Published:Updated:

“வாங்க சார்... வணக்கம், ஜீரோ பார்த்துக்கோங்க!” - கைதிகள் நடத்தும் பெட்ரோல் நிலையங்கள்...

ஒட்டுமொத்த விகடனுக்கும் ஒரே ஷார்ட்கட்

Use App
“வாங்க சார்... வணக்கம், ஜீரோ பார்த்துக்கோங்க!” - கைதிகள் நடத்தும் பெட்ரோல் நிலையங்கள்...
“வாங்க சார்... வணக்கம், ஜீரோ பார்த்துக்கோங்க!” - கைதிகள் நடத்தும் பெட்ரோல் நிலையங்கள்...

“வாங்க சார்... வணக்கம், ஜீரோ பார்த்துக்கோங்க!” - கைதிகள் நடத்தும் பெட்ரோல் நிலையங்கள்...

பிரீமியம் ஸ்டோரி

திப்புமிக்க சமுதாய வாழ்வில் சிறைக் கைதிகள் அடியெடுத்துவைக்க, பெட்ரோல் நிலையங்களை அமைத்து நாட்டுக்கே முன்மாதிரியாகத் திகழ்கிறது தமிழக சிறைத்துறை. வேலூர், கோவை, பாளையங்கோட்டை, புதுக்கோட்டை ஆகிய இடங்களில் சிறைக் கைதிகளால் நடத்தப்படும் பெட்ரோல் நிலையங்களை, கடந்த பிப்ரவரி 22-ம் தேதி முதல்வர் எடப்பாடி பழனிசாமி வீடியோ கான்ஃபரன்ஸிங் மூலம் திறந்துவைத்தார். இதற்காக, தமிழகச் சிறைத்துறை, இந்தியன் ஆயில் நிறுவனத்துடன் ஒப்பந்தம் செய்திருக்கிறது.

வேலூரில் திறக்கப்பட்டுள்ள பெட்ரோல் நிலையத்தில், 15 நன்னடத்தைக் கைதிகள் வேலை செய்கிறார்கள். இவர்களைக் கண்காணிக்க 11 சிறை அலுவலர்கள் நியமிக்கப்பட்டுள்ளனர். 24 மணி நேரமும் நிலையம் செயல்படுகிறது. ஒவ்வொருவருக்கும் ஊக்கத்தொகையாக நாளொன்றுக்கு நூறு ரூபாய் வழங்கப்படுகிறது.

கைதிகளின் முகங்களில் மகிழ்ச்சியைக் காண முடிகிறது. நீல நிறச் சீருடை அணிந்து, வாடிக்கையாளர்களிடம் கணிவாகப் பேசி பெட்ரோல், டீசல் போடுகின்றனர், கைதிகள்.

“வாங்க சார்... வணக்கம், ஜீரோ பார்த்துக்கோங்க!” - கைதிகள் நடத்தும் பெட்ரோல் நிலையங்கள்...

அங்கு பெட்ரோல் போடுவதற்கு வந்திருந்த வாகன ஓட்டிகள் நம்மிடம், ‘‘கைதிகளைப்போல் அவர்கள் தெரியவில்லை. இன்முகத்துடன் பழகுகிறார்கள். சமூகத்தில் இவர்கள் கண்டிப்பாக மதிக்கப்படுவார்கள். கைதிகளுக்கு மறுவாழ்வு தந்துள்ள சிறைத்துறைக்கு பாராட்டுகள்’’ என்றனர்.

சிறைத் துறை அதிகாரிகள் நம்மிடம், ‘‘பெட்ரோல் நிலையத்தில் பணிக்கு அமர்த்தியதால், கைதிகள் திறன்மிக்க தொழிலாளர்களாகப் பரிணாமம் பெறுகிறார்கள். சிறைச் சூழலிலிருந்து வெளியே வந்துள்ள அவர்கள், சிறைத்துறை வருவாய் பெருக்கத்துக்காகவும் பங்காற்றுகிறார்கள். எளிதில் தீப்பற்றக்கூடிய பொருள்களைப் பாதுகாப்பாக அதிநவீன தொழில்நுட்பங்களுடன் கையாளும் பயிற்சியையும் பெறுகின்றனர். தண்டனைக் காலத்தில் சம்பாதிக்கிறார்கள். நேர்மையான முறையில் வருவாய் ஈட்டக் கற்றுக்கொள்வதால், இவர்களுக்கு சமூக அங்கீகாரம் கிடைக்கிறது. அடுத்தகட்டமாக பெட்ரோல் நிலையம் அருகிலேயே விரைவில் சிறை பஜார் அமைக்கப்படும். சிறையில் பயிரிடும் காய்கறிகள், பழங்கள், கைதிகள் தயாரிக்கும் காலணிகள் உள்ளிட்ட பொருள்கள் அங்கு விற்பனைக்கு வைக்கப்படும். கைதிகளுக்கு நல்ல எதிர்காலம் அமையும்’’ என்றார்கள்.

“வாங்க சார்... வணக்கம், ஜீரோ பார்த்துக்கோங்க!” - கைதிகள் நடத்தும் பெட்ரோல் நிலையங்கள்...

நுழைவுவாயிலில் செயற்கை நீரூற்றுடன் அசத்துகிறது கோவை காந்திபுரத்தில் உள்ள சிறைத்துறையினரின் பெட்ரோல் பங்க். “நன்னடத்தை அடிப்படையில் இந்தப் பணிக்குக் கைதிகளைத் தேர்வுசெய்துள்ளோம். மொத்தம் மூன்று ஷிப்ட். ஒரு ஷிப்ட்டில் பத்து பேர் பணியில் இருப்பார்கள். பெட்ரோல் போடுவது மட்டும்தான் கைதிகளின் பணி. பணத்தைக் கையாளும் பொறுப்பைச் சிறைத்துறை ஊழியர்களிடமே ஒப்படைத்துள்ளோம். அவர்கள், கைதிகளையும் கண்காணிப்பார்கள். சீருடை அணிந்த காவலர் ஒருவரும் அங்கு பணியில் இருப்பார். அனுபவம் மிக்க ஊழியர்களுக்கு வழங்கப்படும் ஊதியத்தைத்தான் கைதிகளுக்கும் வழங்குகிறோம். சிறையிலிருந்து வெளியில் வரும்போது, இந்த அனுபவத்தை வைத்து அவர்கள் வேறு பணியில் சேர்ந்துகொள்ள இது உதவும்” என்றார் ஒரு சிறைத்துறை அதிகாரி.

இங்கு பெட்ரோல் போட வந்த பாக்கியநாதன், “சிறை கைதிகளை வைத்து பெட்ரோல் பங்க் தொடங்கியிருக்கிறார்கள் என்று தெரியும். ஆனால், அது இந்த பங்க்தான் என்று தெரியாது. மற்ற பெட்ரோல் பங்க்குகளைவிட இங்கு நிறைய வித்தியாசங்கள் தெரிகின்றன. நுழைந்தவுடன், “வாங்க சார்... வணக்கம். ‘பெட்ரோலா... டீசலா? ஜீரோ பார்த்துக்கோங்க’ என்றெல்லாம் சொல்கின்றனர்” என்றார், ஆச்சர்யத்துடன்.

நல்லதோர் ஆரம்பம்!

- பி.ஆண்டனிராஜ்,  இரா.குருபிரசாத், கோ.லேகேஸ்வரன்

படங்கள்: தி.விஜய், எல்.ராஜேந்திரன், ச.வெங்கடேசன்

“வருமானத்தை பிள்ளைங்களுக்கு அனுப்புவேன்!”

திருச்சி மற்றும் புதுக்கோட்டை மாவட்டங்களைச் சேர்ந்த 17 தண்டனைக் கைதிகள் புதுக்கோட்டையில் செயல்படும் பெட்ரோல் பங்க்கில் பணியாற்றுகின்றனர். அங்கு பணியாற்றும் தண்டனைக் கைதி கிறிஸ்துராஜ், “அஞ்சு வருஷத்துக்கு அப்புறம், உலகத்தைப் பாக்குறேன். கடுமையான மனஉளைச்சலில் இருந்த எனக்கு இந்த வேலை ரொம்ப ஆறுதலாக இருக்கு” என்றார்.

“வாங்க சார்... வணக்கம், ஜீரோ பார்த்துக்கோங்க!” - கைதிகள் நடத்தும் பெட்ரோல் நிலையங்கள்...

தண்டனைக் கைதி முருகன், “இப்போ, என் அஞ்சு பிள்ளைங்களும் அல்லாடிக்கிட்டு இருக்குங்க. இந்த வேலையில கிடைக்கிற வருமானத்தைப் பிள்ளைங்களுக்கு அனுப்பப்போறேன்” என்றார்.

சிறைத்துறை தலைமைக் காவலர் வேலவன், “இங்கு பணியாற்றும் 17 கைதிகளும் நன்னடத்தை மற்றும் வழக்குகளின் நிலையைப் பொறுத்து, சிறைத்துறை அதிகாரிகளால் தேர்ந்தெடுக்கப்பட்டவர்கள். அவர்களை நாங்கள் கண்காணிக்கிறோம். நன்றாக வேலை செய்கிறார்கள். இந்த வேலையால், அவர்களுக்கு நல்ல அனுபவமும், வருமானமும் கிடைக்கும்” என்றார்.

- இரா.மணிமாறன்

படம்: ஆர்.வெங்கடேஷ்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு