கட்டுக்கடங்காத காட்டுயிர் வேட்டை... அதிரவைக்கும் அஜி பிரைட் நெட்வொர்க்!

‘‘2010 முதல் 2018-ம் ஆண்டு வரையிலான காலகட்டத்தில் மட்டும் இந்திய காடுகளில் 265 யானை வேட்டைகள் நடந்துள்ளன என்கிறது, இந்திய காட்டுயிர் பாதுகாப்பு அமைப்பு. யானைத் தந்தங்கள் மட்டுமன்றி, முள்ளம்பன்றி முட்கள், எறும்புத்தின்னி செதில்கள் என வேகமெடுக்கும் வேட்டைகள், காட்டுயிர்களுக்கு பெரும் அச்சுறுத்தலாக மாறியிருக்கிறது’’ என்று கலங்குகின்றனர் வனவிலங்கு ஆர்வலர்கள்.

. வனவிலங்கு வேட்டையை இன்றளவும் உயிர்ப்போடு வைத்திருப்பது இரண்டு விஷயங்கள். ஒன்று, பணம் படைத்தவர்கள் கௌரவத்துக்காக யானைத் தந்தம், மான் கொம்பு போன்ற வனவிலங்குகளின் உறுப்புகளால் வீட்டை அலங்கரிப்பது. இன்னொன்று, சீனப் பாரம்பர்ய மருத்துவம். துரதிர்ஷ்டவசமாக, விலங்கு உறுப்புகளைக்கொண்டு செய்யப்படும் இந்த மருத்துவமுறையை கடந்த ஆண்டு உலக சுகாதார நிறுவனமும் அங்கீகரித்துவிட்டது. இதனால், வனவிலங்கு வேட்டையை சீனக் கள்ளச்சந்தை முடுக்கிவிட்டிருக்கிறது. அதன் விளைவு தமிழகக் காடுகளிலும் எதிரொலிக்கிறது என்பதுதான் வேதனை.

. கீரிப்பிள்ளை பிரஷ்

‘‘கீரிப்பிள்ளை முடியைக்கொண்டு ஓவியம் வரையக்கூடிய பிரஷ் தயாரிப்பது இப்போது பிரபலமாகியிருக்கிறது. ‘அதில் தயாரிக்கப்படும் பிரஷ் அதிக உறிஞ்சுத்தன்மையோடு இருப்பதால், அடிக்கடி சாயத்தில் தொட்டு ஓவியம் வரைய வேண்டியிருக்காது. ஒருமுறை பிரஷ்ஷில் தொட்டு எடுக்கப்படும் சாயமே நீண்ட நேரம் தாக்குப்பிடிக்கும்’ என்று சொல்கின்றனர். ஒரு கீரிப்பிள்ளையிலிருந்து சுமார் 40 கிராம் முடி கிடைக்கும். அதில் 20 கிராம் மட்டுமே பிரஷ் தயாரிக்கும் அளவுக்குத் தரமாக இருக்கும். ஆக, ஒரு கிலோ முடி வேண்டுமென்றால், 50 கீரிப்பிள்ளைகளை வேட்டையாட வேண்டும்’’ என்கின்றனர் விவரம் அறிந்தவர்கள்.

. கடந்த ஆண்டு நவம்பரில் கேரளம், கர்நாடகம், தமிழகம் ஆகிய மாநிலங்களில் காட்டுயிர் குற்றத் தடுப்புப் பிரிவினர் ‘ஆபரேஷன் க்ளீன் ஆர்ட்’ என்ற பெயரில் நடத்திய அதிரடி சோதனையில், கீரிப்பிள்ளையின் ரோமங்களால் தயாரிக்கப்பட்ட 54,352 பிரஷ்களைக் கைப்பற்றினர். இப்படியான சோதனைகளும் கடைநிலை ஊழியர்களைக் கைதுசெய்வதும் அடிக்கடி நடந்தாலும், இதற்கெல்லாம் மூளையாகச் செயல்படும் முக்கியக் குற்றவாளிகளை நெருங்குவது அரிதிலும் அரிதாகவே உள்ளது.

. அப்படியோர் அரிதான சம்பவத்தை தமிழக வனத்துறை அதிகாரியான உமா, கேரளத்தில் நிகழ்த்திக்காட்டினார். தென்னிந்தியாவில் நடக்கும் காட்டுயிர் வேட்டைகளுக்குக் காரணகர்த்தாவாகச் செயல்பட்டுவந்த அஜி பிரைட் என்பவரை, 2015-ம் ஆண்டு திருவனந்தபுரத்தின் வன அதிகாரியாக இருந்த உமா கைதுசெய்தார். இருப்பினும், உமா மீது அஜி பிரைட் தொடுத்த மனித உரிமை வழக்கு வெளிச்சத்துக்கு வந்த அளவுக்கு, அஜி பிரைட் மீதிருந்த யானை வேட்டை தொடர்பான வழக்கு வெளிச்சத்துக்கு வரவில்லை.

. அஜி பிரைட் நெட்வொர்க்

``தமிழகம் மற்றும் கேரளாவில் நடக்கும் அனைத்துவிதமான வனவிலங்கு வேட்டைகளுக்கும் மூளையாகச் செயல்படுவது அஜி பிரைட்தான்’’ என்கின்றனர் வனத்துறையைச் சேர்ந்த சிலர். அவர்களிடம் பேசினோம். ‘‘சிங்கம், குபேந்திரன் ஆகிய இருவர்தான் தமிழகத்தில் யானைகளைச் சுட்டு வீழ்த்தக்கூடிய வேட்டைக் காரர்களாக அறியப்படுபவர்கள். இவர்களுக்கு மேலே இடைத்தரகராகச் செயல்படுவது கேரளாவைச் சேர்ந்த பாபு ஜோஸ். இந்த பாபு ஜோஸுக்கும் மேலே உள்ளவர்தான் அஜி பிரைட். அவர்களுக்கு வரும் ஆர்டரைப் பொறுத்து வேட்டைக் கான அளவுகோலைத் தீர்மானித்து ஆட்களைக் காட்டுக்குள் அனுப்புகின்றனர்.

. அவர்களின் கட்டளைப்படி தனித்தனியாகப் பிரிந்து பல்வேறு வழிகளில் காட்டுக்குள் நுழையும் வேட்டைக்காரர்கள், வேட்டையை ஆரம்பிப்பார்கள். வேட்டை முடிந்ததும் மறைவான ஓரிடத்தில் கூடி, வேட்டையாடிய விலங்குகளின் உடல்களை அங்கேயே கூறுபோடுவார்கள். பிறகு தேவையான பாகங்களை மட்டும் எடுத்துக்கொண்டு, மீதத்தைக் காட்டுக்குள்ளேயே புதைத்து விட்டு, வேட்டை நடந்ததற்கான தடம் தெரியாமல் காட்டுக்குள்ளிருந்து வெளியேறிவிடுகின்றனர். சீனா, ஜப்பான் மற்றும் சில மத்திய கிழக்கு நாடுகளிலும் வனவிலங்கு உறுப்புகளுக் கான கள்ளச்சந்தை பெரிய அளவில் இருக்கிறது. அந்தக் கள்ளச்சந்தை களிலிருந்து வரும் ஆர்டர்களுக்கு ஏற்ப அஜி பிரைட் போன்ற வேட்டைப் புள்ளிகள் கொழிக்கின்றனர்’’ என்று விவரித்தனர்.

. களமிறங்கிய விகடன் ஆர்.டி.ஐ குழு

தமிழகத்தில் காட்டுயிர்களுக்கு எதிராக நடக்கும் குற்றங்களின் நிலை அறிய களமிறங்கியது விகடன் ஆர்.டி.ஐ குழு. கடந்த ஒன்பது ஆண்டுகளில் வனவிலங்கு வேட்டை தொடர்பாகப் பதியப்பட்ட வழக்குகள்குறித்த தகவல்கள் நம்மை அதிரவைத்தன. தமிழகத் திலேயே மதுரை வனக்கோட்டம்தான் காட்டுயிர் வேட்டையின் கோட்டை. 2011-ம் ஆண்டு முதல் 2019 மார்ச் மாதம் வரை மதுரை வனக்கோட்டத்தில் மட்டும் பதியப்பட்ட வனவிலங்கு வேட்டை மற்றும் திருட்டு வழக்குகளின் எண்ணிக்கை மொத்தம் 7,068. தமிழகத்தில் உள்ள ஒன்பது வனச்சரகங்களில்தான் புலி நகங்கள், மான் கொம்புகள், நரியின் தலை, தேவாங்கு தோல், எறும்புத்தின்னி செதில்கள் எனப் பல்வேறு வனவிலங்கு களும் அதிகளவில் வேட்டையாடப் பட்டிருப்பதாகத் தகவல் தெரியவந்துள்ளது.

காட்டுயிர் பாதுகாப்பு ஆர்வலரும் ஒளிப்படக் கலைஞருமான ரவீந்திரனிடம் பேசியபோது, ‘‘காட்டுயிர்கள் வேட்டை கட்டுப்படுத்த முடியாததாகத் தொடர்வது உண்மைதான். திருமங்கலம் பகுதியில் மான்கள் வேட்டையாடப்படுவது குறித்து வனத்துறை அதிகாரிகளுக்குப் பலமுறை புகார் தெரிவித்தும் நடவடிக்கை இல்லை. வனவிலங்குகளை வேட்டையாடு பவர்கள்மீது கடுமையான நடவடிக்கைகள் எடுத்தால்தான் வனவிலங்குகளைக் காப்பாற்ற முடியும். சில அதிகாரிகள் மட்டுமே துணிச்சலுடன் பணியாற்று கின்றனர். எல்லோரும் துணிச்சலுடனும் நேர்மையுடனும் பணியாற்றினால் வேட்டையை எளிதாகத் தடுக்கலாம்’’ என்றார்.

. விலங்கு நல ஆர்வலர் ‘யானை’ அறிவு பேசும் போது, ‘‘வனத்துறையில் ஆள் பற்றாக்குறையைத் தீர்க்க வேண்டும். வனத்தில் வேட்டை தடுப்புக் காவலர்கள் அதிகம் இருந்தால்தான், வேட்டைக்காரர்கள் வனத்துக்குள் செல்ல அஞ்சுவார்கள். அதுமட்டுமல்லாமல் வனத்துறை யினரை நேர்மையாகச் செயல்படவிடாமல் தடுப்பதில் அரசியல்வாதிகளின் நெருக்கடிக்கும் ஒரு தீர்வு கொண்டுவர வேண்டும்’’ என்றார்.

மதுரை வனத்துறை அலுவலர் முகம்மது சபாபிடம் கேட்டோம். ‘‘பணியாளர்கள் பற்றாக் குறை இருப்பது உண்மைதான். பற்றாக்குறையை சரிசெய்ய அரசு தீவிரம்காட்டி வருகிறது. காலிப் பணியிடங்களை விரைவில் நிரப்பிவிடுவோம்” என்றவரிடம், மதுரை வனச்சரகத்துக்குள் வனவிலங்குகள் வேட்டை அதிகமாக இருப்பது குறித்துக் கேள்வி கேட்டதுதான் தாமதம், ‘‘எனக்கு நிறைய வேலை இருக்கிறது’’ என்று சொல்லி இணைப்பைத் துண்டித்துவிட்டார்.

கடந்த எட்டு ஆண்டுகளில் மதுரையில் மட்டும் 7,000 வழக்குகள் என்றால், தமிழகம் முழுவதும் கணக்கிட்டால் எவ்வளவு இருக்கும் என்பதை கற்பனைசெய்யவே அச்சமாக இருக்கிறது. காட்டுயிர் வளம் வேகமாக அழிவது கண்கூடாகத் தெரிகிறது. காட்டுயிர்களின் அழிவு, காடுகளின் அழிவுக்கான தொடக்கப்புள்ளி. காடுகள், நதிகளின் தாய்மடி. அதை அழிப்பது தாய்நாட்டை அழிப்பதற்கான முதல்படி என்பதை தமிழக அரசு உணர வேண்டும்!

. பற்றாக்குறை பணியாளர்கள்!

ம துரை வனக்கோட்டம் உசிலம்பட்டி, சோழவந்தான், மதுரை ஆகிய வனச்சரகங்களை உள்ளடக்கியுள்ளது. வன அதிகாரி, கண்காணிப்பாளர், வனப் பாதுகாவலர் என மொத்தம் 135 பேர் பணி செய்ய வேண்டிய நிலையில், பல ஆண்டுகளாக 100 பேர் மட்டுமே பணியில் உள்ளனர். குறிப்பாக, 23 வனப் பாதுகாவலர்கள் இருக்க வேண்டிய இடத்தில் 16 பேர் மட்டுமே உள்ளனர். மொத்தம் 3,710 சதுர கி.மீ அளவிலான மிகப்பெரிய வனப் பரப்பு உள்ள மதுரை வனக்கோட்டத்தை இவ்வளவு குறைவான பணியாளர்களைக்கொண்டு முழுமையாகக் கண்காணிப்பது நடைமுறையில் சாத்தியமில்லாத காரியம். மதுரை மட்டுமன்றி, மாநிலம் முழுக்கவே வனத்துறையில் 40-லிருந்து 50 சதவிகிதம் பணியாளர்கள் பற்றாக்குறை நிலவுகிறது.

மதுரை வனக்கோட்டத்தில் நடக்கும் வேட்டைகள் ஒரு சோறு பதம்தான். தமிழ்நாட்டில் உள்ள பல வனக்கோட்டங்களிலும் இதுபோல் ஏராளமான வழக்குகள் பதியப்பட்டிருக்கின்றன.

கட்டுக்கடங்காத காட்டுயிர் வேட்டை... அதிரவைக்கும் அஜி பிரைட் நெட்வொர்க்!

க.சுபகுணம்Follow