Published:Updated:

ஆர்.பி.ஐ முடிவு... வரவேற்கத் தகுந்ததா வாராக்கடன் வங்கி?

பேட் பேங்க்
பிரீமியம் ஸ்டோரி
News
பேட் பேங்க்

B A D B A N K - பேட் பேங்கின் சாதகங்களும் பாதகங்களும்

எப்போதெல்லாம் வாராக் கடன் அளவு அதிகரிக் கிறதோ, அப்போதெல்லாம் ‘வாராக்கடன் வங்கியை’ (Bad Bank) உருவாக்க வேண்டுமென்ற கருத்துகள் எழுந்துகொண்டுதான் இருக்கின்றன. கொரோனா பேரிடருக்கு முன்பேகூட, பல வங்கிகள், வரலாறு காணாத வாராக் கடன் சிக்கலில் தத்தளித்துக் கொண்டிருந்தன.

தற்போது கடன் சலுகைக் காலம் (Moratorium) முடிவடைந்த பின்னர், வாராக்கடன் அளவு மேலும் அதிகரிக்கும் புதிய அபாயம் உருவாகியுள்ளதாக ரிசர்வ் வங்கி சமீபத்தில் எச்சரித்திருந்ததது. இதனால், வாராக்கடன் வங்கி குறித்த முன்மொழிவைப் பரிசீலிக்க இருப்பதாக ரிசர்வ் வங்கியின் கவர்னர் சக்திகாந்த தாஸ் சமீபத்தில் தெரிவித்திருப்பது, வாராக்கடன் வங்கி குறித்து புதிய விவாதங்களை எழுப்பியுள்ளது.

வாராக்கடன் வங்கி என்றால்...

ஆங்கிலத்தில் Bad Bank என்று அழைக்கப்படும் வாராக்கடன் வங்கி என்பது, வாராக்கடன் சொத்துகளைப் புனரமைக்கும் ஒரு நிதி நிறுவனமாகும். சாதாரண வணிக வங்கிகளிடமிருந்து வாராக்கடன் சொத்துகளை விலைக்கு வாங்கி, அவற்றை இயன்ற வரையில் புனரமைத்த பின்னர், நிலுவைத் தொகையை வசூலிப்பது தான் வாராக்கடன் வங்கிகளின் பணியாகக் கருதப் படுகிறது.

முதல் பேட் பேங்க்...

உலகின் முதல் வாராக்கடன் வங்கி மெல்லன் வங்கியால் (Mellon Bank) அமெரிக்காவில் 1988-ம் ஆண்டு உருவாக்கப்பட்டது. முதல் வாராக் கடன் வங்கிக்கு அந்த நாட்டின் மத்திய வங்கி உடனடியாக அனுமதி அளிக்கவில்லை என்பது குறிப்பிடத் தக்கது. பின்னர், ஸ்வீடன், பிரான்ஸ், ஜெர்மனி போன்ற நாடுகளிலும் வாராக்கடன் வங்கிகள் உதயமாகின.

2007-08-ம் ஆண்டின் உலகக் கடன் நெருக்கடியின் தொடர்ச்சியான உலகப் பொருளாதார சிக்கலின்போது, பெருவாரியான நிலுவைக் கடன்கள் வாராக்கடன் வங்கிகளிடம் ஒப்படைக்கப்பட்டன என்பதும் வாராக்கடன் வங்கி சிக்கல்கள் சில நாடுகளில் தேசிய சிக்கலாக உருவெடுத்தன என்பதும் சுவாரஸ்ய தகவல்கள்.

இந்தியாவிலும்கூட, கடன் சொத்து புனரமைப்பு நிறுவனங்கள் (Asset reconstruction companies) உருவாக்கப் பட்டு, அவற்றிடம் வாராக் கடன்கள் ஒப்படைக்கப்பட்டன.

வாராக்கடன்
வாராக்கடன்

வரவேற்பும் எதிர்ப்பும்...

வணிக வங்கிகளின் குறிப்பாக, பொதுத்துறை வங்கிகளின் செயல் பாடுகள் சிறப்பாக இல்லாததற்கு வாராக்கடன் சுமைதான் காரணம் என்றும், வாரக்கடன்களை நிர்வகிக்கத் தனியாக ஒரு வங்கியை உருவாக்கிவிட்டால், பொதுத்துறை வங்கிகளின் மீதான அழுத்தம் குறையும்; அவற்றின் புதிய கடன் வழங்கும் செயல்பாடுகள் மேம்படும் என்பது வாராக்கடன் வங்கிகளை வரவேற்கும் தரப்பினரின் கருத்து.

புதியதாக வாராக்கடன் வங்கியை உருவாக்கி அதனிடம் பொதுத்துறை வங்கிகளின் வாராக்கடன் சுமையை ஒப்படைக்கும்போது, வாராக் கடன்களை வசூலிக்கும் பொறுப்பு தட்டிக் கழிக்கப்படும் அபாயம் உள்ளது என்ற கருத்தும் பரவலாக உள்ளது.

மேலும், புதிய கடன்களை வழங்குவதில் தேவைப்படும் எச்சரிக்கை உணர்வு குறையக்கூடும்; அதிகம் கவனிக்கப்படாத வாராக் கடன்கள் நீண்டகால நோக்கில் தேசிய சிக்கலாக உருவெடுக்கும் என்பதும் வாராக்கடன் வங்கி உருவாக்கத்தின் மீதுள்ள விமர் சனங்கள் ஆகும்.

இந்தியாவின் நிலை என்ன..?

வாராக்கடன் வங்கி குறித்து பல காலமாக விவாதிக்கப்பட்டு வந்தா லும், கடந்த மாதத்தில், பொருளாதார விவகாரத் துறையின் செயலாளர் தருண் பஜாஜ், பத்திரிகையாளரின் கேள்வி ஒன்றுக்கு பதில் அளிக்கையில், ‘‘வாராக்கடன் வங்கியை உருவாக்குவது குறித்து மத்திய அரசு ஆலோசித்து வருவதாகக்’’ கூறினார்.

முன்னதாக, மத்திய அரசின் தலைமைப் பொருளாதார ஆலோசகர் சுப்பிரமணியன், ‘‘வாராக் கடன் வங்கி அமைப்பதற்கு முன்பு முக்கிய ஆலோசனைகளை மேற்கொள்ள வேண்டும்’’ என்று கூறியிருந்தார்.

இந்திய தொழிற் கூட்டமைப்பின் தலைவரான உதய் கோடக், ‘‘புதிய வாராக்கடன் வங்கி உருவாக்குவதற்கு முன்பு வாராக்கடன் வசூலில் உள்ள அடிப்படை சிக்கல்களுக்கு தீர்வு காண வேண்டும்’’ என்று கருத்து தெரிவித்திருந்தார்.

‘‘சட்டையின் ஒரு பாக்கெட்டி லிருந்து இன்னொரு பாக்கெட்டுக்கு பணத்தை மாற்றுவதற்கு ஒப்பான வாராக்கடன் வங்கி உருவாக்கம் தேவையற்றது’’ என்று ரிசர்வ் வங்கியின் முன்னாள் ஆளுநர், ரகுராம் ராஜன் கருத்து தெரிவித்துள்ள நிலையில், மற்றொரு முன்னாள் கவர்னரான சுப்பாராவ், வாராக் கடன் சுமை வெகுவாக அதிகரித்து வரும் தற்போதைய இக்கட்டான சூழ்நிலையில், வாராக்கடன் வங்கி உருவாக்கம் அத்தியாவசியமானது என்று தெரிவித்துள்ளார்.

பொதுத்துறை வங்கி அல்லது வாராக்கடன் வங்கி, இரண்டில் எந்த வடிவில் இருந்தாலும் சரி, வங்கிக் கடன் மோசடியில் ஈடுபட்டுள்ள பெரு முதலாளிகளின் மீது சட்ட ரீதியான நடவடிக்கைகளை மேற்கொண்டு, அவர்களிடமிருந்து வாராக்கடன் நிலுவையை உடனடி யாக வசூல் செய்வதே இந்தப் பிரச்னைக்குத் தீர்வு!

பிட்ஸ்

ந்தியாவில் கார் உற்பத்தி செய்ய இருக்கும் டெஸ்லா தொழிற் சாலையைக் கர்நாடகாவில் உள்ள மங்களூரில் அமைக்கும்படி டெஸ்லா நிறுவனத்துக்கு கடிதம் எழுதியிருக் கிறது கர்நாடக அரசாங்கம்!