Published:Updated:

மூன்றே மாதங்கள்.. 18 வங்கிகள்... 32 ஆயிரம் கோடி மோசடி! அதிர வைத்த ஆர்.டி.ஐ. உண்மை

தெ.சு.கவுதமன்

ஸ்டேட் பேங்க் ஆஃப் இந்தியா வங்கியில்தான் அதிகபட்சமாக 38% அளவுக்கு பண மோசடி நடந்துள்ளது. இந்த வங்கி சார்பாக மட்டும் ரூ.12,012.77 கோடி மோசடி தொடர்பாக மொத்தம் 1,197 வழக்குகள் பதியப்பட்டுள்ளன.

State Bank of India
State Bank of India ( vikatan )

கடந்த ஏப்ரல் - ஜூன் காலாண்டில் பொதுத்துறை வங்கிகளில் நடைபெற்ற பண மோசடி வழக்குகள் குறித்து, தகவல் அறியும் உரிமைச்சட்டத்தின் மூலம் கேட்கப்பட்ட கேள்விக்குக் கிடைத்த பதில், இந்தியாவையே அதிர்ச்சியடைய வைத்துள்ளது.

ஏப்ரல் முதல் ஜூன் வரையிலான மூன்று மாதங்களில் மட்டும் மொத்தம் 18 பொதுத்துறை வங்கிகளில் வங்கிக்கடன் பெற்று மோசடி செய்துள்ளதாக, மொத்தம் 2,480 வழக்குகள் பதிவு செய்யப்பட்டுள்ளன. மொத்தம் 31,898.63 கோடி ரூபாய் அளவுக்கு மோசடி நடந்திருப்பது தெரியவந்துள்ளது.

Banking frauds
Banking frauds

ஏற்கெனவே வாராக்கடன்களால் வங்கித்துறை பெரிதும் பாதிக்கப்பட்டுள்ளது. நிரவ் மோடி, விஜய் மல்லையா, ஐசிஐசிஐ சாந்தா கோச்சார் போன்றவர்கள் பல்லாயிரம் கோடி ரூபாய் வங்கி மோசடிகளில் ஈடுபட்ட வழக்குகள் விசாரணையில் உள்ளன. இப்படி தொடர் மோசடிகளால் வங்கித்துறை வருமான இழப்பைச் சந்தித்துவரும் சூழலை மாற்றியமைப்பதற்காக, வங்கிகள் இணைப்பு, நிதி உதவி போன்ற நடவடிக்கைகளில் மத்திய அரசு ஈடுபட்டுவருகிறது. எனினும் பொதுத்துறை வங்கிகளில் வங்கி மோசடி தொடர்கதையாக இருப்பது இப்போது தெரியவந்துள்ளது.

ஸ்டேட் பேங்க் ஆஃப் இந்தியா வங்கியில்தான் அதிகபட்சமாக 38% அளவுக்கு பண மோசடி நடந்துள்ளது. இந்த வங்கி சார்பாக மட்டும் ரூ.12,012.77 கோடி அளவில் மோசடி நடந்துள்ளது. இது தொடர்பாக மொத்தம் 1,197 வழக்குகள் பதியப்பட்டுள்ளன.

அடுத்ததாக அலகாபாத் வங்கி சார்பாக ரூ.2,855.46 கோடி மதிப்பில் மோசடி நடந்துள்ளது. 381 மோசடி வழக்குகள் பதியப்பட்டுள்ளன.

பஞ்சாப் நேஷனல் வங்கி சார்பாக ரூ.2,526.55 கோடி அளவிலான 99 மோசடி வழக்குகள் பதியப்பட்டுள்ளன.

பாங்க் ஆஃப் பரோடா வங்கி சார்பாக ரூ.2,297.05 கோடிக்கு 75 வழக்குகள் பதியப்பட்டுள்ளன.

ஓரியன்டல் பாங்க் ஆஃப் காமர்ஸ் சார்பாக 45 வழக்குகளும், கனரா வங்கி சார்பாக 69 வழக்குகளும், சென்ட்ரல் பாங்க் ஆஃப் இந்தியா சார்பாக 194 வழக்குகளும்,யுனைடெட் பாங்க் ஆஃப் இந்தியா சார்பாக 31 வழக்குகளும் பதியப்பட்டுள்ளன.

சந்திரசேகர் கவுர் என்ற சமூகச் செயற்பாட்டாளர் தகவல் அறியும் உரிமைச்சட்டத்தின் மூலம் கேட்ட கேள்விக்கு இந்த பதில் கிடைத்துள்ளது.

R Ganesan
R Ganesan

வங்கி மோசடி என்பது தொடர்கதையாக இருப்பதற்குக் காரணம் என்ன, வங்கி மேலாளர்களால் இதைத் தடுக்க இயலாதா என்று பஞ்சாப் நேஷனல் வங்கியின் முன்னாள் உதவிப்பொதுமேலாளர் ஆர்.கணேசனிடம் விசாரித்தோம்.

``வங்கிகளின் விதிமுறைகள், மோசடி நடைபெறாத அளவுக்கு நன்றாகவே இருக்கின்றன. ஆனால், அந்த விதிமுறைகளை எப்படி நடைமுறைப்படுத்துகிறார்கள் என்பதுதான் கவனிக்கத்தக்கது.

Vikatan

பொதுவாக, ஒருவர் வங்கிக்கடன் பெற வருகிறார் என்றால் முதலில் அவரது தொழில்திட்டம் குறித்த விவரங்களை ஆய்வு செய்வார்கள். அடுத்ததாக, அவர் அளிக்கும் ஆணங்களைச் சரிபார்ப்பார்கள். மூன்றாவதாக அந்த வாடிக்கையாளர் குறித்த விவரங்களைப் பார்ப்பார்கள். ஆனால், முதலில் வாடிக்கையாளர் எப்படிப்பட்டவர், அவர் உண்மையில் தொழில் செய்யும் ஆர்வத்தோடுதான் வங்கிக்கடன் பெற விண்ணப்பித்துள்ளாரா என்பதைத் தெரிந்துகொள்வதே முக்கியம். அடுத்ததாக அவர் அளிக்கும் ஆவணங்,கள், தொழில் திட்ட அறிக்கை போன்றவற்றை ஆய்வு செய்ய வேண்டும். இப்படிச்செய்தால் வாடிக்கையாளர் மோசடி செய்வதற்காக வங்கிக்கடன் பெறுகிறாரா என்பதை ஆரம்பத்திலேயே தெரிந்துகொள்ள வாய்ப்புள்ளது.

Bank loan
Bank loan

வாடிக்கையாளர்கள் வங்கிக்கடனைத் திருப்பிச்செலுத்தாததற்கு மோசடித்தனம் மட்டுமே காரணமாக இருப்பதில்லை. அவரால் திறம்பட தொழிலை நடத்த இயலாமல் நஷ்டப்படுவதும் காரணமாகிறது. எனவே, வங்கிக்கடன் கொடுப்பதோடு நிறுத்தாமல் அவ்வப்போது அந்தத் தொழில் நன்முறையில் செயல்படுத்தபடுகிறதா என்று ஆய்வு செய்வதும் அவசியம். வாடிக்கையாளர்களின் வளர்ச்சி எப்படி உள்ளது, வாங்கிய வங்கிக்கடனை முழுமையாகத் தொழிலுக்காகச் செலவழித்துள்ளாரா அல்லது வேறு காரணங்களுக்குப் பயன்படுத்தியுள்ளாரா என்பதையெல்லாம் கண்காணிக்க வேண்டும். அதற்கு தொழில்துறை சார்ந்த அனுபவமுள்ளவர்களை ஆய்வுக்குப் பயன்படுத்த வேண்டும்.

மோசடி செய்பவர்களில், பெரிய தொகையாக இருந்தால் அதற்கு அரசியல் தலையீடு முக்கிய காரணமாக இருக்கிறது. சிறிய அளவிலான மோசடியென்பது அரசாங்கம் விதிக்கும் இலக்குகளை அடைவதற்கான உத்வேகத்தில்கூட நடப்பதற்கு வாய்ப்புள்ளது. வங்கி மேலாளருக்கு அதிக வேலைப்பளு இருப்பதன் காரணமாகவும் வங்கிக்கடன் குறித்து அதிக கவனம் எடுத்துக்கொள்ள இயலாமல்போகிறது.

Banking frauds
Banking frauds

வங்கித்துறையில் முன்பு சீனியாரிட்டி அடிப்படையில் வங்கி மேலாளர் பதவிக்கு வருவதற்கு அதிக காலம் எடுத்தது. அதனால் அவர்களிடம் போதுமான அனுபவம் இருந்தது. தற்போது குறைந்த காலகட்டத்திலேயே சீனியாரிட்டி முறையில் வங்கி மேலாளராக வர வாய்ப்புள்ளது. வங்கிப்பணியை முழுமையாகக் கற்றுக்கொள்வதற்கான கால அவகாசம் இல்லை. அதற்கான பயிற்சிகளும் அளிக்கப்படுவதில்லை. எனவே, அனுபவக்குறைவும்கூட வங்கி மோசடியைத் தடுக்க முடியாததற்குக் காரணமாகிறது. இந்தக் குறைகளையெல்லாம் களையும்போது மோசடிகளைப் பெருமளவு குறைக்க முடியும்" என்றார்.