Published:Updated:

வடக்கு வாழ்கிறது... தெற்கு தேய்கிறது - மத்திய அரசுப் பணி நியமனங்கள் சர்ச்சை...

வடக்கு வாழ்கிறது... தெற்கு தேய்கிறது - மத்திய அரசுப் பணி நியமனங்கள் சர்ச்சை...
பிரீமியம் ஸ்டோரி
வடக்கு வாழ்கிறது... தெற்கு தேய்கிறது - மத்திய அரசுப் பணி நியமனங்கள் சர்ச்சை...

- விஷ்ணுபிரசாத்

வடக்கு வாழ்கிறது... தெற்கு தேய்கிறது - மத்திய அரசுப் பணி நியமனங்கள் சர்ச்சை...

- விஷ்ணுபிரசாத்

Published:Updated:
வடக்கு வாழ்கிறது... தெற்கு தேய்கிறது - மத்திய அரசுப் பணி நியமனங்கள் சர்ச்சை...
பிரீமியம் ஸ்டோரி
வடக்கு வாழ்கிறது... தெற்கு தேய்கிறது - மத்திய அரசுப் பணி நியமனங்கள் சர்ச்சை...

மீபகாலமாக தமிழகத்திலிருந்து மத்திய அரசுப் பணிகளுக்குச் செல்பவர்களின் எண்ணிக்கை குறைந்து கொண்டேவருகிறது. சமீபத்தில், தென்னக ரயில்வேயில் 1,765 பணியிடங்களுக்கு நடத்தப்பட்ட தேர்வில்  1,600 பேர் வடமாநிலத்தைச் சேர்ந்தவர்களே தேர்வாகியுள்ளது அதிர்ச்சியை ஏற்படுத்தியுள்ளது. தவிர, தமிழகத்தில் உள்ள வருமான வரித்துறை அலுவலகங்களில் கடந்த 12 ஆண்டுகளில், பத்து விழுக்காட்டினர்கூட தமிழகத்தைச் சேர்ந்தவர்கள், பணிக்கு அமர்த்தப்படவில்லை.

இதுகுறித்து வருமான வரித்துறை ஊழியர்கள் சங்கப் பொதுச்செயலாளர் எம்.எஸ்.வெங்கடேசன் பேசுகையில், “தமிழகத்தில் வருமான வரித்துறை, கலால் துறை, பாஸ்போர்ட் அலுவலகம் என்று மத்திய அரசின் 55 வகையான அலுவலகங்கள் இருக்கின்றன. இந்த அலுவலகங் களில் குரூப் ‘சி’ பிரிவுக்கான பணியாளர்கள், மத்தியப் பணியாளர் தேர்வாணையம் மூலம் தேர்வு செய்யப்படுகின்றனர். இதன்படி இந்தத் தேர்வு 1996-ம் ஆண்டுவரை மண்டல அளவில் நடந்தது. இதனால், அந்தந்தப் பகுதியைச் சேர்ந்தவர்களுக்கு, அவர்கள் பகுதியிலேயே வேலை கிடைத்தது. ஆனால், இந்தத் தேர்வு முறைக்கு எதிராக குஜராத்தைச் சேர்ந்த ஒருவர் வழக்கு தொடுத்ததால், ‘இந்தியா முழுமைக்கும் ஒரே ரேங்க் சிஸ்டத்தைத்தான் பின்பற்றவேண்டும்’ என்று நீதிமன்றம் தீர்ப்பு வழங்கியது.

வடக்கு வாழ்கிறது... தெற்கு தேய்கிறது - மத்திய அரசுப் பணி நியமனங்கள் சர்ச்சை...

அதனைத் தொடர்ந்து, 1996-லிருந்து 2006 வரை எந்த மத்திய அரசுப் பணிகளுக்கும் ஆட்களை எடுக்கவில்லை. 2006-க்குப் பிறகு நடத்தப்பட்ட மத்திய அரசுத் தேர்வுகள் அனைத்தும், ‘ஒரே ரேங்க் சிஸ்டம்’ என்று நீதிமன்றம் வழங்கிய தீர்ப்பின் அடிப்படையிலே நடைபெறுகின்றன. அதேபோல் தேர்வுகளும் இந்தி, ஆங்கிலத்தில் மட்டுமே நடத்தப்படுகின்றன. இதனால், தமிழக இளைஞர்களால் பெரியளவில் தேர்ச்சிபெற முடியவில்லை.

வருமான வரித்துறையில் 2007-ம் ஆண்டுக்குப் பிறகு  பணிக்கு அமர்த்தப்பட்டவர்களில் 90 விழுக்காட்டினர் வடமாநிலங்களைச் சேர்ந்தவர்கள். அதுவும் கடந்த சில ஆண்டுகளாக தமிழகத்தைச் சேர்ந்தவர்கள் பணிக்குச் சேர்வது 10 விழுக்காட்டைக்கூட எட்டவில்லை. கடந்த 2018-ம் ஆண்டு வருமான வரித்துறையில் பணிக்கு அமர்த்தப்பட்ட 100 ஆய்வாளர்களில் 99 பேர் வடமாநிலங்களைச் சேர்ந்தவர்கள்; டேக்ஸ் அசிஸ்டன்ட் பணியில் அமர்த்தப்பட்ட 265 பேர்களில் வெறும் ஐந்து பேர்தான் தமிழகத்தைச் சேர்ந்தவர்கள்.

வருமான வரித்துறை மாதிரியான பணிகள் மக்களுடன் நேரடி தொடர்புடையவை. ஆனால், வடமாநிலங்களிலிருந்து இங்கு வேலைக்கு வருபவர்களுக்கு, மொழி தெரியாததால் மக்களும் அதிகாரிகளிடம் தொடர்புகொள்ள முடிவதில்லை. வடமாநிலத்தவர் இங்கு வரக் கூடாது; இங்கிருப்பவர் வட மாநிலம் செல்லக்கூ டாது என்ற எண்ணம் எல்லாம் நமக்குக் கிடையாது. ஆனால், இந்த நடைமுறை சமத்து வமற்ற சூழலையும், பணிசார்ந்த சிக்கல்களையும் உருவாக்கி உள்ளது. தவிர, இங்குள்ள இளைஞர் களின் வேலைவாய்ப்பையும் நாம் கவனத்தில்  கொள்ள வேண்டும்” என்றவர் தேர்வு தொடர்பாக சில சந்தேகங்களையும் எழுப்பினார்.

“இந்தத் தேர்வு முறைகளில் முறைகேடுகளும் நீடிப்பதாகச் சந்தேகங்கள் எழுகின்றன. பாட்னாவில் ஒரே தெருவிலிருந்து 15 பேர் தேர்வாகி இருக்கின்றனர். வடமாநிலத்தைச் சேர்ந்த ஒருவர், தமிழ் பாடத்தில் முதல் மதிப்பெண் எடுத்துள்ளார். சமீபத்தில் நடந்த ரயில்வே பணித் தேர்வுகளிலும் வடமாநிலத்தைச் சேர்ந்தவர்கள் பலரும் தமிழ்ப் பாடத்தில் அதிக மதிப்பெண்கள் எடுத்துள்ளனர். எனவே, கேள்வித்தாள்களை அந்தந்தப் பிராந்திய மொழிகளில் தயார் செய்ய வேண்டும்” என்றார்.

அடுத்து ரயில்வே துறை பிரச்னை... ரயில்வே துறை இந்தியா முழுவதும் 16 மண்டலங்களாகச் செயல்பட்டு வந்தாலும் தென்னக ரயில்வேயின் பணியாளர்களில் பீகாரைச் சேர்ந்தவர்களே அதிகளவில் உள்ளனர். இதனால், ‘தென்னக ரயில்வேயின் தலைமையகம் பீகாரா?’ என்கிற விமர்சனம் தமிழக அதிகாரிகள் மத்தியில் சர்வசாதாரணமாக எழுப்பப்படுகிறது.

இதுகுறித்து எஸ்.ஆர்.எம்.யு தலைவர் ராஜா ஸ்ரீதரிடம் பேசினோம். “கடந்த 2010-ம் ஆண்டிலிருந்து 2019 வரை தென்னக ரயில்வே பணியிடங்களில் மட்டும் பீகார் மாநிலத்தவர்களே 18 விழுக்காடு சேர்ந்துள்ளனர். சமீபத்தில் நடந்த ரயில்வே தேர்வுகளிலும், கிட்டத்தட்ட 90 விழுக்காடு அவர்கள்தான் தேர்வாகியிருக்கிறார்கள். அதேசமயம் நாம் இன்னொன்றையும் உணர வேண்டும்... வடமாநிலங்களில் மத்திய அரசுப் பணிகளுக்கான போட்டித் தேர்வு வகுப்புகள் அதிகமாக நடக்கின்றன. அங்குள்ள மாணவர்கள் பள்ளியைவிட்டு வெளியேறும்போதே இது மாதிரியான பணிக்குச் செல்ல வேண்டும் என்ற எண்ணத்துடன் படிக்கின்றனர். ஆனால், தேசிய அளவில், மத்திய அரசின் தேர்வுகளில் தமிழகத்தைச் சேர்ந்தவர்களின் பங்கெடுப்பு குறைவாக உள்ளது. இந்தப் பிரச்னைகளுக்குத் தீர்வுகாணவேண்டும் என்றால் பிற மாநிலங்களில் உள்ளதுபோல் குறிப்பிட்ட விழுக்காடுப் பணியிடங்களை, தமிழகத்தைச் சேர்ந்தவர்களுக்கே ஒதுக்க வேண்டும் என்று அரசாணை இயற்றலாம்” என்றார்.

யு.பி.எஸ்.சி தேர்வுகளுக்காகப் படித்துவரும் மாணவர்களிடம் பேசியபோது, “மத்திய அரசுப் பணிகளுக்கான வேலைவாய்ப்பில் இடஒதுக்கீட்டைப் பயன்படுத்தும்போது ‘கிரிமிலேயர்’ தடையாக உள்ளது. எனவே, பிற்படுத்தப்பட்ட சமூகத்தைச் சேர்ந்தவர்கள், இடஒதுக்கீட்டைப் பயன்படுத்த முடியாமல் போகிறது. இது, தமிழக மாணவர்களின் மத்திய அரசுப் பணிகள் தொடர்பான வெற்றியைப் பாதிக்கிறது” என்றார்கள்.

‘வடக்கு வாழ்கிறது; தெற்கு தேய்கிறது’ என்பார் அண்ணா. அவர் மறைந்து ஐம்பது ஆண்டுகளுக்குப் பின்பும் நிலைமை மாறவில்லை. தேர்தல் பரபரப்பில் இருக்கும் அரசியல் கட்சிகள் இதையும் கவனத்தில் கொள்ளவேண்டும்.

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism