Published:Updated:

பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?
பிரீமியம் ஸ்டோரி
பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

ஆர்.மோகனப் பிரபு, சார்ட்டர்ட் ஃபைனான்ஷியல் அனலிஸ்ட்

பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

ஆர்.மோகனப் பிரபு, சார்ட்டர்ட் ஃபைனான்ஷியல் அனலிஸ்ட்

Published:Updated:
பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?
பிரீமியம் ஸ்டோரி
பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

ந்தன் வங்கியின் ஆரம்ப நிறுவனரது பங்கினை 40 சதவிகிதமாகக் குறைக்க வேண்டும் என ரிசர்வ் வங்கி  தொடர்ந்து அழுத்தம் தந்துவந்ததன் காரணமாக, ஹெச்.டி.எஃப்.சி குழுமத்தைச் சார்ந்த க்ருஹ் ஃபைனான்ஸ் நிறுவனம் பந்தன் வங்கியுடன் இணைகிற முடிவை சமீபத்தில் மேற்கொள்ளப்பட்டது. இந்த இணைப்பு சிறப்பானதாகச் சொல்லப் பட்டாலும், பங்குச் சந்தையிலோ இந்த நடவடிக்கைக்குச் சரியான வரவேற்பு கிடைக்கவில்லை. இந்த இணைப்பு அறிவிப்பு வந்த  இரண்டே நாள்களில், க்ருஹ் பங்குகள் சுமார் 20% வரை வீழ்ச்சி அடைந்தன; பந்தன் பங்குகள் 10% வரை வீழ்ச்சியடைந்தன. இந்த இணைப்பின் பின்னணி, இந்த இணைப்பினால் யாருக்கு லாபம் என்பதைப் பற்றியும் பார்ப்போம்.

பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

கிழக்கும் மேற்கும் சந்தித்தால்...

கொல்கத்தாவைத் தலைமையிடமாகக்கொண்டு, கடந்த 2014-ம் ஆண்டு தொடங்கப்பட்டது பந்தன் வங்கி. நம் நாடு சுதந்திரம் அடைந்ததற்குப்பிறகு கிழக்கிந்தியப் பகுதியில் உருவான முதல் வங்கி இதுதான். பந்தன் வங்கியின் உரிமையாளரான பந்தன் ஃபைனான்ஷியல் சர்வீசஸ் நிறுவனம், இந்தியாவின் மிகப்பெரிய வங்கிசாரா (நுண்) நிதி நிறுவனங்களில் ஒன்றாகும். கடந்தாண்டு பங்குச் சந்தையில் பட்டியலிடப்பட்ட பந்தன் வங்கிக்கு மிகப்பெரிய அளவிற்கு வரவேற்பு இருந்தது. பட்டியலிடப்பட்ட முதல் நாளிலேயே இந்த வங்கியின் பங்கு விலை 30% வரை அதிகரித்தது.

கிராமப் பகுதிகளில் எளிய முறையில் வீட்டுக் கடன் வழங்கும் நோக்கத்துடன் ஹெச்.டி.எஃப்.சி குழுமத்தால் குஜராத்தில் 1986-ல் தொடங்கப் பட்ட க்ருஹ் ஃபைனான்ஸ் நிறுவனம் நன்கு  வளர்ச்சி யடைந்து, தற்போது 11 மாநிலங் களில் 195 கிளைகளைக் கொண்டுள்ளது. சுமார் ரூ.15,970 கோடி கடன் சொத்துகளைக் கொண்ட க்ருஹ் ஃபைனான்ஸ் நிறுவனம், சுமார் 23,000 கோடி ரூபாய் அளவிற்கு சந்தை மதிப்பைக் கொண்டிருந்தது.

இந்திய ரிசர்வ் வங்கியின் நடப்பு வழிகாட்டுதல்களின்படி, பந்தன் வங்கியில் நிறுவனரின் பங்கு செப்டம்பர் 2018-க்குள்    40 சதவிகிதத்துக்கும் கீழாக குறைக்கப்பட வேண்டும். ஆனால், இந்த வங்கியில் நிறுவனரின் பங்கு விகிதம் குறைக்கப்படாத நிலையில், புதிய கிளைகளைத் திறப்பதற்கு அந்த வங்கிக்குக் கட்டுப்பாடுகள் விதிக்கப்பட்டன. ரிசர்வ் வங்கி யின் நிலைப்பாடு இந்த  வங்கி யின் விரிவாக்கத்திற்கு முட்டுக்கட்டை போட்டதுடன் கடந்த ஆகஸ்ட் மாதம் புதிய உச்சத்தை (ரூ. 741) தொட்டிருந்த  இந்த வங்கியின் பங்குகள் சரியவும் ஒரு முக்கியக் காரணமாக அமைந்தது.

பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

இந்தச் சூழ்நிலையில், கடந்த 07.01.2019 அன்று, பந்தன் வங்கியுடன் க்ருஹ் ஃபைனான்ஸ் இணைவது குறித்த முக்கியமான அறிவிப்பு வெளி யிடப்பட்டது. அதாவது, பந்தன் வங்கியுடனான க்ருஹ் இணைப்பின்போது, க்ருஹ் ஃபைனான்ஸ் நிறுவனத்தின் 1,000 பங்குகளுக்கு, பந்தன் வங்கியின் 568 பங்குகள் என்ற வீதத்தில் க்ருஹ் ஃபைனான்ஸ் முதலீட்டாளர்களுக்குப் புதிய பந்தன் வங்கி பங்குகள் வழங்கப்படும். இந்தத் திட்டத்தின்படி, க்ருஹ் ஃபைனான்ஸ் நிறுவனத்தில் 58% பங்கு களைக் கொண்டுள்ள முக்கியப் பங்குதாரரான, ஹெச்.டி.எஃப்.சி  நிறுவனத்திற்கு பந்தன் வங்கியின் 15% பங்குகள் வழங்கப்படும். அதேபோல, பந்தன் வங்கியில் தற்போது 82% உரிமை கொண்டுள்ள பந்தன் ஃபைனான்ஷியல் சர்வீசஸ் நிறுவனத்தின் பங்கு 61 சதவிகிதமாகக் குறையும்.

யாருக்கு லாபம்?

பதினோரு மாநிலங்களில், குறிப்பாக, மேற்கிந்தியாவில் அதிகக் கிளைகள் கொண்டுள்ள க்ருஹ் ஃபைனான்ஸ் நிறுவனத்தை இணைப்பதன் மூலம் பந்தன் வங்கியின் வீச்சு பூகோளரீதியாக அதிகரிக்கும். ஹெச்.டி.எஃப்.சி போன்ற அனுபவம் வாய்ந்த பெரும் குழுமத்துடனான உறவு, தொழில்நுட்பம் மற்றும் அரிய வங்கி நுணுக்கங்களை வளர்த்துக்கொள்ளவும் உதவும்.மேலும், பல்லாயிரம் கோடி கடன் சொத்துகள் கொண்ட வீட்டுக் கடன் வழங்கும் க்ருஹ் நிறுவனத்தை இணைப்பது கடன் புத்தகத்தின் விரிவாக்கத்திற்கும், கடன் ரிஸ்க் பரவலாக்கத்திற்கும் உதவும். 

ரிசர்வ் வங்கியின் அறிவுரை படி, நிறுவனரின் பங்கைத் தற்போதைக்கு ஓரளவுக்குக் குறைக்கவும், காலப்போக்கில் முழுமையாகக் கடைப் பிடிக்கவும் (நிறுவனரின் பங்கு = 40%) இந்த இணைப்பு உதவும். ஆனால், ரிசர்வ் வங்கியின் கட்டுப்பாடுகளைத் தவிர்ப்பதற்காக அதிக விலையில் க்ருஹ் பங்குகளை வாங்கியிருக்கத் தேவையில்லை; இந்த வங்கியை நாடு முழுக்க விரிவாக்கம் செய்வதற்குப் பதிலாக, தற்போதுள்ள வங்கிக்கிளைகளைக் கொண்டே அதிக வளர்ச்சியடைய முயற்சி செய்திருக்கலாம் என சந்தை ஆய்வாளர்கள் சொல்கிறார்கள். 

பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

ஹெச்.டி.எஃப்.சி   நிறுவனத்தைப் பொறுத்தவரை, தனது துணை நிறுவனங்களில் ஒன்றே தனக்குப் போட்டியாளராகவும் இருப்பதைத் தவிர்க்க இந்த இணைப்பு உதவுகிறது. மேலும், இந்த இணைப்பு வருங்காலத்தில், பந்தன் வங்கியை தனது இன்னொரு துணை நிறுவனமான ஹெச்.டி.எஃப்.சி வங்கியுடன் இணைப்பதற்கும் வாய்ப்புகளை உருவாக்குகிறது. மேலும், மிக அதிகமான சந்தை மதிப்பீட்டுடன் இருந்த தனது துணை நிறுவனத்தின் பங்குகளைக் குறைந்த தள்ளுபடியில் விற்க முடிந்துள்ளது. வருங்காலத்தில் பந்தன் முதலீட்டில் இருந்தும் இதேபோல வெளியேற முடிந்தால், ஹெச்.டி.எஃப்.சி நிறுவனப் பங்குதாரர் களுக்கு நல்ல பலன் கிடைக்கும்.

தரம் அதிகம், விலையோ அதைவிட அதிகம்

வங்கிசாரா நிதி நிறுவனங்களுக்கு வணிக வங்கிகள் அளவிற்கு ரிசர்வ் வங்கியின் கடுமையான  கட்டுப்பாடுகள் கிடையாது. எளிமையான முறையில் அதிகக் கடன்களை குறுகிய காலத்தில்  தரவல்ல நிலையில் உள்ளதால், பொதுவாகவே வங்கிசாரா நிதி நிறுவனங்களின் பங்கு மதிப்பீடு அதாவது, பங்கு விலை-புத்தக மதிப்பு ஆகியவற்றின் விகிதம் (P/BV), வணிக வங்கிகளை விட மிக அதிகமாகவே உள்ளது.
 
மேற்சொன்ன கருத்தின் அடிப்படையில், பந்தன் வங்கியின் தற்போதைய பங்கு விலை -புத்தக மதிப்பு விகிதத்தைப் போல க்ருஹ் பங்கின் மதிப்பு கிட்டத்தட்ட இருமடங்கு உள்ளது. மேலும், ஹெச்.டி.எஃப்.சி  நிறுவனத்தின் துணை நிறுவனம் என்ற அந்தஸ்தும் க்ருஹ் பங்கின் அதிக சந்தை மதிப்பீட்டிற்கு ஒரு முக்கியக் காரணமாக இருந்தது. ஆனால், பந்தன் வங்கியுடன் இணைக்கப்பட்டபிறகு இந்தச் சிறப்பு அந்தஸ்து பறிபோவதுடன், சந்தை மதிப்பீடும் குறைந்து போய்விடும் அபாயமும் உள்ளது.
 
வேகமாக வளரும் ஒரு சிறிய வங்கி என்ற நிலையில் பந்தன் வங்கிக்கு உயர்வான சந்தை மதிப்பீடு இருந்தது.  வளர்ச்சி குறித்த சந்தையின் எதிர்பார்ப்பு, பேலன்ஸ்ஷீட் ஓரளவுக்கு மேல் வளர்ந்தபின்னர் குறைந்துபோவது இயல்பே. தற்போதைய க்ருஹ் ஃபைனான்ஸ் இணைப்பின் மூலம் அதிகரிக்கும் பேலன்ஸ்ஷீட் மதிப்பு, பந்தன் வங்கியின் வேகமான வளர்ச்சி எதிர்பார்ப்பைக் குறைப்பதினால், வங்கியின் சந்தை மதிப்பீடு குறைந்துபோக வாய்ப்புள்ளது.

பந்தன் வங்கி & க்ருஹ் ஃபைனான்ஸ் இணைப்பு... யாருக்கு லாபம்?

ஒரு தனியார் வங்கியின் பங்குளில் முதலீடு செய்ய 10% என்பது அதிகபட்ச அளவு என்கிற விதிமுறைக்கேற்ப, ஹெச்.டி.எஃப்.சி இந்த இணைப்பின் மூலம் கிடைக்கவுள்ள பந்தன் வங்கியின் அதிகப்படியான 5% பங்குகளை பொது வெளியில் விற்க நேரிடலாம். இது பந்தன் வங்கியின் பங்குகளுக்கு உள்ள மற்றொரு விலை அபாயமாகும். அதேபோல, ரிசர்வ் வங்கியின் 40% அறிவுரையில் பாதிக்கிணறு மட்டுமே தாண்டியுள்ள பந்தன் வங்கியின் நிறுவனர்கள், இன்னும்கூட தங்களிடம் உள்ள பங்குகளை விற்க வேண்டும் என்ற கட்டாயமும் பந்தன் பங்குகளின் சந்தை மதிப்பைப் பாதிக்கக்கூடிய அம்சம். 

மொத்தத்தில், இரண்டு வலுவான நிறுவனங் களின் ஒருங்கிணைப்பானது நீண்டகால நோக்கில் பயன்தரும் என்றாலும், பந்தன் வங்கியின் சந்தை மதிப்பீட்டில் ஒரு சமன்நிலை ஏற்பட்டபின்னர் முதலீட்டிற்கு பரிசீலிப்பது நல்லது!

குறிப்பு: இந்தக் கட்டுரையில் சொல்லப்பட்டுள்ள கருத்துகள் கட்டுரையாளரின் தனிப்பட்ட கருத்துகளே!