Published:Updated:

ஆர்.பி.ஐ வழங்கிய கடன் சலுகைகள்..! - பயன்படுத்திக்கொள்ளும் வழிகள்!

ஆர்.பி.ஐ வங்கி
பிரீமியம் ஸ்டோரி
News
ஆர்.பி.ஐ வங்கி

உங்கள் வைப்பு நிதியையோ, அவசரகால நிதியையோ கொண்டு அதிக வட்டி செலுத்தக்கூடிய கடனைச் செலுத்திவிடுங்கள்.

நாடு முழுவதும் கொரோனா வைரஸ் தடுப்பு நடவடிக்கையாக ஏப்ரல் 14-ம் தேதி வரை ஊரடங்கு அமல்படுத்தப்பட்டிருக்கிறது.

இதனால் வேலையிழப்பு, சம்பளக் குறைப்பு, வருமான இழப்பு போன்றவற்றால் பலரும் பாதிப்படைந்திருக்கிறார்கள். இவர்களுக்கு உதவும்விதமாக மத்திய அரசாங்கம் பலவிதமான நடவடிக்கைகளை எடுத்துவருகிறது. வீட்டுக் கடன், தனிநபர் கடன் எனப் பல வகையான கடன்தாரர்களுக்கும் உதவும் வகையில் நமது மத்திய ரிசர்வ் வங்கியும் சில சலுகைகளை அறிவித்திருக்கிறது. இந்தச் சலுகைகளைச் சரியாகப் பயன்படுத்திக்கொள்ளும் வழிமுறைகளை விரிவாகப் பார்ப்போம்.

வீட்டுக் கடன்
வீட்டுக் கடன்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

மூன்று மாதத் தவணைச் சலுகை..!

`வீட்டுக் கடன், தனிநபர் கடன், கார் கடன் எனப் பல வகைகளிலும் கடன் வாங்கியவர்கள் அந்தக் கடன்களுக்கான அசலையும் வட்டியும் செலுத்த முடியாமல் தவிப்பதால், இந்தக் கடன்களுக்கான தவணைத் தொகை (EMI) அடுத்த மூன்று மாதங்களுக்குத் தள்ளிவைக்கப்படும்’ என ரிசர்வ் வங்கி அறிவித்திருக்கிறது. அதாவது, 2020 மார்ச், ஏப்ரல் மற்றும் மே மாதத் தவணைத் தொகையைக் கடன் வாங்கியவர்கள் செலுத்த வேண்டியதில்லை என ரிசர்வ் வங்கி சலுகை தந்திருக்கிறது.

இது அனைத்து பொதுத்துறை வங்கிகள், தனியார் வங்கிகள், கிராமப்புற வங்கிகள், உள்ளூர் வங்கிகள், கூட்டுறவு வங்கிகள், வங்கிசாரா நிதிச் சேவை நிறுவனங்கள், வீட்டு வசதி நிதி நிறுவனங்கள் மற்றும் மைக்ரோ ஃபைனான்ஸ் உட்பட அனைத்துக் கடன் வழங்கும் நிறுவனங்களுக்கும் பொருந்தும்.

கடந்த ஜனவரி மாத நிலவரப்படி, வீட்டுக் கடன் நிலுவை தொகை சுமார் ரூ.13 லட்சம் கோடியாகவும், வாகனக் கடன் நிலுவை தொகை ரூ. 2 லட்சம் கோடியாகவும் இருக்கின்றன.

`மூன்று மாதம் தவணையைத் தள்ளிச் செலுத்துவதால், வாடிக்கையாளர்களின் சிபில் ஸ்கோரில் (CIBIL Score) எந்த மாற்றமும் இருக்காது’ என்றும், `இது வாராக்கடனாக மாறாது’ என்றும் ரிசர்வ் வங்கி தெரிவித்துள்ளது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

வங்கிகளின் தனிப்பட்ட முடிவு

நம் நாடு முழுக்க செயல்படும் வங்கிகள் மற்றும் நிதி நிறுவனங்களைக் கண்காணித்து வழிநடத்தும் ஆர்.பி.ஐ இப்படிப் பல அறிவிப்புகளை வெளியிட்டிருந்தாலும், அறிவிக்கப்பட்ட சலுகைகள நடை முறைக்குக் கொண்டுவரும் முடிவை எடுக்க வேண்டிய பொறுப்பு வங்கிகள் மற்றும் நிதி நிறுவனங்களிடமே விடப்பட்டிருக்கிறது. பொதுவாக, ரிசர்வ் வங்கி வட்டியை உயர்த்தும்போது, அதை உடனடியாக நடைமுறைப்படுத்தும் வங்கிகள் மற்றும் நிதி நிறுவனங்கள், வட்டியைக் குறைக்கும்போது அதைச் செய்வதே இல்லை. வங்கி மற்றும் நிதி நிறுவனங்களின் நடவடிக்கையை ரிசர்வ் வங்கியாலும் பெரிதாகத் தட்டிக்கேட்க முடிவதில்லை. பல்வேறு கடன்களுக்கான தவணைத் தொகை ஒத்திவைப்பு தொடர்பான இந்த நடவடிக்கையும் அப்படி நடக்கத்தான் வாய்ப்பிருக்கிறது.

என்.காமகோடி, மாதவன் வரதராஜன்
என்.காமகோடி, மாதவன் வரதராஜன்

வங்கிகளின் வேறுபாடுகள்!

கடன் தவணை தொடர்பான ரிசர்வ் வங்கியின் அறிவுறுத்தலை ஒவ்வொரு வங்கியும் ஒவ்வொரு விதமாக செயல்படுத்தத் தொடங்கியுள்ளன (பார்க்க, மேலே உள்ள அட்டவணை).

சில வங்கிகள், ‘கடன் தவணையை மூன்று மாதங்களுக்கு நாங்களே பிடிக்க மாட்டோம். இது அனைத்துவிதமான கடன்களுக்கும் பொருந்தும்’ என அறிவித்துள்ளன. இன்னும் சில வங்கிகள், ‘கடன் வாங்கியவர்கள், `கடன் தவணைத் தொகையை மூன்று மாதங்களுக்குப் பிடிக்க வேண்டாம்’ என்று வங்கிகளுக்கு எஸ்.எம்.எஸ் அல்லது மெயில் அனுப்பினால் மட்டுமே அவர்களுக்கான தவணைத் தொகையைப் பிடித்தம் செய்யாமலிருப்போம். அப்படி எந்த வேண்டுகோளும் வாடிக்கையாளர் வசமிருந்து வரவில்லையெனில், அவர்களிடமிருந்து மாதத் தவணை பிடிக்கப்படும்’ என்று சொல்லியிருக்கின்றன.

ஆர்.பி.ஐ வழங்கிய கடன் சலுகைகள்..! - பயன்படுத்திக்கொள்ளும் வழிகள்!

இந்த நடைமுறை வங்கிக்கு வங்கி மாறுபடுவதால், கடன் வாங்கியவர்கள் அவர் களின் வங்கிக் கிளையைத் தொலைபேசி மூலம் தொடர்புகொண்டு, அந்த வங்கி பின்பற்றும் செயல்முறை என்ன என்பதைக் கேட்டறிந்து, அதற்கேற்ப தங்கள் நடவடிக்கையை அமைத்துக்கொள்வது கடன்தாரர்களுக்கு நல்லது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

அசலும் வட்டியும் பிடிக்க மாட்டோம்..!

கடன் தவணை தொடர்பாக ஒவ்வொரு வங்கியும் ஒவ்வொருவிதமாகச் செயல்படும் நிலையில், சிட்டி யூனியன் வங்கி எப்படிச் செயல்படுகிறது என்பதைத் தெரிந்துகொள்ள அந்த வங்கியின் நிர்வாக இயக்குநர் மற்றும் முதன்மைச் செயல் அதிகாரி என்.காமகோடியிடம் பேசினோம்.

ஆர்.பி.ஐ வங்கி
ஆர்.பி.ஐ வங்கி

‘‘அசலையும் வட்டியையும் மூன்று மாதங்களுக்குப் பிடிக்க மாட்டோம். மார்ச் மாதத் தவணையை ஏற்கெனவே செலுத்தியவர்கள் அந்தத் தொகையைத் திருப்பிக் கேட்கும்பட்சத்தில், அவர்களுக்குத் திருப்பியளிக்க நடவடிக்கை எடுத்துவருகிறோம்’’ என்றவர், தொழில் நிறுவனங்களுக்கு அளிக்கப்படும் சலுகைகள் பற்றியும் விளக்கினார்.

“எங்கள் வங்கியில் கடன் வாங்கிய நிறுவனங்கள், தேவைப்பட்டால் ஏற்கெனவே செலுத்திய கடன் தொகையில் 15% தொகையைக் கூடுதல் கடனாக இப்போது வாங்கிக்கொள்ளலாம். மேலும் கடன் தேவைப் பட்டால், மறுசீரமைப்பு செய்துகொள்ளலாம். 2020, பிப்ரவரி 28 அன்று வரை கடன் தொகை பாக்கியில்லாமல் செலுத்தப்பட்டிருந்தால், நிபந்தனைக்கு உட்பட்டு தவணையைக் குறைத்து கடன் காலத்தை அதிகரித்துக்கொள்ள முடியும்’’ என்றார்.  

கடன் தவணையைச் செலுத்தாமல் விட்டால்..?

`கடினமான இந்தக் காலத்தில் ரிசர்வ் வங்கி அளித்திருக்கும் சலுகையைப் பயன்படுத்திக் கொண்டால் என்ன தவறு... பேசாமல் மூன்று மாதங்கள் கழித்து கடன் தவணையைச் செலுத்துவோமே...’ என்ற எண்ணத்தில் நீங்கள் இருந்தால், ஒரு முக்கியமான விஷயத்தைப் புரிந்துகொள்ளவில்லை என்று அர்த்தம். அதாவது, கடன்களுக்கான மாதத் தவணையை மூன்று மாதங்கள் செலுத்தாமல் விடுவதால், தவணைக் காலம் மூன்று மாதங்கள் மட்டுமே அதிகரிக்கும் எனப் பலரும் நினைக்கிறார்கள். இந்த எண்ணம் தவறானது. காரணம், `இந்த மூன்று மாத காலத்துக்குச் செலுத்தப்படாத அசலுக்கு வட்டி கணக்கிடப்பட்டு, அது அசலுடன் சேர்க்கப்படும்’ என ஆர்.பி.ஐ தெரிவித்திருக்கிறது. அந்த வகையில், உருவாகும் இந்த வட்டியால் நமது கடன் தவணைக் காலம் பல மாதங்களுக்கு அதிகரிக்கும் என்பதே அதிர்ச்சியளிக்கும் உண்மை. இதை ஓர் உதாரணம் மூலம் பார்ப்போம்.

மூன்று மாதங்கள் அல்ல...13 மாதங்கள்..!

ஒருவரின் வீட்டுக் கடன் பாக்கி 2020, மார்ச் 1-ல் ரூ.10 லட்சம் இருப்பதாக வைத்துக்கொள்வோம். இவர் கடனை அடைக்க இன்னும் 236 மாதங்கள் இருக்கின்றன. இவரின் மாத இ.எம்.ஐ 9,050. இவரின் இ.எம்.ஐ-யில் வட்டிக்குச் செல்வது ரூ.7,500. மூன்று மாதங்கள் தவணை செலுத்தவில்லையென்றால், மூன்று மாத முடிவில் கடன் பாக்கித் தொகை ரூ.10,15,055-ஆக அதிகரித்துவிடும்.

வங்கி
வங்கி

இந்த மூன்று மாதத் தவணையைச் செலுத்தவில்லையென்றால், 249 மாதங்களுக்கு, அதாவது 13 மாதங்கள் கூடுதலாகக் கட்டித்தான் கடனை முடிக்க வேண்டியிருக்கும். அதாவது, இந்த மூன்று மாதங்களில் சேரும் வட்டி, கடன் காலத்தை 10 மாதங்கள் அதிகரித்துவிடும்.  மாதத் தவணை இப்படி ஒரேயடியாக அதிகரிப்பதைத் தடுக்க ஓர் எளிய வழி உண்டு. மேற்சொன்ன உதாரணத்தில் மூன்று மாதங்களில் சேர்ந்த வட்டி ரூ.15,055 மற்றும் ஜூன் மாதத் தவணை ரூ. 7,500-ஆக மொத்தம் 22,555 ரூபாயை ஜூன் மாதத்தில் செலுத்திவிட்டால், மூன்று மாதங்கள் மட்டுமே தவணைக் காலம் அதிகரிக்கும்.

யார் இந்தச் சலுகையைப் பயன்படுத்திக் கொள்ளலாம்?

கொரோனா வைரஸ் பாதிப்பால், வேலை இழப்பு, சம்பளம் / வருமானம் அதிகமாகக் குறைந்திருக்கிறது போன்ற இக்கட்டான சூழ்நிலையிலிருப்பவர்கள் மட்டுமே இந்த மூன்று மாதத் தவணை ஒத்திவைப்பைப் பயன்படுத்திக் கொள்ள வேண்டும். அவர்களும் மூன்று மாத முடிவில், அந்த மூன்று மாத காலத்தில் சேர்ந்திருக்கும் வட்டியை ஜூன் மாதத் தவணையுடன் செலுத்திவிடுவது நல்லது.

கடனைச் செலுத்துவதே நல்லது!

உங்களால் கடன் தவணையைச் செலுத்த முடியுமென்றால் தாராளமாகக் செலுத்தலாம். `சம்பளம் வரவில்லை’, `தொழில் நடக்கவில்லை’ என்பவர்கள் என்ன செய்வது என்ற கேள்விக்கு பதிலளிக்கிறார் நிதி நிபுணர் மாதவன் வரதராஜன்.

‘‘உங்கள் வைப்பு நிதியையோ, அவசரகால நிதியையோ கொண்டு அதிக வட்டி செலுத்தக்கூடிய கடனைச் செலுத்திவிடுங்கள்.

முக்கியமாக, கிரெடிட் கார்டு கடனைச் செலுத்திவிடுங்கள். அப்படி எதுவும் இல்லையா... உங்கள் பி.எஃப் தொகையில் மூன்று மாதத் தொகையை எடுத்துக்கொள்ளக் கூடிய சலுகையைப் பயன்படுத்தி, கிரெடிட் கார்டு மற்றும் தனிநபர் கடன்களுக்கான இ.எம்.ஐ-யை செலுத்திவிடுங்கள்.

கிரெடிட் கார்டு கடன் என்பது எந்த உத்தரவாதமும் இல்லாமல் (Unsecured) நமக்கு வழங்கப்படும் 50 நாள் கடன் சலுகை. இந்தக் கடனை அந்தக் காலத்துக்குள் திருப்பிச் செலுத்தாதவர்களிடமிருந்து வங்கிகள் சுமார் 24-40% வரை வட்டி வசூலிக்கும். எனவே, மற்ற கடனை தள்ளிவைத்தாலும் கிரெடிட் கார்டு கடனை முதலில் செலுத்திவிட வேண்டியது அவசியம்’’ என்றார்.

எப்படியிருந்தாலும் நீங்கள் வாங்கிய கடனுக்கான தவணையை நீங்கள்தான் செலுத்த வேண்டும். மேலும், வீட்டுக் கடன் போன்ற கடன்களுக்கு வருமான வரிச் சலுகை இருக்கிறது என்பதால், வரிச் சலுகையைப் பெற நிதியாண்டு இறுதியில் உங்களால் மொத்தமாகச் செலுத்துவதில் சிக்கல் வர வாய்ப்புள்ளது. எனவே, இப்போதே கடனுக்கான அசலையும் வட்டியையும் செலுத்திவிடுவது நல்லது!

இந்தக் கடன் தவணை ஒத்திவைப்பு சலுகை என்பது கொரோனா பாதிப்பு காலத்தில் ஊரடங்கு நடைமுறையால் மக்கள் பாதிக்கப்படாமல் இருக்க வேண்டும் என்பதற்காகத்தான். எந்த வகையிலும் இது கடன் தள்ளுபடி அல்ல என்பதைப் புரிந்துகொண்டு நடப்பது புத்திசாலித்தனம்.

கிரெடிட் கார்டு கடன்கள்..!

கிரெடிட் கார்டு
கிரெடிட் கார்டு

`வீட்டுக் கடன், கல்விக் கடன், தனிநபர் கடன், விவசாயக் கடன், வாகனக் கடன், வீட்டு உபயோகப் பொருள்கள் கடன், இதர குறித்தகால கடன்கள் அனைத்துக்கும் சொல்லப்பட்ட மூன்று மாதத் தவணைத் தொகைச் சலுகை பொருந்தும்’ என ஆர்.பி.ஐ ஆரம்பத்தில் அறிவித்தது. இதைத் தொடர்ந்து, `இந்தக் கடன் தவணை நீட்டிப்பு கிரெடிட் கார்டு கடன்களுக்குப் பொருந்தாது’ என்று செய்திகள் வெளிவந்த நிலையில், ஆர்.பி.ஐ அது குறித்து தெளிவுபடுத்தியுள்ளது. அதாவது, `கிரெடிட் கார்டுக்கான நிலுவைத் தொகைக்கும் இந்தச் சலுகை பொருந்தும்’ என அறிவிக்கப்பட்டிருக்கிறது. இதர கடன்களைப்போலவே கிரெடிட் கார்டு கடன்களுக்கு, தவணை நீட்டிப்புக் காலத்தில் வட்டி கணக்கிடப்படும். இந்த வட்டி என்பது மாதத்துக்கு சுமார் 3.5 சதவிகிதமாக இருக்கும். மூன்று மாதம் என்கிறபோது பாக்கியுள்ள தொகைக்கு சுமார் 10% வட்டி போடப்படும். எனவே, முடிந்தவரை கிரெடிட் கார்டு கடனைச் செலுத்திவிடுவது நல்லது. கிரெடிட் கார்டில் மேற்கொண்டு கடன் வாங்காமல் இருப்பது நல்லது.’’

தமிழக அரசின் சலுகைகள்..!

கூட்டுறவுக் கடன், குடிநீர்க் கட்டணம், சொத்து வரி செலுத்த மூன்று மாதம் அவகாசம் அளித்து தமிழக அரசு அறிவிப்பு வெளியிட்டுள்ளது. கூட்டுறவு நிறுவனங்களில் பயிர்க்கடன், வீட்டு வசதி கூட்டுறவுச் சங்கக் கடன், அனைத்து மீனவக் கூட்டுறவு சங்கங்கள் மற்றும் கைத்தறிக் கூட்டுறவுச் சங்கக் கடன், தமிழ்நாடு தொழில் முதலீட்டுக் கழகக் கடன், சிப்காட் கடன், தமிழ்நாடு வீட்டுவசதி வாரியத்துக்கான தவணை போன்றவற்றுக்கு ஜூன் 30 வரை அவகாசம் வழங்கப்படுகிறது.

வாகன லைசென்ஸ் மற்றும் எஃப்.சி புதுப்பிக்கும் அவகாசம், சொத்து வரி, குடிநீர்க் கட்டணம் செலுத்தும் அவகாசம் மூன்று மாதங்களுக்கு நீட்டிக்கப்படுகிறது. `மார்ச், ஏப்ரல் மாத வீட்டு வாடகைத் தொகையை இரண்டு மாதங்கள் கழித்து பெற்றுக்கொள்ள வேண்டும்’ என்று வீட்டு உரிமையாளர்களைத் தமிழக அரசு கேட்டுக்கொண்டிருக்கிறது. `சிறு, குறு மற்றும் நடுத்தரத் தொழில் நிறுவனங்களின் அவசர மூலதனத் தேவைகளுக்குக் கடன் வழங்கப்படும்’ என்று சொல்லப்பட்டிருக்கிறது.