Published:Updated:

ரிசர்வ் வங்கியின் கண்காணிப்பில் கூட்டுறவு வங்கிகள்! - பின்னணி என்ன..?

ரிசர்வ் வங்கியின் 
கண்காணிப்பில் 
கூட்டுறவு வங்கிகள்
பிரீமியம் ஸ்டோரி
ரிசர்வ் வங்கியின் கண்காணிப்பில் கூட்டுறவு வங்கிகள்

தற்போது பெரும்பாலான கூட்டுறவு வங்கிகள் மாநில அரசுகளின் கண்காணிப்பில் இயங்கி வருகின்றன.

ரிசர்வ் வங்கியின் கண்காணிப்பில் கூட்டுறவு வங்கிகள்! - பின்னணி என்ன..?

தற்போது பெரும்பாலான கூட்டுறவு வங்கிகள் மாநில அரசுகளின் கண்காணிப்பில் இயங்கி வருகின்றன.

Published:Updated:
ரிசர்வ் வங்கியின் 
கண்காணிப்பில் 
கூட்டுறவு வங்கிகள்
பிரீமியம் ஸ்டோரி
ரிசர்வ் வங்கியின் கண்காணிப்பில் கூட்டுறவு வங்கிகள்
டந்த 24.6.2020 அன்று இந்திய அரசு, கூட்டுறவு வங்கிகளை ரிசர்வ் வங்கியின் நேரடிக் கண்காணிப்பின்கீழ் கொண்டுவரும் வகையிலான வரலாற்றுச் சிறப்புமிக்க அவசரச் சட்டத்தைப் பிறப்பித்துள்ளது.

இந்த அவசரச் சட்டத்திருத்தத்தின்படி, 1,482 நகரக் கூட்டுறவு வங்கிகளும், 58 மாநிலங்களுக்கிடையேயான கூட்டுறவு வங்கிகளும் இந்திய ரிசர்வ் வங்கியின் நேரடிக் கண்காணிப்பின்கீழ் கொண்டு வரப்படும் எனத் தெரிகிறது. சுமார் ரூ.5 லட்சம் கோடி மதிப்புள்ள சொத்துகளை நிர்வகித்துவரும் 1,540 கூட்டுறவு வங்கிகளை ரிசர்வ் வங்கியின் கண்காணிப்பு வளையத்துக்குள் கொண்டுவரும் அவசரச் சட்டத்தின் பின்னணி என்ன என்று பார்ப்போம்.

ரிசர்வ் வங்கியின் கண்காணிப்பில் கூட்டுறவு வங்கிகள்! - பின்னணி என்ன..?

ஒட்டுமொத்த விகடனுக்கும் ஒரே ஷார்ட்கட்!

வங்கி ஒழுங்குமுறைச் சட்டத் திருத்தம் – 2020

இந்தியாவிலுள்ள வணிக வங்கிகளின் செயல்பாடுகளை ஒழுங்குபடுத்தும் வகையில் நமது நாடாளுமன்றத்தால் ஏற்கெனவே இயற்றப்பட்டுள்ள ‘வங்கி ஒழுங்குமுறைச் சட்டம் - 1949’ புதிய வணிக வங்கிகளுக்கு ஒப்புதல் வழங்குதல், வங்கிகளின் செயல்பாட்டு நெறிமுறைகளை வகுத்தல், அவற்றை மேற்பார்வையிடுதல் உள்ளிட்ட பல்வேறு அதிகாரங்களை இந்திய ரிசர்வ் வங்கிக்கு வழங்கியுள்ளது.

தற்போது வெளியிடப்பட்டுள்ள அவசரச் சட்டம், வங்கி ஒழுங்குமுறைச் சட்டத்தில் 56-ம் (புதிய) பிரிவில் கூட்டுறவு வங்கிகளை உள்ளடக்கி, அவற்றை ரிசர்வ் வங்கியின் நேரடிக் கண்காணிப்பின்கீழ் கொண்டுவந்திருக்கிறது. `வங்கி வைப்புதாரர்களின் பாதுகாப்பை உறுதி செய்வதற்காகவும், புதிய மூலதனம் திரட்டுவதை எளிதாக்கவும் இந்த அவசரச் சட்டம் பிறப்பிக்கப்பட்டுள்ளது’ என மத்திய அரசு சொல்கிறது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

கூட்டுறவு வங்கிகளின் வரலாறு

இன்றைய தேதியில் சாமானியர்களின் வாழ்வுடன் பின்னிப் பிணைந்திருக்கும் கூட்டுறவு இயக்கத்தின் அதிகாரபூர்வ வரலாறு 1904-ல் கூட்டுறவுச் சங்கங்களுக்கான புதிய சட்டத்துடன் தொடங்கியது. பின்னர் இயற்றப்பட்ட இந்திய கூட்டுறவு சங்கங்கள் - 1912 சட்டத்தின்கீழ் பதிவு பெற்ற வங்கிகள், `கூட்டுறவு வங்கிகள்’ என வழங்கப்பட்டன. இந்த வங்கிகளின் செயல்பாடுகள் கூட்டுறவு வங்கி உறுப்பினர்களால் தேர்ந்தெடுக்கப்பட்ட மேலாண்மைக் குழுவினரால் வழிநடத்தப் படுகின்றன. `ஓர் உறுப்பினரிடம் எத்தனை பங்குகள் இருந்தாலும், ஒரு வாக்குக்கு மட்டுமே உரிமை கோர முடியும்’ என்பது கூட்டுறவு ஜனநாயகத்தின் சிறப்பம்சம்.

கண்காணிப்பு கேமரா
கண்காணிப்பு கேமரா

கிராமியப் பகுதிகளிலுள்ள கூட்டுறவு வங்கிகள் பெரும்பாலும் விவசாயம் சார்ந்த துறைகளுக்குக் கடனுதவி செய்யும் அதே வேளையில், நகர்ப்புறங்களில் கூட்டுறவு சங்கங்கள் சிறு, குறு தொழில் நிறுவனங்கள், சுயவேலை வாய்ப்பு, வீட்டு வசதி போன்ற துறைகளில் கடனுதவி செய்துவருகின்றன.

வணிக வங்கிகளைப்போல, கூட்டுறவு வங்கிகள் லாப நோக்கத்துடன் செயல்படுவதில்லை. என்றாலும், தமது உறுப்பினர்களின் நலம் காக்க விழைகின்றன. ரிசர்வ் வங்கியின் வழிகாட்டு நெறிமுறைகள் கூட்டுறவு வங்கிகளுக்கும் பொருந்தும் என்றாலும், அவை ரிசர்வ் வங்கியின் நேரடிக் கண்காணிப்பின்கீழ் வருவதில்லை.

ரிசர்வ் வங்கியின் சிறப்புப் பட்டியலில் இடம்பெற்றுள்ள கூட்டுறவு வங்கிகள் ஏற்கெனவே ரிசர்வ் வங்கியின் கண்காணிப்பு வளையத்தில் இருப்பதுடன், ரிசர்வ் வங்கியிடமிருந்து நேரடிக் கடன் உதவியைப் பெற முடியும். சில கூட்டுறவு வங்கிகள், வணிக வங்கிகளைப்போல ஏராளமான கிளைகளுடன் மாநிலம் தாண்டியும் செயல்படுகின்றன. தனியார்களால் நடத்தப்படும் கூட்டுறவு வங்கிகள் மகாராஷ்டிரா மற்றும் குஜராத்தில் பரவலாகக் காணப் படுகின்றன.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பஞ்சாப் & மகாராஷ்டிரா வங்கி தந்த பாடம்..!

கடந்த சில ஆண்டுகளாகவே ஆங்காங்கே ஒரு சில கூட்டுறவு வங்கிகள் தோல்வியடைந்து வந்தாலும், கடந்த ஆண்டு பஞ்சாப் & மகாராஷ்டிரா கூட்டுறவு வங்கி (பி.எம்.சி) முடக்கப்பட்டது, கூட்டுறவு வங்கிகளின் செயல்பாடு மற்றும் அவற்றின் மீதான கண்காணிப்பு குறித்து ஏராளமான கேள்விகளை எழுப்பியது. அத்துடன் கூட்டுறவுத்துறையைத் தாண்டி ஒட்டுமொத்த வங்கித்துறையிலும்கூட அதிர்வலைகளை ஏற்படுத்தியது.

கண்காணிப்பு கேமரா
கண்காணிப்பு கேமரா

ரூ.11,617 கோடி டெபாசிட் மற்றும் ரூ.8,383 கோடி கடன்கள் எனக் கிட்டத்தட்ட ஒரு சிறிய வணிக வங்கியின் பிசினஸ் அளவைக் கொண்டிருந்த பி.எம்.சி வங்கியின் முடக்கத்தைத் தொடர்ந்து வங்கிக் கணக்கிலுள்ள வைப்புத் தொகை காப்பீடு குறித்து பெருத்த விவாதம் எழுந்தது. கடந்த பிப்ரவரி மாதத்தில் டெபாசிட் காப்பீட்டுத் தொகையை ரூ.1 லட்சத்திலிருந்து ரூ.5 லட்சமாக மத்திய அரசு உயர்த்தியது. ஆனால், பி.எம்.சி வங்கி முடக்கப்பட்டுப் பல மாதங்கள் முடிந்த பின்னரும் அதில் டெபாசிட் செய்திருக்கும் வாடிக்கை யாளர்களின் தடுமாற்றம் தொடர்ந்து கொண்டுதான் இருக்கிறது. அண்மையில், கடந்த ஜூன் 11-ம் தேதி அன்று கான்பூரைத் தலைமையிடமாகக் கொண்ட ‘பியூப்பிள் கோஆபரேட்டிவ் பேங்க்’கை அடுத்த ஆறு மாத காலத்துக்கு ரிசர்வ் வங்கி முடக்கம் செய்வதாக அறிவித்தது.

ரிசர்வ் வங்கி கண்காணிப்பின் சாதகங்கள்..!

இன்றைய தேதியில் பெரும்பாலான கூட்டுறவு வங்கிகள் மாநில அரசுகளின் கண்காணிப்பின் கீழ் இயங்கிவருகின்றன. வங்கி நிர்வாகத்தில் அரசியல் தலையீடு, கண்காணிப்பில் போதிய நிபுணத்துவம் இல்லாதது, வெளிப்படையற்ற தன்மை போன்றவை நீண்டகால நோக்கில் வங்கியின் செயல்பாடுகளை பாதிப்பதுடன், டெபாசிட்தாரர்களின் பாதுகாப்பையும் கேள்விக்குள்ளாக்குகிறது. தனியாரால் நிர்வகிக்கப்படும் கூட்டுறவு வங்கிகளின் நிலையிலும் பெரிய வேறுபாடு இல்லை. புதிய சட்டத் திருத்தத்தின்படி, கூட்டுறவு வங்கிகள் ரிசர்வ் வங்கியின் கண்காணிப்பு வளையத்துக்குள் வரும்போது, கூட்டுறவு வங்கிகளின் மேலாண்மைக் குழுவில் ரிசர்வ் வங்கியின் பிரதிநிதி ஒருவர் இடம்பிடிக்க முடியும். ரிசர்வ் வங்கியின் நேரடிக் கண்காணிப்பு, கூட்டுறவு வங்கிகளின் நம்பகத்தன்மையை அதிகரிப்பதுடன், அவற்றின் விரிவாக்கத்துக்குத் தேவையான மூலதனத்தைத் திரட்டவும் உதவியாக இருக்கும்.

நடைமுறைச் சிக்கல்கள்..!

கூட்டுறவு வங்கிகளை ரிசர்வ் வங்கியின் கண்காணிப்பு வளையத்துக்குள் கொண்டு வருவது மேலோட்டமாகப் பார்த்தால் சிறப்பான முடிவாகத் தோன்றினாலும், இந்த முடிவை முழுமையாகச் செயல்படுத்துவதில் நடைமுறைச் சிக்கல்களைப் பொருளாதார நிபுணர்கள் சுட்டிக்காட்டியுள்ளனர்.

ரிசர்வ் வங்கியின் கண்காணிப்பில் கூட்டுறவு வங்கிகள்! - பின்னணி என்ன..?

`கிட்டத்தட்ட 1,500-க்கும் மேற்பட்ட கூட்டுறவு வங்கிகளை நேரடியாகக் கண்காணிப்பதற்குத் தேவையான அடிப்படைக் கட்டமைப்பு ரிசர்வ் வங்கியிடம் இருக்கிறதா...’ என்ற கேள்வி எழுந்திருக்கிறது. ஏற்கெனவே ரிசர்வ் வங்கியின் நேரடிக் கண்காணிப்பில் வெகு காலமாகவே இருக்கும் வணிக வங்கிகளின் அதிகப்படியான வாராக்கடன் சிக்கலைத் தீர்க்க வேண்டிய கடினமான சூழ்நிலையில், ரிசர்வ் வங்கியின் பணிச்சுமை மேலும் அதிகமாக வாய்ப்புள்ளது.

ஏற்கெனவே சொன்னபடி, கூட்டுறவு வங்கிகள் சாமானியர்களின் வங்கிகளாகத் திகழ்ந்து வருகின்றன. `தம்முடைய இருப்பிடம் சார்ந்த கலாசாரம் பற்றிய சிறப்பான புரிந்துகொள்ளலும், உள்ளூர்வாசிகளுடன் உணர்வுரீதியான தொடர்பும் கொண்டுள்ள கூட்டுறவு வங்கிகள், ரிசர்வ் வங்கியின் நேரடிக் கட்டுப்பாட்டின்கீழ் செல்லும்போது அடித்தள மக்களிடமிருந்து விலகிப்போய்விடும் அபாயங்களும் உள்ளன’ என்கிறார்கள் சில சமூக ஆர்வலர்கள். `மாநில அரசுகளால் வளர்த்தெடுக்கப்பட்டுள்ள கூட்டுறவு வங்கிகள் ரிசர்வ் வங்கியின் கட்டுப்பாட்டின்கீழ் செல்வது மத்திய அரசின் மறைமுகக் கட்டுப்பாட்டுக்கு வழிவகுத்துவிடும்’ என்றும் சிலர் விமர்சிக்கிறார்கள்.

ஆகமொத்தத்தில், ரிசர்வ் வங்கியின் கட்டமைப்பை மேலும் பலப்படுத்துவதுடன், கூட்டுறவு வங்கிகள் தொடர்ந்து உள்ளூர் தேவைகளை உணர்ந்து செயல்படுவதை உறுதி செய்யும்பட்சத்தில், இந்த அவசரச் சட்டத் திருத்தம் கூட்டுறவு வங்கிகளின் செயல்பாட்டை மேலும் மேம்படுத்தும்.

குறிப்பு: இங்கே சொல்லப்பட்டிருக்கும் கருத்துகள் கட்டுரையாளரின் தனிப்பட்ட கருத்துகளே.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism