ சிலர் உணவில் விஷம் வைத்துக் கொன்றுள்ளனர்" என்றனர்.

இந்த சோக நிகழ்வு குறித்த கால்நடைத்துறையினர், ``நாங்கள் எங்கள் குழுவுடன் சென்று பார்த்தபோது அந்த இடத்தில் நாய் பூனை உள்ளிட்ட விலங்குகள் உயிருக்குப் போராடிக் கொண்டிருந்தன. காப்பாற்ற முயற்சி செய்தும் முடியவில்லை. இறந்த விலங்குகளின் உடலைக் கைப்பற்றி உடற்கூறாய்வு மேற்கொண்ட மாதிரிகளைச் சோதனைக்கு அனுப்பியுள்ளோம். முடிவுகளின் அடிப்பிடையில் நடவடிக்கை எடுக்கப்படும்" என்றனர்.

உயிரிழந்த  விலங்குகள்
உயிரிழந்த விலங்குகள்

இந்தச் சம்பவம் குறித்து விலங்கு நேசர்கள், ``ஊரடங்கால் நகர்ப் பகுதிகளில் வாழும் விலங்கினங்கள் உணவின்றித் தவித்து அலையும் நிலையில் பலரும் மனித நேயத்துடன் தங்களால் இயன்ற உதவிகளைச் செய்து வருகின்றனர். இப்படிப்பட்ட சூழலில் இரக்கமின்றி விஷம் வைத்துக் கொல்லப்பட்டது வருத்தத்தை அளிக்கிறது. இந்தச் செயலில் ஈடுபட்டவர்கள் மீது கடும் நடவடிக்கை எடுக்கவேண்டும்" என்கின்றனர்.

அடுத்த கட்டுரைக்கு