Published:Updated:

வங்கிசாரா நிறுவனங்களில் வீட்டுக் கடன்!

வீட்டுக் கடன்
பிரீமியம் ஸ்டோரி
News
வீட்டுக் கடன்

கவனிக்க வேண்டியவை!

முறையாக வருமான வரிக் கணக்குத் தாக்கல் செய்யாதவர்கள் மற்றும் வீட்டுமனைக்கான சி.எம்.டி.ஏ., டி.டி.சி.பி அப்ரூவல் இல்லாதவர்களுக்கு பொதுத்துறை மற்றும் தனியார் வங்கிகள் வீட்டுக் கடன் தருவதில்லை. ஆனால், இவர்கள் வங்கிசாரா நிதி நிறுவனங்களை அணுகினால், அவர்களின் வருமானத்தின் அடிப்படையில் வீட்டுக் கடன் கிடைக்கிறது. இப்படி, முழுமையான ஆவணங்கள் இல்லாமல் நிதி நிறுவனங்களில் வீட்டுக் கடன் பெறுபவர்கள் கவனத்தில் கொள்ளவேண்டிய முக்கியமான விஷயங்கள் என்னென்ன என்று பார்க்கலாம்.

வங்கிசாரா நிறுவனங்களில் வீட்டுக் கடன்!

தனியார் நிறுவனங்களில் பணியாற்றுபவர்களில் பலர் பல்வேறு காரணங்களுக்காக ஒரு நிறுவனத்தைவிட்டு, இன்னொரு நிறுவனத்துக்கு மாறிக்கொண்டே இருப்பார்கள். சம்பளமும் நிலையில்லாததாக இருக்கும். அதன் காரணமாகவே அவர்களால் வங்கிகளை அணுகி, எளிதில் வீட்டுக் கடன் பெற முடியாத நிலை இருக்கும். புறநகர்ப் பகுதிகளில் குறைந்த விலையில் பஞ்சாயத்து அப்ரூவல் மனை வாங்கியவர்களுக்கு பட்டா இருக்கும்; சி.எம்.டி.ஏ / டி.டி.சி.பி அப்ரூவல் இருக்காது. இதன் காரணமாகவும் பொதுத்துறை வங்கிகளில் வீட்டுக் கடன் கிடைக்காது.

இத்தகைய சூழலில் இவர்களுக்கு வங்கிசாரா நிதி நிதி நிறுவனங்கள்தான் கைகொடுக்கின்றன. இந்த நிறுவனங்கள் மாதச் சம்பளம், வீட்டுக்கான அப்ரூவல் குறித்து அதிக ஆவணங்களைக் கேட்பதில்லை. வீடு கட்டுவதற்கு அப்ரூவல் இல்லையென்றாலும் சற்று ரிஸ்க் எடுத்து, வீட்டுமனையின் மதிப்பீட்டின் அடிப்படையில் கடன் வழங்குகின்றன. இந்த நிறுவனங்கள் வழங்கும் வீட்டுக் கடனுக்கான வட்டி, வங்கிகளைவிடச் சற்று அதிகமாக இருக்கும்.

நிதி நிறுவனங்கள் வாடிக்கையாளர்களைத் தேர்வு செய்யும் முறை குறித்து நவரத்னா ஹவுஸிங் ஃபைனான்ஸ் நிறுவனத்தின் முதன்மை ச் செயல் அதிகாரி ஆர். கணேசனிடம் கேட்டோம்.

“வீட்டுக் கடன் பெறுவதற்காக விண்ணப்பிப்பவர்களிடம் அது தொடர்பான ஆவணங்கள் அனைத்தையும் முதலில் சரிபார்ப்போம். வருமானத்தைப் பொறுத்தவரை, வருமான வரி செலுத்துபவராக இருந்தால் வரிக் கணக்குத் தாக்கல் முறையாகச் செய்திருக்க வேண்டும். அவற்றைப் பரிசீலித்து அவர்களுடைய வருமானத்தைப் பொறுத்து கடன் தொகை நிர்ணயிக்கப்படும். வருமான வரிக் கணக்குத் தாக்கல் செய்யாதவர்களாக இருக்கும்பட்சத்தில், அவர்களின் தொழில் நிறுவனங்களுக்குச் சென்று, மாத வருமானம் கணக்கீடு செய்யப்படும். அதன் அடிப்படையில் கடன் தொகை நிர்ணயிக்கப்படும்.

மாத வருமானம் பெறுவோருக்கு வருமான வரிக் கணக்குத் தாக்கல் விவரம் தரப்படவில்லையென்றால், அவர்களின் சம்பளச் சான்றிதழ், வங்கிக் கணக்கு விவரங்கள் பெறப்படும். தொழில் நிறுவனங்களை நடத்தும் நபர்களாகவோ, வியாபாரிகளாகவோ இருந்தால், அவர்களின் தொழில் நடக்கும் இடத்துக்கே சென்று ஆய்வு நடத்தி, வீட்டுக் கடன் வழங்குவது குறித்து முடிவெடுப்போம்.

வீட்டுமனைக்கான பட்டா, வில்லங்கச் சான்று, சி.எம்.டி.ஏ / டி.டி.சி.பி அப்ரூவல், பிளான் அப்ரூவல் போன்றவற்றைச் சரிபார்ப்போம். இவற்றில் பிளான் அப்ரூவல் இல்லாத மனையாக இருந்தால், சில நிறுவனங்கள் பட்டா விவரம் சரியாக இருக்கும்பட்சத்தில் கடன் வழங்கப் பரிசீலிக்கும். அந்த வீட்டுமனையின் சந்தை மதிப்பைக்கொண்டு வீட்டுக் கடன் தொகை தீர்மானிக்கப்படும். இவற்றிலிருக்கும் ரிஸ்க் காரணமாக, வீட்டுக் கடனுக்கான வட்டி, வங்கிகள் பெறுவதைவிடச் சற்றுக் கூடுதலாக இருக்கும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
வங்கிகளில் கடன் பெற முடியாத சூழ்நிலையில் நிதி நிறுவனங்களை அணுகுவது தவிர்க்க முடியாத வழிமுறைதான்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

நிதி நிறுவனங்களும், தேசிய வீட்டு வசதி வங்கியால் (என்.ஹெச்.பி) அங்கீகரிக்கப்பட்ட ஹவுஸிங் ஃபைனான்ஸ் கம்பெனிகளும் ரிசர்வ் வங்கியின் ஒழுங்குமுறை மற்றும் கண்காணிப்பின்கீழ் இருப்பவைதான். எனவே, நம்பிக்கையுடன் இவற்றை அணுகலாம்” என்றார்.

ஆர்.கணேசன், கே.அழகுராமன்
ஆர்.கணேசன், கே.அழகுராமன்

உயர் நீதிமன்ற வழக்கறிஞர் கே.அழகுராமனிடம் பேசினோம். “வங்கிசாரா நிதி நிறுவனங்களுக்கான நெறிமுறைகள், விதிமுறைகளை ரிசர்வ் வங்கி வகுத்திருக்கிறது. அதன்படி அந்த நிறுவனங்கள் நடந்துகொள்கின்றனவா என்பதையும் ரிசர்வ் வங்கி மேற்பார்வை செய்யும்.

வழங்கும் கடனுக்கு எத்தனை சதவிகிதம் வட்டி வசூலிக்க வேண்டும், எப்படி வசூலிக்க வேண்டும் என்று ரிசர்வ் வங்கி வழங்கிய வழிகாட்டுதல்படிதான் அவை செயல்படும். பெரும்பாலும் வங்கிசாரா நிதி நிறுவனங்கள் ஒருவரின் சொத்து மதிப்பு மற்றும் திரும்பச் செலுத்தும் தகுதி அடிப்படையிலேயே கடன் வழங்குவதால் சாதாரண, நடுத்தர வர்க்க மக்கள் சுலபமாக இவற்றிடமிருந்து கடன் பெற்றுவிட முடியும். ஆனால், வட்டி மற்றும் அபராதத் தொகைக்கான கண்ணுக்குத் தெரியாத கட்டணங்கள் எனப் பல வழிகளில் நாம் செலுத்த வேண்டியிருக்கும்.

வீட்டுக் கடன்
வீட்டுக் கடன்

அதேபோல வாராக்கடனை வசூல் செய்வதற்கு இவர்கள் கையாளும் நடைமுறை வித்தியாசமானதாகவும், பயப்படவைக்கும் முறையிலும் இருக்கும். எனவே, கடனைத் திருப்பிச் செலுத்துவதில் மிகுந்த கவனமாக இருக்க வேண்டும்” என்றார்.

இன்றைய காலகட்டத்தில் முழுமையான தொகையைக் கையில் வைத்துக்கொண்டு வீடு வாங்குவது அனைவருக்கும் சாத்தியப்படாது. வங்கிகளில் கடன் பெற முடியாத சூழ்நிலையில் நிதி நிறுவனங்களை அணுகுவது என்பது சரியான வழிமுறைதான். வாய்ப்பிருக்கும்போது அந்தக் கடனை வங்கிகளுக்கு மாற்றிக்கொள்ளவும் செய்யலாம்.

வங்கிசாரா நிதி நிறுவனங்களில் ஏற்கெனவே கடன் வாங்கியவர்களும், இனி வாங்கப் போகிறவர்களும் இந்த விஷயங்களைக் கவனத்தில்கொள்ளலாமே!